Thaum poob kev txhaum lossis ntog, peb xav khiav nkaum Vajtswv. Peb ntshai tsam Vajtswv tus duab ci pom kev dawbhuv ntawd yuav muab tej qhov tawg, txhua qhov tsis zoo thiab qaug zog uas ntev loo los no peb muab zais cia nthuav tawm. Tiamsis phooj ywg, qhov chaw tsaus ntuj ti ti ntawd tsis tau muaj ib zaum twg yuav yog qhov chaw ua rau muaj kev kho zoo. Tib qhov uas yuav ua rau kom peb rov qab tau kho nyob hauv Vajtswv txhais taw – tus uas zam txim thiab txais tos txhua tus uas mus nyob ze Nws. Tej zaum ntawd yuav yog yam uas hnub ua kevcai tshuab raj (Rosh Hashanah_ ntuas peb txhua tus: yuav tau tig rov qab los cuag Vajtswv.

Hnub no, yog hnub 12/09/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm TIG ROV LOS CUAG VAJTSWV

“Nej cia li los nyob ze Vajtswv, Vajtswv thiaj yuav los nyob ze nej” (Yakaunpaus 4:8a).

Ntawm no yog ib nyob hauv tej nqe Vajluskub uas kuv xav. Txhua zaus ntsib cov lus no, kuv rov qab tau ntuas txog qhov tseem ceeb ntawm txoj kev tau mus nyob ze Vajtswv thiab tuav txoj kev sib raug zoo ua ke nrog Vajtswv. Feem txuas ntxiv ntawm nqe Vajluskub kuj ua rau peb pom Vajtswv yog tus uas peb yuav tau khiav mus rau ntawm Nws hauv lub neej thaum uas tseem tshuav tej kev txhaum tsis tau lees tawm. Vajtswv xav kom tau nrog peb nyob ua ke, tsis yog thaum tau zoo xwb, tiamsis txawm yog thaum uas peb sib mos nrog kev txhaum lossis tej kev txomnyem, tag kev cia siab hauv lub neej. Txawm yog peb mus cuag nws los ntawm yam dabtsi los, Vajtswv yeej xyab tes txais tos peb.

Rosh Hashanah yog thawj hnub ntawm xyoo tshiab raws li cov neeg Yudais lub caijnyoog, thiab kuj yog lub sijhawm cov neeg Yudais yuav tau xav, zoo siab thiab tig lub siab mus rau ntawm tej kev cia siab dawbhuv. Qhib tshiab lub koob tsheej no los ntawm tshuab raj shofar, zoo li ib lo lus nqua hu Vajtswv cov neeg yuav tau tsim dheev tawm hauv txoj kev pw tsaug zog sab ntsujplig, npaj nkag mus rau hauv Kaum hnub ua kev cai lees txim thiab tig mus rau hnub ua kevcai theej txhoj (Yom Kippur). Yog li, Rosh Hashanah tseem muab hu ua hnub tshuab raj (saib Teev Npe 29:1). Ntawm no yog lub sijhawm tseg rau peb txhua tus nyias yuav rov qab los tshuaj nyias lub neej, lees txim rau Vajtswv thiab npaj lub siab tos hnub uas ua kevcai theej txhoj.

Koj puas tau muaj zaug twg ntsib dhau ib qhov kev ceeb toom lawm tau? Puas muaj zaum twg Vajtswv qhib koj qhov muag kom koj pom tias muaj ib yam uas koj tab tom ua yog tab tom rhuav tshem yus tus kheej, ua rau lwm tus muaj kev tu siab lossis ua rau koj txav deb Vajtswv? Ntawd yog txoj kev uas kuv xav txog lub suab raj shofar – yog lub suab raj ua kom peb tsim dheev hauv txoj kev tsaug zog ntawm sab ntsujplig, pab peb pom tias yus tau mus yuam kev deb ntawm Vajtswv thiab nqua hu peb tig rov qab los rau hauv txoj kev hlub ntawm lub siab hlub tshua. Phau Xakhaliyas 1:3 sau tias:

“Tiamsis nimno kuv hais rau nej tias, ‘Nej cia li rov los cuag kuv, thiab kuv yuav rov los cuag nej”

Kuj zoo li Yakaunpaus 4:8 txhawb kom peb mus nyob ze Vajluskub, Xakhaliyas 1:3 kuj hu kom peb tig rov qab los cuag Vajtswv. Thaum peb ua txhaum lossis yuam kev, peb pheej nrhiav kev khiav nkaum Vajtswv, txawm yog yeej tsis muaj leej twg yuav nkaum tau Vajtswv txoj kev tshwm ntsej muag. Thaum muaj kev tu siab lossis tag kev cia siab vim tej kev hloov pauv nyob hauv lub neej, muaj ntau tus tig rov qab los yws lossis txav deb Vajtswv zuj zus. Yooj yim rau peb txav deb Vajtswv thaum uas peb lub siab puv npo kev txaj muag, nyuaj siab, npau taws, muaj kev tu siab lossis tag kev cia siab. tiamsis, nyob rau tej lub sijhawm li ntawd, peb ho yuav tau mus nyob ze Vajtswv dua. Vim nyob hauv Vajtswv txoj kev tshwm ntsej muag, peb thiaj nrhiav tau lub zog tshiab, kev kaj siab thiab tau so kom tiv dhau tej ntu sim siab hauv lub neej.

Ib sab ntawm lub ntsiab yuav tau xav thiab lees txim. Rosh Hashanah tseem yog lub sijhawm tseg rau cov neeg Yudais lawv zoo siab txais xyoo tshiab hauv txoj kev cia siab txog Vajtswv txoj kev ncaj ncees. Txoj kev ib leeg foom ib lo lus zoo rau ib leeg nrog txoj kev noj mov ua rau peb nco txog Vajtswv tej lus cog tseg zoo. Peb muaj cuab kav ruaj siab vim paub tias Vajtswv yog tus zoo thiab yog tus ncaj ncees. Nws yog tus kav ib puas tsav yam, thiab lub homphiaj yuav tau ua tiav, siab tshaj tej uas peb ntsib dhau lossis yuav ntsib tom ntej. Thaum nrog Vajtswv mus ua ke, peb muaj cuab kav saj tau Vajtswv txoj kev hlub thiab ua neej hauv txoj kev cia siab, txawm yog nyob hauv tej kev sim siab. ntawd kuj yog ib zaj kawm zoo thaum ua lub koob tsheej Rosh Hashanah los ceeb toom peb.

Thov caw nrog kuv peb thov Vajtswv ua ke: Tus Tswv, kuv ua koj tsaug txawm yog kuv qaug zog thiab muaj ntau zaug kuv ntog los, txawm yog kuv siv zog khiav nkaum vim txaj muag thiab ntshai los, koj yeej ua siab ntev tos kuv rov qab los. Thov coj kuv mus nyob ze koj txhua hnub. Thov pub kom kuv saj tau txoj kev kaj siab hauv Vajtswv txoj kev tshwm ntsej muag, kom kuv paub tias yeej tsis muaj ib qhov kev txhaum twg loj dua Vajtswv txoj kev hlub, thiab yeej tsis muaj ib yam dabtsi yuav tav tau Vajtswv txoj kev hlub tseg rau peb. Thov pub kom kuv muaj lub siab tawv los mus nyob ze koj, ntseeg koj thiab ncaj ncees nrog koj mus ua ke txhua hnub. Kuv thov hauv Tswv Yexus Khetos lub npe, Amees.

Cov kwv tij tsis paub tias hnub no koj ntsib dhau yam dabtsi thiab tab tom ntsib yam daabtsi, tiamsis cia siab tias koj yuav xaiv nyob ze Vajtswv. Thov kom koj nco ntsoov Vajtswv tej lus cog tseg, yim saj tau Vajtswv tob thiab ruaj siab rau Vajtswv txoj kev ncaj ncees txog Vajtswv lub homphiaj zoo tseg rau yus lub neej. Thov Vajtswv pub lub zog rau koj tso tej uas ua rau koj tu siab tseg lossis rub koj nrug deb Vajtswv tseg, pab kom koj mus nrog txoj kev cia siab thiab Vajtswv tej lus cog tseg zoo. Thov Vajtswv pab kom koj muaj ib hnub tshiab, puv npo koob hmoov.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.