Digul ală b bòn dơng ryũ ryơm, kòn mơnus găm iang bơt mò ală gơlăng jơnhoa, sền gơ la têl sơnĩo gơnoăr pran, passơm mơ bơta pơnhừ să dunnia dê. Bol he don lah ală hiu mơ los mơ xi măng hỡ la ò rgơi bư tus. mơya , yal yau neh lơi wơl oă bơta bơtê jê sồt lah: ò dô nơm phăn bơt mon lơi kòn mơnus dê tơl pran tơmdră diđap bơta brồ lơh nus gơjrãn dơng mơ bơta bơcah lề đah hwêng dê. Tòm tũ ală bơta bol he neh dòn la “sum sum” rgơi lơnggơh tòm dô sơmbrih mat, nus bol he nisơna gơs dô nơm sèng lup: Nting đah la thèng kỡ cê ò tũ lơi tơrlah tơrlơm ai hwêng soan bol he in?

Ngai do, ngai 11/9/2026, Bơta Hôi Dăn Kơp Ngai dăn jà ală ồng mò oh mi bơtê bal jơnau Yang kơnơm dê bơta dong kơl Dianne dê bơh tơnggumê THENG KƠ̆ CÊ.

“Sơnđan Yàng Jehôwa ngan la dô nơm theng kơ̆ cê; Cau song ring ntoat tus tềng hơ̆, geh lơngap lơngai.” (Jơnau Pơnđik 18:10)

Tom ngai 11 kơnhai 9 sơnăm 2001, tơlak tơman cau sền diđap mpan sơnĩo rùp tom lam lơgăr dunnia neh ai lơh nrơt nrơl sền gõ dô nơm rup rngòt rngơt. Ală rơndeh păr kă brô kol ală cau phà hơđăng pah gời kơryăn, neh gơtơm tòm hiu jơnhoa bar nơm tòm tiah Klõ Kă Brô Dunnia dê tòm New York mơ Hiu Prăm Mum rềp Washington, D.C. Jêsồt ngăn, pơgăp 2.800 nă cau neh chơt tòm bơta sơrbơng roh bơh Osama Bin Laden bal mơ mpôl rơndăp lơh sơlung sơlăng Qaeda lăm bồ.
Tũ hỡ, ală cau ăt bồ bơh oă lơgar neh sơrbac sơrbăng pơyoa jơnau tơmpà bơta moat jrung mơ ai jơnau kỡn dong kơl lơgar Mỹ. Mơya, ai lơh krơi ngăn ming tom nđờ jơ tơnỡ, ală phăn pơnđang rup ai pơnđăng wơl rup dô ết nă cau Palestine driau dơng diđap bơta “công nha” bơta lơh sơlung sơlăng dê. Tòm ală jơnau đơs tòm ală mpan sơnio dê tòm Trung Quốc, kung neh gơs ò dô ết jơnau dô nus, sên bơta do la dô bơta lơh pran tòm bơta “pơnhư să Mỹ dê.”. Oă cau tòm ală lơgar ndai kung ai lơh gơs nùs nđac tus di ală cau lơh bơta sơlung sơlăng ala mơ gơs nus nđac gơ wet mơ ală cau kong jêsồt. Gơwet mơ oă cau lang bol Mỹ dê, dô ò di ming là bơta ai lơh nrơt nrơl diđap bơta lơh sơlung sơlăng bèng bơta gơjrãn. Bol khai kung ai lơh nrơt nrơl tòm tũ đăl git nhar bơta gơjrãn dô pơnah dunnia dê gơwet mơ bon lơgar he.

Tòm tũ đơs tus bơta gơlik gơs hỡ, bol he pal cang kah lah Yàng Tòm Trồ kung găm ăt bồ hơđăng ală phan. Bulah behỡ, Sră Goh kung ai tơnggit: “ jơh dunnia ơm hơđơm gơnoar cà ràk.” (I Jang 5:19). Tai bơh hỡ, tũ kòn mơnus pơndăng săng Yang Tòm Trồ mơ kis jat nus is he, bol khai buôn ngăn gơlik gơs phăn ngui nàng cau iơh ngui. Satan ai lơh chò hòp ò git nđờ tũ sih bơta iơh, lơh gơbrồ dơng nùs gơjrãn lơh ală cau lòt tis nrah in rcăng sir phi să nàng tơm gơl bơta kis he nang mìng lơh tơn roh tơlak tơman cau ò tis glài – ală cau ming jơh nus lơh broă kơp ngai bol khai dê.

La kon sau Yang, gơs dỡ bol he hũi lah Satan gơjrãn bol he ò git nđò. Bơh ò rgơi sơmbat at geh hwềng soan ală cau gơri mơ yang, gơ tơryang joi gung dà nàng tơnroh rai kis bol he mơ ală gùng ndơp ndơr ngăn , ndrơm be gùng dô năn cau lơh sơlung sơlăng dê.

Đơs ngăn, ală cau phà hơđăng pah gợi tòm bơta gơlik gơs 11/9 neh geh bơtô tòm ală klơng hao rơndeh păr tòm Mỹ. Blai soh ngăn, bol khai neh ngui alaư bơta jak chai mơ chai rgơi hỡ nàng lơh bơta brồ lơh să tơm lơgăr Mỹ! Satan kung ơs ngui gùng tơmlơh ndrơm behỡ. Gơ ngui ală nđac, chai rgơi mơ ryas pran mơ Yang Tòm Trồ ai pà nàng ơnniai bol he ngui gơ jat gùng tis mơ nus kỡn Kơnrãn dê.

Ală cau lơh sơlung sơlăng sùm joi gùng mut tòm mpôl mơ bol gơs wet tus . Satan kung ò dơh joi gùng dà mut tòm Hiu Jum Goh, tòm hiu nhă mơ tòm bồ dơngoh bol he, sih bơta pin wil wơl, gơtomcah mơ blac pơlôm.

Mơya ala mơ kis tòm rngot rngơt, bol he kah tẽ lah Bơtau Krist la theng kỡ cê bol he dê. Tòm Kơnrãn, bol he gơs dô nơm tiah king crũ mơ ò gơs gơnoăr pran lơi rgơi tòmgơl. Bulah dunnia găm bềng bơta iơh, mơya tũ bol he lơi Yang Dong Jêsus lơh cau tơm nus nhơm mơ hwềng nus he, gen ală kai gơrmỡi cau iơh dê lôi dut rơp ò rgơi lơh alah bol he. Bơh tòm Bơtau Krist, bol he la ală cau phalin rlau bar dỡ.

Dan jà bol he dô nùs bal tòm bơta hòi dan: Khoai Yang Dong Jesus, Bơtau Don Song mơ la Tiah King Crux kòn dê. Digul dô nơm dunnia bềng ală bơta gơlik gơs mơ nus gơjrãn, kòn dơp git lah bờ dơ ngoh he kung la dô bơta tơmlơh. Dăn toh glai bơh ală dỡ kòn lơi bơta cah is mơ blac pơrlôm mut tòm nus, lơh jê sồt bơta gơtơmklac digul kòn mơ Kơnrãn. Dan mham kas mang Yang dê lơh goh kòn mơ prăp gar bồ dơngoh kòn tòm bơta ring lơngai Kơnrãn dê. Bulah cal rbut đah bơdih nê găm nggà driau, kơp kỡn kom ntao kỡ bơh git lah he găm king crũ tòm Yang. Kon jơh nus hôi dăn tòm sơnđăn Yang Jêsu Krist, Amen.

Ơ ală ồng mò oh mi kòñ gơboh, dunnia do rơp găm ală ngai cal rbut, mơ bol he ò rgơi tơm gơl bơta hỡ. Mơya bol he sùm rgơi sac tiah he in king crũ. Bãn lơi bơta cah is deh tai bơta pha is, kung bãn ai gơnoăr bơta gơjrãn lơh ngềt bơta kỡn gơboh tòm nus he. Bãn ai cà rak gơs dô nơm tũ lơmpah lơi. Dăn tẽ mơ Yang bơtô bol he sơmbat rias jrô tòm jơnau Kơnrãn dê, nàng gơlik gơs cau kong sôr cèng bơta ring lơngai digul dunnia oă bơta ò ring lơngai. Bơh tiah ring lơngai rlau jơh ò di la kơp theng lơi mơ kòn mơớn bơtao gơs, mơ la tòm să tòm Yang Dong Jêsus. Cau lơi king crũ tòm Kơnrãn rơp jôi ban bơta ring lơngai mơ ò gơs bơta gơlik gơs tơmgơl lơi dunnia dê rgơi tơmpit ai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.