Tom tŭ tìs glài hala gơpừ, bol he òs kòñ dupleh bơh Yàng Tom Trồ. Bol he rngòt lah bơta àng bơta sàng-goh Kơnràñ dê rơp pơnđàng jơh ală tềl bơcah, jơh ală bơta lơbơn-lơñọ mơ oă tơngai he pơnđơl pun-ndơp. Mơ ya ơ oh mi, tiah hăt-hal klam-jơngọ hơ̆ òhềt tŭ lơi la tiah cèng wơl bơta sơmbòi. Tiah rgơi bơtào tơngguh wơl bol he hơ̆ la hơđơm jơng Yàng- Bơtau sùm toh-glài mơ wă-rò ală cau lơi tùs rềp mơ Kơnràñ. Digơlan hơ̆ kung la bơta mơ ngai Pơjum Uh Kơlwòc (Rosh Hashanah) tơngkah kờp nă bol he: rê wơl tĕ mơ Yàng Tom Trồ.

Ngai do, ngai 12/09/2026, Bơta Hòi Dan Kờp Ngai dan jà jơh ală cau iat kơlôi sơnơng bal Jơnau Yàng kơnòm di bơta dong kơl Jessica Teed bơh tơnggume RÊ WƠL MƠ YÀNG.

“Tus tĕ rềp mơ Yàng Tom Trồ gen Kơnràñ rơp tus rềp mơ oh mi.” (Jakơ 4:8a)

Do la dùl tom ală sèng Sră Goh mơ añ sùm kòñ ngan. Kờp dơ̆ sền gŏ jơnau hơ̆, añ geh tơngkah wơl bơh bơta dờng màng broă lòt tus rềp mơ Yàng Tom Trồ mơ prap sùm bơta gơtomklac đềt mềr mơ Kơnràñ. Pơnah pơnjat tai sèng Sră Goh dê kung ai git să-tòm Kơnràñ la Bơtau bol he pal ntoàt tus tom tŭ rài kis gam oă tồi-glài ò hềt geh yal tơlik. Yàng Tom Trồ jê-gloh tơhir geh ơm bal mơ bol he, ò di mìng tom tŭ jơh ală bơta geh lơngap-lơngai, mơ ya tom tŭ bol he gam tomlơh mơ tồi-glài hala ală bơta bol glar, roh gơn kơnòm tom rài kis. Bulah bol he tus mơ Kơnràñ tài bơh tơnggu lơi, Kơnràñ gam sùm kơp gơn bal mơ tơwòr tê pò ơnàng.
Rosh Hashanah la ngai sơnròp năm pa jat bè ngai kơnhai cau Juđa dê, kung la tŭ nàng cau Juđa kơlôi sơnơng, hòn-chò mơ wèt nùs hơ bơta gơn kơnòm màng ryŭ. Bơta pơjum sơntòm mơ jơnau uh kơlwòc Shofar, be dô jơnau hòi jà lang bol Yàng Tom Trồ kah rngal bơh bơta gơdan bĭc-lơhă đah hwềng, rcang sir cơnđoà mut tom Jơt Ngai Gơjràñ Sang-glài mơ wèt tus Ngai Tơwài-Glài (Yom Kippur). Behơ̆, Rosh Hashanah kung geh sơnđan la Pơjum Uh Kơlwòc (Khà Lang Bol 29:1). Do la pah tơngai nàng kờp nă cau sền sơwì wơl rài kis he, gơjràñ săng-glài di đap Yàng Tom Trồ mơ rcang sir nùs nhơm di đap Ngai Tơwài-Glài.

Gơs tŭ lơi oh mi neh lòt gan dô bơta tơngkah pal kah rngal sơl? Gơs tŭ lơi Yàng Tom Trồ pò mat ai oh mi in đal git lah gơs dô bơta oh mi gam lơh phà tơrlah să-tòm he, lơh jê-sồt cau ndai hala lơh oh mi ngài bơh Kơnràñ sơl? Hơ̆ la gùng añ kơlôi bơh ntàs kơlwòc shofar- ntàs kơlwòc pơrlài bol he đal git he neh lòt ngài bơh Yàng mơ hoi jà bol he rê wơl mơ gùng dà bơta nđàc dê bal mơ nùs nđàc sơngit. Sră Xacari 1:3 cih lah:

“Gen tàng đơs tĕ mơ bol khai lah, Yàng Jehôwa Gơnap Gơnoar Dờng Làm Jơh đơs be do: ‘Rê wơl tĕ hơ Añ.’ Yàng Jehôwa Gơnap Gơnoar Dờng Làm Jơh đơs: ‘Gen Añ rơp rê wơl hơ bol mê.’ Yàng Jehôwa Gơnap Gơnoar Dờng Làm Jơh đơs behơ̆.”

Kung be Jakơ 4:8 pơndòm-pơniàng bol he tus rềp mơ Yàng Tom Trồ, Xacari 1:3 hòi jà bol he rê wơl mơ Kơnràñ. Tom tŭ tìs glài hala gơpừ, bol he òs sùm joi gùng nàng dupleh bơh Yàng Tom Trồ, bulah ò gơs dô nă cau lơi rgơi lik klàs bơh bơta gơs mat Kơnràñ dê. Tom tŭ moat-jrùng hala roh gơn kơnòm bơh ală bơta gơlik gơs tom rài kis, oă cau wơl kê yoam-pơrhiat hala ngài bơh Yàng. Ƀuôn-ngan nàng ngai bơh Yàng Tom Trồ tom tŭ nùs bol he bềng bassil-bassọ, moat-jrùng, gơhào nùs, jê-sồt hala roh gơnkơnòm. Mơ ya, tom ală tŭ behơ̆, bol he pal cang tus rềp mơ Kơnràñ rlau jơh. Tài bơh mìng tom bơta gơs mat Yàng Tom Trồ dê, song bol he jòi geh pràn pa, bơta lơngap-lơngai mơ rlô bòl nàng lòt gan ală tŭ gơlòng bòl glar rài kis dê.

Bal mơ gơtha bơta kơlôi sơnơng mơ gơjràñ săng-glài dê, Rosh Hashanah kung la tŭ cau Juđa chò-hòp wă-rò năm pa tom bơta gơn kơnòm bơh bơta dòn-song Yàng Tom Trồ dê. Sơnoa rnoas jơnau còp să dô năm pa bơkah-lơngồt, lơngai-lơngò, bal mơ geh dòp ală phan sa òs mòng sùm tơngkah bol he bơh ală jơnau ho niam rlau jơh Kơnràñ dê. Bol he rgơi kơ̆-nùs bơh git lah Yàng Tom Trồ sùm niam rlau jơh, mơ Kơnràñ la Bơtau dòn-song wĭl tơl. Kơnràñ la Bơtau at-bồ jơh ală phan, mơ bơta rơndap kung be tơnggu Kơnràñ dê rơp sùm geh gơlik gơs ngan, sơrlèt rlau jơh ală bơta bol he neh lòt gan hala rơp pal ntào tom ngai tơnơ̆. Tom tŭ cơnđoà lòt bal mơ Yàng Tom Trồ, bol he sùm rgơi dòp git bơta bơkah-lơngồt bơta nđàc mơ kis tom bơta gơn kơnòm, mơ digùl ală gơlòng bol glar. Hơ̆ kung la dul tom ală bơta bơtê niam ngan mơ bơta pơjum Rosh Hashanah tơngkah bol he.

Dan jà bol he dô nùs bal tòm bơta hòi dan: Khoai Yàng kòñ gơboh kòn dê, ưnngai Kơnràñ tài bơh bulah kòn gơs bơta lơbơn-lơñọ mơ oă dơ̆ gơpừ, bulah kòn pơnđơl du-pleh Kơnràñ tài bơh bassil-bassọ mơ rngòt-rngơt, Kơnràñ gam sùm kong-ơt kơp gơn kòn rê wơl. Dan tề lam kòn tus rềp mơ Kơnràñ kờp ngai. Dan ai kòn in git lam bơta lơngap-lơngai tom bơta gơs mat Yàng dê, nàng kòn git lah ò gơs dô tồi-glài lơi dờng rlau bơta nđàc Kơnràñ dê, mơ ò dô bơta wĭl tơl lơi rgơi kơryan bơta kòñ gơboh Kơnràñ dê ai kòn in. Dan ai kòn in nùs khin cha nàng sùm tus rềp Kơnràñ, dòn kơnòm Kơnràñ mơ dòn-song cơnoà lòt jat Kơnràñ kờp ngai. Kòn jơh nùs hòi-dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, ò git ngai do oh mi neh lòt gan ală bơta lơi hala gam ntào di đap bơta lơi, mơ ya dan oh mi rơp sac rwah tus rềp mơ Yàng Tom Trồ. dan oh mi sùm cih kah ală jơnau ho Kơnràñ dê, ngai sơlo git lam Kơnràñ dô bă jrô-ndơp rlau mơ kơ̆ nùs dòn kơnòm di bơta dòn-song kung be bơta rơndap niam rlau Kơnràñ dê ai rài kis he in. Dan Yàng ai oh mi in pràn kơldang nàng săng jơh ală bơta gam lơh oh mi jê-sồt hala hwài oh mi ngài mơ Kơnràñ, kung dong oh mi cơnđoà lòt tom bơta gơn kơnòm mơ ală jơnau ho Kơnràñ dê cèng wơl. Dan Yàng ai oh mi in dô ngai pa lơngap-lơngai, bơkah-lơngồt mơ bềng lơngai-lơngò.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.