Nyob hauv lub neej uas vam meej, peb pheej ntsib ib txoj kevcai swm zoo li no: yog xav kom mus tau deb hauv ib txoj haujlwm twg, peb yuav tsum mus dhau tej kev kawm thiab xyaum txhua hnub. Ntawm kev kawm paub, tswvyim ua haujlwm, mus rau tej uas yus tau ntsib dhau hauv kev nqes tes tiag, tag nrho txhua yam puav leej cheem tsum siv sijhawm thiab lub siab tiag tiag los ua. Yeej tsis muaj ib qho haujlwm twg tau ua tiav es tsis muaj txoj kev npaj zoo. Tiamsis, thaum saib mus rau hauv lub neej ntawm sab ntsuj plig, peb twb siv pes tsawg sijhawm dag zog los npaj thiab cob qhia rau peb sab kev ntseeg? Yam uas Vajtswv xav yuav ntawm Nws cov thwjtim tsis yog tuav kev ntseeg raws kev raws cai xwb, tiamsis lub neej yuav tsum txi txiv. Yog li yog xav kom txi txiv pub rau Vajtswv, muab ib yam uas peb yuav tsum paub.

Hnub no yog hnub 13/9/2026, Kev thov Vajtswv txhua hnub thov caw peb sawv daws txhua tus los kawm Vajtswv txojlus txog zaj kawm: TAU COV QHIA KOM TXI TXIV

“Nws pheej qhia li ntawd tau ob xyoos, cov Yudais thiab lwm Haivneeg uas nyob hauv lub xeev Axias thiaj tau hnov Vajtswv Txojlus.” (Teg Num 19:10)

Tiamsis cov neeg ntawd qee leej muaj siab tawv tsis kam ntseeg Yexus. Lawv tabmeeg thuam Tswv Yexus zaj rau sawvdaws mloog. Ces Paulus txawm tso lawv tseg, coj nws cov thwjtim nrog nws mus, thiab nws niaj hnub mus qhia hauv Tilanus chav tsev sablaj. 10Nws pheej qhia li ntawd tau ob xyoos, cov Yudais thiab lwm Haivneeg uas nyob hauv lub xeev Axias thiaj tau hnov Vajtswv Txojlus. Teg Num 19:-10

“Rooj kawm Vajluskub hnub so” yog dabtsi os niam? “Kawm Vajluskub hnub so lov”? “lam kheev kuv tau pw ib me ntsis ntxiv rau tagkig hnub so…” Ntawd yog kuv tej kev xav thaum uas kuv nyuam qhuav pib mus koom cov rooj kawm Vajluskub hnub so hauv Tuamtswv. Kuv tsis nco, thaum ntawd luv puas tau nyiam tej kev kawm Vajluskub lossis tsis tau. Kuv tsuas nco tias, txhua tagkig hnub so thaum muaj 7 teev, kuv yuav tsum tau mus kawm.

Kuv nco txog tus kws qhia cô Hạnh, yog tus uas rau siab ntso qhia peb rooj Vajluskub menyuam hluas. Tej hnub kawm thaum ntawd tseem txomnyem heev. Peb tuaj rau hauv chav kawm, qhib phau Nkauj, hu ib zaj nkauj ua ke thiab tom qab los kawm Vajluskub ua ke. Tsis muaj suab taub, tsis muaj micro, kuj tsis muaj lub tivi tso duab. Tiamsis, kuv nco ntsoov ua Vajtswv tsaug rau qhov dhau lub rooj kawm Vajluskub me me ntawd, thiaj pab rau kuv thiab lawv cov kwvtij nkauj muam uas nrog kuv kawm ua ke thiab tuav tau kev ntseeg ruaj khov thiab loj hlob mus pab Vajtswv haujlwm rau ntau qhov chaw.

Tom qab no, thaum mus rau lwm lub Pawgntseeg coob dua, loj dua, tiamsis kuv ho pom ua cas ho tsis muaj coob tug hluas mus kawm Rooj kawm Vajluskub hnub so li lawm. Twb muaj tsis txog li 5 tug tuaj kawm. Muaj ntau zaug kuv hnov qaug zog thiab kuv tso dhau tej rooj tseem ceeb no. Tiamsis ib lub sijhawm tom qab, Vajtswv twb ua haujlwm thiab tshoov cov hluas ntau tug hauv pawg ntseeg lub siab. Lawv pib mus kawm rooj kawm Vajluskub hnub so coob heev, txog qib uas peb lub chav kawm qub twb tsis txaus chaw lawm thiab peb thiaj hloov mus rau lwm lub chav uas dav dua.

Tiamsis, tsis yog qhov twg txoj kev kawm Vajtswv txojlus twb kub siab li ntawd. Muaj tej rooj kawm tsawg neeg heev, thiab tej zaug qhov no kuj ua rau peb pom tias peb tabtom ua poob peb lub siab ntshaw Vajtswv txoj lus lawm. Tej zaug dhau ib kiab ua haujlwm sab li sab, leejtwg los xav kom tau so. Yog li ntawd, qhov uas siv li 30 feeb los nyeem Vajtswv txojlus yog ib qho kev sim siab loj heev. Peb poob mus rau qhov uas pom tias yus khwv thiab sab heev.

Tiamsis thaum rov qab nco txog tej nplooj ntawv hauv phau Teg Num, zaj xwm ntawm lubb tsev kawm Tilanus ua rau peb pom ib qho txawv txog cov ntseeg kev rau siab kawm Vajtswv txojlus zoo li Teg Num 19:8-10 tau sau tseg.

Ntawm lub nroog Efexus 2000 xyoo tag los, nyob hauv Timthawj Paulus kev mus qhia moo zoo zaug thib peb, yawg pib tes haujlwm los ntawm kev qhia Vajtswv txojlus ntev li peb lub hli hauv Lub tsev qhia Vajtswv txoj kev cai. Paulus xaiv lub Tswv qhia Vajtswv txoj kevcai los ua lub chaw qhia ua ntej vim yog ntawm no muaj cov neeg Yudas uas hwm thiab ntshai Vajtswv, twb paub Vajluskub Qub lawm. Yog li ntawd thaj chaw no thiaj yog ib thaj chaw zoo rau kev qhia txojmoo zoo txog Tus Tswv Yexus. Txawm li ntawd los, Paulus yeej ntsib kev tawm tsam thaum qhia hauv lub Tsev no. Tsis tso tseg, Paulus thiaj faib cov thwjtim mus kawm rau ntawm lub tsev kawm Tilanus. No yog ib tus xibhwb neeg Kilis lub tsev kawm hu ua Tilanus. Raws li txoj kev cai coj thaum ntawd, txhua lub tsev kawm pheej qhib thiab ua haujlwm rau yav tagkig sawv ntxov. Yog lis muaj ntau tus thiaj ntsuam xyuas pom tias tej thaum Paulus qiv lub sijhawm thaum tavsu los qhia.
Nyob rau hauv ob lub xyoo, tim thawj Paulus cob qhia kom cov thwjtim ruaj khov thiab mus qhia moo zoo txog Tswv Yexus, txog qib uas, cov Yudais thiab lwm Haivneeg uas nyob hauv lub xeev Axias thiaj tau hnov Vajtswv Txojlus.” Tsis yog tsuas muaj qee leej tau hnov Vajtswv txojlus xwb, tiamsis yog “ntau tug”. Tej paj txiv no yog ib qho tim khawv qhia tias tom qab ib tug neeg tau cob qhia kawm Vajtswv txojlus, tug ntawd lub neej yuav tau hloov paub thiab mus qhia Vajtswv txojlus rau ntau tug ib ncig. Thaum ntsib “kev thuam” kev “tawm tsam” ntawm lwm tus, Paulus thiab cov thwjtim yeej tsis thim rov qab, tiamsis nrhiav tswv yim hloov kev cob qhia thiab Vajtswv thiaj foom koob hmoov rau lawv tej haujlwm. Yog li ntawd, peb pom tias Kev Cob Qhia Cov Ntseeg yuav tsis raug cuam tshuam los ntawm tej teeb meem nyob ib ncig thiab lub caij nyoog tiamsis tau loj hlob los ntawm lub siab rau siab thiab ua siab ntev qhia Vajtswv txojlus uas yog Qhov Tseeb.

Saib rau zaj xwm ntawm lub tsev kawm Tilanus, ua rau peb pom ib daim duab zoo txog Kev Cob Qhia Cov Ntseeg. Tej rooj Kawm Vajluskub Hnub So, Tej rooj cob qhia thwjtim, lossis tej rooj kawm Vajluskub pab pawg hauv txhua lub pawg ntseeg niaj hnub nim no twb yog tej “rooj kawm Tilanus” nyob rau tiam vam meej no. Ntawd yog tej qhov chaw rau siab ntso qhia Vajtswv txojlus rau cov ntsee. Tiamsis tsis yog nres li ntawd xwb, Kev Cob Qhia Cov Ntseeg yuav tsum yog thaj chaw cob qhia tau ib co uas yog Tswv Yexus cov thwjtim tiag tiag, kom cov thwjtim ntawd tsis yog tsuas ua haujlwm rau hauv tuamtsev plaub phab ntsa xwb, tiamsis muaj lub neej sab ntsuj plig kub lug thiab muaj Vaj ntsuj plig lub hwjchim mus ua tim khawv txog Vajtswv, kom mus ua tiav lub haum phiaj uas tias “txhua tus puav leej tau hnov Vajtswv txojlus” tshwjxeeb yog nyob rau tiam uas lub ntiajteb no hloov pauv ntau yam thiab kev phem kev qias yim huam vam.

Hnub no yog hnub tseg hu ua hnub Kev Cob Qhia Cov Ntseeg, yog li peb txhua tus tau nqua hu los tig saib peb tes haujlwm hauv kev tshaj tawm Vajtswv txoj lus. Tus qhia Vajtswv txojlus tej thaum yog tus qhia rooj Kawm Vajluskub hnub so, tus coj pab pawg kawm Vajluskub, niam txiv hauv tsev neeg…Peb cia li tig mus saib Paulus tug qauv ntawm Tilanus. Paulus tau siv tagnrho sijhawm, thaj chaw, tsis hais zoo lossis tsis zoo los rau siab ntso cob qhia cov thwjtim txhua hnub. Kev Cob Qhia Cov Ntseeg kuj yuav tsum rau siab ntso thiab qhia tag siab tag ncws li ntawd. Txawm tias muaj tej rooj kawm Vajluskub lossis rooj thov Vajtswv nws tsawg tsawg, lossis tsis tau pom tej paj txiv tom hauv ntej, tiamsis yuav tsum ntseeg tias ntawd yog tej lub noob uas tab tom muab cog rau hauv tiam txuas ntxiv lub siab.

Yog ib tug ntseeg, peb puas saib taug thiab saib muaj nqis tej lub sijhawm uas peb tau kawm Vajtswv txoj lus? Qee zaug, tsis yog peb muaj haujlwm ntau lossis peb tsis muaj sijhawm, tiamsis yog peb tsis tau npaj siab tso tseg tej yam uas peb ntshaw lossis peb tej kev tub nkeeg los ua tib zoo kawm nrhiav Vajtswv txojlus. Peb siv tsheej teev sijhawm mus saib xov tooj, tiamsis ho khuvxim ob peb feeb los tu thiab saib xyuas peb lub neej sab ntsuj plig.

Txawm yog tus qhia lossis tus kawm Vajtswv txojlus, peb txhua tus puav leej ntshaw kom yus ruaj khov kho thiab sab ntsuj plig loj hlob tuaj. Kev loj hlob ntawm sab ntsuj plig tsis yog dhau ib hmo xwb txawm loj, tiamsis yog mus dhau tej lub sijhawm uas peb rau siab nrhiav kawm Vajtswv txojlus ntawm tug kheej, ntawm tej rooj kawm nrog tej kwvtij phoojywg ntseeg. Koj puas npaj siab cia Vajtswv txojlus cob qhia koj, kom koj yuav ua haujlwm pab rau Vajtswv thiab txi txiv puv ntoob rau Vajtswv lub tebchaws?

Peb los thov Vajtswv ua ke: Leejtxiv uas muaj kev hlub puv npo, thov pab kom kuv muaj lub siab ntshaw thiab rau siab ntso kawm Koj txojlus txhua hnub. Thov pab kom kuv tsis yog tsuas mloog xwb tiamsis tseem paub qhia tawm Koj txojlus rau tej neeg ib ncig, rau qhov kuv ntseeg tias thaum Koj txojlus tau muab tshaj tawm, ntau lub neej yuav tau hloov pauv, thiab sau tau tej txiv zoo los rau hauv Pawgntseeg, rau lub teb lub chaw. Kuv taij thov txhua lo lus no los ntawm Tswv Yexus Khetos lub npe, Amees!

Ib tsoom kwvtij phoojywg sawv daws, Nyob rau Hnub Kev Cob Qhia Cov Ntseeg hnub no, ntshaw kom peb lub neej tau cob qhia kom txi txiv pub rau Vajtswv ntau dua, Cia li cog lus siv sijhawm los nyeem, kawm Vajtswv txojlus txhua hnub ntawm peb tug kheej, koom rau tej rooj kawm cob qhia Vajluskub ntawm koj pawg ntseeg. Tiamsis, tsis yog kawm kom paub xwb tiamsis yuav tsum kawm los ntawm lub siab ntshaw kom koj lub neej tau hloov pauv thiab cia Vajtswv siv koj, kom koj lub neej yog lub teeb ci Vajtswv txojlus nrog tej kev coj zoo ntawm tug ntseeg, coj kev cia siab mus hloov pauv ntau tug lub neej sab nrau.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.