Kòp ang drim tú sền ală bơta gơlik gơs, nùs hư ò rgơi pleh klàs bơh dô rai kis bêng bơta ò niam gơlik gơs mơ ò gơs bơta ring lơngai. Gơs oă ngăn bơta bol glar gơ tơn tus lơh kon mơnùs in gơlơh bè dềt rhên ngan mơ ò tơl pràn nàng ntào kớ. Jơh kơlin gơtoà, lơnggơr ù tus dà kó, gơlơh bè la plai ù do ò gơs tiah lơi gơs bơta ring lơngai tai. Digul bơta roh gơcoh mơ jê sồt hớ, dô nơm seng lùp he òs lùp is lah: Yàng Tòm Trồ gam ơm tiah lơi taih?

Ngai do, ngai 14/09/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl Bruce C. Swaffield bơh tơnggume: Ơ YÀNG, KƠNRÀN ƠM TIAH LƠI?

“Yàng Jesu đơs lah: “Añ la bơta kis wơl mơ bơta kis; cau lơi dòn Añ gen rơp kis, bulah neh chơt rau. Ai cau lơi kis mơ dòn Añ gen rơp ò tŭ lơi chơt ò. Ai dòn bơta hơ̆ sơl?” (Jang 11:25-26)

Yàng Tòm Trồ ơm tiah lơi tòm tú bơta tòm lơh tòm Trung Đông gơlik gơs taih? Yàng Tòm Trồ ơm tiah lơi tú bàr bơta lơnggơr ù tòm Venezuela gơlik gơs lơh oă cau chơt? Kơnràn ơm tiah lơi tú trồ tơngai dơng mơ gơs ồs sa dơng tòm Châu Âu, chu jơh hiu tum mơ chơt oă cau taih?

Seng ho lah: Yàng Tòm Trồ gam at , kung bè Kơnràn neh at bồ tòm tú ồng Ê-tiên kol cau cơm lú tus tú chơt, tú ồng Jang Bap-tit kol cau koh ngko, tú ồng Pier kol cau pơng hơđang chi pơng mơya chut bồ hơđơm, mơ tú ồng Abel kol ồng Kain tơnchơt. Kơnràn gam ơm bal tòm tú hớ, kung bè Kơnràn neh ơm bal mơ Kon Dul Kơnràn dê kong cau pơng hơđang chi pơng. Yàng Tòm Trồ gơs gơnoar nàng kơryan bơta chơt mơ tòm gơl ală bơta ò niam. Mơya, tòm bơta jak chài mơ bơta rơndap tap seng Kơnràn dê, Kơnràn neh ai gơnoar nàng bơta hớ gơlik gơs.

Bol he ò rgơi git jơh. Bol he sum lùp nchi bơh tài. Nchi bơh tài Kơnràn lòi jơh ală cau do pal chơt? Gơwèt mơ kon mơnùs gen jòi oă bơta nàng kơryan ală bơta ò niam do gơlik gơs. Gen nchi bơh tài Yàng Tòm Trồ ò lơh behớ taih? Seng ho lah: “Bol he ò git nchi bơh tai” ngan rơp ò ceng wơl he in bơta hừ nùs. Gơ pơrlớ wơl, bơta hớ lơh he in bơtơl bơta jê sồt mơ dơrcul. Kal ke ngan he in tòm tú he ò rgơi git wă lah dô Yàng Tòm Trồ gơnap gơnoar mơ bêng bơta kỡn gơboh ai bơta hớ in gơlik gơs.

Bulah behớ, ẵn mơ ồng mò oh mi rgơi jòi bàn bơta ring lơngai tòm tú he dòp git lah: Bol he ming rgơi sên gó bơta chơt mơ bơta kis jat bơta sên gó kon mơnùs dê lơm. Bol he ò rgơi bơta ndơp ndơr tòm bơta hớ dê. Ẵn mơ ồng mò oh mi ming kơlôi tis di bơta kis gơkló tòm lơgar đang trồ lơm, bơh rai kis gam sum sum mơ ală bơta kơlôi sơnơng jrô ndơp Yàng Tòm Trồ dê. Behớ tang, nùs dòn he dê tòm Kơnràn gơlik gơs dô nơm ntung ceng he lòt gan croh jrô bơta pin wil wơl mơ bơta ò dòn dê. Bơta dòn ò lơh roh bơta jê sồt, mơ rơp dong he ntào di đap bơta chơt mơ bơta gơn kơnòm – lah Yàng Tòm Trồ gam at bồ mơ ală jơnau ho Kơnràn dê la ngan.

Gơwèt mơ bol he, bơta chơt bè la bơta dut dơl. Mơya gơwèt mơ Yàng Tòm Trồ, bơta chơt tòm dunnia do la dô nơm mpồng ceng he tus hơ bơta kis gam sum sum. Bol he rgơi nhim rac tòm tú tìp bơta jê sồt moat jrum – Yàng Jesus kung nhim tòm tí cau gơp bơyô kỡn gơboh Kơnràn dê la Laxarơ chơt. Kah té jơnau Yàng Jesus đơs tòm tú Mathe đơs lah: “Ơ Yàng, dilah gơs Yàng tềng do, gen bi añ ò chơt” (Jang 11:21). “Yàng Jesu đơs lah: “Añ la bơta kis wơl mơ bơta kis; cau lơi dòn Añ gen rơp kis, bulah neh chơt rau. Ai cau lơi kis mơ dòn Añ gen rơp ò tŭ lơi chơt ò. Ai dòn bơta hơ̆ sơl?” (Jang 11:25-26).

Bulah bêng dà mat hor, mơya dan he in gơs bơta pơndom pơniang tòm jơnau ho hớ Yàng dê. Bơh Yàng Dong Jesus neh pha lin bơh bơta chơt, gen bơta chơt ò gơs gơnoar lơi tai tòm cau dòn Kơnràn. Să jan do rơp roh, mơya bơta kis he dê tòm Bơtau Krist rơp gam sum sum.

Dan jà bol he dô nùs bal tòm bơta hòi dan: Khoai Yàng Jesus la Bơtau Dong Klàs kỡn gơboh, di đap oă bơta gơ tơn tus mơ bol glar kal ke gut dar kon, nùs kon ò rgơi pleh klàs bơh bơta dơrcul lơnggơr. Dan toh glài kon in bơh ală bơta ò dòn, ală bơta pin wil wơl tòm tú hớ. Dan Yàng Hwềng Goh thoa rpa ală hwềng nùs jê sồt. Dan pà ai kon in dô bơta dòn kớ cê, nàng kon dòp git hiu tơm kon dê la đăng trồ gơkló. Di gul bơta roh gơcoh mơ jê sồt, dan at kớ hwềng soan kon tòm bơta lơngai đăng trồ Kơnràn dê. Kon jơh nùs hòi dan, ai sơnđan Yàng Jesus Krist. Amen.

Ơ ală ồng mò oh mi kỡn gơboh, gơs ngai bơta jê sồt moat jrum bè dà tú bêng, lơh he in ò rgơi sên gó gung lòt hơđap. Ming jòi ală seng hơ bơh ală bơta ò niam gơlik tus mơ gơs dô bơta he pal dòp git lah: gơs ală seng lùp ming gơs seng ho tòm tiah gam sum sum lơm. Cơnđoà lòt tòm bơta dòn gơtha la he dòn kơnòm Yàng tòm tú ală bơta ò hềt loh lang, klam jơngo. Digơlan jơh rai kis he ò rgơi git nchi bơh tai bơta hớ gơlik gơs. Mơya tú he dòp git loh lang bơh Bơtau at bồ hơđang rlau jơh. Mơ ming behớ kung tơl nàng he in rgơi pơnjat cơnđoà lòt mơ bơta gơn kơnòm ò tú lơi tòm gơl, bơh he git Yàng rơp jùt jơh dà mat he dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.