Rim pơge, kơplah bơ̆n lăng dôm lu tơdrong đei roi tơbăt, jơhngơ̆m lu bơ̆n sơ’ngon kơ lăm teh đak đei lơ tơdrong rŭng răng ưh kơ đei hiôk-hian. Đei lu tơdrong hiong răm blư truh, lăng kon bơngai iĕ dêh păng ưh kơ đei tơdrong kiơ gơh tơgŭm kon bơngai bơ̆n. Klaih kơ đơ̆ng tơdrong tơblah wang, truh tơ teh tơdrŏ, tru tơ đak lơ̆p, rŏ lăng jơ̆p kơ ala teh âu ưh pă đei anih ayơ hiôk-hian tơpă. Lăm dôm lu tơdrong hiong răm păng sơ’ngon thoi noh, minh tơdrong jet mă kon bơngai juăt kơ jet đơ̆ng adrol sơ̆ truh tơ dang ei lăm đon tơchĕng lơ bơngai: Kră Yang ‘Bok Kei-Dei oei tơ yơ?

Năr ‘nâu, năr 14/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Bruce C. Swaffield kơ̆l ‘bai KRĂ YANG OEI TƠYƠ

“Inh boih tơiung arih bơngai đơ̆ng lôch păng ăn tơdrong arih ling-lang. Bơngai bu lui kơ Inh, bơngai ‘noh sư lôch bưh mơ̆n, mă-lei Inh tơiung arih sư dơ̆ng. Bơngai bu arih yua kơ sư lui kơ Inh, bơngai ‘noh ưh kơ layơ lôch hiong.” (Yôhan 11:25-26)

Kră Yang ‘Bok Kei-Dei oei tơ yơ kơplah ŭnh tơblah tơ dêh char tăp dăr kơ Isơrael, lơ kơ ‘brơ̆m phao prah tơ dêh char Isơrael? Kră Yang ‘Bok Kei-Dei oei tơ yơ kơplah ‘bar wơ̆t teh tơdrŏ tih tơ Venezuela pơlôch rơbâu kon bơngai, na achăng lê̆ lơ hnam dơnŏ lăm tơdrong ơh sơ’ngon yua kơ bơngai lôch? Kră Yang oei tơ yơ kơplah ‘năr tŏ dêh hloh kơ juăt, hăm dôm lu ŭnh sa bri jơ̆p kơ dêh char Châu Âu, ŭnh sa đĭ hnam păng iŏk tơdrong arih lơ bơngai mă ưh kơ đei glăi kiơ?

Nơ̆r tơl jơ̆: Kră Yang ‘Bok Kei-Dei oei pơgơ̆r tôm tơdrong, kư̆m thoi Sư đei pơgơ̆r kơplah Êtien đe klơ̆m hăm tơmo wă kơ truh tơ lôch, kơplah Yôhan bơngai mă pơm ‘batem đe chơ̆ng ako, kơplah Pêtrôs đe pơlôch tơ ‘long pơglang adrơ̆k kơ̆l sư tơ ala, păng kơplah Abel pơlôch Kain. Sư oei hơdai lăm rim tơdrong truh ơh sơ’ngon noh, kư̆m thoi Sư oei hơdai kơplah Kon Pôm Sư mă Sư ‘mêm tơpă đe pơlôch pơmat tơ ‘long pơglang. ‘Bok Kei-Dei đei mơsêh mơyang tôm tơdrong, Sư gơh găn đĭ dôm lu tơdrong lôch păng gơh tơplih rim lu tơdrong truh. Mă-lei, lăm tơdrong gơh hơgei păng tơdrong Sư pơgơ̆r Sư ăn kơ dôm lu tơdrong noh đei truh.

Lu bơ̆n ưh kơ hlôh tôm. Lu bơ̆n juăt kơ jet khan: Yua kơ kiơ Sư ăn kơ đĭ-đăng lu bơngai âu lôch? Kiơ̆ kơ akâu kon bơngai, lu bơ̆n gô chă rim trong wă găn tôm tơdrong wă pơgăn tơdrong ơh sơ’ngon thoi noh. Na yua kơ kiơ ‘Bok Kei-Dei ưh kơ găn? Nơ̆r tơl: “Bơ̆n ưh kơ băt yua kơ kiơ.” Nơ̆r noh ưh kơ gơh pơm kơ jơhngơ̆m bơ̆n huay kơ sơ’ngon ôh. Mă-lei, noh rai pơm kơ jơhngơ̆m bơ̆n hơwơ̆l hơwang păng sơ’ngon hloh dơ̆ng. Gleh dêh kơ jơhngơ̆m bơ̆n wă lăp đon kơ minh tơdrong tơpăt khan Kră Yang đei mơsêh mơyang tôm tơdrong păng ‘bĕnh kơ tơdrong ‘mêm, mă-lei Sư ăn kơ dôm lu tơdrong hiong răm, ơh sơ’ngon tih thoi noh đei truh.

Mă-lei, ih păng inh đei jơhngơ̆m kơjăp kơplah băt khan: lu bơ̆n kư̆ lăng tơdrong arih păng tơdrong lôch đơ̆ng lăm tơdrong arih ala teh hrei âu dang ei đĕch. Lu bơ̆n jơ̆ ưh kơ băt dôm lu tơdrong mơsêh lăm tơdrong lôch. Ih păng inh kư̆ tơchĕng kơ tơdrong ư-ang tơ plĕnh ti, tơdrong arih ling-lang păng dôm lu tơdrong jang tih đơ̆ng ‘Bok Kei-Dei đĕch. Yua kơ thoi noh, tơdrong gơnang kơ Sư jing trong ba lu bơ̆n klaih đơ̆ng tơdrong tơchĕng ưh kơ ngeh kơ đei păng tơdrong ưh kơ lui. Đon lui ưh tŭk lê̆ dôm lu tơdrong ơh sơ’ngon yua kơ hiong răm ôh, mă đon lui tơgŭm lu bơ̆n gô tơ’bơ̆p tơdrong lôch hăm tơdrong chang hơmĕng – khan ‘Bok Kei-Dei oei pơgơ̆r tôm tơdrong, păng đĭ-đăng dôm lu nơ̆r Sư pơkă jơ̆ tơpă ngăl.

Hăm lu bơ̆n, tơdrong lôch rŏ lăng jơ̆ anih tôch kơ tôm tơdrong. Mă hăm ‘Bok Kei-Dei, tơdrong lôch lăm teh đak âu jơ̆ ‘măng năm tơ tơdrong arih ling-lang. Lu bơ̆n rŏlăng oei nhơ̆m hmoi yua kơ tơdrong hiong răm păng ơh sơ’ngon – kư̆m thoi Yang Yêsu kư̆m nhơ̆m hmoi kơplah buăl juăt Sư, Lasarơ lôch. Athei ‘blŏk kơ nơ̆r Sư khan kơplah Mathê khan: “Ơ ‘Bok, dah Ih tơ âu ki lei ‘nhŏng inh huay kơ lôch ôh.” (Yôhan 11:21)

Na Yêsu khan kơ sư: “Inh boih tơiung arih bơngai đơ̆ng lôch păng ăn tơdrong arih ling-lang. Bơngai bu lui kơ Inh, bơngai ‘noh sư lôch bưh mơ̆n, mă-lei Inh tơiung arih sư dơ̆ng. Bơngai bu arih yua kơ sư lui kơ Inh, bơngai ‘noh ưh kơ layơ lôch hiong.” (Yôhan 11:25-26)

Mă khan jơhngơ̆m bơ̆n sơ’ngon păng đak măt oei lĕch, hơpơi kơ lu bơ̆n đei tơdrong pơlung đơ̆ng nơ̆r Sư pơkă noh. Yua kơ Kră Yang Yêsu đei iung arih bơih đơ̆ng lôch, na tơdrong lôch ưh pă anih tôch ăn kơ lu bơngai lui kơ Sư. Akâu kơdih bơ̆n minh năr gô hiong răm, mă tơdrong arih lu bơ̆n lăm Yêsu Krist gô oei arih ling-lang ưh kơ layơ tôch.

Apĭnh đĭ đăng krao khan hơdai: Kơkuh kơ Kră Yang Yêsu mă ‘mêm, Bơ̆t anăp dôm tơdrong rŭng răng păng tơdrong răm anat anot lăm teh đak oei tăp dăr kơ kon, jơhngơ̆m kon kư̆m tơrơ păng hơwơ̆l hơwang. Apinh Ih huay kơ jô̆ yo kơ dôm tơdrong kon jet păng dôm tơdrong tơchĕng ưh kơ ngeh kơ đei kơplah kon tơkan hăm dôm tơdrong ơh sơ’ngon. Apinh Yang Bơhngol ‘Lơ̆ng Ih pơlung păng pơklaih ‘lơ̆ng jơhngơ̆m pơchah pơchek kon. Apinh Ih ăn kơ kon đei đon lui kơjăp, wă kơ kon gơh lăng rai ataih hloh păngwă kơ băt khan dêh char tơpă kon jơ̆ tơ plĕnh ti mă ‘bĕnh kơ tơdrong ư-ang. Lăm dôm lu đak măt ơh sơ’ngon yua kơ hiong răm, apinh Ih wei-lăng chô̆ kơjăp lăm tơdrong hiôk-hian đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đei lu năr tơdrong ơh sơ’ngon nhen thoi tŭk hơbơ̆l gom, pơm kơ lu bơ̆n ưh pă đei ‘bôh trong tơ anăp. Lu bơ̆n juăt kơ chă nơ̆r tơl yua kơ dôm tơdrong hiong răm, mă-lei đei minh tơdrong lu bơ̆n kăl kơ drơ̆ng iŏk: đei lu tơdrong jet mă kư̆m truh tơ tơdrong arih ling-lang na bơ̆n gô đei băt nơ̆r tơl. Yak lăm đon lui jơ̆ rơih iŏk gơnang kơ Kră Yang, mă kơplah đôm lu tơdrong oei măng mu. Rŏ lăng đĭ chăl arih âu lu bơ̆n ưh kơ layơ hlôh yua kơ kiơ dôm lu tơdrong răm anat anot noh đei truh. Mă lu bơ̆n băt tơpă kơ Tơ’ngla mă oei pơgơ̆r tôm tơdrong lăm plĕnh teh. Yua kơ tôm tơdrong noh đĕch kư̆m trŏ ăn kơ lu bơ̆n yak năm hăm tơdrong chang hơmĕng huay kơ tơplih, yua kơ lu bơ̆n băt kơ đak măt Kră Yang gô sŭt hrĕng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.