Kev hlub ib txwm muaj ntau tus yamntxwv, thiab ntau zaug, tej haujlwm uas yuav chwv txog tib neeg lub siab tshaj ho tau nthuav tawm raws li txoj kev uas peb xav tsis txog tshaj. Tej yam ua rau peb nco ntsoov txog ib tug neeg tsis yog tej khoom muaj nqis lossis tej lus cog tseg zoo. Tej zaum ntawd tsuas yog ib nyuag qhov haujlwm me me, ua ntsiag to txog qhov uas ntau tus tsis quav ntsej txog. Tiamsis tej uas xav tias cuag li tsis muaj dabtsi ntawd ho cim civ ntsia tob tob nyob hauv peb txoj kev xav, vim lub sijhawm ntawd peb tau ntsia pom ib lub siab puv npo kev hlub.

Hnub no, yog hnub 15/09/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kellin Gibson dhau ntawm Zaj kawm KEV HLUB LUB HWJCHIM

“Kuv yog nej tus Tswv thiab yog nej tus Xibhwb, kuv twb ntxuav nej kotaw lawm; yog li ntawd, nej ib leeg yuav tsum ntxuav ib leeg kotaw.” (Yauhas 13:14)

Kuv yuav tsis muaj hnub hnov qab qhov khoom plig uas kuv tus phooj ywg thaum tseem yau nws tau tseg rau kuv. Thaum pib, kuv tsuas xav tias tsuas yog mus Spa nrog tej phooj ywg ua si xwb. tiamsis, hnub ntawd ho dhau los ua ib hnub muaj nqis heev. Thaum kuv tus phooj ywg txhos caug ntawm kuv xub ntiag thiab maj mam ntxuav kuv ko taw, kuv ua twj ywm rau ntawm nws txoj kev txo hwjchim thiab kev hlub uas nws ua.

Txhua zaug uas nco txog lub sijhawm ntawd, kuv cim civ nug: tsis paub qhov uas ua nthuav tawm kev hlub thiab txo hwjchim li ntawd puas yuav tshwm rau ob tug tib neeg uas ib txwm yog yeebncuab?

Muaj ib zaj movies qub qub uas kuv nyiam saib, tau ua rau kuv xav txog qhov no. Ntawd yog The Rebel (1959), raws li tus neeg nyob hauv yog Johnny Yuma- ib tug tub rog, nws tau mus qhov txhua chaw nrhiav lub ntsiab ntawm lub neej.

Muaj ib txua, Johnny sawv tim ntsej tim muag nrog tus neeg uas ib txwm nyiam ntaus sawv daws nyob hauv zos ntawd. Qhov haujlwm no ua rau muaj ib tug pojniam sau ntawv ntsia pom, nws raug rub los ntawm Johnny tus yamntxwv sab nraud, nws thiaj ntxiv lus rau Johnny yog ib tug neeg zoo nws ua li no kom tau nws tus tswv pom tias nws yog ib tug sau ntawv zoo. Tiamsis txhua yam ho tsis zoo li nws xav. Tej zaj xwm uas tus pojniam no ntxiv rau ho tsis ua rau kom sawv daws nyiam Johnny, tiamsis ho muab yawg dhau los ua ib qhov kev luag rau lub zos ntawd.

Thaum pom tias tej xwm uas hais txog nws yog tsim los ntawm tej zaj xwm tsis muaj tiag, Johnny thiaj nrhiav mus txog tus txiv neej uas yawg tau ntaus nws swb thiab ua ib yam uas sawv daws xav tsis thoob. Pauv qhov uas ua rau kom luag qhuas lossis ua pov thawj qhia tias yus yog tus yeej, nws txhos caug muab yawm ntawd nkawm khau so kom huv huv. Johnny tsis txais yuav lub meej mom tau tsim nyob rau saum tej lus dag.

Daim duab no nyob rawv hauv kuv lub siab ntau xyoo. Ntawd yog ib qhov piv txwv zoo txog txoj kev txo hwjchim thiab kev hlub thaum ntsib yeebncuab. Tiamsis, tag nrho, yeej tseem tsuas yog ib daim duab ntsia tsis pom thaum muab tso rau ntawm Tswv Yexus tau ua nyob hauv Yauhas tshooj 13. Tus Vajntxwv ntawm txhua tus vajntxwv tau txhos caug ntxuav taw rau nws cov thwjtim. Thiab nyob hauv muaj cov neeg uas tau Tswv Yexus ntxuav taw hnub ntawd muaj Yudas Ixakalius- tus uas tab tom yuav ntxeev siab rau Nws.

“Kuv yog nej tus Tswv thiab yog nej tus Xibhwb, kuv twb ntxuav nej kotaw lawm; yog li ntawd, nej ib leeg yuav tsum ntxuav ib leeg kotaw. Kuv ua qauv li no qhia rau nej kom nej xyaum ua raws li kuv ua rau nej lawm” (Yauhas 13:14-15).

Hlub tej neeg uas hlub yus yog yam uas yuav tsum muaj. Tiamsis Tswv Yexus nqua hu kom peb yuav tau mus deb dua qhov ntawd: hlub cov neeg uas tawm tsam thiab ua rau peb tu siab tib si. Ntawd yog tus cag ntawm Txojmoo Zoo – hlub lawv txawm yog lawv tsis tsimnyog hlub. Vim thaum peb tseem yog neeg txhaum, yog Vajtswv tus yeebncuab, Yexus Khetos tau hlub thiab muab Nws txojsia tuag theej peb.

Puas tau muaj leej twg ua rau koj muaj kev tu siab, xav yuam kev rau koj lossis ua tsis ncaj ncees rau koj lawm tau? Yog Tswv Yexus tab tom hu kom koj “ntxuav taw” rau tus neeg ntawd, koj yuav ua li cas rau nws? Yuav zoo li cas yog koj xaiv ua siab ntev pauj txoj kev uas ua pauj, xaiv zam txim pauj qhov uas koj ceev txoj kev iab siab cia, lossis ua twjywm thov Vajtswv rau tus neeg ua rau yus muaj kev mob siab?

Johnny Yuma tsis xub mus ua yam zoo rau tus neeg uas tau nrog nws sib ntaus. Tiamsis thaum lub sijhawm los txog, yawg xaiv txo hwjchim pauv qhov uas nrhiav kev qhia rau nws paub tias yus yog tus yog. Thiab Tswv Yexus tseem ua deb dua qhov no. Nws tsis yog tsuas qhia txog kev txo hwjchim, tiamsis Nws tseem yog tus tswv ntawm txoj kev txo hwjchim ntawd. Nws txhos caug ntxuav taw rau cov thwjtim, txawm yog Yudas, tus uas yuav ntxeev siab rau nws los nws yeej ntxiav. Thiab Nws kuj caw kom peb txhua tus xyaum raws li tus qauv ntawd.

Thov caw nrog kuv peb thov Vajtswv ua ke: Tus Tswv, hnub no kuv thov txo kuv lub hwjchim ntawm koj xub ntiag. Thov qhia rau kuv paub hlub koj ib yam li koj tau hlub kuv, thiab paub ua dejnum pab lwm tus los ntawm lub siab txo hwjchim, txawm yog thaum uas tej ntawd nws tsis yooj yim. Thov pub kom kuv muaj zog zam txim thiab muaj lub siab tawv xaiv ua siab ntev pauj qhov uas yuav ua pauj. Thov hliv kev hlub puv npo hauv kuv lub siab, kom kuv paub hlub tej neeg ua rau kuv tu siab. thov kom kuv lub neej nthuav tawm txoj kev hlub puv npo nyob rau txhua lub caijnyoog. Kuv thov hauv Tswv Yexus Khetos lub npe, Amees.

Cov kwv tij, Yexus Khetos txoj kev hlub yeej ib txwm siab tshaj txhua txojcai uas lub siab qia dub hauv ntiajteb no muaj. Pab lwm tus tau ua rau yus muaj kev tu siab yeej tsis muaj suab npe ntawm neeg ntiajteb qhov muag, tiamsis nws yuav qhib kev rau txoj kev kho zoo thiab kaj siab hauv peb lub hlwb. Thov Vajtswv pub rau nej kom tau txais txoj koob hmoov nplua mias hlub ib yam li Nws tau hlub, zam txim ib yam li Nws tau zam txim, thiab txo hwjchim pab lwm tus ib yam li Nws tau ua qauv rau peb. Hnubno, Tswv Yexus tab tom nqua hu kom koj hlub thiab pab ib tug twg ntawd, txawm yog koj yuav pom tias tus ntawd nws tsis tsimnyog?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.