Tơdrong ‘mêm đei lơ tơdrong wă pơdah tơ’bôh, păng mơ’nah, dôm lu tơdrong mă hơtŭt ‘bơm jơhngơ̆m noh tă kơ pơdah kiơ̆ kơ tơdrong mă lu bơn ưh kơ ê hloh. Dôm lu tơdrong pơm kơ lu bơ̆n ling lang ‘blŏk kơ mĭnh ‘nu bơngai ưh kơ sĭ jơ̆ lu tơmam kăp jên tơdah dôm lu nơ̆r pơkă mơ̆ng rơngơp. Noh jơ̆ lăp mĭnh tơdrong pơm iĕ đĕch, mă minh tơdrong pơm hrĕp lơ bơngai ưh kơ bơngơ̆t. Mălei dôm lu tơdrong mă ngeh kơ iĕ noh tă pơm kơ bơ̆n răk jrŭ lăm đon tơchĕng, yua kơ kơplah noh lu bơ̆n đei lăng ‘bôh tơdrong pran kơtang ‘bĕnh blai kơ tơdrong ‘mêm.

Năr ‘nâu, ‘năr 15/09/2026, tơdrong tơdă Amăn Jơ Krao Khan Rim Năr apinh wơ̆n đĭ đăng mơ̆ng pơwao hơdai Nơ̆r Kră Yang hăm bơngai chih Kellin Gibson kơ̆l ‘bai PRAN KƠTANG TƠDRONG ‘MÊM

“Inh ‘Bok Thây iĕm păng Yŏng iĕm, mă-lei Inh ôp jơ̆ng iĕm dang Inh pơm đĭch iĕm đĕch, mă iĕm athei ôp dih băl jơ̆ng iĕm. Inh ôp jơ̆ng iĕm noh, Inh pơm tơ’bôh kơ iĕm hơdrol wă kơ iĕm pơm kiơ̆ dih băl thoi noh.” (Yôhan 13:14-15)

Inh gô ưh kơ layơ hiơt kơ tơmam mă buăl juăt inh đơ̆ng hơ’lơ̆p đei pơjao ăn kơ inh. ‘Măng blŭng, inh ngeh noh jơ̆ minh năr năm tơ spa wă pơdơh hơdai hăm bôl buăl đĕch. Mălei, năr noh jing minh năr mă inh ‘blŏk răk ling lang. Kơplah buăl inh sơtơ̆p kŭl tăng bơ̆t anăp inh păng ôp jơ̆ng inh, inh thĕng hreh ‘bôh tơdrong iŏk đon ala păng tơdrong ‘mêm mă sư đei tơ’bôh ăn.

Rim ‘măng ‘blŏk kơ jơ phŭt noh, inh đei kơ jet kơdih: rŏ lăng tơdrong ‘mêm mơnat păng tơ jur akâu jăn kơdih thoi noh hăm đei sơlam kơ bre bơngai mă ayăt dih băl?

Đei hơ’mon lăm phim so bơih mă inh hơ-iă đei pơm kơ inh đei tơdrong tơchĕng jrŭ gah tơdrong âu. Noh jơ̆ The Rebel(1959), bơngai pơdah tơm noh Johnny Yuma – minh ‘nu bơngai lĭnh so đơ̆ng rŏng kơ tơdrong tơblah Lăm Dêh Char, sư chă yak jơ̆p jang anih wă chă tơdrong anăn lăm chăl arih.

Lăm sơ̆p hơ’mon phim noh, Johnny tơblah hăm minh ‘nu bơngai juăt kơ pơm kơnê̆ kơ sư lăm pơlei. Tơdrong sư pơm noh đei pơm ăn kơ minh ‘nu bơngai pơcheh tơdrong hơ’mon lăng ‘bôh. Sư lăp đon dêh kơ tơdrong ‘lơ̆ng gah ‘ngoaih Johnny, na sư pơtơm chih pơcheh gah Johnny thoi lĕ kơ minh ‘nu bơngai nuih kơtang, wă pơm ăn kơ tơ’ngla yŏng sư lăp đon. Mă-lei, tơpă tơdrong noh tă kơ tơplơ̆ kơ tơdrong sư hơmĕng. Dôm tơdrong sư pơcheh ưh kơ pơm ăn kơ kon pơlei pơ-ư Johnny ôh, sơmă pơm kơ đe hiĕk ăr chebơle kơ sư lăm pơlei.

Kơplah sư băt tơdrong anăn sư đei pơjing đơ̆ng minh tơdrong pơcheh ưh kơ tơpă, Johnny năm chă bơngai mă đêl sư tơblah mă kĕ jĕi, păng sư pơm minh tơdrong mă đĭ đăng ‘bôh hlĭch. Tơplih kơ sơng iŏk tơdrong pơ-ư pơ-ang dah tơ’bôh akâu jăn sư kơdih thoi lĕ minh ‘nu bơngai kơtang, sư sơtơ̆p kŭl tăng wă sŭt chơkhŏ kơ bơngai noh. Sư ưh kơ chă iŏk tơdrong pơ-ư đơ̆ng tơdrong pơcheh hơlĕnh noh ôh.

Rup noh oei răk lăm đon tơchĕng inh lơ sơnăm. Noh jơ̆ minh tơdrong pơdah ‘lơ̆ng rŏ gah tơdrong tơ jur akâu păng tơdrong ‘mêm kơplah tơkan ‘bơ̆t anăp bơngai ayăt. Mă-lei, đĭ đăng noh tơ’bôh tơdrong pơm lăng hmă đĕch kơplah dan jê̆ tơdrong mă Yang Yêsu đei pơm lăm Yôhan chăl 13. Pơtao Tih Hloh kơ đĭ-đăng lu pơtao sơtơ̆p kŭl tăng ôp jơ̆ng kơ lu bơngai jơ̆ng ‘bang Sư. Păng lăm lu bơngai mă Sư ôp jơ̆ng năr noh đei Juđa – bơngai mă wă blơ̆ blĕch Sư.

Mă-lei, Kră Yang Yêsu khan: Inh ‘Bok Thây iĕm păng Yŏng iĕm, mă-lei Inh ôp jơ̆ng iĕm dang Inh pơm đĭch iĕm đĕch, mă iĕm athei ôp dih băl jơ̆ng iĕm. Inh ôp jơ̆ng iĕm noh, Inh pơm tơ’bôh kơ iĕm hơdrol wă kơ iĕm pơm kiơ̆ dih băl thoi noh.” (Yôhan 13:14-15)

‘Mêm lu bơngai mă ‘mêm kơ lu bơ̆n noh jơ̆ tơdrong juăt kơ đei lăm kon bơngai bơ̆n. Mă-lei Kră Yang Yêsu krao wơ̆n lu bơ̆n năm hơtaih ‘biơ̆ hloh kơ tơdrong juăt noh: ‘mêm mơnat kơ lu bơngai mă pơm kơnê̆ kơ lu bơ̆n. Noh jơ̆ minh tơdrong tơm lăm Tơdrong ‘Nao ‘Lơ̆ng – tơdrong ‘mêm mă kon bơngai ala teh âu ưh kơ gơh hơ-iă tôm. Kơplah lu bơ̆n jơ̆ bơngai yoch, ayăt kơ ‘Bok Kei-Dei, ‘Bok Krist ‘mêm kơ lu bơ̆n păng lôch tang lu bơ̆n.

Hăm đei bơngai bu pơm kơ ih sơ’ngon, dah pơjăm ih ưh? Tơdah Kră Yang Yêsu krao ih “ôp jơ̆ng” kơ bơngai noh, ih gô pơm thoi yơ? Gô thoi yơ dah ih rơih iŏk tơdrong ‘mêm mơnat tơplih kơ tơdrong pơm kơnê̆; rơih iŏk tơdrong iŏk đon dim tơplih kơ tơdrong rong răk, păng thĕng hrĕh krao khan ăn kơ bơngai mă đei pơm kơ ih jĭ jơhngơ̆m?

Johnny Yuma ưh kơ đei bu pơrơ̆ng sư pơm tơdrong ‘lơ̆ng kơ bơngai mă ayăt kơ sư. Mă-lei, sư rơih iŏk tơdrong tơ jur akâu tơplih kơ tơdrong wă tơ’bôh pơ-ư akâu jăn sư kơdih. Păng Kră Yang Yêsu pơm kăl hloh kơ noh. Sư ưh kơ kư̆ bơtho gah tơdrong iŏk đon ala ôh, sơmă kơdih akâu jăn Sư jơ̆ Tơ’ngla tơdrong ‘mêm mơnat noh. Sư sơtơ̆p kŭl tăng ôp jơ̆ng ăn kơ lu jơ̆ng ‘bang Sư, hăm Juđa hloi, bơngai wă blơ̆ blĕch Sư. Păng Sư kư̆m oei krao wơ̆n lu bơ̆n yak kiơ̆ tơdrong noh

Apĭnh đĭ đăng krao khan hơdai: Kơkuh kơ Ih Kră Yang, năr ‘nâu kon apinh sơtơ̆p kŭl tăng ‘bơ̆t anăp Ih. Apinh Ih bơtho kon băt ‘mêm mơnat thoi Ih đei ‘mêm mơnat kơ kon, păng băt bơ̆jang tơgŭm bơngai nai iŏk jơhngơ̆m đon ala, mă khan tơdrong noh ưh kơ ‘bônh ôh. Apinh tuh ăn kơ kon jơhngơ̆m pran wă kơ đei mơnat ăn păng jơhngơ̆m pơ̆n nuih wă rơih iŏk tơdrong iơ̆m dim tơplih kơ tơdrong pơm tơplơ̆ kơ đe. Apinh tuh ăn tơdrong ‘mêm Ih lăm jơhngơ̆m kon wă kơ kon đei ‘mêm mơnat kơ lu bơngai mă pơm pơjĭ kon. Hơpơi tơdrong arih kon pơdah tơdrong ‘mêm mơnat Ih lăm tôm tơdrong. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdrong ‘mêm ‘Bok Krist ling lang yak hlôi hloh kơ dôm tơdrong juăt dôm lu plei nuih kơnê̆ tơ ala teh âu. Bơ̆jang tơgŭm kơ bơngai mă pơm kơ bơ̆n jĭ lăm jơhngơ̆m ưh kơ ba ăn tơdrong ư-ang kiơ̆ kơ bơngai ala teh, mălei pơih ăn trong kơ tơdrong pơklaih păng chơ̆n hơđơ̆ng lăm jơhngơ̆m lu bơ̆n. Apinh Kră Yang tuh ăn kơ iĕm ‘bĕnh blai tơdrong ‘mêm mơnat Sư wă kơ ‘mêm thoi Sư đei ‘mêm, mơnat ăn thoi Sư đei mơnat ăn, păng tơjur akâu jăn bơ̆jang thoi Sư đei pơm kơmĭl ăn kơ lu bơ̆n. Năr âu, Kră Yang Yêsu oei krao ih wă kơ đei ‘mêm mơnat păng bơ̆jang tơgŭm bơngai bu, mă khan ih mơn bơngai noh ưh kơ trŏ kơ mơnat ră?

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.