Lăm tơdrong arih, đei dôm lu tơdrong lu bơ̆n pơnam adrin pơm păng wei răk hăm đĭ jơhngơ̆m, mă ưh kơ đei rôp răk ling-lang lăm tơpang ti bơ̆n ôh. Đei găr adrĕch rĕi hăm đak măt, đei dôm tơdrong mă bơ̆n kăl kơ chang gô khŏm khŏm, păng kư̆m đei kơplah lu bơ̆n drơ̆ng iŏk kơdŭn tơrŏng, pơjao dôm lu tơdrong mă bơ̆n ‘mêm lăm tơ tơpang ti Kră Yang. Đei kơplah, tơdrong gleh hloh jơ̆ thoi yơ lu bơ̆n gơh pơjao tôm tơdrong jang tơ tơpang ti Kră Yang, păng oei đei jơhngơ̆m hiôk-hian wă kơ lui kơjăp kơ Kră Yang, Sư oei pơtrơp bơ̆jang tơdrong Sư.

Năr ‘nâu, năr 16/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai RĔI PƠTĂM LĂM ĐON LUI, ACHĂNG LÊ̆ LĂM LUI GƠNANG.

“Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆. Wă truh tơ kră lu sư huay kơ weh dơ̆ng trong noh.” (Tơdrong Pơđơ̆k 22:6)

Lăng ‘bơ̆r kon nge hơ iă dêh “Amen” re dêh, na ‘bĭch đang tơ kơpal giơng, hiôk chơt păng tep hloi, jơhngơ̆m inh ‘bĕnh kơ tơdrong bơnê kơ ‘Bă mă ‘mêm. Dôm năr krao khan hơdai hiôk ‘lơ̆ng noh tĕnh ‘bônh kơ hlôi. Đơ̆ng rŏng kơ noh, inh hăm kon năm tơ dôm lu năr akŭm hơ’lơ̆p, na truh tơ dôm năr akŭm hơ’lơ̆p kư̆m ‘bônh kơ keh đang. Păng kơplah inh hăm kon krao khan hơdai hăm kon lăm jơ akŭm lu hơ’lơ̆p noh kư̆m ‘bônh kơ keh đang.

Jơ năr nhen thoi ‘brơm prah, trŏ tơpă! “Bơnê kơ Kră Yang đei oei hơdai hăm kon ling-lang, chông anhăk kon lăm tơdrong bơtho pơhrăm kon inh ăn kơ Ih. Bơnê kơ ‘Bă đei bơtho kon băt pŭ iŏk wei rong kon drŏ kăn ‘lơ̆ng hơ iă”. Na inh mơn băt khan, ưh kơ rim ‘nu bơngai Kră Yang ăn kơ đei jơ năr oei hơdai, wei rong păng bơtho đơ̆ng kơdih.

Thoi Sơ̆p Hla Bơar Nơ̆r ‘Bok Kei-Dei lăm Lĕch Đơ̆ng Êyiptơ chăl 2 tơ’bôh ăn kơ bơ̆n ‘bôh bơngai mĕ anăn Jôkêbêt. Hăm jơhngơ̆m nuih kơtang păng đon lui kơjăp hrĕp lăm jơhngơ̆m, Jôkêbêt đei hơdai tơgŭm pơjing jơhngơ̆m đon Môis bơ̆jang kơ Kră Yang jao ăn, lăm jơ năr tŏsĕt mă sư đei oei hơdai hăm kon sư. Lăm tơdrong mơsêh mơyang đơ̆ng Kră Yang ‘Bok Kei-Dei, kiơ̆ tơdrong pơgơ̆p Sư hăm ‘bok Abraham, kon pơlei Isơrael pơjing rai lơ, rai kơdrâ̆m hlĭch chrơp tơpă păng rai đunh jing mơdrŏng pran kơtang tơ dêh Êyiptơ lăm 400 sơnăm.

Na Sơ̆p Hla Bơar Nơ̆r ‘Bok Kei-Dei lăm Lĕch Đơ̆ng Êyiptơ chăl 1 păng chăl 2 tơ’bôh kơ lu bơ̆n lăng tơ minh jơhnơr măng mu kon pơlei Isơrael, kơplah Pharaôn khan tơtă kơ đĭ-đăng kon pơlei sư kơdih thoi âu: “Mưh iĕm ‘bôh lu bơngai Hêbrơ ‘nao tơpŭ kon drŏ-nglo iĕm klơ̆m lê̆ tơ đak krong Nil; kon drŏ-kăn iĕm rong sư arih.” (Lĕch Đơ̆ng Êyiptơ 1:22). Lăm kơplah pơlôch bơngai ‘bĕnh kơ tơdrong ơh sơ’ngon noh: “Đei minh ‘nu lăm adrĕch adrung Lêwi rôp bơngai adruh Lêwi pơm akăn. Drŏ-kăn ei anăp, na tơpŭ kơ minh ‘nu kon drŏ-nglo; ‘bôh kon drŏ-nglo ‘lơ̆ng dêh tơpă, na ôn lê̆ lăm pêng khei.” ( Lĕch Đơ̆ng Êyiptơ 2:1-2)

Dôm sơnăm jang gleh hrat pơmat-tat lăm tơdrong pơgŏ pơđep đơ̆ng pơtao Pharaôn kơnê̆ noh, kư̆m ưh kơ gơh pơrăm lê̆ đon lui Jôkêbêt, minh ‘nu kon adruh lăm adrĕch Lêwi, mă sư lui kơ Kră Yang ‘Bok Kei-Dei lu sư. Đon lui noh pơm ăn kơ Jôkêbêt đei nuih kơtang, wei rong kon sư hrĕp hreh lăm kơplah lu linh pơtao chă pơlôch lu kon nge drŏ-nglo. “Mĕ ‘bă Môis kư̆m đei đon lui, na lăp bre sư tơpŭ kơ nge Môis, na bre sư lăng nge ‘noh ‘bak ‘lơ̆ng, na bre sư ôn nge ‘noh truh tơ pêng khei, kơlih kơ kơplah noh ‘bok pơtao chă pơlôch đĭ lu kon nge drŏ-nglo. Mă-lei mĕ ‘bă Môis ưh kơ hli kơ ‘bok pơtao ôh. Jơhngơ̆m bre sư oei hiôk đĕch.” (Hêbrơ 11:23)

Na tơdrong mơsêh mơyang ‘Bok Kei-Dei oei arih păng pran kơtang đei hơtŭt bơm Jôkêbêt đơ̆ng kơplah sư achăng lê̆ bai hre mă pik chai hơngo, tơ’bĭch kon drŏ-nglo sư pêng khei lăm noh, na ming ôn đông ro kiơ̆ kơ đak krong, truh tơ kơplah sư sơng iŏk kon sư đơ̆ng kon adruh pơtao Pharaôn dơ̆ng, na kon adruh pơtao ăn kơ sư iŏk nge noh wih tơ hnam wei rong tơmŏm, hăm tơdrong wei-lăng đơ̆ng kon adruh pơtao.

Minh tơdrong mơsêh mơyang hlĭch tơpă mă Kră Yang ‘Bok Kei-Dei pơm ăn kơ minh ‘nu mĕ oei lăm tơdrong pơmat-tat păng jơhngơ̆m rơdu đei ba ăn đon lui kơ Jôkêbêt đơ̆ng dôm lu tơdrong sư kơtơ̆ng ră roi rim jơhnơr đơ̆ng lu ‘bok yă sư, truh tơ sư kơdih băt tơpă kơ tơpang ti Kră Yang đei pran kơtang tôm tơdrong mă dŏng pơklaih kon sư. Đon lui noh oei kơjăp lăm tơdrong hlôh wao mơsêh mơyang đơ̆ng Kră Yang đei pran kơtang, tơdrong mă Jôkêbêt ‘bôh hăm măt sư, na đon lui noh hrĕp hrĕh đei tơ’bôh ăn kơ jơhnơr tơ anăp: Arôn, Miriam, păng tih hloh jơ̆ Môis. Wă jê̆ tơhngam jĭt sơnăm hlôi boih, dôm tơdrong Môis đei ‘bôh, kơtơ̆ng păng đei rĕi lăm jơhngơ̆m sư đơ̆ng mĕ sư mă lui kơjăp kơ Kră Yang, tưk tơ iung pran kơtang kơplah sư kơtơ̆ng ‘bơ̆r Kră Yang pơma đơ̆ng lăm jơla ŭnh oei sa: “Inh boih Kră Yang ‘Bok Kei-Dei ‘bok ih, Kră Yang ‘Bok Kei-Dei Abraham, Kră Yang ‘Bok Kei-Dei Isăk păng Kră Yang ‘Bok Kei-Dei Jakôp. Môis đơ̆p măt sư hloi yua kơ sư hli ưh kơ pơ̆n lăng tơ Kră Yang ‘Bok Kei-Dei.” (Lĕch Đơ̆ng Êyiptơ 3:6). Anăn Kră Yang ‘Bok Kei-Dei pơm ăn kơ Môis ‘blŏk kơ sư noh jơ̆ bu, păng sư jing kon pơlei bu.

Kơplah Jôkêbêt chu yom păng tơpăt lăm tơdrong bơtho Môis, rĕi lăm jơhngơ̆m sư tơdrong băt kơ Kră Yang ‘Bok Kei-Dei ưh kơ minh Kră Yang ‘bok yă sơ̆ đĕch ôh, mă Sư Kră Yang arih ling-lang păng đei tơ’bôh lăm tơdrong arih Jôkêbêt, sư băt kơ jơ năr sư đei oei hơdai hăm kon noh tŏsĕt đĕch. Na gô truh tơ trŏ kơ jơ năr, Jôkêbêt kăl kơ achăng lê̆, jao tơdrong arih kon drŏ-nglo sư tơ tơpang ti Kră Yang ‘Bok Kei-Dei mă măt sư ưh kơ đei ‘bôh. Mă-lei tơdrong Kră Yang oei hơdai hăm sư, sư băt tơpă na ưh kơ layơ lê̆ đơ̆ng jơhngơ̆m sư. “Truh wơ̆ ‘lŏ wao boih, mĕ sư chông ba sư năm ăn kơ kon adruh pơtao, kon adruh pơtao iŏk pơm kon, sư krao anăn noh Môis yua kơ sư khan: Đêl inh iŏk pơklaih sư đơ̆ng đak.” (Lĕch Đơ̆ng Êyiptơ 2:10). Tơdrong hiôk kơplah Jôkêbêt băt kơ kon sư klaih đơ̆ng tơdrong lôch, đơ̆ng tơpang ti sư đei wei rong, tơmŏm păng bơtho pơhrăm kon sư, na kư̆m tĕnh hlôi kơ tơdrong noh.

Oei lăm Nơ̆r Kră Yang, inh mơn băt kơ jơhngơ̆m Jôkêbêt. Kơplah sư chông ba kon năm ăn kơ kon adruh pơtao Pharaôn, rŏ lăng Jôkêbêt kư̆m đei tơblah lăm jơhngơ̆m wă lui gơnang kơ Kră Yang ‘Bok Kei-Dei, kơplah sư lăp đon ăn kon sư lĕch năm lăm minh tơdrong arih tơ tơmoi, ‘bĕnh kơ tơdrong pơlong lăng kơ đon lui mă sư đei rĕi lăm jơhngơ̆m.

Kư̆m thoi inh mơ̆n, lăm năr lu kon hơlơ̆p inh iŏk hla bơar keh bơih kơ tơdrong hŏk, jơhngơ̆m inh ‘bĕnh kơ tơdrong hiôk kơplah ‘bôh lu kon pơm truh tôch tơdrong hŏk tơ anih hŏk lăm kơjung, mă tơ lăm jơhngơ̆m inh đei tŏsĕt tơdrong hli păng ưh kơ hiôk. Thoi Jôkêbêt chông ba kon sư ăn kơ kon adruh pơtao Pharaôn, inh băt kơplah kăl kơ achăng lê̆, achăng lê̆ lu kon yak năm lăm tơdrong arih kơdih. Lăm tơdrong arih dang ei, hăm internet păng tơdrong hlôh wao đơ̆ng kơmăi, ‘bă tơm kơ tơdrong hơlĕnh păng pơklơ̆p lê̆ tơdrong tơpă tơpăt.

Mă Kră Yang oei ‘mêm mơnat tơpă. Sư chông anhăk inh truh tơ đak hiôk-hian, pơih ăn kơ măt inh ‘bôh đon lui Jôkêbêt đei bluh pơkao păng jing plei. Dôm sơnăm arih lăm hnam pơtao Pharaôn mă ‘bĕnh kơ tơmam mơdrŏng, dôm lu tơdrong tơchĕng hlôh kơ Êyiptơ păng dôm tơdrong pơm pơjâu noh kư̆m ưh kơ gơh pơtôch găr adrĕch gah Kră Yang ‘Bok Kei-Dei đei pran kơtang, ‘bĕnh kơ tơdrong ‘mêm mơnat. Găr adrĕch iĕ mă Jôkêbêt chu yom păng tơpăt rĕi lăm jơhngơ̆m kon sư noh đei iung pran kơtang lăm Kră Yang ‘Bok Kei-Dei. Sư pơm ăn găr adrĕch noh rai tih, đei bluh pơkao păng jing đei plei. Tơdrong sĭt gah Kră Yang ‘Bok Kei-Dei đei pran kơtang, jơhnơr kon pơlei Isơrael lăm Môis pran kơtang hloh kơ đĭ-đăng dôm lu ayăt lăm măng mu mă Pharaôn păng dêh Êyiptơ kơkuh. Môis lăp đon rơih iŏk đon lui đơ̆ng mĕ sư păng kon pơlei sư, thoi Sơ̆p Hla Bơar Nơ̆r ‘Bok Kei-Dei chih: “Truh tơ Môis tơdăm ‘lŏ boih, yua kơ sư đei đon lui, sư kuă kơ oei păng mĕ thăm sư kon pơtao Pharôn. Sư ‘maih iŏk tơdrong pơmat-tat hơdai hăm lu bôl sư kon ‘Bok Kei-Dei hloh kơ sư oei hiôk jơnap tơ lăm hnam ‘bok pơtao, mă oei pơm yoch; păng tơdrong hiôk jơnap kon bơngai ưh kơ đunh ôh.” (Hêbơrơ 11:24-25)

Tơdrong arih păng tơdrong juăt hnam dơnŏ kon pơlei Việt Nam đơ̆ng sơ̆ pơm ăn kơ inh tơchĕng kon hơlơ̆p jơ̆ jing mŭk tơmam mĕ ‘bă. Yua kơ thoi noh, lăm tơdrong jing mĕ ‘bă, bơ̆n tơchĕng kơ bơ̆n gơh tôm tơdrong wă bơtho, chông anhăk păng rơih iŏk tơdrong arih ning-mônh ăn kơ lu kon kiơ̆ kơ kơ bơ̆n wă kơdih. Mă-lei Nơ̆r Kră Yang đei pơih măt jơhngơ̆m inh păng tơplih tơdrong lăng inh: “Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆. Wă truh tơ kră lu sư huay kơ weh đơ̆ng trong noh.” (Tơdrong Pơđơ̆k 22:6)

Inh rai hlôh băt dơ̆ng, lăm trong jing mĕ ‘bă, Kră Yang krao lu bơ̆n tơpăt rĕi găr adrĕch Nơ̆r Sư lăm jơhngơ̆m lu kon. Na truh tơ trŏ kơ kơ jơ năr Sư pơkă, bơ̆n kăl kơ hŏk achăng lê̆ hăm đon lui ngeh, jao lu kon lăm tơdrong tơdă Sư, mă Kră Yang ‘Bok Kei-Dei đei dan ăn kơ rim tơdrong arih đơ̆ng blŭng-a sơ̆.

Oei lăm tơdrong Kră Yang tơhlôh ăn kơ inh, inh ‘bôh Kră Yang ‘Bok Kei-Dei tih hloh: “Păng wă kơ iĕm băt kơ Sư Kră Yang mơsêh tăp pang mơyang tăp dăr gơh tơgŭm lu bơ̆n bơngai lui kơ Sư,” na “ăn kơ Sư pơgơ̆r tôm lu ‘bok pơgơ̆r, lu linh jang, lu yang nai, tôm kơ lu Sư pơgơ̆r mă pơgơ̆r dang ei, mă pơgơ̆r ning-mônh dah layơ tă Yêsu pơgơ̆r ngăl.” (Êphêsô 1:19, 21)

Tơdrong noh pơm ăn kơ jơhngơ̆m inh hiôk-hian tơpă, păng inh rai ‘maih wă chơchă, hŏk pơhrăm păng iŏk tơdrong Kră Yang hơmet ăn, wă kơ inh đei arih hơdai hăm lu kon wơ̆ ‘lŏ truh tơ adruh tơdăm.

Apĭnh đĭ đăng krao khan hơdai: Kơkuh kơ Kră Yang ‘Bok Kei-Dei, Kon bơnê kơ Ih yua kơ Ih ‘mêm kơ kon, lui kơ kon păng jao ăn kơ kon minh tơdrong wă wei rong, bơtho pơhrăm lu kon hơ’lơ̆p arih ăn kơ Ih. Bơnê kơ Kră Yang Yêsu Krist đei huai iŏk lu nhôn, chông ba lu nhôn wih trŏ kơ anih păng ‘Bok Kei-Dei đei pơkă ăn kơ mĕ ‘bă đơ̆ng blŭng-a sơ̆. Bơnê kơ Yang Bơhngol ‘Lơ̆ng mă oei lăm lu nhôn, ling-lang krăng kơchăng hơmet ăn, chông anhăk păng ăn kơ lu nhôn gơh hơgei hlôh wao, wă kơ lu nhôn đei pơm trŏ pŭ iŏk jing mĕ ‘bă kiơ̆ tơdrong wă ‘lơ̆ng đơ̆ng Ih. Apinh Ih tơgŭm kon lui gơnang kơjăp khan Tơ’ngla mă ăn lu kon hơlơ̆p păng kơ kon, kư̆m jơ̆ Tơ’ngla mă ‘mêm kơ lu sư hloh kơ kon đei ‘mêm, wei rong lu sư ‘lơ̆ng hloh kơ kon đei wei rong, păng chông anhăk lu sư lăm tơdrong wă ‘lơ̆ng mă Ih đei pơkă ăn kơ rim tơdrong arih đơ̆ng adrol kơ Ih tam mă pơjing plĕnh teh sơ̆. Apinh dôm lu găr adrĕch Nơ̆r Kră Yang mă đei rĕi lăm jơhngơ̆m lu kon hơ’lơ̆p gô chăt rơh, wơ̆ ‘lŏ, jing bluh pơkao păng jing đei plei, wă kơ anăn Ih đei ư-ang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Nơ̆r Kră Yang lăm Yakơ 4:14 khan: “Mă-lei iĕm ưh kơ băt kơ năr dơning iĕm thoi yơ, băt kơ iĕm oei arih băt kơ thoi yơ. Tơdrong arih bơ̆n thoi lĕ kơ tŭk, dang ei bơ̆n oei ‘bôh sư gom kông, pă ‘biơ̆ kơ ‘noh ưh pă ‘bôh kiơ dơ̆ng”, Jơ năr Kră Yang ăn kơ lu bơ̆n đei tơgŭm bơtho pơhrăm păng jing tơdrong ‘lơ̆ng ăn kơ jơhnơr hơ’lơ̆p tơ anăp, ưh kơ đei ling-lang ôh. Yua kơ thoi noh, athei lu bơ̆n lăng kiơ̆ tơdrong arih Jôkêbêt, athei yua iŏk kơplah hiôk ‘lơ̆ng mă Kră Yang ăn, wă rĕi găr adrĕch lăm jơhngơ̆m lu kon sâu lu bơ̆n, rĕi lăm jơhngơ̆m jơhnơr tơ anăp mă Kră Yang pơkă ăn oei jum dăr kơ lu bơ̆n, wă kơ lu sư băt tơdrong trŏ đơ̆ng Kră Yang ‘Bok Kei-Dei, Tơ’ngla mă pơjing, ‘mêm mơnat, Tơngla mă lu hơ’lơ̆p jing kon Sư. Đơ̆ng lăm hnam dơnŏ, đơ̆ng lăm Hnam Akŭm, apinh lu bơ̆n tơgŭm jơhnơr tơ anăp băt kơ Kră Yang, ‘mêm păng hli yom kơ Sư, yak kiơ̆ trong Sư, wă kơ “mă truh tơ kră lu sư huay kơ weh đơ̆ng trong noh.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.