Yog muaj ib tug neeg txawv txav nkag los rau hauv koj lub tsev, nrhiav kev coj ib yam khoom qub txeeg qub teg uas muaj nqis ntawm koj tsev neeg mus, koj thawj qhov kev xav yeej yuav yog sawv los tawm tsam, puas yog? Peb tibneeg yeej txaus siab tsa ntau txheej laj kab los tiv thaiv tej khoom muaj nqis hauv ntiajteb no, tiamsis thaum peb tej qub txeeg qub teg sab ntsujplig uas tsis muaj nqis dabtsi yuav muab piv tau raug yeebncuab txeeb mus, peb ho tsis quav ntsej li. Puas yog muaj ib zaug twg koj nyob hauv koj lub neej uas qhuav qhawv ib yam li ib tug neeg txom nyem, txawm yog koj tseem nyob saum tej qub txeeg qub teg uas muaj koob hmoov uas tus Tswv twb npaj tseg rau koj lawm?

Hnub no, yog hnub 17/09/2026, peb kev Thov Vajtswv Txhua Hnub thov caw koj los nrog peb kawm Vajtswv Txoj Lus dhau los ntawm tus sau Martha Noebel muaj lub ntsiab QUB TXEEG QUB TEG NTAWM SAB NTSUJ PLIG

“Kuv muab kuv txojkev kaj siab rau nej. Kuv txojkev kaj siab uas kuv muab rau nej tsis zoo li lub ntiajteb muab. Nej tsis txhob cia nej lub siab ntxhov, thiab tsis txhob ntshai.” (Hauv Yauhas 14:27)

Koj puas tau txais ib qho qub txeeg qub teg dua ib zaug? Tej zaum yog ib co nyiaj, ib lub tsev, ib thaj av lossis ib yam khoom qub txeeg qub teg uas muaj nqis heev uas tau muab xa dhau ntau tiam neeg los. Thaum koj yog tus txais qub txeeg qub teg raws cai, tej qub txeeg qub teg ntawd yog koj li. Koj muaj cai khaws cia, siv thiab txaus siab rau yam uas tau muab pub rau koj.

Tiamsis yuav ua li cas yog muaj ib hnub twg muaj ib tug txhob txwm xav txeeb koj tej qub txeeg qub teg ntawd? Muaj tseeb tiag, koj yuav nrhiav txhua txojkev los tiv thaiv thiab rov muab yam uas yog koj li qub los. Rau qhov ntawd yog koj txoj cai txais qub txeeg qub teg raws cai, thiab tsis muaj leejtwg muaj cai txeeb yam ntawd ntawm koj mus.

Tam sim no, cia peb ua tib zoo xav txog peb tej qub txeeg qub teg saum ntuj ceeb tsheej. Thaum Tswv Yexus tawm hauv ntiajteb no mus, Nws puas tau tseg ib yam dabtsi rau peb?

Hauv Yauhas 14:27, Nws hais tias: “Kuv muab kuv txojkev kaj siab rau nej. Kuv txojkev kaj siab uas kuv muab rau nej tsis zoo li lub ntiajteb muab. Nej tsis txhob cia nej lub siab ntxhov, thiab tsis txhob ntshai.”

Txojkev kaj siab tiag tiag yog ib qho ntawm tej qub txeeg qub teg uas muaj nqis heev uas Tswv Yexus tus Cawmseej tau tseg rau cov uas yog Nws li.

Tiamsis peb tus ntsujplig tus yeebncuab yeej nrhiav kev txeeb txojkev kaj siab ntawd ntawm peb mus. Qhov tseeb, nws tsis muaj cai ua li ntawd, tiamsis nws lub neej yeej yog tus tub sab tub nyiag.

Yog li ntawd, peb yuav tsum sib ntaus! Yog muaj ib tug txhob txwm xav txeeb koj tej qub txeeg qub teg uas yog koj li raws cai, yeej yuav yog koj mus foob nws rau hauv tsev hais plaub thiab lees paub tias: “Cov khoom no yog kuv li raws cai!”
Yog li peb puas tabtom ua li ntawd rau peb tej qub txeeg qub teg saum ntuj ceeb tsheej thiab? Thaum Xatas nrhiav kev txeeb txojkev kaj siab ntawm peb mus, peb puas txiav txim siab sib zog sib ntaus? Peb puas muaj cuabkav hais nrov nrov tias: “Tsis muaj leejtwg muaj cai txeeb txojkev kaj siab uas tus Tswv muab rau kuv mus!”?

Yog koj tsis ntseeg tias koj yog tus txais qub txeeg qub teg tiag tiag, koj yeej yuav tsis muaj cuabkav txais lossis txaus siab rau yam uas yog koj li. Tiamsis kev txais tej qub txeeg qub teg ntawd yog koj txoj cai raws cai.

Koj thiab kuv twb tau txais txojkev kaj siab uas tus Tswv muab rau peb kom peb txaus siab rau thaum peb tseem ua neej nyob hauv ntiajteb no. Qhov ntawd yog txojkev kaj siab uas dhau txhua txojkev totaub, thiab tej qub txeeg qub teg ntawd yog peb li tiag tiag!

Ib yam li Vajtswv Txojlus hais hauv 1 Petus 5:7 tias: “Cia li muab nej txhua yam kev txhawj xeeb tso plhuav rau nws, vim nws mob siab nej.”

Cia li tso siab lug muab txhua lub nra hnyav rau hauv Nws txhais tes uas muaj kev hlub, kom tus Tswv txojkev kaj siab uas puv npo kav thiab coj koj lub siab hnub no.

Thov caw nrog kuv peb thov Vajtswv ua ke: Tus Tswv Yexus, kuv ua koj tsaug kawg siab kawg ntsws vim tej qub txeeg qub teg uas muaj koob hmoov uas Koj tau nchuav los rau saum kuv lub neej. Txojkev cawm dim, txojkev kho kom zoo, txojkev kaj siab thiab lub hwjchim—txhua yam no twb tau muab pub rau kuv dhau los ntawm Koj cov ntshav uas muaj nqis heev. Kuv lub siab ntshaw xav txais kom puv npo txhua yam uas Koj twb npaj tseg rau kuv dhau los ntawm Koj txojkev txom nyem thiab Koj txojkev txi. Thov tus Tswv pab kom kuv ibtxwm ceevfaj los tiv thaiv tej qub txeeg qub teg saum ntuj ceeb tsheej ntawd, thiab thov Koj qhia kom kuv pom yog muaj ib yam dabtsi uas kuv tsis txhob txwm cia tus yeebncuab txeeb ntawm kuv lub neej mus. Kuv thov txhua lo lus no los ntawm Tswv Yexus Khetos lub npe, Amees!
Tus phooj ywg, nyob rau lub sijhawm no, cia li tseg ib lub sijhawm ntsiag to los mus soj ntsuam txog koj lub siab lub ntsws. Seb puas muaj yam dab tsi nyob rau hauv koj lub neej tab tom ua rau koj txhawj xeeb, tsis paub ua li cas lossis tsis hnov qab siab? Tej yam ntawd tej yog ib tug txheeb ze ntawm koj nws tsis tau txais kev cawm dim lossis kev kho zoo mob, nyob rau ntawm tej kab mob hauv nws tus kheej thiab tseem tshuav ntau yam kev txhawj xeeb tab tom los raug rau nws lub neej. Txawm tias lub nra ntawd yuav nyhav npaum li cas xij, cia li coj txhua yam kev txhawj xeeb ntawd los fij thiab tso rau ntawm Tus Tswv Yexus Khetos lub xwb ntiag. Cia li muab txhua yam kev txhawj ntshai rau Vaj Tswv, kom tau txais txhua yam uas Vaj tswv tau npaj tseg rau nws cov menyuam.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.