Muaj ntau tus yeej nkag siab yuam kev tias thaum uas ntseeg Vajtswv thiab ua lub neej raws li Vajtswv lub siab nyiam lawm, ces tej teeb meem tamsim lossis tej teeb meem yuav tshwm los tom ntej no yuav ploj mus. Peb cim civ xav txog ib lub neej zoo: txhua lub qhov rooj yuav qhib lug, tej teeb meem yuav ntsiag to thiab lub neej txij ntawd mus yuav hloov pauv thiab tsuas muaj tshav ntuj lawm xwb. tiamsis khuv xim tshaj, tej kev xav no tsis yog tsuas yuam kev Vajluskub xwb tiamsis nws tseem tsis yog li qhov tseeb. Kev ntseeg tsis yog daim thaiv pab kom peb zam tau tej teeb meem hauv ntiajteb no. tiamsis kev ntseeg yog lub hauv paus zog pab kom peb sawv khov kho thaum uas lub ntiajteb yuav pob puas ntawm peb txhais taw.

Hnub no, yog hnub 19/09/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm VIM LI CAS TUG NEEG ZOO HO NTSIB KEV TSIS ZOO?

“Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm.” (Yauhas 16:33)

Peb tab tom ua neej nyob rau lub ntiajteb muaj kev puas tshuaj vim tej kev txhaum. Nyob hauv ntiajteb no, teeb meem, kev quaj ntsuag lossis ib qhov kev mob twg yog yam nyuaj uas peb yuav nyuaj zam kom dhau. Vajluskub twb ntxov ceeb toom tias tej kev txomnyem yuav tshwm los, vim nag yeej tseem poob los rau saum tus ncaj ncees thiab tsis ncaj tib si. Yeej tsis muaj leej twg yuav tsis raug kev sim siab, kev quaj ntsuag lossis kev puas tshauj. Txawm yog Tswv Yexus los thaum tseem nyob ntiajteb, Nws kuj los kua muag thiab.

“Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm.” (Yauhas 16:33).

Vajluskub yeej tsis cog lus tias peb lub neej no yuav yog kev tiaj xwb, tiamsis Vajtswv tej lus tab pov ib nqe tias: koj yuav tsis muaj hnub nyob ib leeg thaum koj ntsib cua daj cua dub. Tswv Yexus yeej nyob ntawd, zoo siab hlo ntxiv zog thiab pab peb tej uas peb cheem tsum. Txawm yog lub caijnyoog ntawd yuav phomsij npaum cas, Vajtswv yeej tshua thiab tu koj (saib Ntawv Nkauj 23:4, Mathais 28:20).
Hnub uas kuv tus txiv cia li tag sim neej sai sai rau xyoo 2023, kuv lub siab muaj ntau lo lus nug tsis muaj lus teb. Kuv cim civ nug tias vim li cas nws ho tuag ntxov ua luaj li ntawd. Kuv xav paub saib Vajtswv tab tom nyob qhov twg hauv kuv tej kev mob, thiab Vajtswv lub siab nyiam yog dabtsi thaum tej teeb meem ntawd tshwmsim los raug rau kuv? Muaj tej lub sijhawm kuv tseem mob siab, xav tias tsis paub yus puas yuav ua tau lwm yam txawv los hloov pauv qhov teeb meem ntawd.

Puas tau muaj zaum twg koj kuj poob rau tej lub sijhawm tsis paub ua li cas lawm tau? Tseeb tiag, qhov uas peb pheej cim civ nug tias vim li cas txhua yam ho tshwmsim zoo li ntawd, lossis kheev lam kuv ua txawv ces tej zaum yuav txawv, ntawm no yog tib neeg tus cwjpwm coj. Tiamsis lub neej no ib txwm muaj ntau yam nyob sab nrauv tej uas peb xav txog. Muaj tej lub sijhawm, peb pheej puag rawv lo lus nug tsis paub thaum twg mam muaj lo lus teb, txog rau hnub uas peb mus nrog Vajtswv nyob ntawm qhov chaw ib txhis.

Thaum puas tshuaj, txomnyem lossis tej kev txomnyem tshwm tuaj, peb muaj cai xaiv. Peb muaj cuab kav xaiv tso tus Tswv tseg cim civ tiv qhov kev mob no ib leeg. Lossis peb yuav khiav mus vam khom Vajtswv, nrhiav kev so thiab tso siab plhuav rau ntawm Vajtswv tej lus cog tseg txog Vajtswv txoj kev hlub.

Ib xyoos dhau los, kuv twb hnov txoj kev kaj siab, tau nplig siab nyob hauv Vajtswv txoj kev tshwm ntsej muag, raws li tej txoj kev uas yav tas los kuv tsis tau xav txog. Kuv ntsia pom Vajtswv kho zoo kuv lub siab thiab pub rau kuv kom muaj txaus txhua yam uas kuv cheem tsum. Kuv yeej tseem nrhiav tau kev zoo siab, txawm yog nyob rau tej hnub uas mob siab tshaj. Thiab kuv ntsia pom Vajtswv siv kuv lub neej los coj txoj kev nplig siab, kev kho zoo pub rau tej neeg ib ncig.
Ntawd yog yam uas Vajluskub tau cog lus pub: Vajtswv kev tshwm ntsej muag, nrog kev cia siab tias Vajtswv yuav muab txhua yam los tso ua ke kom muaj nqis rau tus uas hlub Vajtswv, yog cov neeg uas tau suav tias ua lub neej raws li Vajtswv lub siab nyiam (saib Loos 8:28).

Cia Vajtswv tej lus qab zib no txhawb koj lub siab, ntuas kom koj paub tias txawm yog koj tab tom mus rau hauv qhov chaw tsaus ntuj los, Vajtswv yeej nyob ntawd vim koj. Cia Vajtswv tej lus cog tseg rub koj nyob hauv tej hnub uas tsaus ntuj nti tshaj:

“Cov Yixalayees, tus Tswv uas tsim nej hais tias, “Nej tsis txhob ntshai, kuv yuav cawm kom nej dim. Kuv twb tuav nej npe hu nej lawm, vim nej yog kuv haivneeg. Thaum nej hla tej dej tob, kuv yuav nrog nraim nej lossis nej mus hauv dej, dej yuav tsis tshoob nej. Thaum nej mus hauv cov nplaim hluavtaws, hluavtaws yuav tsis kub nej; txojkev sim siab no yuav txov tsis tau nej. Rau qhov kuv yog tus Tswv uas yog nej tus Vajtswv. Kuv yog cov Yixalayees tus Vajtswv dawbhuv uas cawm kom nej dim. Kuv muab cov Iziv los ua nqi txhiv nej, muab cov Sudas thiab cov Xe-npas los pauv nej” (Yaxayas 43:1-3).

Thov caw nrog kuv peb thov Vajtswv ua ke: Tus Tswv nyob hauv tej hnub uas kuv lub siab tsis paub ua cas rau tej lus nug uas tsis muaj lus teb, kuv thov khiav los cuag koj. Ua Vajtswv tsaug vim Koj tau cog lus yuav nrog nraim kuv, txawm yog kuv yuav mus dhau tej hnub tsaus ntuj nti hauv lub neej. Thov ntxiv zog rau kuv kom kuv txhob poob kuv lub siab ntseeg, tiamsis ruaj siab vim paub tias Vajtswv tseem coj kuv thiab tiv thaiv kuv. Thov pab kom kuv paub vam khom Vajtswv, kom nrhiav tau kev kaj siab uas ntiajteb yuav pub tsis tau rau kuv. Txawm yog lub caijnyoog ntawd yuav zoo li cas los, thov pub kom kuv ntsia pom txoj kev ncaj ncees, kev hlub thiab kev cia siab uas Vajtswv tseg rau kuv. Kuv thov hauv Tswv Yexus Khetos lub npe, Amees.

Cov kwv tij txhua tus, kuv tsis paub tias koj tab tom ntsib yam dabtsi, tiamsis Vajtswv paub zoo. Vajtswv tab tom nyob ze koj. Txawm yog muaj tej lub sijhawm kua muag ua rau koj ntsia tsis pom Nws los, Vajtswv yeej nyob ntawd, tsis tau muaj ib zaum twg tso kuv tseg. Vajtswv tsis muaj hnub hnov qab koj thiab Vajtswv txoj kev hlub tseg rau koj loj dua tag nrho tej uas koj yuav xav txog. Cia siab tias koj yuav ntsia pom Vajtswv txoj kev ua siab ntev thiab ncaj ncees nyob rau hauv yus lub neej, txawm yog koj tab tom mus rau hauv tiaj nrag kev tuag los. Cia siab tias koj yeej tseem tuav tau txoj kev cia siab txawm yog txhua yam cuag li twb tag kev cia siab. thov kom koj yuav vam khom rau Tswv Yexus, thiab ntseeg tias Nws yog tus ncaj ncees yuav tiv thaiv koj, vim nws hlub koj heev.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.