Peb pheej xav yuam kev tias qhov uas peb puag tej kev iab siab thiab tsis kam zam txim yuav yog lub tsho thaiv ruaj khov los tiv thaiv peb. Tiamsis tseeb tiag, nws kuj zoo li hnub no dhau hnub tod cim civ muab lub kauj mab pos ntawd zawm kom ruaj ruaj rau hauv siab – tus uas tiv kev mob tshaj ho yog peb tus kheej. Yog li yuav ua li cas kom peb thiaj yuav zam txim tiag thaum uas peb lub siab twb tiv txoj kev mob siab ntau dhau? Tib txoj kev yog khiav mus cuag tus uas twb zam txim rau peb zaum no tas txog lwm zaus, los ntawm Tswv Yexus cov ntshav.

Hnub no, yog hnub 20/09/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Rich Miller dhau ntawm Zaj kawm QHOV CHAW RAU KHOOM MUAJ NQIS NYOB HAUV LUB SIAB UAS ZAM TXIM

“Tus neeg siab zoo yeej hais tej lus zoo. Tus neeg siab phem yeej hais tej lus phem, rau qhov nws lub siab xav li cas, nws lub ncauj hais li ntawd” (Lukas 6:45)

Ntu Lukas 6 no txuas ntxiv Tswv Yexus tej lus qhia txog lub siab hlub tshua pub rau yeebncuab, kev ua siab ntev, tsis txiav txim thiab tus cwjpwm zam txim rau lwm tus (nqe 27-44). Dhau ntawm tej lus cob qhia ntawd, Vajtswv nthuav qhia txog tus cwjpwm sab nraud nws pib hauv peb lub siab. thaum ib tug neeg nws mus hauv txoj kev zam txim, tej yam zoo yuav cim civ ntws hauv lawv lub siab los. Lawv paub txais yuav tej kev zoo siab raws li txoj kev uas tus neeg pheej puag rawv tej kev iab siab cia uas lawv txais tsis tau. Tseeb tiag, yeej tsis muaj leej twg xav txav ze ib tug neeg uas muaj kev iab siab, vim tej lus yws thiab lawv tus cwjpwm tsis zoo uas lawv rho ntawm lwm tus los. Cia siab tias koj yuav tsis xav txog ib tug twg ntawd lub sijhawm no!

Ntau xyoo dhau los, thaum kuv tab tom ua haujlwm hauv Pawg Ntseeg, muaj ib nkawm niam txiv tau nrhiav kev ntiab kuv tawm hauv pab tsav xwm. Thaum ntawd, kuv npau taws heev thiab yuav poob sijhawm ntev heev thiaj zam txim tau rau nkawd. Txhua zaus uas tig rov qab mus ntsia, kuv yeej tseem hnov nyuaj siab. kuv nkag siab tias Vajluskub tsis txwv kom peb txhob npau taws. Tiamsis Vajtswv tej lus qhia kom peb yuav tau daws peb txoj kev npau taws ntawd kom tsis ua txhaum (Efexaus 4:26). Qhov tseem ceeb yog txhob cia nws tsuam peb thaum uas peb raug lwm tus ua rau muaj kev tu siab.

Tiamsis, tus nqi yuav tau them thaum peb pheej puag txoj kev iab siab rau hauv siab txog qhov uas qaug zog thiab tsim txom yus. Yog Vajtswv ib tug menyuam, tsimnyog kuv yuav tau nkag siab qhov no dua lwm tus, vim uv twb saj tau tus taug “tsis zam txim” lawm. Khuv xim ib qhov uas kuv tsis cia Yexus Khetos tej lus qhia txog kev zam txim rhau cag kom tob rau hauv kuv lub siab. Kev tsis zam txim muaj ib lub zog loj heev rhuav tshem txaus ntshai heev: nws ua rau txoj kev peb ntsia pom yuam kev. Nws ua rau peb pheej xav tias tus neeg tov tab tom tawm tsam yus, thiab pheej ua li no, lub qhov txhab yim voos tob mus li.

Ua Vajtswv tsaug, Vajtswv tau ua siab ntev coj kuv mus dhau lub sijhawm ntawd thiab pub ru kuv muaj lub zog los zam txim. Nws qhib kuv lub qhov muag los pom tias, txawm yog tej uas lawv hais nws tsis yog raws li qhov tseeb, los nkawm niam txiv ntawd nkawd yeej tsis yog txhob txwm hais dag. Nkawd tsuas ntseeg rau tej uas nkawd xav tias yog xwb, txawm yog tej uas nkawd saib pom ntawd nws tsis yog qhov tseeb. Tig rov qab mus ntsia, yog muab los piv rau tej kev txhaum uas kuv ua, tau Tswv Yexus txhiv kuv, ces kuv tej kev chim ntawd nws yuav dhau los sib lawm ntau. Puas mob? Yeej yuav mob xwb. tiamsis qhov mob no nws tsuas yog ib nyuag ntsiav suab zeb me me thaum muab tso ntawm tej uas Tswv Yexus tau ris nyob saum ntoo khaublig.

Ntau xyoo tom qab, thaum uas kuv rov qab ntsib lawv, kuv rov qab nrog lawv sib puag xub pwg thiab sib tham zoo siab. qhov no ua rau kuv xav tsis thoob txog qhov uas kuv twb hnov qab tej xwm dhau los ntev lawm tsis yog tsuas zam txim xwb, tiamsis kuv lub hlwb tseem cuag li uas nws raug ntxuav huv si lawm! Hnub tomqab, kuv lub siab hnov cuag li tau Vajtswv maj mas ntuas: “Koj puas pom tej uas kuv tau ua lawm tau? Kuv tsis nco tej ntawd lawm!” txog thaum ntawd kuv thiaj rov qab nco txog, tiamsis xav tsis txog li, tej uas yav dhau los thaum no nws maj mam plig siab, tsis muaj ib qhov iab daw twg tseem tshuav lawm.

Twb yog Vajtswv pub kuv kom kuv thiaj qhib tau siab los zam txim rau lawv, vim Vajtswv tus cwjpwm ib txwm puv npo lub siab hlub tshua. Tig rov qab mus saib ntau xyoo dhau los, muaj ntau zaug kuv ntog kuj yog ntau zaug uas Vajtswv siv lwm tus los nthuav tawm txoj kev hlub tshua rau kuv! Tswv Yexus yog qhov chaw rau khoom muaj nqis tshaj nyob hauv peb lub siab, thiab lub ntiajteb no yuav paub peb yog Nws cov thwjtim dhau ntawm txoj kev uas peb sib hlub. Zoo li Vajtswv tej lus qhia: tus uas tau zam txim ntau yuav tau hlub ntau (Lukas 7:47). Tej uas peb hais tawm txhua hnub yuav yog qhov pov thawj meej meej ua rau peb pom tias yus puas tab tom mus nrog txoj kev zam txim tiag. Tswv Yexus twb hais txog tej kev txhaum yog tej uas yuav tshwmsim tuaj (Lukas 17:1). Cia siab tias tom qab tej kev puas tshuaj ntawd, peb yeej tseem tuav rawv tau peb lub siab mos muag thiab puv npo kev hlub los sib pub.

Thov caw nrog kuv peb thov Vajtswv ua ke: Leej Txiv siab ntev, thov pab kom kuv txais tau koj txoj kev hlub zoo kawg nkaus kom kuv kuj paub txojkev muab qhia rau tej neeg ib ncig. Ua Vajtswv tsaug vim tau ua siab ntev zam txim rau kuv. Thov pub kom kuv kuj paub coj txoj kev hlub ntawd mus qhia rau lwm tus. Thov ci kom kuv lub siab pom kev, nthuav tawm tej ceg kaum tseem zais cia tej kev tsis zam txim, thiab coj kuv mus rau hauv qhov tseeb. Kuv ntseeg tias yeej tsis muaj ib yam dabtsi nws yuav nyuaj rau koj. Kuv thov hauv Tswv Yexus Khetos lub npe, Amees.

Cov kwv tij txhua tus, yog tias hnub no koj yeej tseem ris lub nra nyhav txog tej kev qhov txhab qub, txhob ris ib leeg lawm. Cia li muab tag nrho tej ntawd coj mus rau Tswv Yexus. Tsuas yog Nws xwb thiaj yuav kho zoo tej qhov txhab nyob tob tob hauv koj lub siab thiab pub rau koj muaj lub zog zam txim. Peb xaiv zam txim vim Vajtswv tau hlub thiab zam txim rau peb ua ntej. Thaum peb kam muab txoj kev npau taws tso tseg, thaum ntawd yog lub sijhawm Leej Txiv txoj kev kaj siab tiag yuav puv npo, yuav ua rau kom peb muaj lub siab sib, mos muag, puv npo kev hlub.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.