Tơdah đei minh ‘nu bơngai tơmoi mơ̆t tơ hnam ih, chă wă iŏk mŭk tơmam git kăl mă hnam dơnŏ ih wei răk đơ̆ng lu ‘bok yă sơ̆, tơdrong ih wă pơm rŏ lăng ih gô iung tơgar iŏk tơmam noh, hăm trŏ ưh? Kon bơngai bơ̆n krăng kơchăng pơm lơ trong wă bơwei, wei răk dôm lu mŭk tơmam gĭt kăl tơ lăm chăl arih âu, mă-lei, kơplah dôm tơmam gah bơhngol kăl hloh mă lu ayăt kơ bơ̆n tơgar iŏk. Hăm đei layơ ih arih nhen thoi minh ‘nu bơngai dơnuh hin, jơhngơ̆m rơdu păng jô kro, tơ lăm mŭk tơmam hiôk jơnap mă Kră Yang đei pơkă pơjao ăn kơ ih ưh?

Năr ‘nâu, năr 17/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Martha Noebel kơ̆l ‘bai MŬK TƠMAM GĬT KĂL

“Inh wă tơklah đơ̆ng iĕm na Inh ăn kơ iĕm jơhngơ̆m hiôk. Jơhngơ̆m Inh hiôk dang yơ, Inh ăn kơ iĕm hiôk dang noh mơ̆n. Inh ăn kơ iĕm hiôk ưh kơ thoi lu bơngai ala teh ăn kơ iĕm hiôk ôh. Iĕm ‘nĕ sơ’ngon păng ‘nĕ kơ hli.” (Yôhan 14:27)

Ih hăm đei layơ iŏk tơmam đei pơjao đơ̆ng hnam dơnŏ bơih ưh? Rŏ lăng noh jơ̆ jên, minh pôm hnam, teh jang sa, dah mŭk tơmam gĭt kăl mă đei pơjao ăn đơ̆ng adrĕch adrŭng kră sơ̆. Kơplah ih jing bơngai iŏk tơmam pơjao boih, noh jơ̆ tơmam ih. Ih trŏ kơ wei răk, yua păng hiôk hăm tơdrong mă đei pơjao ăn kơ ih.
Mă lei gô thoi yơ tơdah minh năr đei bơngai chă wă tơgar iŏk mŭk tơmam noh đơ̆ng ih? Rŏ lăng ih gô chă trong wă bơwei păng iŏk dôm tơmam noh kơ ih. Yua kơ noh tơmam đei pơjao ăn kơ ih, na ưh kơ đei bu gơh tơgar iŏk tơdrong noh đơ̆ng ih.

Na dang ei, apĭnh bơ̆n tơchĕng gah tơmam pơjao ăn tơ plĕnh ti mă Kră Yang ăn kơ bơ̆n. Kơplah Kră Yang Yêsu wih đơ̆ng teh âu, Sư hăm ăn kơ lu bơ̆n tơdrong kiơ ưh?

Lăm Yôhan 14:27, Sư khan: “Inh wă tơklah đơ̆ng iĕm na Inh ăn kơ iĕm jơhngơ̆m hiôk. Jơhngơ̆m Inh hiôk dang yơ, Inh ăn kơ iĕm hiôk dang noh mơ̆n. Inh ăn kơ iĕm hiôk ưh kơ thoi lu bơngai ala teh ăn kơ iĕm hiôk ôh. Iĕm ‘nĕ sơ’ngon păng ‘nĕ kơ hli.”

Jơhngơ̆m hiôk tơpă jing minh lăm dôm tơmam đei pơjao ăn kăl hloh mă Kră Yang Yêsu ăn kơ lu bơngai jing kon Sư.

Mă-lei, ayăt kơ bơhngol bơ̆n ling-lang chă wă tơgar iŏk jơhngơ̆m hiôk noh. Tơpă sư ưh kơ đei kiơ wă tơgar iŏk tơdrong noh đơ̆ng bơ̆n ôh, mă yua kơ sư boih jơ̆ bơngai chă tơtông.

Yua kơ thoi noh, bơ̆n athei tơblah! Tơdah đei bơngai chă wă tơgar iŏk tơmam ih, rŏ lăng ih gô chă trong păng roi kơ lu bơngai sek tơlang khan: “Tơmam âu jơ̆ trŏ kơ tơmam inh tơpă!”

Na hăm tơmam đei pơjao ăn tơ plĕnh ti, bơ̆n hăm pơm thoi noh ưh? Kơplah Satan chă wă tơgar iŏk jơhngơ̆m hiôk đơ̆ng bơ̆n, bơ̆n hăm blah ưh? Bơ̆n hăm đei pơ̆n nuih pơma re khan: “Ưh kơ đei bu gơh tơgar iŏk jơhngơ̆m hiôk mă Kră Yang ăn kơ inh!” dah ưh?

Tơdah ih ưh kơ lui khan ih jing bơngai iŏk tơmam đei pơjao ăn tơpă, ih gô ưh kơ layơ đei pơ̆n nuih wă iŏk păng hiôk hăm tơdrong mă tơmam noh trŏ kơ tơmam ih. Mă-lei, iŏk dôm tơmam pơjao noh boih trŏ tơpă mă Kră Yang đei ăn kơ ih.
Ih păng inh, Kră Yang đei ăn kơ bơ̆n jơhngơ̆m hiôk wă kơ bơ̆n hiôk hăm tơdrong noh kơplah bơ̆n oei arih tơ ala teh âu. Noh jơhngơ̆m hiôk kơ tôm tơdrong kon bơngai hlôh băt, na tơmam pơjao ăn noh jing gah lu bơ̆n tơpă.

Thoi Nơ̆r Kră Yang lăm I Pêtrôs 5:7 khan: “Bơ̆n athei pơjao kơ Sư dôm tơdrong bơ̆n sơ’ngon jơ̆l hăt phăt-ol, yua kơ Sư wei-lăng bơ̆n.”

Yua kơ thoi noh, ih athei gơnang pơjao dôm tơdrong jơ̆l hăt phăt-ol tơ tơpang ti ‘mêm mơnat Sư bĕ, wă kơ jơhngơ̆m hiôk tơpă đơ̆ng Kră Yang pơgơ̆r păng chông anhăk jơhngơ̆m ih lăm năr âu.

Apĭnh đĭ đăng krao khan hơdai: Kơkuh kơ Kră Yang Yêsu, kon bơnê kơ Ih hăm đĭ jơhngơ̆m, yua kơ dôm tơmam pơjao ăn hiôk jơnap mă Ih đei ăn kơ tơdrong arih kon. Tơdrong huai iŏk, tơdrong pơklaih, jơhngơ̆m hiôk păng pran kơtang – đĭ-đăng dôm lu tơdrong noh kon đei iŏk yua kơ Ih lôch tuh pham ăn kơ lu nhôn. Jơhngơ̆m kon ‘maih tơpă wă iŏk tôm tơdrong mă Ih đei hơmet ăn kơ kon yua kơ tơdrong Ih pơmat păng chu lôch yua kơ lu nhôn. Apinh Ih tơgŭm kon ling-lang chơ̆n jơhngơ̆m păng kơchăng kơdih wă bơwei tơmam đei pơjao ăn tơ plĕnh ti mă Ih đei ăn. Apinh Ih pơchrang păng tơ’bôh ăn kơ kon băt, tơdah đei tơdrong kiơ kon ăn kơ ayăt tơgar iŏk đơ̆ng tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, dang ei bĕ bơ̆n ‘măn tŏsĕt jơ hrĕp hrĕh, lăng tơ lăm jơhngơ̆m bơ̆n kơdih. Hăm đei tơdrong kiơ lăm tơdrong arih pơm ăn kơ ih sơ’ngon jơ̆l hăt phăt-ol, tơchĕng lơ păng jơhngơ̆m ưh kơ hiôk ưh? Rŏ lăng noh tơdrong ih sơ’ngon gah minh ‘nu lăm hnam dơnŏ ưh tam mă lui kơ Kră Yang păng ưh tam mă klaih đơ̆ng tơdrong yoch, dah tơdrong jĭ jăn, dah dôm lu tơdrong gleh pơmat-tat nai mă oei tăp dăr lăm tơdrong arih ih. Mă khan dôm tơdrong jơ̆l hăt phăt-ol noh tih truh thoi yơ kư̆m bưh, athei chĕp ba tôm tơdrong noh năm tơ ala jơ̆ng Kră Yang Yêsu. Pơjao kơ Sư dôm lu tơdrong ih sơ’ngon jơ̆l hăt phăt-ol, yua kơ Sư wei-lăng ih. Na ih gô hiôk hăm tơmam đei pơjao ăn tôm tơdrong mă ‘Bok Kei-Dei ăn kơ lu kon Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.