Hăm đei layơ ih mơn juăt bơih kơ pơmat tat đunh, na ih ưh pă băt mơn kơ tơdrong pơmat noh bơih? Lu bơ̆n rai lăp đon kơ tơdrong rơka so – dôm tơdrong mă oei thĕng hrĕh lăm anih măng mu đunh sơnăm boih. Đei kơplah, lu bơ̆n hli wă kơ klaih, hli kơ arih hăm minh tơdrong arih ‘nao, minh tơdrong arih mă ưh pă đei sơkok jĭ juăt jue noh. Na đunh kơ sơnăm, Kră Yang Yêsu năm truh na jet pơm ăn kơ bơngai mơ̆ng sơleng kơ đon: “Ih hăm wă klaih kơ jĭ?”

Năr ‘nâu, năr 18/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Helen R. Smith kơ̆l ‘bai IH HĂM WĂ KƠ ĐEI TƠDRONG PƠKLAIH ƯH?

“Ih hăm wă klaih kơ jĭ?”  (Yôhan 5:6)

Rŏ lăng ih kư̆m đei đei năm ngôi hơpong tơ minh ‘nu bơngai jĭ jăn boih. Năm ngôi hơpong, ‘măn jơ năr kơ bơngai jĭ jơ̆ jing minh tơdrong ‘lơ̆ng tơpă. Ih ‘blŏk kơ dôm wơ̆t kơplah ih năm ngôi hơpong tơ bơngai jĭ, ih đei pơma tơdrong kiơ hăm lu sư? Dang ei, ih tơchĕng lăng bĕ, mưh ih năm ngôi hơpong na khan kơ bơngai jĭ: “Ih hăm wă klaih kơ jĭ?” rŏ lăng sư gô tơl ih thoi yơ?

Kơtơ̆ng nhen hlĭch kơ đon tơpă, yua kơ bơngai jĭ jăn bu kư̆m ‘maih wă kơ klaih, wă kơ jing pran ngăl? Nơ̆r jet noh dang lĕ ưh kơ kăl kơ jet. Mă-lei, noh boih nơ̆r Kră Yang Yêsu jet minh ‘nu bơngai jĭ đunh đei chih tơ lăm Sơ̆p hla bơar Yôhan:

“Tơ Pơlei Jêrusalem đei minh tŭm dơnâu đak ‘bơ̆t jê̆ ‘măng tơm pơlei mă đe anăn ‘Măng Triu. Đak dơnâu ei lăm nơ̆r Juđê anăn khan dơnâu Betsatha. Tơ noh đei pơđăm tŏ prơng hnam. Tơ ala prơng noh đei lơ bơngai ‘bĭch păn kơ jĭ jăn. Lu mơ’nah măt tol, mơ’nah ti kue, mơ’nah jơ̆ng jo go kơdŭ. Lu bơngai jĭ ei chang gô đak dơnâu tơglăk… Lăm ei đei minh ‘nu bơngai jĭ đunh đei pêng-jĭt tơhngam sơnăm boih. Na Yêsu ‘bôh sư ‘bĭch lăm ei. Păng Yêsu băt kơ bơngai ei jĭ đunh tơpă na Yêsu jet sư: ‘Ih hăm wă klaih kơ jĭ?’” (Yôhan 5:2-6)

Thoi noh, bơngai ei hăm wă kơ klaih kơ đơ̆ng jĭ ưh? Pêng-jĭt tơhngam sơnăm sư arih hơdai hăm tơdrong jĭ jăn – noh jơ̆ đunh tơpă. Tơdrong pơmat đei oei hơdai hăm sư đunh dêh bơih, truh kơ tơdrong tơchĕng wă kơ klaih kơ jĭ kư̆m pơm ăn kơ sư hli, yua kơ sư ưh kơ băt tơdrong arih sư gô thoi yơ tơdah ưh pă đei sơkok jĭ noh oei hơdai hăm sư dơ̆ng bơih.

Mă-lei, tơdah kơ kơplah noh sư đei tŏsĕt tơchĕng ‘bar pah, tơdrong noh kư̆m jăk hloi tĕnh dêh. Kơplah sư kơtơ̆ng nơ̆r pơma đei pran kơtang đơ̆ng Kră Yang Yêsu: “Ih iung bĕ, lôm sơkok ih chĕp brŏk kơ ih bĕ.” Na sư pơm kiơ̆ iung nơnăm hloi. Sơkok mă đei oei hơdai jĭ jăn sư pêng-jĭt tơhngam sơnăm, dang ei sư kơdih lôm tôi chĕp brŏk. Đơ̆ng kơplah noh hloi, tơdrong arih sư đei tơplĭh.

Đơ̆ng rŏng kơ noh, lu kră bơngai Juđê truh (Yôhan 5:10). Kơplah lu sư ‘bôh bơngai mă sơ̆ păn kơ jĭ jăn đunh, dang ei klaih hloi na iung nơnăm wih brŏk, lu sư ưh kơ hiôk ôh. Lu sư kư̆ lăng tơ minh tơdrong sư pơm, yua kơ bơngai jĭ noh lôm sơkok sư tôi brŏk, mă lu sư jô̆ kơ tơdrong noh kơ̆m lăm năr pơdơh Sa’bat. Lu sư jet khan: “’Bok bu athei ih lôm sơkok ih brŏk ei?” Na lu sư kư̆m pơm kơnê̆ kơ Yêsu, kơlih kơ Sư pơklaih đe jĭ lăm năr pơdơh Sa’bat. Sơ’ngon tơpă, lu sư ưh kơ jet Kră Yang minh nơ̆r: “Ih hăm gơh pơklaih lu nhôn dai ưh?” – mă tơm lăm bơhngol lu sư kơdih boih kăl kơ pơklaih hloh, mă lu sư ưh kơ băt tơdrong noh.

Tơplih kơ lu sư lăng hlĭch kơ đon yua kơ tơdrong mơsêh mơyang tih mă pơm ‘bơ̆t anăp lu sư, lu sư kư̆ kơ chă tơdrong wă kơ gơh rôp pơlôch Yêsu. Yua kơ Sư pơklaih bơngai jĭ lăm năr Sa’bat păng khan ‘Bok Kei-Dei ‘Bă Sư, lu sư jô̆ Yang Yêsu bơngai pơm yoch mă trŏ kơ lôch.

Yang Yêsu băt hơđăl kơ lu sư chă tơdrong wă ayăt, jô̆ yoch păng sek tơlang Sư. Mă-lei Sư ưh kơ chă trong pơma dŏng akâu Sư kơdih ôh. Sư ưh kơ hli, ưh kơ rŭng răng, mă pơma trŏ tơpăt tơ anăp lu sư. Na Sư pơma dơ̆ng dôm nơ̆r kơtang rai pơm ăn kơ lu sư rai areh hloh păng rai ayăt kơ Sư.

“Yua kơ ‘Bă Inh gơh tơiung arih kon bơngai đơ̆ng lôch na Inh Kon Sư kư̆m thoi Sư mơ̆n, Inh gơh ăn tơdrong arih kơ kon bơngai gô mơ̆ng kơ Inh wă. ‘Bă Sư ưh kơ sek tơlang kon bơngai ôh. Sư ăn Kon Sư đĕch sek tơlang, wă kơ đĭ-đăng bơngai lui yom kơ Kon Sư kư̆m thoi lu sư lui yom kơ ‘Bă Sư. Bơngai bu ưh kơ lui yom kơ Kon Sư, bơngai ‘noh kư̆m dang sư ưh kơ lui yom kơ ‘Bă Sư, yua kơ Kon Sư đơ̆ng ‘Bă Sư wơh.” (Yôhan 5:21-23)

Kră Yang Yêsu pơklaih bơngai bu mă mơ̆ng Nơ̆r Sư păng lui hloi kơ Sư. Thoi ‘Bă Sư đei ăn tơdrong arih, Kon Sư kư̆m đei ăn tơdrong arih mơ̆n. Hloh kơ noh dơ̆ng, ‘Bă Sư ăn kơ Kon Sư sek tơlang kon bơngai. Thoi noh, bơ̆n gô tơ’bơ̆p Sư mă Tơ’ngla pơklaih bơ̆n, dah ‘Bok sek tơlang? Hăm lu bơngai mă sơng iŏk Sư jing ‘Bok Dŏng Pơklaih păng Yŏng Tơ’ngla tơdrong, Sư gô pơklaih lu jơhngơ̆m pơchah pơchek, păng Sư kư̆m sek tơlang tơpăt wă chông anhăk bơ̆n yak lăm tơdrong arih ‘lơ̆ng rơgoh. Lăm Sư, lu bơ̆n đei gơnang hơmĕng kơjăp, bơ̆n gô đei pơklaih tơpă lăm tơdrong arih dang ei, dah tơ anăp ning-mônh. Na bơ̆n huay pă hli kơ năr Sư sek tơlang.

Âu boih nơ̆r Kră Yang Yêsu wă tơ’blŏk kơ rim ‘nu lu bơ̆n:

“Inh khan kơ iĕm tơpă, bơngai bu mơ̆ng Inh bơtho păng lui hloi kơ ‘Bok Kei-Dei mă wơh Inh, bơngai ‘noh ning-mônh sư gô oei hơdai hăm ‘Bok Kei-Dei arih ling-lang păng Inh huay pă sek tơlang tơdrong sư boih. Sơ̆ sư kiơ̆ tơdrong lôch mă-lei dang ei sư kiơ̆ tơdrong arih.” (Yôhan 5:24)

Apĭnh đĭ đăng krao khan hơdai: Kơkuh kơ Kră Yang Yêsu, Tơ’ngla mă băt hơđăl tôm tơdrong hrĕp hloh lăm jơhngơ̆m kon. Lơ wơ̆t, kon đei juăt arih hơdai hăm jơhngơ̆m pơchah pơchek, dôm tơdrong pơmat-tat păng dôm tơdrong sơ’ngon hrĕp lăm jơhngơ̆m, truh kơ kon hiơt kơ Ih boih đei pran kơtang gơh pơklaih tôm tơdrong. Ơ Kră Yang, jơhngơ̆m kon ‘maih tơpă wă kơ đei pơklaih. Apinh Ih ăn kơ kon đon lui kơjăp wă kơ kon gơh iung dơ̆ng, nuih kơtang yak kiơ̆ kơ ‘bơ̆r Ih krao. Apinh Ih tơplĭh kon, wă rim năr kon arih ưh pă oei ala tơdrong hli kơ sek tơlang, mă ‘bĕnh kơ pran kơtang tơdrong huai iŏk păng tơdrong ‘mêm ling-lang đơ̆ng Ih.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr noh, bơngai jĭ ei đei iung dơ̆ng, lôm sơkok sư chĕp na brŏk, tơplih kơ sư ‘bĭch chang gô ‘bơ̆t jê̆ đak dơnâu. Năr ‘nâu, Kră Yang Yêsu kư̆m jet ih nơ̆r noh mơ̆n: “Ih hăm wă klaih kơ jĭ?” Rŏ lăng “sơkok” mă ih ‘bĭch tơ noh jing tơdrong pơm kơ ih sơngon, dôm tơdrong pơdê, dah pơmat yua kơ tơdrong yoch. Sư ưh kơ athei ih chă trong tơdrong pơklaih kơdih ôh. Sư wă kơ ih đei jơhngơ̆m krăng kơchăng, lui gơnang kơ Sư păng tơl nơ̆r Sư krao. Kơplah ih tơl: “Ơ Kră Yang, kon wă klaih kơ jĭ!”. Sư gô ăn kơ ih jơhngơ̆m pran wă iung dơ̆ng, weh hloi đơ̆ng anih mă ih đei đom đunh boih, na yak lăm tơdrong rơngei mă Sư ăn kơ ih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.