Đei lơ bơngai tơchĕng khan tơ̆ng bơ̆n lui kơ Kră Yang păng arih pơm kiơ̆ thoi Sư wă, lei tôm tơdrong pơmat-tat dang ei, dah dôm lu tơdrong gleh tơ anăp, gô hiong đĭ. Bơ̆n tơchĕng pơjing tơdrong arih mă ‘lơ̆ng jơnap: dôm lu ‘măng gô pơih, dôm lu tơdrong anat anot gô thĕng hrĕh, na tơdrong arih gô đei năr hiôk-hian. Hmach dêh, tơdrong tơchĕng thoi noh ưh kơ trŏ hăm Sơ̆p hla bơar Nơ̆r ‘Bok Kei-Dei, na kư̆m ưh kơ trŏ hăm tơdrong arih bơ̆n dang ei ôh. Tơdrong lui ưh kơ pơm ăn kơ lu bơ̆n klaih đơ̆ng dôm lu tơdrong pơmat-tat lăm ala teh âu. Mă-lei tơdrong lui boih pran kơtang mă Kră Yang ăn kơ bơ̆n, wă kơ bơ̆n lui kơjăp păng oei kơjăp, kơplah tôm tơdrong ala teh dang lĕ hơlŭng pơchah ‘bơ̆t jơ̆ng bơ̆n.

Năr ‘nâu, năr 19/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Jessica Teed kơ̆l ‘bai YUA KƠ KIƠ BƠNGAI ARIH ‘LƠ̆NG ĐEI TƠ’BƠ̆P TƠDRONG ƯH KƠ ‘LƠ̆NG?

“Inh roi kơ iĕm dôm tơdrong noh hei wă kơ iĕm chơt hiôk yua kơ iĕm gơnang kơ Inh. Tơ ala teh âu iĕm gô đei tơdrong anat anot. Mă-lei iĕm ‘nĕ kơ sơ’ngon hŏ yua kơ tôm tơdrong ala teh âu thuơ kơ Inh ngăl boih.” (Yôhan 16:33)

Lu bơ̆n oei arih lăm ala teh đak mă ‘bĕnh kơ tơdrong pơchah pơchek păng tơdrong yoch. Tơ ala teh âu, tơdrong anat anot, tơdrong pơmat-tat, tơdrong hiong răm dah tơdrong chhŭr nuih ưh kơ gơh wă wer weh. Sơ̆p hla bơar Nơ̆r ‘Bok Kei-Dei đei bơtho adrol boih khan tơdrong gleh gô truh, yua kơ đak ‘mi kư̆m kơtoh tơ lu bơngai ‘lơ̆ng tơpăt păng lu bơngai ưh kơ ‘lơ̆ng tơpăt mơ̆n. Ưh kơ đei bu lăm lu bơ̆n oei ataih đơ̆ng tơdrong gleh, tơdrong pơmat-tat dah tơdrong hiong răm. Kư̆m thoi Kră Yang Yêsu, kơplah Sư oei tơ ala teh âu, Sư kư̆m đei nhơ̆m hmoi mơ̆n.

“Inh roi kơ iĕm dôm tơdrong noh hei wă kơ iĕm chơt hiôk yua kơ iĕm gơnang kơ Inh. Tơ ala teh âu iĕm gô đei tơdrong anat anot. Mă-lei iĕm ‘nĕ kơ sơ’ngon hŏ yua kơ tôm tơdrong ala teh âu thuơ kơ Inh ngăl boih.” (Yôhan 16:33)

Sơ̆p hla bơar Nơ̆r ‘Bok Kei-Dei ưh kơ tơtă khan tơdrong arih bơ̆n gô dơ hnă ‘lơ̆ng ôh, mă-lei Nơ̆r Kră Yang tơbăt ăn kơ bơ̆n băt minh tơdrong tơpăt: ih ưh kơ layơ oei hơdrô̆ kơplah tơdrong anat anot truh ôh. Kră Yang Yêsu ling-lang oei hơdai, gô ăn jơhngơ̆m pran kơtang păng tơgŭm ih hăm tôm tơdrong ih kăl. Mă khan tơdrong truh kơ ih tih trăp thoi yơ kư̆m, Kră Yang ling-lang ‘mêm mơnat păng wei-lăng ih ( lăng lăm Hơriso 23:4, Mathiơ 28:20)

Kơplah klo inh lôch lăm sơnăm 2023, lăm jơhngơ̆m inh đei lơ tơdrong jet mă ưh kơ đei nơ̆r tơl. Inh ling-lang jet lăm jơhngơ̆m: yua kơ kiơ sư lôch hrôih thoi noh? Jơhngơ̆m inh ‘maih tơpă wă băt Kră Yang oei tơ yơ lăm tơdrong pơmat-tat inh, păng Sư wă thoi yơ kơplah Sư ăn tơdrong noh truh kơ inh? Đei kơplah inh kư̆m tơchĕng lăm jơhngơ̆m khan: dah inh đei pơm minh tơdrong kiơ nai, lei rŏ lăng tơdrong noh gô tơplĭh ưh?

Hăm đei layơ ih kư̆m đei jơhngơ̆m ngĭl ngŭl thoi noh ưh? Tơpă, bơ̆n ling-lang jet lăm jơhngơ̆m yua kơ kiơ tơdrong âu truh thoi noh, dah tơ̆ng bơ̆n pơm phara lei rŏ lăng tơdrong noh gô tơplĭh – noh bơngai bơ̆n juăt kơ tơchĕng. Mă-lei lăm tơdrong arih âu đei lơ tơdrong ‘nguaih kơ bơ̆n tơchĕng. Đei kơplah, bơ̆n oei rôp iŏk dôm nơ̆r jet mă ưh kơ layơ đei nơ̆r tơl tôm mah, truh kơ năr bơ̆n brŏk oei hơdai hăm Kră Yang lăm tơdrong arih ling-lang.

Kơplah tơdrong hiong răm, tơdrong pơmat-tat dah tơdrong gleh truh kơ bơ̆n, bơ̆n ling-lang đei trong wă rơih iŏk. Bơ̆n gơh rơih tơwih rŏng kơ Kră Yang, na pơmat-tat hơdrô̆. Dah bơ̆n kơdâu năm tơ Sư, gơnang kơ Sư, chă tơdrong pơdơh hiôk-hian păng lui gơnang kơ dôm nơ̆r Sư tơtă păng tơdrong Sư ‘mêm mơnat.
Lăm minh sơnăm hlôi, inh mơn băt tơdrong hiôk-hian păng tơdrong pơlung đơ̆ng Kră Yang oei hơdai hăm inh, mă ki sơ̆ inh ưh tam mă đei layơ tơchĕng truh. Inh đei ‘bôh Sư pơklaih jơhngơ̆m inh, păng tơgŭm ăn kơ inh tôm tơdrong inh kăl. Inh đei chă ‘bôh tơdrong hiôk chơt, mă lăm năr inh pơmat-tat. Păng inh kư̆m ‘bôh Kră Yang yua iŏk trong yak năm lăm tơdrong arih inh wă pơlung păng pơklaih lu bơngai jum dăr kơ inh.

Noh boih tơdrong Sơ̆p hla bơar Nơ̆r ‘Bok Kei-Dei tơtă ăn kơ bơ̆n: Kră Yang oei hơdai hăm bơ̆n, păng bơ̆n đei gơnang hơmĕng khan Sư gô iŏk tôm tơdrong mă truh kơ bơ̆n wă ăn tơdrong chơt hiôk kơ lu bơngai mă ‘mêm kơ Sư, lu bơngai mă Sư rơih iŏk kiơ̆ thoi Sư wă (Rôm 8:28)

Athei ăn kơ nơ̆r hiôk âu đơ̆ng Kră Yang pơlung jơhngơ̆m ih, tơ’blŏk ăn kơ ih băt khan, mă ih yak lăm thŭng thong măng mu, Kră Yang ling-lang oei hơdai hăm ih. Athei ăn nơ̆r Sư pơlung ih kơplah lăm năr măng mu dêh:

“Dang ei Kră Yang khan thoi âu: Ơ Jakôp Sư Tơ’ngla pơjing iĕm, ơ Isơrael! Sư bơih Tơ’ngla pơjing iĕm, ‘nĕ kơ hli yua kơ Inh huai iŏk iĕm bơih. Inh bơih krao iĕm hăm anăn iĕm păng iĕm gah Inh. Tơdah iĕm tŏk kơ đak, inh gô oei hơdai iĕm, tơdah iĕm glơi tŏk kơ đak glung, iĕm huay kơ glơ̆k ôh, tơdah iĕm yak lăm ŭnh iĕm huay kơ pơtŏk, pla ŭnh ưh kơ sa iĕm. Yua kơ Inh Kră Yang ‘Bok Kei-Dei iĕm, Tơ’ngla ‘lơ̆ng rơgoh Isơrael, Tơ’ngla dŏng pơklaih iĕm. Inh ăn bơih dêh char Êyiptơ jing tơmam huai iŏk iĕm. Char Kus păng Sêba pơm tơmam huai tơplih kơ iĕm.” (Êsai 43:1-3)

Apĭnh đĭ đăng krao khan hơdai: Kơkuh kơ Kră Yang, kơplah lăm jơhngơ̆m kon ngĭl ngŭl kơ lơ tơdrong jet mă ưh kơ đei nơ̆r tơl, kon apinh kơdâu năm tơ Ih. Kon bơnê kơ Ih yua kơ Ih đei tơtă ling-lang oei hơdai hăm kon, mă khan kon yak năm lăm dôm lu năr măng mu lăm tơdrong arih kon. Apinh Ih ăn kơ kon đei jơhngơ̆m pran kơtang wă kơ kon huay kơ achăng lê̆ tơdrong lui, mă ling-lang lui kơjăp yua kơ kon băt kơ Ih oei chông ba păng wei-lăng kon. Apinh Ih tơgŭm kon băt gơnang kơ Ih, wă kơ kon đei tơdrong hiôk-hian mă ala teh âu ưh kơ đei. Mă tơdrong arih đei truh kơ kon thoi yơ, apinh ăn kơ kon ling-lang ‘bôh Ih ‘lơ̆ng tơpăt, tơdrong Ih ‘mêm mơnat păng chang hơmĕng mă Ih ăn kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, inh ưh kơ băt ih dang ei oei tơ’bơ̆p tơdrong kiơ, mă Kră Yang Sư băt hơđăl. Sư oei hơdai hăm ih, jê̆ ih. Mă kơplah đak măt pơm ăn kơ ih ưh kơ ‘bôh Sư, mă Sư ling-lang oei tơ noh, ưh kơ layơ lê̆ ih ôh. Sư ưh kơ layơ hiơt kơ ih, păng tơdrong Sư ‘mêm kơ ih tih hloh kơ tơdrong ih đei tơchĕng. Hơpơi kơ ih ling-lang lăng ‘bôh tơdrong Kră Yang ‘mêm mơnat păng ‘lơ̆ng tơpăt lăm tơdrong arih ih, mă kơplah oei yak năm lăm thŭng tơdrong lôch. Hơpơi kơ ih gơnang kơ Kră Yang Yêsu, păng lui tơpă khan Sư gô wei-lăng ih, yua kơ Sư ‘mêm kơ ih khŏm khŏm.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.