Lu bơ̆n juăt tơchĕng hơwơ̆l khan mưh bơ̆n oei răk tơdrong ơh lăm jơhngơ̆m păng oei jô̆ yo kơ đe, noh dang lĕ ao mam kơjăp wă dŏng akâu bơ̆n kơdih. Mă-lei tơpă, noh dang lĕ đơ̆ng năr ‘nâu truh tơ năr nai đơ̆ng ti kơdih gơret ‘long jơla tơ kơtơh – bơngai mă pơmat-tat hloh jơ̆ akâu bơ̆n. Thoi noh, lơliơ bơ̆n đei huay kơ jô̆ yo tơpă, kơplah jơhngơ̆m bơ̆n đei pơchah pơchek păng pơmat-tat lơ tơpă boih? Đei minh trong đĕch kơdâu năm tơ Kră Yang Yêsu Krist, Sư huay kơ jô̆ yo kơ bơ̆n đơ̆ng tơdrong âu truh tơ tơdrong nai, hăm pham Sư kơdih.

Năr ‘nâu, năr 20/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Rich Miller kơ̆l ‘bai TƠMAM GĬT LĂM JƠHNGƠ̆M HUAY KƠ JÔ̆ YO

“Bơngai bu đei jơhngơ̆m đon ‘lơ̆ng, sư kư̆m pơm ‘lơ̆ng mơ̆n. Bơngai bu đei jơhngơ̆m đon kơnê̆, sư kư̆m pơm kơnê̆ mơ̆n. Lăm jơhngơ̆m đon bơ̆n thoi yơ, bơ̆n kư̆m gô pơma thoi ei.” (Luka 6:45)

Tơdrong bơtho lăm Luka 6 ‘nâu pơtrơp kiơ̆ dôm nơ̆r Kră Yang Yêsu bơtho gah tơdrong ‘mêm mơnat kơ lu bơngai mă pơm kơnê̆ kơ bơ̆n, pơm băl mă ‘lơ̆ng, ‘nĕ bâu roi đe, păng ‘nĕ kơ jô̆ yo dih băl (trong 27-44). Hăm dôm nơ̆r bơtho noh, Sư tơbăt ăn kơ bơ̆n băt khan dôm lu tơdrong bơ̆n pơm gah ‘nguaih, mă tơm đơ̆ng lăm jơhngơ̆m đon bơ̆n. Kơplah minh ‘nu bơngai arih lăm tơdrong huay kơ jô̆ yo, dôm tơdrong ‘lơ̆ng gô lĕch đơ̆ng jơhngơ̆m sư. Sư băt sơng iŏk tơdrong hiôk hăm tơdrong arih mă bơngai oei chĕp tơdrong ơh lăm jơhngơ̆m ưh kơ layơ đei hiôk thoi noh. Tơpă, ưh kơ đei bu ‘maih oei jê̆ minh ‘nu bơngai mă jơhngơ̆m ling-lang ơh păng kơnê̆ ôh, yua kơ dôm nơ̆r sư pơma ôr pơret păng tơdrong kơnê̆ ling-lang pơm ăn kơ lu bơngai nai sơ’ngon. Hơpơi kơ dang ei ih ưh tơchĕng truh tơ minh ‘nu bơngai ayơ noh kơplah jơ ‘nâu hŏ!

Adrol sơ̆, kơplah inh oei jang lăm Hnam Akŭm, đei minh ‘bar agrop hnam dơnŏ chă trong wă tŭk inh đơ̆ng khŭl bơngai bơ̆jang. Kơplah noh, inh ơh tơpă, păng kăl kơ lơ khei năr ‘mơ̆i inh huay kơ jô̆ yo kơ bre sư. Mưh inh ‘blŏk kơ tơdrong noh, jơhngơ̆m inh sơ’ngon tơpă. Inh băt Sơ̆p hla bơar Nơ̆r ‘Bok Kei-Dei huay kơ khan bơ̆n ưh kơ gơh ơh ôh. Mă lei Nơ̆r Kră Yang bơtho bơ̆n athei băt kơ bơwei tơdrong ơh, wă kơ bơ̆n huay kơ pơm yoch (Êphêsô 4:26). Tơdrong mă kăl tơpă, bơ̆n ‘nĕ kơ nŏng kơ ‘blŏk, dah ưh kơ drơ̆ng iŏk kơ jơhngơ̆m bơ̆n ơh, kơplah đe pơm kơ jơhngơ̆m bơ̆n sơ’ngon.

Mă-lei, tơdrong bơ̆n oei wei tơdrong ơh lăm jơhngơ̆m păng chhŭr nuih đunh, noh pơm ăn kơ bơ̆n gleh lap păng pơmat-tat tơpă. Jơ̆ kon ‘Bok Kei-Dei, trŏ kơ inh băt tơdrong noh rơđah hloh kơ lu bơngai nai, yua kơ inh kư̆m đêl đei tơdrong “oei jô̆ yo”. Hmach tơpă inh ưh kơ ăn nơ̆r Yêsu Krist bơtho gah tơdrong huay kơ jô̆ yo chăt rơh jrŭ lăm jơhngơ̆m inh. Tơdrong jô̆ yo pơrăm pran tơpă: sư tơplih tôm tơdrong bơ̆n lăng. Sư pơm ăn kơ bơ̆n lui khan bơngai noh ayăt kơ bơ̆n, na kư̆ kơ thoi noh jơhngơ̆m bơ̆n rai ơh sơ’ngon ling lang.

Bơnê kơ Kră Yang tơpă, Sư đei pơlung inh khŏm khŏm, chông ba inh yak kiơ̆ lăm dôm khei năr noh, păng ăn kơ inh pran kơtang wă kơ inh huay kơ jô̆ yo. Sư pơih măt jơhngơ̆m inh ăn kơ inh băt, dôm nơ̆r lu sư pơma ưh kơ trŏ, mă lu sư ưh kơ wă kơ hơlĕnh kơ inh ôh. Lu sư kư̆ lui kơ tơdrong lu sư tơchĕng khan trŏ, mă khan tơdrong noh lăng ưh kơ trŏ. Na kơplah inh lăng tơ tơdrong noh, tơdah pơting tơdrong ơh sơ’ngon noh hăm lơ tơdrong yoch mă Kră Yang đei huai iŏk inh boih, tơdrong ơh lăm jơhngơ̆m inh kư̆m jing iĕ tơpă. Hăm chhŭr nuih ưh? Chhŭr nuih tơpă. Mă tơdrong chhŭr nuih noh dang lĕ minh găr chuơh iĕ đĕch, kơ plah dan hăm tơdrong Kră Yang Yêsu đei pơmat-tat păng chu lôch tơ ‘long pơglang yua kơ lu bơ̆n.

Lơ sơnăm đơ̆ng rŏng, kơplah inh tơ’bơ̆p lu sư, inh kư̆m gơh kuăr lu sư păng pơma dơnuh mă hiôk. Tơdrong mă pơm ăn kơ inh hlĭch kơ đon noh jơ̆ inh pă đei ‘blŏk tôm tơdrong noh bơih – ưh kơ sĭ adrô̆ huay kơ jô̆ yo đĕch, mă tơdrong ‘blŏk lăm jơhngơ̆m inh ôp rơgoh bơih! Năr đơ̆ng rŏng, lăm jơhngơ̆m inh mơn kơ Kră Yang pơma dơnuh tơ’blŏk kơ inh khan: “Ih băt kơ tơdrong Inh đei pơm ưh? Dang ei ih ưh pă ‘blŏk tơdrong noh dơ̆ng boih!” Truh tơ thoi noh ‘mơ̆i inh ‘blŏk, mă lei hlĭch dêh, tơdrong adrol sơ̆ dang ei jing hiong hiơt đĭ bơih, ưh pă đei tơdrong ơh lăm jơhngơ̆m dơ̆ng bơih.

Kră Yang ăn kơ inh đei jơhngơ̆m ‘mêm mơnat, yua kơ Sư jơ tơm kơ tơdrong ‘mêm mơnat. Lăng ming dôm sơnăm đei hlôi, rim ‘măng inh pơ̆k huŏng, rim ‘măng noh Kră Yang kư̆m iŏk lu bơngai nai wă tơbăt tơdrong ‘mêm mơnat Sư kơ inh! Kră Yang Yêsu boih tơmam gĭt lăm jơhngơ̆m lu bơ̆n, na ala teh âu gô băt kơ bơ̆n jing bơngai lui kơ Sư yua kơ đơ̆ng tơdrong bơ̆n băt ‘mêm mơnat dih băl. Kư̆m thoi Sơ̆p hla bơar Nơ̆r ‘Bok Kei-Dei bơtho: bơngai bu huay kơ jô̆ yo lơ, sư kư̆m đei tơdrong ‘mêm mơnat lơ mơ̆n. (Luka 7:47). Dôm nơ̆r bơ̆n pơma rim năr noh jơ̆ tơbăt rơđah hloi khan bơ̆n tam arih lăm tơdrong huay kơ jô̆ yo tơpă dah ưh. Kră Yang Yêsu đei bơtho adrol boih khan puh lăm tơdrong pơhlŭ tơdrong noh gô đei truh (Luka 17:1). Hơpơi kơ, tơdah dôm lu tơdrong pơ̆k huŏng noh truh, lu bơ̆n gô wei jơhngơ̆m bơ̆n iơ̆m dim, păng ‘bĕnh kơ tơdrong ‘mêm mơnat dih băl.

Apĭnh đĭ đăng krao khan hơdai: Kơkuh kơ ‘Bă mă ‘mêm mơnat, apinh Ih tơgŭm kon iŏk tôm tơdrong Ih ‘mêm mơnat, wă kơ kon kư̆m băt ‘mêm mơnat kơ lu bơngai jum dăr kơ kon. Bơnê kơ Ih yua kơ Ih huay kơ jô̆ yo kơ kon. Apinh Ih ăn tơdrong ‘mêm mơnat kơ kon, wă kơ kon kư̆m băt pơm tơdrong ‘mêm mơnat noh kơ lu bơngai nai. Apinh Ih pơchrang kơ jơhngơ̆m kon, tơbăt rơđah dôm lu anih hrĕp lăm jơhngơ̆m kon mă oei jô̆ yo, păng chông ba kon yak kiơ̆ lăm tơdrong ‘lơ̆ng tơpăt Ih. Kon lui tơpă ưh kơ đei tơdrong kiơ mă Ih ưh kơ gơh pơm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdah năr ‘nâu jơhngơ̆m ih oei trăp trĭn yua kơ jơhngơ̆m ơh sơ’ngon so, ‘nĕ pă chĕp răk adrô̆ ih. Ba đĭ tôm tơdrong noh năm tơ Kră Yang Yêsu bĕ. Sư đĕch gơh pơklaih dôm lu jơhngơ̆m chhŭr nuih hlơp lăm jơhngơ̆m, păng ăn kơ ih pran kơtang wă kơ huay kơ jô̆ yo. Lu bơ̆n rơih iŏk huay kơ jô̆ yo, yua kơ Kră Yang đei ‘mêm mơnat păng huay kơ jô̆ yo kơ lu bơ̆n adrol boih. Kơplah bơ̆n achăng lê̆ tơdrong ơh sơ’ngon păng tơdrong huay kơ jô̆ yo, thoi noh tơdrong hiôk-hian tơpă đơ̆ng ‘Bă gô ‘bĕnh lăm jơhngơ̆m bơ̆n, pơm ăn kơ jơhngơ̆m bơ̆n phiơl hơnhơl, hiôk hian păng ‘bĕnh kơ tơdrong ‘mêm mơnat.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.