Hnub Kevcai Yom Kippur, lossis hu ua hnub Kevcai Theej Txhoj tau saib ua Hnub tseem ceeb dawbhuv tshaj nyob hauv ib lub xyoo ntawm cov neeg Yudas – yog lub sijhawm uas tib neeg tau txais kev zam txim thiab tau txuav tej kev txhaum hauv ib lub xyoo tag los. Nyob rau hauv lub neej uas maj nroos nyob rau tiam no, muaj ntau kev hnyav siab, kev qaug zog los txuam txawv peb sab ntsuj plig, ua rau peb ntshaw kom muaj ib lub sijhawm ntsiag to los tso tseg peb tej nra hnyav thiab txhawb zog peb sab ntsuj plig. Txawm tias peb tsis ua tej kevcai fij tsiaj li tiam Vajluskub Qub lawm, tiamsis hnub Kevcai Theej Txhoj ntawd tseem muaj ib lub ntsiab lus tseeb tsis hloov pauv: Leejtwg cheem tsum kev zam txim, cheem tsum ib qho kev nkaum thaj yeeb rau sab ntsuj plig, thiab ua ntej tshaj plaws yog, peb cheem tsum Tswv Yexus txoj kev cawm dim uas Nws twb ua tiav dhau los ntawm Nws txoj kev tuag.

Hnub no, yog hnub 21.09/2026, Kev Thov Vajtswv Txhua Hnub thov caw peb sawv daws los nrog tus qhia Paula L. Stansbury kawm txog zaj kawm: TUS UAS PUB TXOJ KEV THAJ YEEB UAS ZOO KAWG NKAUS

“Thaum Yexus mus hauv lub tsevntaub ntawd, nws mus hauv Chav uas Dawbhuv Kawg Nkaus tib zaug xwb; nws tsis nqa ntshav tshis thiab ntshav heev nyuj coj mus theej txhoj, tiamsis nws muab nws cov ntshav theej peb lub txhoj kom peb dim peb lub txim mus ibtxhis li.” (Henplais 9:12)

Levis Kevcai tshooj 16 qhia txog Aloos tes haujlwm uas yog Ib Tug Povthawj Hlob nyob rau hnub Kevcai Theej Txhoj. Vajtswv kom Aloos mus rau hauv Chav Dawbhuv kawg nkaus. Nyob rau ntawd, Aloos fij tej tsiaj uas yog ntsuag nyuj, heev yaj thiab heev txhis, yog muab fij los theej txhoj. Txoj kevcai theej txoj no tsis yog tsuas ua rau yawg xwb tiamsis yog ua rau tagnrho cov Yixalayees. Txhua xyoo, Tug Povthawj Hlob ua txoj kevcai no rau cov pej xeem kom lawv tau nyob rau hauv txoj kev nrog Vajtswv muaj kev sib raug zoo thiab txais tau Vajtswv txoj kev thaj yeeb.

Kevcai Theej Txhoj yog txoj kev uas Vajtswv tsim los kom cov pej xeem tau daws txim thiab nyob rau hauv txoj kev sib raug zoo nrog Vajtswv tsis tu xyoo no mus rau xyoo tod. Tiamsis nyob hauv Khetos, Txoj kev Theej Txhoj no ua ib zaug xwb twb txaus nkaus lawm, thiab Vajtswv txoj kev thaj yeeb muaj nyob mus ib txhis. Ib tagkis ntawd, thaum kuv zaum twjywm ntsia saib lub hnub tawm tuaj dhau ntawm lub qhov rai, Vajtswv twb ntuas kuv txog qhov tseeb no rau hauv kuv lub siab:
“Cia li tso siab lug”

Nyob hauv lus Henplais, lo lus shalom pheej tau txhais hais tias “thaj yeeb”, tiamsis lub ntsiab ntawm lo lus no nws tseem mus tob dua. Shalom yog hais txog qhov tagnrho, zoo kawg nkaus, sib haum xeeb, koob hmoov uas Vajtswv muab pub peb.

“Shalom! Cia li mus rau hauv txoj kev thajyeeb uas zoo kawg nkaus”
Thaum qhib thawj, kuv xav tias lo lus no yuav pab tsis tau kuv tej kev kub ntxhov ntawm kuv thiab lwm tus. Tiamsis, thaum kuv xaiv ua kuv lub neej nyob hauv Vajtswv txoj kev thajyeeb, kuv thiab tug neeg ntawd txawm muaj kev thaj yeeb sib raug zoo tuaj.

Shalom tsis yog hais txog kev kaj siab hauv peb lub siab xwb. Ntawd yog qhov uas peb txais tau tagnrho tej kev zoo, tej koob hmoov uas Vajtswv xav muab pub rau neeg. Shalom nkag los puv ntoob tagnrho rau hauv peb tug kheej – sab ntsuj plig, lub siab ntsws, cev nqaij daim tawv. Tiamsis thaum peb tsis muaj txoj kev thajyeb ntawd, ces peb sab nqaij daim tawv, lub neej sab hauv thiab peb tej kev sib txuas mus rau lwm tus yuav raug cuam tshuam.

Hauv Efexus 4:3, Vajtswv txojlus ntuas peb “Vajtswv tus Ntsujplig twb ua rau nej sib raug zoo lawm, thiab qhov uas nej sib raug zoo ntawd, twb rub nej los nyob ua ke sib haum lawm.”

Qhov kev sib raug zoo uas kuv tau txais ntawd kuj yog yam uas Vajtswv xav muab pub rau cov Yixalayees nyob rau hnub Kevcai Theej Txhoj. Vajtswv samhwm kom lawv tseg hnub ntawd ua hnub so dawbhuv, txo hwjchim los cuag Vajtswv thiab nrog Vajtswv nyob sib haum xeeb. Hnub Kevcai no tau Vajtswv tsim los kom Vajtswv haiv neeg yuav tsum coj tiam no mus rau lwm tiam. Yog li, lawv thiaj tau cawm dim thiab ua neej ntxiv nyob nrog Vajtswv.

Aloos thiab cov Yixalayees nrhiav txoj kev thajyeeb dhau qhov uas tua tsiaj fij rau Vajtswv nyob rau hnub Kevcai Theej Txhoj. Tiamsis tus sau phau Henplais ntuas peb tias: “Rau qhov tej ntshav heev nyuj thiab ntshav tshis yeej ntxuav tsis tau neeg tej kev txhaum mus ib zaug li.” Henplais 10:4. Yog li, xyoo twg tug Povthawj Hlob twb yuav tsum mus hauv Chav Dawbhuv kawg nkaus rov ua tej kevcai no qhia tau tias tej tsiaj ntawd yeej pub tsis tau txoj kev zam txim uas zoo kawg nkaus.

Tiamsis ua Vajtswv tsaug, zam xwm tsis yog tag rau ntawd xwb. Tus sau phau Henplais hais ntxiv txog ib txoj xov zoo:

“Tiamsis Yexus Khetos twb los ua tus Povthawj Hlob saib xyuas ib puas tsav yam zoo uas nimno twb muaj lawm. Lub tsevntaub uas Yexus mus ua haujlwm hauv, lub ntawd tseemceeb dua thiab zoo dua lub qub. Lub ntawd tsis yog neeg txhais tes ua thiab tsis yog lub uas Vajtswv tsim cia rau hauv ntiajteb no. Thaum Yexus mus hauv lub tsevntaub ntawd, nws mus hauv Chav uas Dawbhuv Kawg Nkaus tib zaug xwb; nws tsis nqa ntshav tshis thiab ntshav heev nyuj coj mus theej txhoj, tiamsis nws muab nws cov ntshav theej peb lub txhoj kom peb dim peb lub txim mus ibtxhis li.” (Henplais 9:11-12.)

Yaxayas 9:6 lees tias Tswv Yexus yog tus Tswv ntawm kev Thajyeeb. Tseeb tiag, Nws yeej yog lub hauv paus ntawm txhua txoj kev thajyeb hauv peb lub neej. Nws pub kev thajyeeb rau peb sab ntsuj plig, thiab sab nqaij tawv. Nws kuj yog yam khoom fij zoo kawg nkaus uas twb cawm peb ib zaug xwb txaus lawm, thiab coj peb los nrog Vajtswv sib raug zoo thiab nrog lwm tug sib raug zoo.

Kev thajyeb tiag yog ib qho khoom plig uas tsuas yog TSwv Yexus xwb thiaj pub tau rau peb. Ntau xyoo tag los lawm, Thaum kuv teb Nws txoj kev tuag saum tug ntoo khaublig tias “Amees!” thaum ntawd Tus Tswv txoj kev thajyeeb puv npo hauv kuv.

Hnub Kevcai Theej Txhoj yog hnub uas Vajtswv haiv neeg los lees txim, thiab ua tib zoo xav tab meeg rau ntawm Vajtswv. Kuj yog hnub puv npo kev zoo siab, rau qhov lo lus cog tseg tias yuav tau zam txim thiab tau tso dim ntawm tej lub nra hnyav thiab lub txim coj mus txais tau kev thajyeeb, kev cia siab thiab kev zoo siab puas hauv lub siab tuaj. Ntawd kuj yog qhov uas Tswv Yexus Khetos twb muab pub rau peb hnub no. tsis yog tsuas nyob rau hnub Kevcai Theej Txhoj xwb, tiamsis yog puv npo kev thajyeeb hauv peb lub neej uas nyob txhua hnub hauv lub ntiajteb no.

Thov caw nrog kuv peb thov Vajtswv ua ke: Aub Vajtswv tus uas muaj lub siab ntev, kuv ua Koj tsaug rau Tswv Yexus Khetos, kuv tsis tag yuav tos txog hnub ua kev cai theej txhoj txhua lub xyoo lawm. Vim yog Koj txoj kev tuag saum tug ntoo khaub lig, kuv twb tau zam txim, tau los nrog Leejtxiv sib raug zoo thiab txais tau kev thajyeeb nyob mus ib txhis. Thov pab kom kuv tsis txhob ua lub neej txaj muag lossis raug kev txhaum khi kuv, tiamsis kuv lub neej yuav tau so kaj siab lug hauv Tswv Yexus txoj kev cawmdim uas twb ua tiav lawm. Thov kom Koj txoj kev thajyeeb kav kuv, kom kuv paub lub neej nyob sib haum xeeb thiab nthuav tawm txoj kev thajyeeb ntawd mus rau txhua tus ib ncig. Kuv thov txhua lo lus no los ntawm Tswv Yexus Khetos lub npe, Amees!

Ib tsoom kwvtij sawvdaws, Koj puas tau paub tseeb tias Tswv Yexus Khetos yog tus Tswv ntawm Kev Thajyeeb, thiab yog Tug Povthawj Hlob uas zoo kawg nkaus? Nws ntshaw kom pub tau rau koj txoj kev thajyeeb uas lub ntiajteb no tsis muaj, yog kev thajyeeb rau koj sab ntsuj plig, thiab sab nqaij tawv tibsi. Los ntawm Tus Tswv txoj kev tuag saum ntoo khaub lig, peb tau los cuag Vajtswv thiab tau nqua hu kom ua lub neej nrog lwm tus nyob sib haum xeeb. Txoj kev thajyeeb ntawd tsis yog ib yam uas nyob deb deb peb. Ntawd yog qhov khoom plig uas Tswv Yexus twb muab Nws txoj sia pos pauv thiab npaj siab yuav muab pub rau tus uas ntseeg Nws, tso siab nyob hauv Nws. Shalom!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.