21.09 Amăn Jơ Krao Khan Rim Năr: TƠ’NGLA TUH ĂN TƠDRONG HIÔK HIAN TÔM TƠDRONG

Năr phĕt Yom Kippur, dah Phĕt Huai Tơdrong Yoch, lăng nhen thoi jơ̆ năr gĭt lăm minh sơnăm bơngai Isarael – jơ năr wă kơ kon bơngai sơng iŏk tơdrong ‘mêm mơnat păng ôp rơgoh tơdrong yŏch lăm minh sơnăm hlôi. Tŏk bŏk tơdrong arih hrĕnh tĕnh dang ei, lơ tơdrong hiơ̆k bơngơ̆t, tơdrong pơmat tat păng gleh lap, trăp lăm bơhngol, lu bơ̆n kŭm rơhing wă kơ đei jơ hrĕp hreh wă tŭk đi dôm lu tơdrong trăp trĭn păng tơplih ming ‘nao tơdrong arih gah bơhngol. Mă khan lu bơ̆n ưh pă pơm tơdrong soi sơmah thoi chăl bơngai Isarael sơ̆, mălei tơdrong Phĕt Huai Tơdrong Yoch oei tơ’blŏk minh tơdrong tơpă ưh kơ đei tơplih, rim ‘nu kơ bơ̆n kŭm kăl kơ đei mơnat, kăl kơ minh anih gơ’nơp hơđơ̆ng ăn kơ bơhngol. Păng hloh đĭ đăng, lu bơ̆n kăl kơ tơdrong dŏng pơklaih tôm tơdrong mă Kră Yang Yêsu đei pơkeh đơ̆ng tơdrong Sư chu lôch.

Năr ‘nâu, năr 21/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Paula L. Stansbury kơ̆l ‘bai TƠ’NGLA TUH ĂN TƠDRONG HIÔK HIAN TÔM TƠDRONG

“Yêsu mơ̆t boih hnam ei, truh tơ anih giĕng tih hloi. Sư mơ̆t soi minh ‘măng đĕch tôm hloi kơ tơdrong soi boih yua kơ Sư soi hăm pham Sư kơdih. Ưh kơ sĭ Sư soi hăm pham bơbe pham rơmo ôh. Sư soi thoi noh đĕch, na bu wă gơnang kơ tơdrong Sư soi noh, bơngai noh gô klaih hloi kơ tơdrong yoch.” (Hêbơrơ 9:12)

Hla bơar Lêwi chăl 16 roi kơ tơdrong jang Arôn pơm ‘bok soi tơm lăm năr Huai Tơdrong Yoch. ‘Bok Kei Dei khan kơ Arôn mơ̆t lăm anih ‘lơ̆ng rơgoh. Tơ anih ‘noh, tơmam sư pơyơ̆r noh rơmo tơdăm, triu tơno, păng bơbe tơno wă pơm tơmam soi huai đơ̆ng yoch. Tơdrong soi huai đơ̆ng yoch ‘nâu ưh kơ sĭ ăn kơdih sư, noh ăn kơ đĭ đăng kon pơlei Isarael. Rim sơnăm, ‘Bok Soi Tơm ling lang pơm tơdrong soi noh wă kơ kon pơlei oei arih lăm tơdrong tơ’bưh hăm ‘Bok Kei Dei păng mơn tơdrong hiôk hian đơ̆ng Kră Yang.

Phĕt Huai Tơdrong Yoch noh jơ̆ tơdrong ‘Bok Kei Dei pơjing wă kơ kon pơlei Sư gơh huai tơdrong yoch păng bơwei tơdrong tơ’bưh hăm Sư đơ̆ng sơnăm ‘nâu truh tơ sơnăm nai. Mălei lăm ‘Bok Krist, tơdrong huai tơdrong yoch đei pơkeh minh wơ̆t tôm boih, păng tơdrong hiôk hian Sư ăn oei đei ling lang. Lăm minh pơge, kơplah inh oei ngôi hrĕp hreh bơ̆t ‘măng ‘mŏk đei drang tŏ măt ‘năr pơchrang, Kră Yang đei khan lăm jơhngơ̆m inh:

“Athei hiôk hian bĕ”

Lăm nơ̆r grĕk, chư shalom juăt kơ hlôh khan “hiôk hian” mălei chư ‘nâu sư đei khan jrŭ hloh. Shalom roi kơ oei sa hiôk pơgơ̆p dih băl, păng pŭn hiôk tôm tơdrong đơ̆ng ‘Bok Kei Dei ăn.

“Shalom! Athei yak năm lăm tơdrong hiôk hian tôm tơdrong.”

‘Măng blŭng, inh tơchĕng khan nơ̆r ‘noh ưh kơ gơh pơyaih tơdrong blĕk đunh sơnăm lăm inh hăm bơngai jê̆ inh. Mălei, kơplah inh rơih iŏk tơdrong arih lăm tơdrong hiôk hian Kră Yang ăn, tơdrong juăt noh sư đei tơplih kiơ̆ trong ‘lơ̆ng hloh.

Shalom ưh kơ sĭ hiôk hian lăm jơhngơ̆m. Noh jơ̆ tơdrong jơnap, pŭn hiôk tôm tơdrong mă ‘Bok Kei Dei ‘maih ăn kơ kon bơngai. Shalom mơ̆t lăm jơ̆p jang kon bơngai bơ̆n – bơhngol, jơhngơ̆m păng akâu jăn. Tơplơ̆ kơ noh, tơdah ưh kơ đei tơdrong hiôk hian noh, jơhngơ̆m pran, tơdrong arih gah lăm, păng dôm tơdrong tơ’bưh lu bơ̆n gô đei tơdrong.

Lăm Êphêsô 4:3 nơ̆r Kră Yang bơtho lu bơ̆n:”Iĕm athei adrin oei hiôk hơdai hăm bôl buăl, yua kơ Yang Bơhngol ‘Lơ̆ng ăn kơ bơ̆n jing minh jơhngơ̆m minh đon rim ‘nu kơ bơ̆n lei-lăi ngăl.”

Tơdrong inh mơn kơ tơdrong oei hiôk hơiă băl noh kŭm jơ̆ ‘Bok Kei Dei wă ăn kơ kon pơlei Isarael đơ̆ng lăm năr Phĕt Huai Tơdrong Yoch. Kră Yang tơtă kơ lu sư ‘măn năr noh pơm năr pơdơh rơgoh, tơjur kơdih akâu bơ̆t anăp Kră Yang păng jing hiôk ‘lơ̆ng hăm Sư. Năr phĕt ‘nâu đơ̆ng ‘Bok Kei Dei pơjing wă kơ kon pơlei Sư bơwei đơ̆ng jơhnơr ‘nâu truh tơ jơhnơr nai. Đơ̆ng noh, kon pơlei đei huai tơdrong yoch păng bơwei tơdrong arih tơ’bưh hăm ‘Bok Kei Dei.

Arôn păng kon pơlei Isarael chơchă tơdrong hiôk hian noh hăm pơyơ̆r tơmam soi kơ ‘Bok Kei Dei lăm rim năr Phĕt Huai Tơdrong Yoch. Mălei bơngai chih hla ar Hêbrơ tơ ‘blŏk kơ lu bơ̆n: ” Yua kơ lu sư gơnang kơ soi hăm pham rơmo, pham bơbe khan klaih kơ tơdrong yoch. Thoi yơ pham rơmo pham bơbe gơh pơklaih tơdrong yoch? Pham noh ưh kơ gơh pơklaih minh tơdrong kiơ.” (Hêbrơ 10:4).
Mălei bơnê kơ Kră Yang, tơdrong ưh kơ dơ̆ng ‘bơ̆t doh. Bơngai chih hla bơar Hêbrơ roi tơbăt ăn tơdrong hiôk tih:

“Đĭ kơ lu ‘bok soi oei jang hơnơ̆ng rim năr soi kơ ‘Bok Kei-Dei, mă-lei tơdrong soi noh ưh kơ gơh pơklaih tơdrong yoch ôh. Gah Yêsu Krist, Sư soi akâu Sư kơ ‘Bok Kei-Dei wă pơklaih tơdrong yoch kon bơngai minh ‘măng sơ̆ tôm boih. Dang ei Sư tơoei gah ‘ma kơ ‘Bă Sư ‘Bok Kei-Dei.” (Hêbrơ 9: 11-12)

Hla bơar Êsai 9:6 roi Kră Yang Yêsu jơ̆ Kră Yang Hiôk Hian. Trŏ tơpă, Kră Yang jơ̆ tơm kơ tôm tơdrong hiôk hian lăm chăl arih lu bơ̆n. Sư ăn tơdrong hiôk hian kơ bơhngol, jơhngơ̆m, akâu jăn lu bơ̆n. Sư jơ̆ tơmam soi huai iŏk tơdrong yŏch bơ̆n minh wơ̆t đĕch tôm mah hloi, Sư kŭm tơgŭm bơ̆n hiôk hơiă hăm ‘Bok Kei Dei păng tơgŭm lu bơngai lui kơ Kră Yang jing minh jơhngơ̆m đon.

Tơdrong hiôk hian tơpă lăp minh Kră Yang Yêsu đĕch gơh ăn kơ bơ̆n. Ki sơ̆, kơplah inh tơl tơwih kơ tơdrong Kră Yang chu lôch tơ ‘long pơglang hăm nơ̆r “A-men”! tơdrong hiôk hian Kră yang ‘bĕnh blai lăm inh.

Phĕt Huai Tơdrong Yoch jơ̆ năr kon pơlei Kră Yang tơbral tơdrong yoch păng tơchĕng pơwao kơdih ‘bơ̆t anăp Kră Yang. Noh kŭm jơ̆ minh năr ‘bĕnh blai tơdrong hiôk chơt, yua kơ nơ̆r pơkă huay kơ jô̆ yo păng tŭk lê̆ tơdrong trăp trĭn tơdrong yoch ba ăn tơdrong hiôk hian, tơdrong hơmĕng, păng tơdrong hiôk chơt lăm jơhngơ̆m. Noh boih jơ̆ tơdrong Kră Yang Yêsu ăn kơ lu bơ̆n hrei ‘nâu. Ưh kơ lăp minh năr Phĕt Huai Tơdrong Yoch đĕch, mălei ‘bĕnh blai tơdrong hiôk hian rim năr lăm chăl arih kơpal teh âu.

Apĭnh đĭ đăng krao khan hơdai: Kơkuh kơ ‘Bok Kei Dei mă ‘mêm mơnat kơ kon, kon bơnê kơ ‘Bă yua kơ đơ̆ng Kră Yang Yêsu Krist, kon huay pă gleh lap chang gô minh năr huai tơdrong yoch lăm rim sơnăm. Yua kơ đơ̆ng tơdrong chu lôch tơ ‘long pơglang, kon đei Ih mơnat, hiôk hơiă hăm ‘Bă păng sơng iŏk tơdrong hiôk hian ling lang. Apinh Ih tơgŭm kon arih huay pă hli tơrơ, dah ăn tơdrong yoch chô̆ pơkơ̆ng, mălei băt pơdơh lăm tơdrong jang dŏng pơklaih đơ̆ng Kră Yang Yêsu đei pơkeh. Apinh tơdrong hiôk hian Ih oei lăm kon, wă kơ kon kŭm băt arih hiôk hơiă păng tơ’bôh tơdrong hiôk hian ăn kơ bơngai jum dăr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng ‘mêm kơ eng, buăl tam băt hơđăl Kră Yang Yêsu jơ̆ Kră Yang Hiôk Hian, păng ‘Bok Soi Tơm tih hloh dah ưh? Sư rơhing ba ăn kơ buăl tơdrong hiôk hian mă teh đak âu ưh kơ đei, minh tơdrong hơđơ̆ng ăn kơ bơhngol, jơhngơ̆m, păng akâu jăn. Yua kơ đơ̆ng tơdrong Sư chu lôch tơ ‘long pơglang, lu bơ̆n đei arih hiôk hơiă hăm ‘Bok Kei Dei păng đei krao wơ̆n wă arih hiôk hơiă hăm bơngai nai. Tơdrong hiôk hian noh ưh kơ ataih. Noh tơmam apah Kră Yang Yêsu răt hăm pham Sư păng gô ăn kơ bơngai bu lui ngeh, pơdơh lăm Kră Yang.

Shalom!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.