Txoj kev sib ntseeg siab rau tiam no cuag li tsawg zuj zus. Tib neeg tej kev sib raug zoo ib tug ua xyem xyav rau ib tug, vim ib txwm swm txoj kev tsis ntseeg siab, sib teem kom tas cai. Tiamsis tej lus hais tsis tau muaj ib zaum twg yuav yog tsis muaj qab hau – nws ris lub nra thiab tus cwjpwm ntawm ib tug tib neeg. Thiab yog lo lus cog tseg ntawm tej tus phooj ywg zoo tseem ceeb npaum ntawd ces Tswv Yexus tej lus cog tseg – tus uas tsis tau muaj ib zaum twg nws tsis tau ua raws li Nws tej lus cog tseg hauv Keeb kwm tib neeg ne yuav zoo li cas?

Hnub no, yog hnub 22/09/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maria Schleicher dhau ntawm Zaj kawm QHOV TSEEMCEEB NTAWM LO LUS COG TSEG

“Rau qhov tej uas Yexus ua puavleej tiav raws li Vajtswv tej lus cog tseg. Twb yog vim li ntawd peb cov uas ntseeg Yexus Khetos peb thiaj hais tias, “Amees,” yog peb ua rau Vajtswv tau koob meej” (II Kauleethaus 1:20)

Muaj ib yam uas kuv niaj hnub tiv thaiv nyob hauv kuv txoj kev ua neej thiab ua pub rau sawv daws: ntawd yog ua li kuv tej lus cog tseg.

Yog tias cog lus tuaj tom tshav dav hlau tos koj ces kuv yuav tuaj kom ncav lub sijhawm. Thov kom kuv pab npaj dabtsi rau pluas noj, ces tso siab tau kuv yuav ua kom tiav! Cheem tsum kom kuv saib ob peb tug menyuam txhob pub khiav tawm nraum zoov ces kuv yuav muaj ntsej muag thaum koj cheem tsum!

Yog ib tug sau ntaub ntawv, kuv saib lub zog ntawm txhua lo lus zoo heev. Muaj ib yam uas kuv pheej hais rau kuv tus kheej: “Lo lus hais tsuam tsi” thaum uas cog lus rau yam dabtsi, kuv yeej xav ua kom tiav. Kuv tuav tej lus cog tseg zoo vim xav dhau los ua ib tug neeg txaus ntseeg. Thaum kuv lees tias yam twg yog tiag, koj yuav ntseeg tias kuv twb poob lub sijhawm ntau los nrhiav thiab sau los ntawm tej uas kuv ntsib dhau hauv lub neej. Leej twg thov pab txoj haujlwm dabtsi, kuv yeej xav kom lawv tso siab tias kuv txoj kev ncaws hau yog cov lus ua rau lawv tso siab tau – tshwj tej thaum uas muaj kev tab kaum.

Nyob hauv Lukas 7:1-10, peb ntsib ib zaj xwm hais txog ib tug thawj tub rog txoj kev ntseeg. Tus qhev uas yawg hlub heev tab tom mob nyhav, ze txoj kev tuag. Yog li, yawg thiaj thov cov pov thawj hlob-cov neeg uas muaj suab npe hauv zej zos – mus thov Tswv Yexus kho zoo rau nws tus qhev.

Tswv Yexus thiaj nrog lawv mus rau ntawm tus thawj tub rog lub tsev. Tiamsis, ua ntej Tswv Yexus mus txog chaw, tus thawj tub rog ho txib neeg mus tos lawv thiab hais rau Tswv Yexus tias yawg tsis tsimnyog tau tus Tswv mus rau hauv Nws lub tsev. Yawg hais: “Tus Tswv, nyob tsam tabkaum koj, kuv yog ib tug uas tsis tsimnyog koj yuav mus hauv kuv lub tsev; thiab kuv yog ib tug uas tsis tsimnyog tuaj cuag koj. Thov koj hais tib los xwb, ces kuv tus tubtxib yeej yuav zoo. Txawm yog kuv los tseem muaj cov hlob uas kav kuv, thiab kuv muaj ib co tubrog uas kuv kav. Yog kuv hais rau tus no hais tias, ‘Mus!’ Nws txawm mus; yog kuv hais rau tus tod hais tias, ‘Los! ‘ Nws txawm los; thiab yog kuv hais rau kuv tus tubtxib hais tias, ‘Ua li no! ‘ Nws txawm ua li ntawd.” (Lukas 7:6-8).

Tus thawj tub rog ntseeg tias tsuas yog Tswv Yexus hais ib los xwb ces yuav dhau los muaj tseeb. Yawg nkag siab zoo Tswv Yexus muaj hwjchim thiab Nws ntseeg Tswv Yexus tej lus hais. Yawg paub tias tsuas yog Tswv Yexus hais xwb, nws tus qhev yuav zoo. Ntawm yawg tus kheej, thaum twg Tswv Yexus hais xwb ces tab pov tias yeej yuav tau zoo. Tus thawj tub rog no txoj kev ntseeg ua rau pom tias yeej tsis muaj ib yam dabtsi yuav tav tau Tswv Yexus tej lus dhau los muaj tseeb.
“Thaum Yexus hnov lawv hais li ntawd, nws xav tsis thoob li; nws tig mus hais rau cov neeg coob coob uas raws nws qab hais tias, “Kuv qhia rau nej hais tias, txawm yog hauv cov Yixalayees los kuv tsis tau porn ib tug uas muaj kev ntseeg npaum li tus no! Cov uas tus thawj tubrog txib tuaj ntawd, rov mus txog tom tus thawj tubrog tsev, ua ciav tus tubtxib twb zoo lawm” (Lukas 7:9-10).

Nyob ntawm Tswv Yexus, txhua lo lus hais puav leej muaj hwjchim. Yam uas Tswv Yexus hais yeej yuav dhau los muaj tseeb. Yog li, peb muaj cuab kav ntseeg txhua yam uas Tswv Yexus tau hais yuav dhau los muaj tseeb. Piv li, thaum nyeem II Kauleethaus 5:17 tias leej twg nyob hauv Yexus Khetos tus ntawd yuav yog ib tug neeg tshiab, koj ntseeg siab tau tias: “tej uas qub yuav dhau mus, txhua yam yuav dhau los ua tshiab.”

Thaum Tswv Yexus qhia peb tias tsis txhob txhawj txog tej kev cheem tsum vim Vajtswv yuav ua tus pab, ces Vajtswv lub siab yeej yog li ntawd (Mathais 6:31-33).
Tseeb tiag, Vajtswv txhua lo lus cog tseg puav leej tau ua tiav nyob hauv Yexus Khetos, raws li II Kauleethaus 1:20 tau hais: “rau qhov tej uas Yexus ua puavleej tiav raws li Vajtswv tej Ius cog tseg. Twb yog vim li ntawd peb cov uas ntseeg Yexus Khetos peb thiaj hais tias, “Amees,” yog peb ua rau Vajtswv tau koob meej”
Koj puas tab tom qaug zog? Tswv Yexus twb cog lus yuav cia rau txhua tus uas mus cuag Nws kom tau so (Mathais 11:28-30).

Koj puas ntshaw kom muaj txojsia ib txhis? Tswv Yexus cog lus yuav pub txojsia ib txhis rau tus uas ntseeg nws. Nws kuj cog lus tias yuav rov qab los coj peb mus nrog Nws nyob ua ke ib txhis (Yauhas 4:14; 14:2-3).

Koj puas hnov tias yus tab tom nyob ib leeg? Tswv Yexus cog lus yuav tso tus txhawb zog uas yog Vaj Ntsujplig los, tus ntawd yuav nrog peb nyob thiab pab cov neeg uas yog Vajtswv tug (Yauhas 14:16-17,26).

Tswv Yexus txhua lo lus hais puav leej muaj tseeb thiab tab pov, puav leej yog “muaj” thiab “Amees”! Yam uas Tswv Yexus cog lus, Nws yuav ua kom tiav. Yam uas Nws cog lus, Nws yuav ua. Yog li, peb muaj cuab kav ntseeg siab rau Nws, vim Tswv Yexus txhua lo lus cog tseg puav leej muaj nqis.

Thov caw nrog kuv peb thov Vajtswv ua ke: Vaj ntxwv Yexus, ua Koj tsaug vim koj ncaj ncees rau Koj txhua lo lus cog tseg. Ua Koj tsaug tau pub rau kuv tej lus cog tseg muaj nqis los cia siab thaum kuv tseem nyob hauv ntiajteb no. thov pab kom kuv nthuav tawm kuv txoj kev ncaj ncees dhau ntawm kuv lub neej txhua hnub. Thov qhia rau kuv paub ua lub neej kom yog raws li tej lus uas kuv tau hais thiab ncaj ncees ua raws li tej lus kuv cog tseg, kom tej neeg ib ncig kuv paub tias kuv yog koj cov menyuam. Kuv thov hauv Tswv Yexus Khetos lub npe, Amees.

Cov kwv tij, tom qab tej hnub mus los hauv lub neej, peb pom tias txhua yam nws yuav cia li dhau mus, tsuas muaj Vajtswv tej lus xwb thiaj yuav nyob mus ib txhis. Thaum txoj kev ua neej no yoj yees thiab tib neeg tej lus cog tseg tsis yog thaum twg tau ceev zoo zoo, peb yuav nrhiav tau txoj kev khov kho rau ntawm Vajtswv tej lus cog tseg. Yam uas Vajtswv twb cog lus lawm, Nws yuav ua kom tiav. Yog li, thov Vajtswv pab kom peb paub ntseeg Nws ntau dua txhua hnub, tib txhij ntawd kuj dhau los ua tus neeg ua neej ncaj ncees thiab tsimnyog ntseeg nyob rau hauv lub ntiajteb no – ib yam li qhov uas Vajtswv tau hlub thiab tuav Nws tej lus cog tseg rau peb mus txog thaum kawg.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.