Nyob hauv lub neej, muaj ntau zaug peb hnov lo lus: “qhia rau kuv paub saib koj tus phooj ywg yog leej twg, kuv mam qhia rau koj paub tias koj yog tus neeg zoo li cas.” Lo lus no muaj ib feem nthuav tawm ib qhov tseeb tias tej neeg uas peb pheej nrog lawv nyob ntawm ib sab tej zaum yuav cuam tshuam txog peb txoj kev xav, tus cwjpwm coj thiab txoj kev uas peb ua neej. Yog ib tug ntseeg Vajtswv, peb yuav tau ua tib zoo zeem kom paub txhua txoj kev sib raug zoo puav leej yuav cuam tshuam txog peb txoj kev ua neej thiab peb txoj kev ntseeg. Yog li, yam uas tseem ceeb yog peb tab tom xaiv dhau los ua tus neeg zoo li cas nyob hauv tej kev sib raug zoo ntawd.

Hnub no, yog hnub 23/09/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm TSWJ LUB SIAB KOM TSAV DEB KEV PHEM

“Yeej tsis tau muaj leejtwg yuav zoo siab hlo muab nws lub cev muag mus ua txhaum tabmeeg tus Tswv li Ahaj qaug Yexenpees uas yog nws tus pojniam tej lus haub ntxias li.” (1 Vajntxwv 21:25)

Thaum tseem yau, muaj ib qhov kev nco txog uas kuv tseem nco ntsoov. Txhua hnub thiv, kuv niam kuv txiv nkawd sawv ntxov heev npaj yuav mus pehawm Vajtswv. Kuv niam hnav tsho ntev, txiv hnav tsho dawb, coj hlua zoo zoo. Tiamsis muaj ib yam ua rau kuv ceev faj yog txiv pheej siv ib yam dabtsi coj los pleev txiv cov plaub hau kom ncaj, kom du lug. Yeej tsis nkag siab, kuv kuj xav xyaum li kuv txiv. Yog li kuv thiaj muab dej los pleev kuv cov plaub luv luv saum taubhau, ua kom zoo li txiv cov plaub.

Thaum rov qab nco txog lub sijhawm ntawd, kuv pom tias tej menyuam ib ncig lawv kawm tej neeg ib ncig li yooj yim heev. Tiamsis tsis yog tsuas yog menyuam xwb thiaj zoo li ntawd. Feem ntau peb puav leej raug cuam tshuam los ntawm tej neeg uas peb tseg sijhawm nyob ntawm lawv ib sab. Ib tug neeg yeej ib txwm ua tib zoo maj mam dhau los ua tus neeg tsis ceev faj thaum nrog cov neeg lam tau lam ua nyob ua ke. Ib tug neeg ncaj ncees tej zaum yuav pib dag thaum uas ua neej nrog ib tug neeg dag. Yog tias tej neeg ib ncig lawv yuav cuam tshuam txog peb txoj kev ua neej, ces lawv kuj yuav cuam tshuam txog peb txoj kev ntseeg thiab.

Qhov no yim txaus xav thaum uas hais txog lub neej txijnkawm. Lub neej txijnkawm yog qhov kev sib sau ntawm ob tug neeg, tiamsis kuj yog qhov kev sib ntsib ntawm ob txoj kev ua neej, ob qhov muaj nqis sib txawv, ob lub neej sab ntsujplig sib txawv. Peb tus txijnkawm tej zaum yuav txhawb kom peb hlub Vajtswv dua. Tiamsis tej zaum kuj yuav ua rau peb lub neej sab ntsujplig poob zuj zus yog tias peb tsis ceev faj thiab tsis tuav yus nyob hauv Vajtswv.

Vajluskub qhia rau peb pom txog ib lub neej txijnkawm uas nws tseg tus qauv tsis zoo ntawd yog lub neej txijnkawm ntawm vajntxwv Ahaj thiab Yexanpees.

Ahaj yog tus vajntxwv thib xya nyob rau tebchaws Yixalayees sab qaum teb. Yawg kav 22 xyoo. Ahaj yog ib tug vajntxwv muaj hwjchim tiamsis “ua phem ntawm Vajtswv qhov muag thiab tseem ua phem tshaj cov vajntxwv ua ntej nws” (1 Vajntxwv 16:30). Lub sijhawm uas yawg ua vajntxwv kav, Ahaj twb ntsia pom Vajtswv lub hwjchim dhau ntawm tus cev lus Eliyas thiab hnov Vajtswv tej lus ceeb toom, tiamsis yawg yeej xaiv ua lub neej phem, tsis raws li Vajtswv txoj kev.

Ahaj tus pojniam yog Yexanpees. Pog yog vajntxwv Xidoos tus ntxhais. Nkawd lub neej txijnkawm dhau los ua ib tug qauv cuam tshuam loj heev rau cov neeg Yixalayees lub neej sab ntsujplig. Yexanpees yog ib tug neeg pe tus mlom Npa-as, yog li yeej tsis muaj dabtsi txawv thaum uas pog txhawb nqa txoj kev pe mlom. Pog tseem caum tua Vajtswv cov cev lus, nrhiav kev tua cov neeg uas tawm tsam nws. Tiamsis peb pom tias, txawm yog raug Yexanpees quab yuam kom ua los, Ahaj yuav tau ris lub nra txog nws qhov kev xaiv thiab tej haujlwm uas nws ua. Vajluskub sau: “Yeej tsis tau muaj leejtwg yuav zoo siab hlo muab nws lub cev muag mus ua txhaum tabmeeg tus Tswv li Ahaj qaug Yexenpees uas yog nws tus pojniam tej lus haub ntxias li. Nws tau ua tej kev txhaum uas txajmuag kawg vim nws mus pe mlom ib yam li cov Amoos. Cov neeg Amoos twb raug tus Tswv muab ntiab tawm hauv lub tebchaws thaum cov Yixalayees tabtom los txeeb nyob lawm” (1 Vajntxwv 21:25-26).

Nqe Vajluskub no ua rau peb pom txog ob qhov tseeb. Yexanpees nws cuam tshuam loj heev rau saum Ahaj. Pog ntxias kom yawg ua phem thiab tua neeg ntawm Vajtswv xub ntiag. Tiamsis Vajluskub kuj hais meej meej tias Ahaj “cim civ muag nws mus ua phem” hais tiag yawg cim civ muaj cai xaiv, tiamsis yawg tau xaiv tsis mloog lus.

Thiab yog tsis muaj Yexanpees, Ahaj puas yuav dhau los ua neeg phem? Peb tsis paub tseeb lo lus teb. Yam uas Vajluskub qhia rau peb paub yog Yexanpees tau ua rau txoj kev tsis mloog lus nyob rau hauv Ahaj lub siab nthuav tawm kom meej dua.

Qhov no ua rau kuv xav txog txoj kev thooj yim hauv lub neej sab ntsujplig. Thaum ua neej nyob hauv thaj chaw tso cai rau kev txhaum, yog peb tsis ceev peb tus kheej kom ntshai Vajtswv, peb yuav yooj yim thooj yim rau kev txhaum, thiab tsis quav ntsej Vaj Ntsujplig tej lus ceeb toom, ua mus ua tuaj saib qhov uas ua tsis yog ntawd yog ib yam uas tsis yog kev txhaum. Thiab txaus ntshai dua yog peb tsis paub txog peb tus kheej ntxiv lawm. Ntawd yog thaum uas peb cim civ “muag peb tus kheej mus ua phem” ntawm Vajtswv xub ntiag. Thaum kawg tus neeg ntawd tus ntsujplig dhau los pob puas thiab kev puas tshuaj pib tshwm tuaj yog yam uas yooj yim nkag siab.

Zaj xwm hais txog Ahaj kuj qhia rau pom txog txoj kev thooj yim rau kev txhaum thaum kawg tsis yog raug rau tus neeg ntawd xwb. txoj kev pe mlom thiab tsis mloog lus tau cuam tshuam tag nrho rau haiv neeg Yixalayees. Pom tias, lub neej txijnkawm nws yuav cuam tshuam rau tej menyuam, tsev neeg thiab tag rho cov nyob tomqab. Yog li, thaum uas paub txog qhov no, koj yuav tau tshuaj saib koj lub neej, lub siab tamsim ntawm Vajtswv xub ntiag. Cov neeg uas nyob ze koj tshaj puas tab tom cab koj mus nyob ze Vajtswv? Koj puas tab tom liam txim rau lwm tus txog yus lub neej sab ntsujplig? Nyob hauv ntau txoj kev xaiv ntawm lub neej, koj puas tab tom xaiv mus raws li Vajtswv txoj kev, txawm yog yuav tau them nqi? Txawm yog lub neej ib ncig yuav zoo li cas los, peb yuav tau nco ntsoov qhov no: “Koj yuav tsum ceevfaj thiab xav zoo zoo, rau qhov koj lub neej mus raws li koj tej kev xav” (Pajlug 4:23).

Thov caw nrog kuv peb thov Vajtswv ua ke: Tus Tswv, thov ceev kuv lub siab kom ncaj ncees ntawm koj lub xub ntiag. Nyob hauv txhua thaj chaw thiab tej kev sib raug zoo uas koj tso nyob ib ncig kuv, thov pab kom kuv ceev faj, tsis thooj yim rau kev txhaum tiamsis txiav txim nthuav tawm Vajtswv txoj kev hlub thiab txoj kev dawbhuv tawm. Thov kom tej neeg ib ncig kuv tau txav los ze Vajtswv dhau ntawm kuv lub neej. Kuv thov hauv Tswv Yexus Khetos lub npe, Amees.

Cov kwv tij txhua tus, txhua zaug uas ntog ntawm lub neej sab ntsujplig, txhob maj liam txim rau lub neej ib ncig lossis tej neeg ib ncig. Tiamsis ua ntej, yuav tau tshuaj yus lub siab thiab lub nra ntawm yus tus kheej tej kev xaiv. Thaum daws tau tej teeb meem sab hauv peb lub siab, koj thiaj yuav hloov pauv tau tej kev sib raug zoo thiab txhua yam ib ncig. Yog muaj qhov kev sib raug zoo twg lossis thaj chaw twg tab tom ua rau koj ua tsis tau lub neej dawbhuv, tseem npog kev txhaum cia, cia li vam khom Vajtswv, koj yuav tau muaj lub siab tawv hloov, thiab txiav txim siab tso tseg. Txawm yog nyob rau lub caijnyoog twg los, kuj yuav tau cia Vajtswv lub tebchaws ua qauv rau tej neeg ib ncig koj kiag hnub no.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.