Đon lui lăm chăl arih hrei ‘nâu rai đunh rai rơdu bơih. Lu bơngai năm ngôi hơpong dih băl hăm jơhngơ̆m ưh kơ ‘maih tơpă, yua kơ lu sư đei juăt kơ pơm thoi noh bơih, juăt kơ pơma pơkă mă ưh kơ pơm kiơ̆. Na nơ̆r pơma ưh kơ layơ tơpăt ôh – noh jơ̆ sĭt pŭ iŏk tơdrong ưh kơ lui ngeh đơ̆ng minh ‘nu kon bơngai. Na nơ̆r kon bơngai gĭt kăl dang noh, na pơma kiơ kơ dôm lu nơ̆r Kră Yang Yêsu đei pơkă gĭt kăl hloh kơ noh dơ̆ng – Nơ̆r pơkă đơ̆ng Sư ling-lang ‘blep ngăl.

Năr ‘nâu, năr 22/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Maria Schleicher kơ̆l ‘bai PŬ TRĂP ĐƠ̆NG NƠ̆R PƠKĂ

“Dôm tơdrong ‘Bok Kei-Dei pơkă wă tơgŭm, Yêsu Krist năm hloi. Thoi noh na dôm tơdrong bơ̆n krao khan bơ̆n pơma A-men, noh wă khan bơnê kơ ‘Bok Kei-Dei tơpăt ling-lang ăn Yêsu Krist jur tơgŭm tơpă.” (II Kôrintô 1:20)

Đei minh tơdrong mă inh ling-lang adrin wei răk lăm tơdrong arih păng ngôi hơdai hăm lu bôl buăl: noh boih pơm trŏ thoi nơ̆r inh pơkă.

Inh đei pơkă wă năm tơ anih gre păr sơng iŏk ih, inh gô năm truh trŏ kơ jơ. Ih apinh inh hơmet tơmam sa kiơ wă sŏng sa, ih ‘nĕ kơ hiơ̆k bơngơ̆t tôm tơdrong gô jing keh đang! Dah ih kăl kơ inh wei lăng kon hơ’lơ̆p ih wă lĕch tơ ‘nguaih tŏsĕt, lei inh gô truh tơ noh mưh ih kăl kơ inh!

Tơdrong bơ̆jang inh noh jơ̆ chih hla bơar, thoi noh na inh lăng gĭt tơpă kơ rim nơ̆r inh chih păng pơma. Đei minh tơdrong inh juăt tơ’blŏk kơ kơdih inh: “Nơ̆r pơma sĭt tơpă.” Mưh inh đei pơkă minh tơdrong kiơ, inh gô pơm trŏ tôm tơdrong noh. Inh wĕi nơ̆r inh pơkă yua kơ inh ‘maih wă jing minh ‘nu bơngai mă đe gô lui gơnang tơpă. Mưh inh khan minh tơdrong kiơ noh boih tơpă, ih gô lui kơ inh khan inh đei lơ khei năr wă chă băt hơđăl kơ tơdrong noh, dah inh đei tơ’bôh đơ̆ng tơdrong inh kơdih đei tơ’bơ̆p lăm tơdrong arih. Dah đei bu apinh inh tơgŭm pơm minh tơdrong kiơ, inh ling-lang ‘maih wă ăn kơ đe gơnang tơpă khan nơ̆r inh khan “’blep” noh boih nơ̆r pơkă mă đei lui gơnang – nguaih kơ tơdrong mă inh ưh kơ gơh pơm đĕch.

Lăm Luka 7:1-10, bơ̆n tơ’bơ̆p tơdrong gah đon lui đơ̆ng minh ‘nu ‘bok yŏng linh Rôm. Sư đei minh ‘nu đĭch mă sư kơeng bơlŏ, mă đei jĭ jăn wă truh tơ lôch. Thoi noh, sư wơh lu kră pơlei đe Juđê – lu bơngai mă đe chu yom lăm pơlei – năm krao apinh Kră Yang Yêsu năm tơ sư wă pơklaih jĭ đĭch sư.

Na Yêsu năm kiơ̆ hloi lu đe ei. Mă kơplah adrol kơ Sư truh tơ hnam ‘bok yŏng linh, sư wơh lu bơngai buăl sư năm tơ’bơ̆p Yang Yêsu na khan sư ưh kơ hơnhŏ kơ đei Kră Yang wă mơ̆t tơ hnam sư: “Ơ ‘Bok, yŏng nhôn khan Ih huay kơ mah năm truh tơ hnam sư ôh. Sư khan sư ưh kơ hơnhŏ wă tơmơ̆t Ih tơ hnam sư. Păng sư kư̆m khan sư ưh kơ hơnhŏ wă năm tơ’bơ̆p Ih tơ âu ôh. Sư wă kơ Ih sơkat đơ̆ng âu đĕch na đĭch sư tơ hnam kư̆m klaih mơ̆n. Sư khan sư kư̆m đei đe pơgơ̆r sư păng sư kư̆m đei pơgơ̆r lu linh mơ̆n. Dah sư khan kơ bơngai âu, mă bơngai to: Năm bĕ, đe năm hloi chu sư. Dah sư bơtho lu đĭch sư jang, mă dôm tơdrong kiơ kiơ, lu sư jang hloi. Na sư kư̆m wă kơ Ih pơm thoi noh mơ̆n. Sư wă kơ Ih sơkat đơ̆ng âu đĕch na đĭch sư tơ hnam kư̆m gô klaih mơ̆n.” (Luka 7:6-8)

‘Bok yŏng linh noh lui tơpă khan mưh Kră Yang Yêsu sơkat minh nơ̆r đĕch, tơdrong noh gô jing hloi. Sư băt hơđăl tơdrong pơgơ̆r đơ̆ng Kră Yang, păng lui đĭ jơhngơ̆m kơ tơdrong mơsêh mơyang lăm nơ̆r Sư pơma. Sư băt kơ mưh Kră Yang pơma sơkat đĕch, lei đĭch sư tơ hnam gô klaih tơpă. Hăm sư, mưh Kră Yang đei pơma, tơdrong noh đei hloi boih. Đon lui ‘bok yŏng linh noh lui tơpă khan ưh kơ đei tơdrong kiơ gơh pơgăn ăn nơ̆r Kră Yang Yêsu pơma khan.

“Yêsu kơtơ̆ng sư khan thoi noh, Sư mah hlĭch kơ đon, yua ‘bok noh đei đon lui tơpă. Na Sư hue tơ rŏng khan kơ lu bơngai tơpôl mă kiơ̆ Sư ei thoi âu: ‘Inh khan kơ iĕm tơpă, đơ̆ng sơ̆ Inh tam mă ‘bôh ôh khŭl bơngai Juđê lui kơjăp dang bơngai Rôm âu.’ Đơ̆ng noh na lu bơngai mă đơ̆ng ‘bok tih linh athei năm đih Yêsu ei wih hĭ tơ hnam. Lăp truh tơ hnam ‘bôh đĭch mă đêl jĭ hei klaih hloi.” (Luka 7:9-10)

Hăm Kră Yang Yêsu, rim nơ̆r Sư pơma đei tôm kơ nơ̆r pơgơ̆r. Tơdrong Sư pơma gô jing đei tơpă. Thoi noh na bơ̆n lui đĭ jơhngơ̆m khan dôm lu nơ̆r Sư pơma gô jing trŏ tơpă, đŏk lăm II Kôrintô 5:17 khan: “Thoi noh na bu kiơ̆ Yêsu Krist, bơngai noh bơ̆n băt kơ ‘Bok Kei-Dei pơjing sư jing bơngai ‘nao, dôm tơdrong so ưh pă đei boih, sư đei tơdrong ‘nao ngăl, yua kơ sư jing bơngai ‘nao boih.”

Kơplah Kră Yang Yêsu bơtho lu bơ̆n ‘nĕ tơchĕng gah dôm tơdrong bơ̆n kăl lăm tơdrong arih, yua kơ ‘Bă bơ̆n tơ plĕnh ti băt boih dôm tơdrong lu bơ̆n kăl yua păng Sư gô tơgŭm bơ̆n, lei tơdrong Sư bơtho noh tơpă dang noh mơ̆n (Mathiơ 6:31-33).

Tơpă, dôm tơdrong ‘Bok Kei-Dei pơkă gô jing đei tơpă lăm Yêsu Krist, kư̆m thoi II Kôrintô 1:20 pơma khan:

“Dôm tơdrong ‘Bok Kei-Dei pơkă wă tơgŭm, Yêsu Krist năm hloi. Thoi noh na dôm tơdrong bơ̆n krao khan bơ̆n pơma A-men, noh wă khan bơnê kơ ‘Bok Kei-Dei tơpăt ling-lang ăn Yêsu Krist jur tơgŭm tơpă.”

Ih hăm oei gleh lap ưh? Kră Yang Yêsu pơkă ăn tơdrong pơdơh kơ lu bơngai mă năm tơ Sư (Mathiơ 11:28-30).

Ih ‘maih wă tơdrong arih ling-lang ưh? Kră Yang Yêsu pơkă ăn tơdrong arih ling-lang kơ lu bơngai lui kơ Sư. Sư kư̆m pơkă gô jur dơ̆ng wă anhăk ba lu bơ̆n oei hơdai hăm Sư ling-lang:

“Tơ hnam ‘Bă Inh đei lơ anih oei tơpă. Dah ưh kơ đei Inh kư̆m khan ưh kơ đei mơ̆n. Na dang ei Inh wă năm hơmet kơ iĕm anih. Đơ̆ng rŏng kơ Inh năm hơmet kơ iĕm anih oei, Inh gô jur tơ âu dơ̆ng, Inh wă anhăk ba iĕm tơ anih Inh; na iĕm oei hơdai hăm Inh ling-lang tơ ei.” (Yôhan 14:2-3)

Ih hăm mơn kơ sơ’ngon ưh? Kră Yang Yêsu đei pơkă gô apinh ‘Bă Inh ăn minh ‘nu dŏng iĕm plơ̆ng dơ̆ng, anăn Sư Yang Bơhngol ‘Lơ̆ng. Sư gô tơbăt ăn tơdrong ‘Bok Kei-Dei tơpă păng Sư gô oei hơdai lu bơngai lui kơ Sư ling-lang.” (Yôhan 14:16-17,26)

Tôm lu nơ̆r Kră Yang Yêsu pơma sĭt tơpă păng tơpăt ling-lang – jơ̆ “’blep” păng “A-men.” Tơdrong Sư pơkă, Sư gô pơm trŏ. Tơdrong Sư pơma, Sư gô ăn jing tơpă. Thoi noh na lu bơ̆n athei lui gơnang đĭ jơhngơ̆m kơ Sư, yua kơ dôm lu nơ̆r Kră Yang Yêsu pơma ling-lang tơpăt.

Apĭnh đĭ đăng krao khan hơdai: Kơkuh kơ Pơtao Yêsu, kon bơnê kơ Ih yua kơ Ih ling-lang ‘lơ̆ng tơpăt, pơm trŏ thoi dôm lu nơ̆r Ih đei pơkă. Bơnê kơ Ih yua kơ Ih đei ăn kơ kon dôm nơ̆r pơkă gĭt kăl, wă kơ kon gơh gơnang kơ Ih kơplah kon oei arih lăm ala teh âu. Apinh Ih tơgŭm kon, wă kơ tơdrong arih kon rim năr tơbăt rơđah tơdrong Ih ‘lơ̆ng tơpăt. Apinh Ih bơtho kon ling-lang arih pơm trŏ thoi nơ̆r kon pơma, păng chu yom tơpăt wei răk tôm tơdrong kon đei pơkă, wă kơ lu bơngai jum dăr kơ kon băt kơ kon jing kon Ih tơpă. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đơ̆ng rŏng kơ dôm lu năr bơ̆n yak năm đơ̆ng tu tơ bơbah, đơ̆ng bơbah tơ tu lăm tơdrong arih, bơ̆n mơn băt khan tôm tơdrong ala teh âu gô hlôi hloh, pôm Nơ̆r Kră Yang đĕch oei ling-lang ưh kơ layơ tôch. Kơplah tơdrong arih đei lơ tơdrong tơplih, păng dôm lu nơ̆r kon bơngai pơkă ưh kơ ling-lang đei pơm trŏ, lu bơ̆n tam đei gơnang kơ dôm nơ̆r Kră Yang pơkă, yua kơ nơ̆r Sư jơ̆ sĭt păng tơpăt ling-lang. Tơdrong Kră Yang đei pơkă, Sư gô pơm trŏ. Thoi noh na apinh Kră Yang tơgŭm lu bơ̆n rim năr băt gơnang kơ Sư lơ hloh dơ̆ng, păng jing bơngai arih chu yom ‘lơ̆ng tơpăt, jing bơngai mă đe lui gơnang lăm ala teh âu – kư̆m thoi Kră Yang đei ‘mêm kơ lu bơ̆n păng pơm trŏ tôm nơ̆r Sư pơkă kơ bơ̆n khŏm khŏm.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.