Lăm tơdrong arih, đei lơ wơ̆t bơ̆n mơ̆ng đe pơma khan: “Tơbăt kơ inh băt buăl ih mă ih ‘mêm tơpă noh bu, na inh gô khan kơ ih băt ih bơngai thoi yơ.” Nơ̆r pơma âu đei minh pah tơbăt kơ minh tơdrong tơpă khan lu bơngai mă bơ̆n juăt kơ oei hơdai gô pơm ăn kơ tơdrong bơ̆n tơchĕng, dôm lu tơdrong juăt kơ pơm păng tơdrong arih lu bơ̆n. Lu bơ̆n jing bơngai lui kơ Kră Yang, thoi noh bơ̆n athei băt tơdrong pơgơ̆p hơdai gô đei rok kiơ̆ lăm tơdrong arih păng lăm đon lui lu bơ̆n. Yua kơ thoi noh, tơdrong kăl lu bơ̆n athei rơih iŏk wă jing bơngai thoi yơ lăm dôm lu tơdrong pơgơ̆p hơdai ‘noh.

Năr ‘nâu, năr 23/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai BƠWEI JƠHNGƠ̆M WEH ĐƠ̆NG TƠDRONG YOCH KƠNÊ̆.

“Tơpă, ưh kơ đei bơngai bu thoi Ahap tĕch akâu sư pơm tơdrong yoch kơnê̆ ‘bơ̆t anăp Kră Yang, kiơ̆ kơ Jêsebel akăn sư pơhlŭ.” (I Lu Pơtao 21:25)

Kơplah inh oei hơ’lơ̆p, đei minh tơdrong mă inh ‘blŏk ling-lang. Rim pơge Năr Tơpơh, mĕ ‘bă inh juăt kơ iung hrôih wă hơmet adrol kơ năm tơ Hnam Akŭm kơkuh kơ Kră Yang. Mĕ inh hrŭk ao tai (áo dài), ‘bă inh hrŭk ao kok hơdah păng ‘băk ka-vat. Mă đei minh tơdrong pơm kơ inh ling-lang kơnhăm lăng ‘bă inh juăt kơ iŏk tơmam kiơ noh wă pơm kơ sŏk sư tơpăt ‘lơ̆ng. Inh kư̆m ưh kơ băt yua kơ kiơ, mă inh kư̆m ‘maih pơm kiơ̆ thoi ‘bă inh mơ̆n. Thoi noh, inh iŏk đak bah kơl mă sŏk inh kơđeh đĕch, adrin pơm thoi noh wă kơ nhen sŏk ‘bă inh.

Kơplah ‘blŏk kơ tơdrong noh, inh băt kơ lu hơ’lơ̆p ‘bônh kơ pơm kiơ̆ lu bơngai jum dăr. Ưh kơ sĭ hơ’lơ̆p đĕch pơm thoi noh ôh. Lơ bơngai lu bơ̆n ‘bônh kơ pơm kiơ̆ hăm dôm lu bơngai mă bơ̆n oei hơdai đunh. Minh ‘nu bơngai sư juăt kơ pơ’lơ̆ng tơpă, mă kơplah oei jê̆ minh ‘nu bơngai pơm kư̆ kă, hăt hot sư kư̆m jing pơm kư̆ kă, hăt hot thoi noh. Minh ‘nu bơngai sư pơm ‘lơ̆ng tơpăt, mă kơplah oei jê̆ minh ‘nu bơngai juăt kơ hơlĕnh, plêl sư kư̆m gô jing bơngai thoi noh mơ̆n. Tơdah lu bơngai jum dăr kơ bơ̆n mă pơm ăn kơ tơdrong arih bơ̆n tơplĭh kiơ̆ thoi noh, lei lu sư kư̆m gô pơm tơplih ăn kơ đon lui lu bơ̆n mơ̆n.

Tơdrong âu kăl kơ tơchĕng lơ kơplah pơma gah tơdrong ŭnh om. Tơdrong ŭnh om jơ̆ tơdrong pơgơ̆p hơdai đơ̆ng ‘bar ‘nu bơngai, mă kư̆m tơdrong tơ’bơ̆p đơ̆ng ‘bar tơdrong arih phara, ‘bar tơdrong tơchĕng păng ‘bar tơdrong arih gah bơhngol phara băl. Klo dah akăn bơ̆n gô pơlung bơ̆n ‘mêm kơ Kră Yang lơ hloh mơ̆n, mă kư̆m gô pơm ăn kơ tơdrong arih gah bơhngol bơ̆n rơdu tơdah bơ̆n ưh kơ krăng kơchăng bơwei akâu bơ̆n lăm Kră Yang.

Sơ̆p hla bơar Nơ̆r ‘Bok Kei-Dei tơbăt ăn kơ bơ̆n ‘bôh minh tơdrong arih lăm ŭnh om mă đei truh răm dêh, noh boih tơdrong ŭnh om pơtao Ahap hăm Jêsebel.
Ahap boih pơtao mă tơpơh đơ̆ng dêh char gah yă-nơ̆m Isơrael. Sư pơgơ̆r lu kon pơlei ‘bar-jĭt ‘bar sơnăm. Ahap boih minh ‘nu pơtao đei tơdrong pơgơ̆r tih, mă-lei sư “pơm tơdrong yoch ‘bơ̆t anăp Kră Yang hloh kơ đĭ-đăng lu pơtao adrol kơ sư” (I Lupơtao16:30). Lăm chăl sư pơgơ̆r, Ahap đei ‘bôh tơdrong mơsêh mơyang pran kơtang đơ̆ng ‘Bok Kei-Dei athei bơngai pơtruh nơ̆r Kră Yang noh Êli, păng đei mơ̆ng dôm nơ̆r Kră Yang roi tơbăt kơ sư. Mă-lei sư rơih iŏk arih lăm tơdrong kơnê̆, na rai weh ataih đơ̆ng Kră Yang. Akăn Ahap anăn Jêsebel. Sư kon drŏ-kăn pơtao khŭl Siđôn. Tơdrong ŭnh om Ahap hăm Jêsebel đei pơm tơplih gah bơhngol tih tơpă kơ lu kon pơlei Isơrael. Jêsebel kơkuh kơ yang Baal, thoi noh ưh kơ hlĭch kơ đon sư pơhlŭ păng tơgŭm ăn kơ tơdrong kơkuh kơ rup yang rai lơ. Sư kư̆m druh ‘moi păng pơlôch lu bơngai pơtruh nơ̆r ‘Bok Kei-Dei, chă trong wă pơrăm lu bơngai mă ayăt kơ sư. Mă-lei lu bơ̆n băt, Jêsebel pơhlŭ Ahap, Ahap pŭ iŏk tơdrong glăi gah dôm tơdrong sư rơih iŏk păng pơm. Sơ̆p hla bơar Nơ̆r ‘Bok Kei-Dei chih: “Tơpă, ưh kơ đei bơngai bu thoi Ahap tĕch akâu sư pơm tơdrong yoch kơnê̆ ‘bơ̆t anăp Kră Yang, kiơ̆ kơ Jêsebel akăn sư pơhlŭ. Dôm tơdrong sư pơm kơ Kră Yang areh dêh, sư kơkuh kơ rup yang thoi lu bơngai Amôrit kơkuh, lu sư noh kon pơlei pơla mă Kră Yang pơpuh tơlĕch bơih lu sư đơ̆ng anăp lu bơngai Isơrael.” (I Lupơtao 21:25-26)

Nơ̆r lăm Sơ̆p hla bơar ‘Bok Kei-Dei âu tơbăt ăn kơ bơ̆n ‘bôh ‘bar tơdrong lăm minh ‘măng. Jêsebel đei pơm tơplih kơ Ahap. Sư pơhlŭ Ahap pơm tơdrong yoch kơnê̆, pơm dôm tơdrong mă Kră Yang areh. Na Sơ̆p hla bơar ‘Bok Kei-Dei kư̆m pơma rơđah khan Ahap “tĕch akâu sư pơm tơdrong yoch kơnê̆ ‘bơ̆t anăp Kră Yang.” Tơbăt rơđah, sư đei rơih iŏk, mă sư rơih iŏk ưh kơ chu yom Kră Yang.
Thoi noh, tơdah ưh kơ đei Jêsebel, Ahap gô jing bơngai kơnê̆ dah ưh? Bơ̆n ưh kơ băt tơpă nơ̆r tơl. Tơdrong Sơ̆p hla bơar Nơ̆r ‘Bok Kei-Dei ăn kơ bơ̆n băt boih Jêsebel đei pơhlŭ, pơm ăn tơdrong ưh kơ chu yom mă đei đơ̆ng adrol lăm jơhngơ̆m Ahap tơbăt rai rơđah hloh.

Tơdrong âu pơm kơ inh tơchĕng gah tơdrong bơ̆n oei hơdai tơdrong yoch lăm tơdrong arih gah bơhngol. Kơplah bơ̆n oei lăm minh anih juăt kơ pơm tơdrong yoch, dah bơ̆n ưh kơ hli yom kơ Kră Yang păng kơchăng bơwei akâu bơ̆n lăm Sư, lei bơ̆n ‘bônh kơ hơdai tơdrong yoch. Bơ̆n gô ‘bônh ưh kơ mơ̆ng Yang Bơhngol ‘Lơ̆ng bơtho khan kơ bơ̆n, lăng tơdrong ưh kơ trŏ jing thoi tơdrong juăt, păng tơdrong hli hloh jơ̆ bơ̆n ưh pă băt dơ̆ng bơih tơdrong arih bơ̆n kơdih thoi yơ. Noh boih kơplah bơ̆n “tĕch akâu bơ̆n kơdih wă pơm tơdrong yoch kơnê̆ ‘bơ̆t anăp Kră Yang.” Gô đei tơdrong arih gah bơhngol bơngai noh rai rơdu, rai weh ataih đơ̆ng Kră Yang, na pơ̆k huŏng lăm tơdrong yoch sĭt gô truh tơpă.

Tơdrong pơtao Ahap kư̆m tơbăt ăn kơ bơ̆n ‘bôh khan tơdrong gô đei lăm tơdrong hơdai kiơ̆ kơ tơdrong yoch ưh kơ tôch ‘bơ̆t akâu kơdih đĕch ôh. Tơdrong kơkuh kơ rup yang păng ưh kơ chu yom Kră Yang đei pơm tơplih truh tơ đĭ-đăng lu kon pơlei Isơrael. Bơ̆n ‘bôh tơdrong ŭnh om ling-lang đei pơm pơplih truh tơ lu kon, tơ hnam dơnŏ, păng truh tơ adrĕch adrŭng đơ̆ng rŏng kơ lu bơ̆n.

Yua kơ thoi noh, kơplah bơ̆n băt kơ tơdrong âu, ih athei tơchĕng pơwao lăng tơdrong arih păng jơhngơ̆m ih kơdih ‘bơ̆t anăp Kră Yang. Lu bơngai mă oei jê̆ ih hloh kơ đe nai, lu sư hăm chông ba ih năm jê̆ Kră Yang rai hloh dah ưh? Ih oei pơtă tơdrong glăi đơ̆ng ih kơ lu bơngai nai gah bơhngol dah ưh? Lăm lơ tơdrong rơih iŏk lăm tơdrong arih, ih oei rơih iŏk yak kiơ̆ trong Kră Yang mă khan pŭ iŏk tơdrong pơmat dah ưh? Mă khan dôm tơdrong jum dăr thoi yơ, bĕ bơ̆n ling-lang ‘blŏk kơ nơ̆r âu: “Kơchăng bĕ ling-lang wă kơ wei-lăng jơhngơ̆m ih, Yua kơ tơdrong arih tơm lĕch đơ̆ng noh.” (Tơdrong Pơđơ̆k 4:23)

Apĭnh đĭ đăng krao khan hơdai: Kơkuh kơ Kră Yang, apinh Ih wei-lăng jơhngơ̆m kon ling-lang tơpăt ‘bơ̆t anăp Ih. Lăm rim anih păng rim tơdrong pơgơ̆p dih băl mă Ih dan ăn kơ kon, apinh Ih tơgŭm kon chơ̆n jơhngơ̆m păng kơchăng kơdih, huay kơ lui kiơ̆ tơdrong yoch, mă adrin tơ’bôh jơhngơ̆m ‘mêm mơnat păng ‘lơ̆ng rơgoh đơ̆ng Ih. Hơpơi kơ lu bơngai jum dăr kơ kon đei năm jê̆ Ih rai hloh yua kơ đơ̆ng tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah bơ̆n pơ̆k huŏng lăm tơdrong arih gah bơhngol, ‘nĕ hăt kơ pơtă kơ tơdrong arih dah lu bơngai jum dăr kơ bơ̆n. Mă adrol hloh, athei tơpă tơpăt tơchĕng lăng lăm jơhngơ̆m bơ̆n kơdih, păng chu iŏk tơdrong glăi gah dôm tơdrong bơ̆n kơdih đei rơih iŏk. Kơplah bơ̆n đei pơm trŏ lăm jơhngơ̆m boih, bơ̆n kăl kơ hơmet ming dôm lu tơdrong pơgơ̆p hăm bơngai nai păng anih bơ̆n oei arih. Dah đei tơdrong pơgơ̆p dah minh anih kiơ mă pơm ăn kơ bơ̆n arih ưh kơ ‘lơ̆ng rơgoh, dah kiơ̆ hơdai tơdrong yoch, athei gơnang kơ tơdrong ‘mêm mơnat Kră Yang, ih athei hơmet ming, tơplih dah achăng lê̆ hloi. Mă khan oei lăm tơdrong arih thoi yơ, adrin ăn kơ ‘Bok Kei-Dei pơgơ̆r tơbăt tơ’bôh ăn kơ lu bơngai jum dăr kơ ih đơ̆ng năr ‘nâu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.