Lub sijhawm tej zaum yuav ua rau peb txoj kev ntseeg cog tau tob tob, tiamsis tej zaum kuj yuav ua rau peb lub siab tsis ceev faj. Yim nrog Vajtswv mus ntev, peb yim dhau los swm ua rau peb lub siab hwm Vajtswv thaum pib cia li tsuag zuj zus. Peb nco tej kev coj noj coj ua hauv Pawg Ntseeg, peb nco tej kevcai ntawm lub neej ntseeg, tiamsis ho hnov qab thawj hnub uas peb txhos caug muab peb lub neej fij rau Vajtswv. Txoj kev uas ib txwm swm ntawd ua rau tej koob hmoov uas peb txais tau ntawd dhau los ua yam uas yuav tsum muaj, tshuav kev hlub thaum pib ploj zuj zus lawm. Peb tsav peb lub neej raws li tej uas peb ntsib dhau, tiamsis hnov qab tias txhua yam uas peb muaj hnub no puav leej pib hauv Tswv Yexus txoj kev hlub.

Hnub no, yog hnub 24/09/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ben Ledger dhau ntawm Zaj kawm NCO TXOG THAWJ HNUB

“Hnub no tus Tswv uas yog nej tus Vajtswv hais kom nej ua raws li nws tej kevcai txhua nqe huv tibsi; nej cia li muab siab npuab thiab ua raws li ntawd kom kawg siab kawg ntsws.  Hnub no nej twb lees yuav tus Tswv ua nej tus Vajtswv lawm; nej coglus hais tias nej yuav mloog nws lus, coj raws li nws tej kevcai txhua nqe, thiab ua raws li tej uas nws hais txhua lo huv tibsi.” (2 Kevcai 26:16-17)

Kuv nyiam tsav tsheb heev. Muaj ib qhov kev ywj pheej tshwj xeeb heev thaum uas mus deb thiab mus sai dua li kuv lub zog. txawm yog tsav tsheb mus yuav khoom los kuj ua rau kuv nyiam heev! ntau zaug, kuv xav txog lub sijhawm uas tsev neeg yuav mus ncig ua si rau tom ntej: peb yuav taug txoj kev twg, pom daim duab zoo li cas thiab yuav ntxiv kev deb pes tsawg rau hauv peb txoj kev.
Tiamsis, nyob hauv tag nrho tej ntawd, muaj ib yam uas kuv tsis nco qab yog: hnub uas kuv txais tau ntawv tsav tsheb. ntawd yog ib lub sijhawm tseem ceeb. Kuv yeej tseem nco ntsoov kuv ua zoo heev thaum tsav tsheb los tsev rau hnub tshwj xeeb ntawd.

Hais tiag kuv yeej tsis tshua xav txog hnub uas kuv txais daim ntawv tsav tsheb ntawd, tiamsis yog tsis muaj lub sijhawm ntawd, hnub no kuv yuav tsis tau cai ywj pheej tsav tsheb. Hnub kawm tiav, hnub ua rooj tshoob lossis ib lub sijhawm twg tseem ceeb hauv lub neej kuj ib yam li ntawd. Ntawd yog tej hnub tseem ceeb, uas peb yuav tau mus dhau peb thiaj yuav hla tau mus dua txua kev tshiab. Tiamsis, lub sijhawm pheej dhau mus, muaj tsawg tus tseem tshua txog lossis zaum nco txog hnub tseem ceeb ntawd. Yooj yim tsuas yog qhov pib ntawm ib txua kev tshiab xwb.

Txawm li los, ntau zaug peb nres cia thiab tig rov qab mus saib thaj chaw pib ho yog ib yam uas cheem tsum.

Yuav tau hais tias, thaum no kuv tsis tsav tsheb zoo li thawj hnub uas nyuam qhuav txais tau ntawv lawm. Kuv yeej ua tib zoo tsav, tiamsis kuv tso siab dua lawm ntau. Kuv tsis ntshai txhua zaus uas tuav lub kauj tsav tsheb li yav dhau los, thiab tej uas kuv ntsib dhau hauv lub neej dhau ntawm lub caijnyoog kuj pab rau kuv tswj tau lub tsheb zoo nyob rau ntau lub sijhawm. Tiamsis, kuj yog vim ib txwm swm txoj kev tsav tsheb ua rau kuv tsis ceev faj. Muaj tej lub sijhawm tsis ceev faj tej uas nyob ib ncig, muaj tej lub sijhawm ho cia rau lub hlwb no tsis quav ntsej. Txhua zaug zoo li no, kuv rov qab nco txog tej lus ntuas uas kuv tau hnov nyob rau hnub tau txais ntawv tsav tsheb: tshav tsheb yuav ua rau muaj kev zoo siab thiab muaj kev ywj pheej, tiamsis ntawd kuj yog lub nra loj heev, tsis txhob saib tias nws sib.

Tomqab ntau xyoo ncig mus ncig los tom moj sab qhua, haiv neeg Yixalayees thaum kawg kuj mus txog rau tebchaws cog lus tseg. Tsuas tshuav ib kaujruam thiab xwb, lawv yuav ua neej nyob hauv lub nroog uas lawv tsis paub thiab txais tej txiv hmab txiv ntoo uas lawv tsis cog. Tiamsis ua ntej yuav mus nyob hauv lub tebchaws ntawd, Mauxes coj cov pej xeem mus ua ib qhov kevcai tseem ceeb kom lawv rov qab nco txog txoj kev sib cog lus nrog Vajtswv. Thaum xaus txoj kev cai ntawd, yawg hais:

“Hnub no tus Tswv uas yog nej tus Vajtswv hais kom nej ua raws li nws tej kevcai txhua nqe huv tibsi; nej cia li muab siab npuab thiab ua raws li ntawd kom kawg siab kawg ntsws. Hnub no nej twb lees yuav tus Tswv ua nej tus Vajtswv lawm; nej coglus hais tias nej yuav mloog nws lus, coj raws li nws tej kevcai txhua nqe, thiab ua raws li tej uas nws hais txhua lo huv tibsi.” (2 Kevcai 26:16-17).

Tomqab txoj kevcai ntawd, tej zaum haiv neeg Yixalayees tau nrog tus Tswv mus ua ke los ntawm lub siab kub lug thiab ua zoo ceev faj. Tiamsis, raws li lub sijhawm dhau mus, lawv txav deb Vajtswv zuj zus. Lawv cia lawv lub siab khiav caum lwm yam txawv thiab hnov qab txoj kev tau nrog Vajtswv sib cog lus ua ke lawm. Yog li, Vajtswv thiaj txib cov cev lus hu kom lawv tig rov qab los, ntuas kom lawv nco ntsoov tias tsuas muaj tus Tswv tib leeg xwb thiaj yog lawv tus Vajtswv.
Niaj hnub nim no, dhau ntawm Tswv Yexus, peb kuj tab tom taug txoj kev nqaim mus txais tau txojsia, thiab txais yuav ib lub neej tshiab nyob hauv Vajtswv txoj kev cawmdim. Peb kuj txais tau txoj ywj pheej thiab Vajtswv txoj kev hlub – thiab yim nrog tus Tswv mus, qhov no yim dhau los tob dua. Peb yim swm Vaj Ntsujplig txoj kev coj peb, tso siab rau Vajtswv hauv tej kev thov thiab ua tim khawv txog Vajtswv, tsis txhawj li thaum pib lawm: “Tsis paub yus puas mus yog kev?”

Tiamsis yog muaj tej lub sijhawm peb tsis ceev faj lossis tsis paub tias yus yuav mus rau qhov twg, ces Paulus ntuas kom peb yuav tau tig rov qab los rau txoj kev lees paub peb txoj kev ntseeg thaum pib:

“Txojkev ntseeg piv ib yam li neeg sib tw khiav. Koj yuav tsum sib zog khiav kom kawg koj lub zog, koj thiaj li tau txojsia uas ntev mus ibtxhis uas Vajtswv hu koj los yuav, rau qhov koj twb lees tabmeeg rau ntau leej” (1 Timautes 6:12).

Tej pov thawj ntawd yeej tseem nrog nraim peb txoj kev ntseeg Vajtswv. Thiab thaum peb lub neej dhau los ua ib lo lus pov thawj, yuav muaj ntau tus tig rov qab los cuag Vajtswv thiab nrog nws mus ua ke hauv txoj kev ntseeg ntawd.

Thov caw nrog kuv peb thov Vajtswv ua ke: Tus Tswv, kuv ua Koj tsaug vim koj tau cawm kuv thiab pub kom kuv muaj txoj koob hmoov nrog Koj mus ua ke txhua hnub, thov zam txim rau kuv vim muaj ntau zaug kuv cia tej kev txhawj, txoj kev tsis khoom hauv lub neej ua rau kuv lub siab tsis ceev faj, tsis nyob ze Vajtswv li thaum pib. Thov Vaj Ntsujplig ntuas kuv kom nco ntsoov kuv tej lus cog tseg tau cog nrog Vajtswv ua ke, kom kuv mus nrog txoj kev mloog lus thiab ntseeg siab. thov ntxiv zog rau kuv kom tuav kev ntseeg kom ruaj nyob hauv ntsus tsov rog no thiab ua lub neej haum Vajtswv siab. Kuv thov hauv Tswv Yexus Khetos lub npe, Amees.

Cov kwv tij txhua tus, nyob hauv lub ntiajteb ua rau peb lub siab no yoj yees, yam uas peb cheem tsum tshaj yog yuav tau nres rov qab nco txog tej hnub thawj uas yus los ntseeg Vajtswv. Lub sijhawm ntawd, peb yuav nco tias yus tau cog lus li cas rau Vajtswv thiab vim li cas yus ho txiav txim siab nrog Nws mus. txoj kev nrog Tswv Yexus mus ua ke tsis yog thaum twg twb yooj yim muaj, tiamsis ntawd yog txoj kev mus txais tau txojsia, puv npo kev hlub, kev kaj siab thiab Vajtswv txoj kev hlub. Yog tias hnub no koj pom tias koj tab tom mus yuam kev. Cia li nco txog tej hnub thawj uas koj mus cuag Vajtswv. Nco txog koj tej lus cog tseg tau cog nrog Vajtswv thiab tig rov qab los rau txoj kev hlub thaum pib. Vajtswv yeej nyob ntawd, zoo siab hlo pab, coj thiab ntxiv zog rau koj kom khov kho hauv txoj kev ntseeg.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.