Khei năr gô pơm ăn kơ đon lui lu bơ̆n rai kơjăp, mă kư̆m gô pơm ăn kơ jơhngơ̆m bơ̆n rai rơdu tơdah bơ̆n ưh kơ krăng kơchăng. Lu bơ̆n yak kiơ̆ Kră Yang đunh, lu bơ̆n rai dan tơdrong juăt kơ pơm, pơm ăn kơ đon lui rai rơdu, na jơhngơ̆m hli yom kơ Kră Yang thoi kơ blŭng a rai pă đei thoi adrol sơ̆. Lu bơ̆n băt tôm tơdrong juăt kơ pơm lăm Hnam Akŭm, băt rơđah dôm lu tơdrong bơngai lui kơ Kră Yang athei arih pơm kiơ̆, mă bơ̆n kư̆m hiơt lê̆ kơplah adrol sơ̆ bơ̆n kŭp kơ̆l hăm đak măt năr blŭng a sơtơ̆p kŭl tăng pơjao tơdrong arih bơ̆n kơ Kră Yang. Tơdrong juăt kơ pơm jing pơm ăn kơ dôm lu tơdrong pŭn hiôk bơ̆n đei iŏk noh lăng nhen thoi hmă dêh, na tơdrong ‘mêm đơ̆ng blŭng-a sơ̆ rai ngach. Lu bơ̆n pơgơ̆r tơdrong arih bơ̆n hăm lơ tơdrong băt đêl hlôi kơpơm păng gơnang kơ akâu bơ̆n kơdih, mă hiơt kơ tôm tơdrong bơ̆n đei dang ei lĕch đơ̆ng tơdrong ‘mêm mơnat đơ̆ng Kră Yang Yêsu Dŏng.

Năr ‘nâu, năr 24/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Ben Ledger kơ̆l ‘bai ‘BLŎK KƠ NĂR BLŬNG A

“Năr ‘nâu, Kră Yang ‘Bok Kei-Dei iĕm athei pơkă khan kơ iĕm pơm kiơ̆ dôm lu khôi juăt păng nơ̆r tơtă ‘nâu, iĕm athei kơchăng wei răk hăm đĭ jơhngơ̆m klơm klak, Năr ‘nâu iĕm pơkă drơ̆ng iŏk Kră Yang pơm ‘Bok Kei-Dei iĕm, yak năm kiơ̆ trong Sư, wei răk khôi juăt Sư, nơ̆r tơtă păng nơ̆r đơ̆ng Sư athei, kư̆m chu kiơ̆ nơ̆r sư khan.” (Bơtho Khôi juăt 26:16-17)

Inh ‘maih wơ̆r gre tơpă. Đei minh tơdrong rơngei phara tơpă kơplah bơ̆n gơh năm ataih hloh păng hrĕnh hloh kơ jơhngơ̆m pran bơ̆n. Kư̆m mă wơ̆r gre năm tơ anih tĕch tơmam đĕch kư̆m pơm ăn kơ inh hưch hanh dêh! Kư̆m đei, inh tep hơpo kơ năm chă ngôi tơ ataih hơdai hnam dơnŏ inh tơ anăp: lu nhôn gô yak kiơ̆ trong a-yơ, gô ‘bôh lu anih ‘lơ̆ng a-yơ, păng gô chih thim lơ kilômet lăm sơ̆p hla bơar chih răk lăm trong yak năm inh.

Mă-lei lăm tôm tơdrong noh, đei minh tơdrong mă inh ưh kơ đei ‘blŏk: năr inh iŏk băng wơ̆r gre sơ̆. Noh boih jơ̆ kơnao gĭt kăl lăm tơdrong arih inh. Inh ‘blŏk kơ năr noh, jơhngơ̆m inh tơtăm păng inh pơ’lơ̆ng tơpă kơplah wơ̆r gre wih tơ hnam.
Tơpă, inh ưh kơ tơchĕng truh tơ năr inh iŏk băng wơ̆r gre noh ôh. Mă dah ưh kơ đei tơdrong kăl noh, năr ‘nâu inh kư̆m ưh kơ gơh wơ̆r gre hăm tơdrong rơngei thoi âu. Năr pơkeh tơdrong hŏk pơhrăm, năr et kơ pơkong pơjing ŭnh om, dah rim tơdrong kăl lăm tơdrong arih kư̆m thoi noh mơ̆n. Dôm tơdrong thoi noh boih mă bơ̆n kăl kơ ‘blŏk, yua kơ bơ̆n đei yak hlôi kơ lu tơdrong noh pơtơm lăm trong yak năm plơ̆ng ‘nao. Mă khei năr rai yak năm hlôi hloh tơ anăp, ưh kơ đei bu oei tơchĕng dah ‘blŏk kơ năr kăl noh. Noh dang lĕ pơtơm kơ trong yak năm ‘nao đĕch.

Mă-lei đei kơplah bơ̆n tơchĕng ming tŏsĕt, hue lăng tơ anih bơ̆n pơtơm đơ̆ng blŭng-a tơdrong noh jơ̆ kăl tơpă.

Dang ei inh ưh pă wơ̆r gre thoi năr inh iŏk ‘băng wơ̆r gre blŭng-a sơ̆ bơih. Inh oei pơ’lơ̆ng kơplah wơ̆r gre, mă jơhngơ̆m inh nuih kơjăp păng hiôk hloh bơih. Inh ưh pă hli tơtăm kơplah rôp vô-lăng thoi adrol, păng đơ̆ng inh hlôi hloh wơ̆r gre lăm rim sơnăm kư̆m tơgŭm ăn kơ inh wơ̆r hrĕnh tĕnh ‘biơ̆ lăm lơ tơdrong weh wer. Mă-lei yua kơ đơ̆ng inh juăt tơpă kơ wơ̆r gre boih, truh tơ inh ưh pă kơchăng. Kư̆m đei, inh ưh pă lăng tôm tơdrong jum dăr, dah jơhngơ̆m đon tơchĕng tơ nai. Rim wơ̆t đei thoi noh, inh ‘blŏk kơ nơ̆r đei tơ’blŏk kơ inh lăm năr inh iŏk ‘băng wơ̆r gre: wơ̆r gre gô đei ăn kơ bơ̆n lơ tơdrong hiôk păng tơdrong rơngei, mă noh kư̆m minh tơdrong kăl kơ pŭ iŏk tih, ưh kơ gơh pơhơi.

Đơ̆ng rŏng kơ lơ sơnăm yak năm lăm tơmăn glă, lu kon pơlei Isơrael – tuch luch kư̆m dơ̆ng ‘bơ̆t anăp dêh char mă Kră Yang đei pơkă ăn kơ lu sư. Oei pă minh yak đĕch bơih, na lu sư gô mơ̆t oei lăm pơlei mă lu sư ưh kơ đei pơjing, sa dôm lu plei ‘long mă lu sư ưh kơ rĕi pơtăm. Mă adrol kơ mơ̆t tơ dêh char noh, Môis chông lu kon pơlei pơm minh tơdrong rơgoh gĭt kăl, wă tơbăt dơ̆ng tơdrong pơgơ̆p mă lu sư đei pơkă hăm Kră Yang ‘Bok Kei-Dei. Tơ tuch luch kơ tơdrong noh, Môis khan:
“Năr ‘nâu, Kră Yang ‘Bok Kei-Dei iĕm athei pơkă khan kơ iĕm pơm kiơ̆ dôm lu khôi juăt păng nơ̆r tơtă ‘nâu, iĕm athei kơchăng wei răk hăm đĭ jơhngơ̆m klơm klak, 17Năr ‘nâu iĕm pơkă drơ̆ng iŏk Kră Yang pơm ‘Bok Kei-Dei iĕm, yak năm kiơ̆ trong Sư, wei răk khôi juăt Sư, nơ̆r tơtă păng nơ̆r đơ̆ng Sư athei, kư̆m chu kiơ̆ nơ̆r sư khan.” (Bơtho Khôi juăt 26:16-17)

Đơ̆ng rŏng kơ tơdrong juăt noh, rŏ lăng lu kon pơlei Isơrael đei pơtơm yak kiơ̆ Kră Yang hăm jơhngơ̆m pơ’lơ̆ng păng hưch hanh tơpă. Mă-lei khei năr rai đunh, lu sư rai weh ataih đơ̆ng Kră Yang. Lu sư ăn jơhngơ̆m kiơ̆ dôm lu tơdrong nai păng hiơt lê̆ dôm nơ̆r lu sư đei pơkă hăm ‘Bok Kei-Dei. Yua kơ thoi noh, Kră Yang wơh lu bơngai pơtruh nơ̆r Sư năm krao wơ̆n lu sư wih brŏk tơ Kră Yang, tơ’blŏk ăn kơ lu sư băt khan pôm Kră Yang ‘Bok Kei-Dei đĕch boih ‘Bok Kei-Dei lu sư.

Năr ‘nâu, yua kơ Kră Yang Yêsu, lu bơ̆n kư̆m oei yak lăm trong iĕ mă năm tơ tơdrong arih, păng iŏk tơdrong arih ‘nao lăm tơdrong Sư huai iŏk. Lu bơ̆n đei chơt hiôk hăm tơdrong rơngei păng tơdrong ‘mêm đơ̆ng ‘Bok Kei-Dei – na kơplah bơ̆n yak kiơ̆ Sư rai đunh, tơdrong noh kư̆m rai jrŭ să păng kơjăp hloh dơ̆ng. Lu bơ̆n rai juăt kơ Yang Bơhngol ‘Lơ̆ng chông ba, rai pơ̆n nuih kơjăp năm jê̆ Kră Yang lăm tơdrong krao khan păng ră roi tơdrong Sư kơ lu bơngai nai. Bơ̆n ưh pă hiơ̆k bơngơ̆t thoi adrol khan: “Inh oei yak trŏ trong dah ưh?”

Mă dah đei kơplah bơ̆n rai ưh kơ kơchăng, dah ưh pă băt bơ̆n wă yak năm tơyơ, lei ‘bok Pôl tơ’blŏk kơ bơ̆n athei wih brŏk tơ nơ̆r bơ̆n pơsĭt đon lui tơm hmơm sơ̆:
“Pơtih gia lu bơngai kơdâu pơjei, bơngai bu mă kơdâu adrin tơpă jei sư, bơngai ‘noh sư gô đei apah. Mă ih kư̆m lei-lăi athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling-lang. Hơtai ih lui tơm hmơm sơ̆, đe krao khan kơ ih đang boih, na ih pơma ‘bơ̆t anăp đe tơpôl lơ khan ih wă tơpă lui kơ Yêsu Krist. Đơ̆ng noh sơ̆ boih ‘Bok Kei-Dei ăn kơ ih arih ling-lang.”(I Timôthê 6:12)

Lu bơngai mă đei ‘bôh păng mơ̆ng nơ̆r bơ̆n pơsĭt đon lui noh oei yak hơdai hăm bơ̆n lăm trong kiơ̆ Kră Yang. Na kơplah tơdrong arih bơ̆n jing minh tơdrong roi tơbăt gah Kră Yang, gô đei lơ bơngai wih brŏk tơ Sư păng yak hơdai hăm bơ̆n lăm trong đon lui.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ Ih đei huai iŏk kon păng ăn kơ kon tơdrong ‘mêm mơnat wă kơ đei yak kiơ̆ Ih rim năr. Apinh Ih huay kơ jô̆ yo kơ kon, yua kơ đei lơ wơ̆t kon ăn kơ dôm tơdrong hiơ̆k bơngơ̆t păng hrăt hrot lăm tơdrong arih pơm ăn jơhngơ̆m kon weh ataih, ưh pă oei jê̆ Ih thoi kơplah blŭng-a sơ̆. Apinh Yang Bơhngol ‘Lơ̆ng ling-lang tơ’blŏk ăn kơ kon ‘blŏk truh tơ dôm nơ̆r kon đei pơkă hăm Ih, wă kơ kon yak kiơ̆ lăm tơdrong chu yom păng lui gơnang kơ Ih. Apinh Ih ăn kơ kon jơhngơ̆m pran kơtang, wă kon lui kơjăp, adrin kơdâu pơjei lăm đon lui, păng arih lăm tơdrong arih mă Ih lăp đon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơ ala teh âu đei lơ tơdrong mă pơm kơ jơhngơ̆m bơ̆n rơdu, tơdrong bơ̆n kăl hloh dơ̆ng tơchĕng lăng ‘mơ̆i, na ‘blŏk kơ dôm kơ năr blŭng- a bơ̆n năm tơ Kră Yang. Kơplah noh, bơ̆n gô ‘blŏk bơ̆n đei pơkă tơdrong kiơ hăm Sư, păng yua kơ kiơ bơ̆n đei rơih iŏk yak kiơ̆ Sư. Trong kiơ̆ Kră Yang Yêsu ưh kơ đei ‘bônh kơ yak năm ôh, mă-lei noh boih trong mă năm tơ tơdrong arih, ‘bĕnh kơ tơdrong ‘mêm mơnat, hiôk-hian păng tơdrong ‘mêm đơ̆ng ‘Bok Kei-Dei. Dah năr ‘nâu ih ưh kơ kơnhăm, dah wơ̆l jrok, athei ‘blŏk bĕ kơ năr blŭng- a ih năm jê̆ Kră Yang. ‘Blŏk bĕ tơ dôm nơ̆r ih đei pơkă hăm Sư, na wih brŏk tơ tơdrong ‘mêm blŭng-a sơ̆. Kră Yang ling-lang oei hơdai hăm ih, Sư gô pơlung tưk tơiung, chông ba păng ăn kơ ih pran kơtang, wă kơ ih pơtrơp yak năm kơjăp lăm đon lui.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.