Kon bơngai bơ̆n ‘bônh kơ puh dêh gah tơdrong đei ‘bôh hăm măt: Lu tơdrong anat lăm măng mu, lu tơnăr kơjung mă lu bơ̆n ưh kơ ngeh wă kĕ hlôi. Hăm trŏ kơ lu bơ̆n oei đom lăm măt lăng gah sĕch akar, na lăng kơnhăm to dôm tơdrong anat ‘bơ̆t anăp hloi đĕch? Hăm trŏ dôm lu tơdrong mă ưh kơ ngeh wă gơh kĕ đei oei pơlong lăng tơdrong tơchĕng rơdu rơmơ̆n lu bơ̆n? Tơdah mă, lu bơ̆n oei kơnhăm dêh gah tơdrong arih mă hiơt ‘bơih kơ ‘Bok Kei-Dei oei bơ̆jang?

Năr ‘nâu, ‘năr 25/09/2026, tơdrong tơdă Amăn Jơ Krao Khan Rim Năr apinh wỡn đĭ đăng wang powao hơdai Nơ̆r Kră Yang hăm bơngai chih Nina Keegan hlôi kơ kơ̆l ‘bai ‘BAR PAH MĂT IH HĂM OEI RƠĐAH?

“Pơih măt inh, wă kơ inh gơh ‘bôh dôm tơdrong hlĭch chrơp lăm khôi juăt Ih.” (Hơriso 119:18)

Jơhngơ̆m đon lu bơ̆n oei kơnhăm tơ ayơ? gah lu tơdrong anat păng tơdrong mă akâu jăn bơ̆n ưh kơ gơh pơm, tơdah gah tơdrong mơsêh mơyang ưh kơ tôch đơ̆ng ‘Bok Kei-Dei? Tơdrong kiơ oei tuh tơ‘bĕnh kơ măt lăng lu bơ̆n?

Adrol hloh kơ tôm tơdrong, lu bơ̆n kăl kơ lăng kơnhăm tơ Kră Yang Yêsu. Lu bơ̆n athei krao apinh Kră Yang pơih ăn măt lăng gah bơhngol lu bơ̆n.

Lăm Sơ̆p hla bơar II Lu Pơtao 6, Êlisê păng lu bơngai đam sư iung wă kơ ‘bôh lu linh tơblah oei bơwang jum dăr kơ pơlei. ‘Bơ̆t anăp tơdrong noh, lu bơngai đĭch đam sư hli tơrơ păng krao ôr: “Ơ ‘bok thây, lu bơ̆n wă pơm liơ ‘nâu?” Đei dôm ‘măng bơih lu bơ̆n kư̆m dai tơlĕch nơ̆r thoi noh kơplah tôch kơ đon?

Mălei, tơplih kơ tơdrong hli tơrơ, Êlisê thar krao khan!

Ưh kơ tơchĕng hơnat, sư krao khan apinh Kră Yang pơih ăn măt lăng kơ lu đĭch đam sư. Noh ưh kơ sĭ măt lăng gah sĕch akar, sơmă jơ̆ măt lăng gah bơhngol. Sư apinh wă kơ lu bơngai đĭch đam sư gơh lăng ‘bôh tơdrong mă ling lang đei oei hơdai mălei măt gah ‘nguaih ưh kơ kơnăl ‘bôh: lu linh ‘Bok Kei-Dei oei ‘bơ̆t doh, lơ ‘biơ̆ păng pran kơtang hloh kơ đĭ đăng lu lĭnh kon bơngai.

Kơplah ‘Bok Kei-Dei pơih ăn măt lăng bơngai đĭch đam sư, sư lăng ‘bôh minh groi ‘bĕnh kơ aseh păng gre aseh ŭnh tăp tang kơ Êlisê. Tơdrong noh tơ’blŏk kơ lu bơ̆n khan dôm lu tơdrong mă măt hmă lăng ‘bôh noh ưh kơ sĭ tôm tơdrong noh đei tơpă ôh. Tơdah năr ‘nâu ‘Bok Kei-Dei kư̆m dai pơih măt lăng gah bơhngol lu bơ̆n lei lu bơ̆n gô ‘bôh tơdrong kiơ?

Sư khan: “Nĕ kơ hli, đei lu bơngai oei hăm bơ̆n lơ hloh kơ bơngai oei hăm lu sư. Đơ̆ng noh, Êlisê krao khan thoi âu: “Ơ Kră Yang apinh Ih pơih ăn măt đĭch đam inh wă kơ sư gơh ‘bôh.” Kră Yang pơih ăn măt đam noh, na sư ‘bôh rơwơ̆nh rơwănh kơ aseh ‘bĕnh kơ kông păng gre aseh ŭnh tăp tang kơ Êlisê” (II Lu Pơtao 6: 16-17)
Lu lĭnh ‘Bok Kei-Dei đĭ tơ noh wă bơwei păng tơblah tơplih ăn kơ lu sư, mă khan ưh kơ đei bu gơh ‘bôh păng măt hmă. Noh jơ̆ trong mă ‘Bok Kei-Dei oei ling lang bơ̆jang. Sư ling lang oei hơdai lu bơ̆n kơplah anat anot. Sư ưh kơ layơ weh lăm tơdrong tơblah lu kon Sư. Kơplah lu bơ̆n ngeh lăp mĭnh adrô̆ đĕch, Sư oei ‘bơ̆t doh păng ‘bơ̆jang.

Sơ̆p hla bơ-ar Nơ̆r ‘Bok Kei-Dei lơ ‘măng ăn kơ lu bơ̆n ‘bôh ‘Bok Kei-Dei jơ̆ Tơ’ngla tơblah tơplih ăn kơ kon pơlei pơla Sư. Thoi noh, tơplih kơ gơnang kơ akâu jăn kơdih, lu bơ̆n oei đei krao wơ̆n wă dan đĭ jơhngơ̆m đon lui lăm Sư. Đon lui ưh kơ dan ‘bơ̆t anih măt gơh ‘bôh, mălei tơ Tơ’ngla mă ling lang chĕp răk nơ̆r pơkă mă khan lu bơ̆n ưh kơ ‘bôh Sư oei bơ̆jang.

Đơ̆ng đei đon lui, lu bơn băt ‘Bok Kei-Dei oei pơm ăn kơ lu kon pơlei pơla Sư hloh kơ tơdrong mă măt lăng păng đon tơchĕng kon bơngai đei ‘bôh. Rim ‘nu lu bơ̆n gô đei tơ’bơ̆p dôm lu tơdrong pơlong lăng mă ưh kơ ngeh wă lĕch hlôi. Đei lơ năr, dôm lu tơdrong pŭ trăp lăm tơdrong arih pơm kơ lu bơ̆n lăp tơhôih păng jet kơdih: “Pơm liơ na inh gơh yak dơ̆ng tơ anăp?”

Mălei dôm tơdrong tơgŭm đơ̆ng ‘Bok Kei-Dei ưh kơ layơ hrơ̆. Sư hơmet lê̆ bơih dôm lu tơdrong bơ̆n kăl wă. Tơdrong ‘mêm mơnat Sư ưh kơ layơ hrơ̆, tơdrong pŭn hiôk Sư ling lang tôm mah, păng lu lĭnh Sư oei bơ̆jang tơdrong Sư wă. Mă khan măt bơ̆n lăng ưh kơ ‘bôh, tơdrong noh jơ̆ đei tơpă.

Lu bơ̆n athei ling lang chă ‘Bok Kei-Dei păng lăng tôm tơdrong hăm đon lui. Athei lui ngeh kơ Sư, yua kơ Sư gô tuh ăn dôm tơdrong bơ̆n kăl, wă kơ bơ̆n dơ̆ng kơjăp păng yak hlôi đơ̆ng dôm tơdrong pơmat.

Tơdah lu bơ̆n ưh kơ lăng ‘bôh ‘Bok Kei-Dei oei bơ̆jang lăm chăl arih bơ̆n, tơdrong noh ưh kơ sĭ lăm tơdrong mơsêh mơyang tơdah tơdrong wă dŏng pơklaih đơ̆ng Sư đĕch, sơmă lăm măt lăng gah bơhngol lu bơ̆n. Apinh Kră Yang pơih ăn măt lu bơ̆n wă kơ đei ‘bôh Sư oei hơdai păng tơdrong jang Sư mă rơđah hloh.

Êlisê krao khan dơ̆ng. Kơplah ‘nâu, sư ưh kơ apinh ‘Bok Kei-Dei pơih ăn măt lăng, mălei apinh Sư pơm ăn kơ lu linh ayăt jing măt tol. ‘Bok Kei-Dei tơl tơwih sư. Đơ̆ng noh, Êlisê ưh pă kăl kơ tơblah bơih. Sư chông anhăk lu linh sư năm truh tơ anih mă ‘Bok Kei-Dei dan ăn bơih, păng Sư dŏng pơklaih kon pơlei Sư. Tơdrong kĕ jei ưh kơ truh đơ̆ng săng đao tơdah đơ̆ng jơhngơ̆m kon bơngai, sơmă đơ̆ng tơdrong mơsêh mơyang ‘Bok Kei-Dei.

‘Bar tơdrong măt lăng tơplơ̆ băl lăm tơdrong hơ’mon âu pơdah tơdrong arih kiơ̆ Kră Yang lu bơ̆n lăm rim năr. Tơdrong arih gô ưh kơ tơplih dei dei hloi, mălei kơplah Kră Yang pơih ăn măt lăng lu bơ̆n, tơdrong hli gô ưh pă ‘bơm jơhngơ̆m bơ̆n bơih:

“Pơih măt inh, wă kơ inh gơh ‘bôh dôm tơdrong hlĭch chrơp lăm khôi juăt Ih.” (Hơriso 119:18)

Apĭnh đĭ đăng krao khan hơdai: Kơkuh kơ Kră Yang, apinh mơnat ăn kơ kon yua kơ lơ wơ̆t kon lăng ‘bôh lu lĭnh ayăt na hiơt lê̆ kơ lu lĭnh Ih oei ling lang jum dăr păng bơwei kon pơlei pơla Ih. Tŏkbŏk kial hơbŭt păng tơdrong pơmat tăp dăr, apinh pơih ăn măt gah bơhngol wă kơ kon lăng ‘bôh tơdrong mơsêh păng tơdrong oei hơdai đơ̆ng Ih, wă kơ kon huay kơ arih lăm tơdrong hli tơrơ, sơmă yak năm kơjăp lăm đon lui păng lui gơnang. Apinh tơgŭm kon ling lang lăng kơnhăm tơ Ih wă kơ yak năm hơđơ̆ng lăm tôm tơdrong. Kon kŭp kơ̆l krao khan hăm anăn Yang Yêsu Krist, A-men.

Ơ lu buăl mă ‘mêm kơeng, măt lăng gah bơhngol lu bơ̆n oei lar lĕi mă oei tep? Hăm trŏ tơdrong tơchĕng ngĭl ngŭl, đon lui rơdu, ưh kơ wă adrin păng pơhơi kơ tơdrong krao khan pơm kơ lu bơ̆n jing ưh kơ lăng ‘bôh tơdrong tơpăt, đơ̆ng noh puh huŏng lăm tơdrong pơhlŭ mă lu ayăt kơ bơ̆n oei ‘năk lê̆? Lu bơ̆n hăm pơ̆n nuih lui ngeh khan đơ̆ng rŏng kơ nơ̆r krao khan đei pơjao ăn, ‘Bok Kei-Dei gô bơ̆jang, mă khan măt lăng lu bơ̆n ưh kơ đei ‘bôh? Athei lăng păng măt gah đon lui wă gơh ‘bôh lu lĭnh kơpal plĕnh Sư oei tơblah yua kơ kon pơlei pơla Sư. Păng hơpơi lăm năr ‘nâu, đon lui lu bơ̆n kư̆m gô pơm kơ Kră Yang Yêsu lăp đon, wă kơ lu bơ̆n yak tơ anăp lăm tơdrong chơ̆n hơđơ̆ng kơplah băt rơđah khan dôm tơdrong tơblah lăm tơpang ti Sư ngăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.