Đĭ đăng kon bơngai ‘maih arih lăm tơdrong hiôk-hian. Mă-lei, kơplah ưh kơ gơnang kơ ‘Bok Kei-Dei, bơ̆n juăt gơnang kơ akâu bơ̆n kơdih tôm tơdrong trăp trĭn lăm tơdrong arih, na jơhngơ̆m bơ̆n rai gleh glăn yua kơ dôm tơdrong noh tih hloh kơ tơdrong bơ̆n kĕ. Đon tơchĕng bơ̆n boih, jơ̆ tơmam gĭt mă ‘Bok Kei-Dei ăn kơ bơ̆n, wă kơ bơ̆n đei pơwao tơchĕng păng rơih iŏk dôm tơdrong hlôh wao, mă kư̆m đei đơ̆ng tơdrong noh gô jing hiơ̆k bơngơ̆t păng dôm tơdrong tơchĕng ưh kơ pơdơh. Kư̆m đei, tơdrong rơih iŏk iĕ đĕch kư̆m pơm ăn kơ jơhngơ̆m bơ̆n rơdu. Mă-lei, trong năm tơ dŏng pơklaih ưh kơ layơ oei lăm tơdrong bơ̆n adrin lơ hloh ôh. Tơdrong hiôk-hian tơpă truh kơ bơ̆n kơplah bơ̆n băt achăng lê̆ dôm lu tơdrong trăp trĭn, chu yom kơ Yang Bơhngol ‘Lơ̆ng chông ba, păng ăn kơ Kră Yang pơgơ̆r jơhngơ̆m bơ̆n.

Năr ‘nâu, năr 26/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Kellin Gibson kơ̆l ‘bai ATHEI PƠJAO TÔM TƠDRONG ĂN KƠ INH!

“Thoi noh na ‘blep trŏ thoi Êsai chih khan lê̆ hơdrol sơ̆ thoi âu: ‘Lu sư mơ̆ng Inh bơtho khŏm khŏm ră mă-lei lu sư ưh kơ hlôh, Măt lu sư lăng khŏm khŏm ră mă ưh kơ ‘bôh tơdrong kiơ. Yua kơ đon lu sư kơtul dêh, Mă-lei lu sư oei wă pơchĭt đon sư kơdih khŏm khŏm ‘mơ̆i, Păng măt lu sư wă kơ tep ling-lang. Dah lu sư ‘nĕ kơ pơm đon thoi noh, lei măt lu sư gơh ‘bôh, Đon lu sư gơh kơtơ̆ng nhên, lu sư gơh tơchĕng kơdih băt wih tơ ‘Bok Kei-Dei, Na Sư gô pơklaih đĭ dôm tơdrong yoch lu sư.” (Mathiơ 13:14-15)

Đon tơchĕng inh dang thoi truh tơ tôch bơih. Lăm minh măng, kơplah inh oei wơ̆r gre, inh ‘blŏk tơchĕng ưh kơ băt wă drong mơ̆t tơ anih tĕch tơmam, wă răt tŏsĕt plei ‘long dah ưh. Minh tơdrong rơih iŏk mă lăng thoi iĕ dêh, mă jing tơdrong tơsŭl tơwŏk tih tơpă. Kơplah inh tơchĕng lăng tơ dôm tơdrong noh, inh băt kơ tơdrong lĕch đơ̆ng dôm sơnăm kơplah inh oei hơ’lơ̆p.

Đơ̆ng tơsĭn sơnăm, inh đei lăm jơhngơ̆m lăng ưh kơ trŏ gah inh kơdih. Truh tơ inh mơjĭt pêng sơnăm, inh pơtơm pơgơ̆t kơ tơmam sa. Kơplah truh tơ inh ‘bar-jĭt sơnăm, tơdrong sa Paleo păng Keto jing lơ bơngai kiơ̆. Dôm tơdrong sa âu đei lơ protein păng tơmam mơ̆r ‘lơ̆ng, mă lei sa plei ‘long lăp ai đĕch, ‘nguaih kơ plei iĕ mă đei lơ đak.

Pơtơm đơ̆ng blŭng-a wă kơ sa tơmam mă ‘lơ̆ng rơgoh, na jing truh tơ minh tơdrong tơchĕng ling-lang wă kơ tơmam sa “rơgoh” tơpă – minh tơdrong sa ưh kơ gơh gơt mă đe krao orthorexia. Pơm kơ inh hli kơ plei ‘long, mă khan sơ̆ inh ‘maih sa plei ‘long tơpă. Plei ‘long đei pơm ăn kơ akâu jĭ dah ưh? Plei hơmu păng plei chik đei đak sĭk lơ tơpă. Tơmam âu đei pơjing ‘lơ̆ng rơgoh dah ưh? Inh chơchă păng hŏk lơ tơdrong, mă ưh kơ ‘bôh nơ̆r tơblang lăp kơ jơhngơ̆m inh. Đon tơchĕng inh pơjah pơjăng ling-lang hăm dôm tơdrong tơchĕng phara dih băl, ưh kơ layơ đei pơdơh.

Mă-lei, lăm dôm lu tơdrong tơchĕng kư̆ kă noh, inh băt kơ minh tơdrong: ‘Bok Kei-Dei boih Tơ’ngla pơjing plei ‘long. Pơgar Êđen Sư đei lơ adrĕch plei ‘long. Măng noh, tơplih kơ inh wơ̆r gre yak weh đơ̆ng anih tĕch tơmam thoi inh đei wă, inh mơ̆t tơ lăm na rơih iŏk lu ‘nhot păng plei ‘long hơdrih mă ‘lơ̆ng hloh. Truh hrĕi ‘nâu, inh oei lŭ sa plei hơra, plei krô̆i, plei prit păng lơ adrĕch plei ‘long nai, huay pă ăn kơ dôm tơdrong hiơ̆k bơngơ̆t ưh kơ trŏ rôp pơgŏ inh dơ̆ng.

Tơpă, dôm tơdrong ‘bơm gah jơhngơ̆m đon tơchĕng đei pơm ăn kơ kon bơngai pơmat tih tơpă, mă hloh loi kơplah đơ̆ng kơdih lu bơ̆n mơ̆t lăm tơdrong hiơ̆k bơngơ̆t păng tơchĕng kư̆ kă. Inh đei lăng akâu inh hloh kơ tơmam nai, na pơm ăn kơ akâu inh kơdih đom lăm dôm tơdrong tơchĕng hli krê noh. Mă-lei tơdrong ‘lơ̆ng hloh lăm tơdrong hơ’mon kơ inh noh jơ̆: Kră Yang oei hơtŭt bơm truh tơ dôm lu anih hrĕp jrŭ hloh lăm jơhngơ̆m lu bơ̆n, na pơklaih bơ̆n.

Nơ̆r Kră Yang năr ‘nâu kư̆m tơ’blŏk kơ bơ̆n tơdrong tơpăt noh. Kơplah Yang Yêsu bơtho lu bơngai tơpôl hăm dôm nơ̆r pơtih gia, Sư tơ’bŏk kơ bơngai pơtruh nơ̆r ‘Bok Kei-Dei Êsai:

“Lu sư mơ̆ng Inh bơtho khŏm khŏm ră mă-lei lu sư ưh kơ hlôh, Măt lu sư lăng khŏm khŏm ră mă ưh kơ ‘bôh tơdrong kiơ. Yua kơ đon lu sư kơtul dêh, Mă-lei lu sư oei wă pơchĭt đon sư kơdih khŏm khŏm ‘mơ̆i, Păng măt lu sư wă kơ tep ling-lang. Dah lu sư ‘nĕ kơ pơm đon thoi noh, lei măt lu sư gơh ‘bôh, Đon lu sư gơh kơtơ̆ng nhên, lu sư gơh tơchĕng kơdih băt wih tơ ‘Bok Kei-Dei, Na Sư gô pơklaih đĭ dôm tơdrong yoch lu sư.”(Mathiơ 13:14–15)

Dang thoi Yang Yêsu oei pơma kơ rim ‘nu lu bơ̆n: “Pơjao tôm tơdrong kơ Inh bĕ.” Tơplih kơ bơ̆n chă hơmet ming akâu bơ̆n kơdih dah chă pơklaih akâu bơ̆n kơdih, athei ăn kơ Sư bơ̆jang. Ăn kơ Kră Yang tưk tơiung lu bơ̆n, chông ba đon tơchĕng bơ̆n mă oei kư̆ kă wih tơ tơdrong hiôk-hian mă pôm Sư đĕch ăn kơ bơ̆n.

Đei dôm lu tơdrong tơblah bơ̆n ưh kơ kĕ jei hăm jơhngơ̆m bơ̆n kơdih. Tơdah bơ̆n băt pơjao tôm tơdrong trăp trĭn kơ Kră Yang păng ăn kơ Sư bơ̆jang, bơ̆n gô băt hơdăl tơdrong pơklaih păng tơdrong rơngei mă pôm Sư đĕch ăn kơ bơ̆n.

Apĭnh đĭ đăng krao khan hơdai: Kơkuh kơ Kră Yang Yêsu ‘Bok Dŏng Pơklaih mă ‘mêm kơ kon, kon pơjao tôm tơdrong trăp trĭn păng hiơ̆k bơngơ̆t kon kơ Ih. Kơplah đon tơchĕng kon gleh glăn păng mơ̆t lăm măng mu, apinh Ih chông ba kon năm jê̆ Ih, krôp gom kon hăm tơdrong hiôk-hian păng tơdrong pơklaih đơ̆ng Ih. Kon bơnê kơ Ih, yua kơ Ih huay kơ jô̆ yo tôm tơdrong yoch kon, mă Ih chơ̆n dŏng pơklaih kon đơ̆ng dôm tơdrong mă oei rôp pơgŏ jơhngơ̆m kon. Apinh Ih bơtho ăn kơ kon ling-lang lui gơnang kơ Ih, păng pơdơh hiôk-hian lăm tơdrong ‘mêm mơnat Ih rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mă khan ưh kơ rim wơ̆t Kră Yang tơl nơ̆r krao khan bơ̆n hơđăl thoi kơ bơ̆n chang gô, bơ̆n kư̆m lui kơjăp kơ Sư ‘mêm mơnat păng wei-lăng bơ̆n ling-lang. Đơ̆ng rŏng kơ Kră Yang Yêsu Dŏng Pơklaih tơdrong bơ̆jang Sư huai iŏk tơ ‘long pơglang keh đang boih, Sư oei pơtrơp tơdrong dŏng pơklaih, wei-lăng păng tơplih tơdrong arih lu bơngai lui kơ Sư. Yua kơ thoi noh, dah năr ‘nâu ih oei pơjei hăm dôm tơdrong chhŭr nuih păng dôm tơdrong tơblah lăm jơhngơ̆m, ‘nĕ kơ sơ’ngon. ‘Bok Kei-Dei gô pơklaih ih tơpă. Ih hăm wă ăn kơ Sư bơ̆jang lăm tơdrong arih ih ưh?

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.