Ih đei mơn băt jum dăr kơ ih ‘bĕnh kơ nơ̆r roi tơbăt truh tơ ih lơlang lơlap? Đei lơ tơdrong tơsŭl tơwŏk đơ̆ng jơ̆p jang kơ teh đak truh ling-lang, pơm ăn kơ đon tơchĕng păng bơhngol ih trăp trĭn, na tơdrong hiơ̆k bơngơ̆t păng hli tơrơ rai dui iŏk ih? Lu bơngai hil pơret, pơjah pơjăng gah bu trŏ, pơma kơnê̆ pơjuă dih băl hăm dôm nơ̆r mă chhŭr nuih, na nhen thoi jơ̆p jang kơ teh đak đei anhăk kiơ̆ minh tơdrong pă đei hiôk-hian. Mă-lei Kră Yang krao wơ̆n bơ̆n pơm minh tơdrong phara – tôn hơgơ̆r tơ’bôh tơdrong hiôk-hian păng lui gơnang kơ tơdrong Sư pơgơ̆r tôm tơdrong.

Năr ‘nâu, năr 27/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Ruth Kastberg kơ̆l ‘bai TÔN HƠGƠ̆R RE PHARA

“Thoi noh na ‘Bok Kei-Dei ăn kơ iĕm hiôk huay kơ tơchĕng lơ tơdrong păng huay kơ tơchĕng kơ tơdrong hli, yua kơ iĕm lui gơnang boih kơ Yêsu Krist. Tơ̆ng bơ̆n gơnang kơ đon bơ̆n tơchĕng kơdih đĕch bơ̆n ưh kơ hiôk ôh.” (Philip 4:7)

Đei dôm sơnăm adrol sơ̆, kơplah Hnam Akŭm pơtơm blŭng-a ơ̆t kơ por, inh rơih iŏk pơdơh kơ lăng điê̆n thoăi (mạng xã hội) păng dôm lu kênh ră roi tơbăt. Dôm lu tơdrong noh ưh kơ đei kiơ kơnê̆ ôh, mă đơ̆ng lu tơdrong noh pơm ăn kơ inh gleh lap tơpă. Inh lăng tơ gah yơ kư̆m ‘bôh lu bơngai rai ưh kơ wă mơ̆ng dih băl. Lu sư pơma rơ̆n re, nơ̆r tơhil dih băl, păng tơchĕng kơdih khan dah sư pơma rơ̆n re hloh na sư gô tơbăt sư trŏ hloh.

Tơplih kơ lăng tơdrong ră roi tơbăt, inh rai hơwơ̆l hơwang. Inh tơchĕng kơ lăng điê̆n thoăi gô pơm ăn kơ inh pơgơ̆p tơ’bưh hơdai lơ hloh, mă tuch luch jơhngơ̆m inh rai trăp trĭn hloh dơ̆ng.

Lăm khei noh, rim wơ̆t inh wă iŏk điê̆n thoăi – rim wơ̆t ti inh arăk bơ̆t lu tơdrong wă pơih lăng lăm điê̆n thoăi – inh rơih lăng tơ Kră Yang Yêsu. Inh pơtơm krao khan. Inh thĕng hrĕh. Inh ăn đĭ đon tơchĕng inh năm tơ Sư.

Na đơ̆ng noh, tơdrong hiôk-hian tơpă rai ‘bĕnh lăm bơhngol inh.

Kơplah inh tơchĕng tŭk lê̆ dôm nơ̆r kư̆ kă mă oei truh ling-lang, inh băt hơđăl kơ Kră Yang oei hơdai hăm inh kơjăp tơpă. Mă lu bơngai tơ ala teh oei tơchĕng pơma gah dôm tơdrong răm gô truh, tơdrong hli ưh pă gơh rĕi dah pơgơ̆r đon tơchĕng inh dơ̆ng bơih. Jơhngơ̆m inh thĕng hrĕh, hiôk-hian, na đei jơhngơ̆m kĕ pơlung ăn kơ bơngai jum dăr chang hơmĕng. Inh weh wer dah tep măt kơ tơdrong arih dang ei- inh tơ’bơ̆p tơdrong arih dang ei hnhoi kiơ̆ Kră Yang mă oei pơgơ̆r păng hơmet tôm tơdrong jơ̆p-jang kơ teh đak âu.

Inh đei rơih iŏk, păng oei rim năr yak năm kiơ̆ minh tơdrong phara – tôn hơgơ̆r yak năm adrol phara tơpă.

Sơ̆p hla bơar Nơ̆r ‘Bok Kei-Dei năr ‘nâu ăn kơ bơ̆n ‘bôh rup thoi noh lăm Tơdrong Jang ră roi Tơdrong ‘Nao ‘Lơ̆ng đơ̆ng ‘bok Pôl lăm chăl 27 roi gah tơdrong thŏng-nan pơchah lăm kial hơbŭt tih tơ đak dơsĭ. Lăm mơjĭt-puăn năr, ‘bar-hrĕng tơpơh-jĭt tơdrâu ‘nu bơngai oei pơmat hăm kial păng đak poh-yă. Lu sư gleh lap, pơngot rơwĕt, na oei lăm tơdrong hli tơrơ. Mă-lei Pôl đei jơhngơ̆m hơđơ̆ng, yua kơ măt sư ưh kơ lăng tơ kial hơbŭt, mă tơchĕng tơ ‘Bok Kei-Dei đĕch.

Sư pơlung lu đe noh khan:

“Bơ̆n nŏng kơ chang gô kial dơhlu dă ‘biơ̆ ơ̆t kơ sŏng sa mơjĭt-puăn năr boih. Na dang ei inh wă kơ bơ̆n sŏng sa wă kơ bơ̆n pran huay kơ rơmơ̆n. Iĕm ‘nĕ pă mah hli dêh hŏ, inh băt ưh kơ đei bu jĭ kiơ ôh.” (Tơdrong Jang 27:33-34)

Tơdrong Pôl pơm pran tơpă. Sư ưh kơ tơchĕng ‘bơ̆t nơ̆r pơlung đĕch, mă iung pơm ăn kơ lu sư ‘bôh bơ̆n athei pơm thoi yơ lăm tơdrong thoi noh.

Sơ̆p hla bơar khan Pôl iŏk ‘bĕng mi, krao khan bơnê kơ ‘Bok Kei-Dei ‘bơ̆t anăp đĭ-đăng lu sư, na phĕ hloi ‘bĕng mi ei sa. Kơplah lu sư ‘bôh Pôl pơm thoi noh, na lu sư kư̆m pơm kiơ̆. Đon lui kơjăp đơ̆ng Pôl pơm tơplih kơ anih noh. Tơdrong hiôk-hian lăm sư rai lanh kơ đĭ-đăng lu bơngai nai.

Inh ‘maih tơpă tơdrong noh. Kơplah oei kial hơbŭt tih tơpă, Pôl rơih iŏk bơnê kơ ‘Bok Kei-Dei. Kơplah lăm tơdrong hli jum dăr, sư pơm hăm jơhngơ̆m lui gơnang.
Sơ’ngon tơpă, hlôi lơ sơnăm boih, jơ̆p-jang kơ teh đak ưh kơ đei tơplih lơ.

Tơdrong arih oei đei kial hơbŭt, teh đak oei hrơ̆ng hreng, păng dôm nơ̆r chih roi tơbăt pơm ăn kơ jơhngơ̆m kon bơngai hli tơrơ. Mă-lei năr ‘nâu kư̆m thoi năr noh, bơ̆n ling lang đei rơih iŏk đơ̆ng kơdih.

Bơ̆n rơih iŏk lăng tơ Kră Yang mă oei bơwei jơ̆p-jang kơ teh đak lăm tơpang ti Sư. Hăm đon lui iĕ, tơpăt păng iŏk đon dim thoi nge, bơ̆n đei krao wơ̆n wă jing lu bơngai pơlung pơhiôk jơhngơ̆m lu bơngai nai, wă kơ lu sư kư̆m ngơk lăng – na tơ’blŏk dih băl băt tơdrong tơgŭm tơpă lĕch đơ̆ng yơ.

Apĭnh đĭ đăng krao khan hơdai: Kơkuh kơ Kră Yang, kơplah jơ̆p-jang kơ teh đak ‘bĕnh kơ nơ̆r hrơ̆ng hreng, pă đei hiôk-hian păng tơdrong hli tơrơ, apinh Ih huay kơ jô̆ yo kơ kon, yua kơ đei lơ wơ̆t kon kư̆m ăn jơhngơ̆m kon kiơ̆ dôm tơdrong noh. Apinh Ih tơgŭm kon băt tơchĕng, ming lê̆ dôm tơdrong kư̆ kă tơ cheng, na wih brŏk tơ Ih. Apinh Ih ăn kơ kon tơdrong hiôk mă huay kơ tơchĕng lơ tơdrong, păng ăn kơ kon đei đon lui kơjăp thoi ‘bok Pôl sơ̆, băt bơnê kơ Ih kơplah lăm kial hơbŭt, na yak năm kiơ̆ trong Ih. Apinh Ih ăn kơ ‘bơ̆r kon đei nơ̆r pơlung pơhiôk jơhngơ̆m, wă kơ yua tơdrong arih kon, dôm lu bơngai jum dăr kư̆m đei tơdrong hiôk-hian păng chang hơmĕng. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơplih kơ bơ̆n ăn akâu bơ̆n kiơ̆ dôm tơdrong hli kư̆ kă jum dăr, bơ̆n gô pơm ăn kơ tơdrong jum dăr rai hrĕp hrĕh păng hiôk-hian. Tơplih kơ bơ̆n ăn tơdrong hli pơgơ̆r lăm jơhngơ̆m, bơ̆n gô tơ’bôh tơdrong hiôk-hian. Tơplih kơ bơ̆n ăn đon tơchĕng mơ̆t lăm tơdrong ưh pă chang hơmĕng, bơ̆n đei tơbăt đon lui kơjăp kơ ‘Bok Kei-Dei – Sư bơwei tôm tơdrong năr dơning lăm tơpang ti Sư. Hơpơi kơ bơ̆n ling-lang lui kơjăp, pơtrơp yak năm lăm tơdrong tôn hơgơ̆r re phara noh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.