Kơplah tŏk bŏk lu bơngai tơpôl lơ hăt hot nơnăm wih wơ̆t, ih mơn băt bơ̆n ưh kơ ‘bôh tơdrong chhŭr nuih dih băl. Tơdrong pơm ‘lơ̆ng, mă trŏ kơ đei lăm jơhngơ̆m kon bơngai đơ̆ng tơm, dang ei rai jing minh tơdrong ưh pă đei bơih. Lu bơngai hli kơ pơhlŭ, hli kơ tơchĕng hiơ̆k bơngơ̆t, dah hli kơ akâu kơdih đei tơdrong kơ’bah, na lu sư rơih iŏk oei adrô̆. Mă-lei lăm anih jrŭ tơpă lăm jơhngơ̆m rim ‘nu bơngai, bu mă ưh kơ đei layơ chang nơ̆r pơma dơnuh rơngơp, ‘mêm mơnat, păng ưh kơ wă đei yua kơ kơdih? Kơplah jơ̆p-jang kơ teh đak mă jơhngơ̆m kon bơngai rai ngach thoi âu, lơliơ Kră Yang dan bơ̆n oei tơ âu wă kơ bơ̆n pơlung jơhngơ̆m dih băl hăm tơdrong ‘mêm tơpă?

Năr ‘nâu, năr 28/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Jessica Teed kơ̆l ‘bai PHARA KƠ TEH ĐAK KƠ‘BAH KƠ TƠDRONG ‘MÊM

“Yêsu khan kơ sư dơ̆ng: “Ih băt thoi noh boih na ih pơm kiơ̆ hloi bĕ.”  (Luka 10:37)

“Yua kơ kiơ ih pơm ‘lơ̆ng kơ inh?” – sư jet. Nơ̆r sư pơma noh pơm ăn kơ inh jĭ plei nuih dêh, na oei ling-lang lăm đon tơchĕng inh.

Inh ăn kơ sư minh blah khăn su. Inh ưh kơ băt pơma tơdrong kiơ nai ôh, inh tơl sư thoi âu: “Đei tơdrong kiơ pơm ăn kơ inh kuă kơ pơm ‘lơ̆ng kơ ih hă?”

Sư lăng tơ inh, pơpơ̆ hơngiĕng na khan: “Yua kơ ưh kơ đei bu pơm thoi noh ôh.” Sư lăng inh đơ̆ng kơ̆l truh tơ jơ̆ng, na pơma dơ̆ng: “Ih ưh kơ thoi lu sư.”

Lăm jơ̆p jang kơ teh đak dang ei, tơdrong pơm ‘lơ̆ng dah đon ‘brơ̆k mơnat dang thoi jing minh tơdrong phara, ưh pă jing tơdrong kon bơngai pơm ăn dih băl rim năr dơ̆ng bơih. Yua kơ thoi noh, minh tơdrong pơm ‘lơ̆ng đơ̆ng minh ‘nu bơngai tơmoi kư̆m đei pơm ăn kơ bơ̆n ‘bôh hlĭch. Ih tam đei layơ tơ’bơ̆p tơdrong thoi noh ưh? Đei layơ minh ‘nu bơngai ih ưh kơ băt kơ sư, mă sư pơm ‘lơ̆ng kơ ih ưh? Kơplah noh ih pơm thoi yơ?

Tơ̆ng jơhngơ̆m kon bơngai oei wă tơchĕng kơ akâu kơdih, mă Sơ̆p hla bơar Nơ̆r ‘Bok Kei-Dei krao wơ̆n bơ̆n arih hăm đon băt mơnat kơ đe, ưh kơ sĭ ‘mêm kơ bôl buăl đĕch, mă athei ‘mêm mơnat kơ lu bơngai mă pơm kơnê̆ kơ bơ̆n mơ̆n, thoi Yang Yêsu Krist đei pơm. (Lăng lăm Mathiơ 22:37-39; Mathiơ 5:43-47; Philip 2:3-4)
Lăm Luka chăl 10, minh ‘nu ‘bok thây bơtho tơdrong juăt jet Yêsu: “Lu đe bu bôl buăl inh?”

Wă tơl nơ̆r jet noh, Yêsu pơma pơtih gia gah bơngai Samri mă băt mơnat. (Lăng lăm Luka 10:30-37). Lăm tơdrong pơtih gia noh, minh ‘nu bơngai Juđê yak đơ̆ng Pơlei Jêrusalem wă năm tơ Pơlei Jêrikô, tơ’bơ̆p lu bơngai răp tơgar tơtông klĕ. Lu sư tơgar iŏk tôm tơmam sư, blei hiap păng teh sư rơka jĭ ‘bĕnh kơ akâu, na achăng sư lôch mol ‘bơ̆t cheng trong. Minh ‘nu ‘bok soi Juđê ‘bôh sư, mă năm yoh đĕch. Minh ‘nu bơngai Lêwi kư̆m năm truh, ‘bôh sư, mă sư kư̆m năm yoh đĕch mơ̆n. Mă-lei minh ‘nu bơngai Samri năm truh tơ noh, ‘bôh bơngai jĭ noh na sư đei đon ‘brơ̆k mơnat. Tơ̆ng bơngai Juđê păng bơngai Samri ưh kơ pơgơ̆p ‘lơ̆ng hơdai, mă bơngai Samri noh ưh ăn kơ tơdrong pơgăn păng tơdrong areh dih băl đơ̆ng adrĕch adrŭng lu sư. Sư rơih iŏk băt mơnat, tơgŭm păng wei-lăng bơngai mă oei jĭ noh.

Na Yêsu jet ‘bok thây noh: “Lăm pêng ‘nu bơngai noh, ih lăng bơngai ayơ bôl buăl păng bơngai mă jĭ đơ̆ng lu bơngai tơtông teh noh?” Na ‘bok thây ei khan:

“Bơngai mă băt mơnat kơ bơngai jĭ noh yơh.” Yêsu khan kơ sư dơ̆ng: “Ih băt thoi noh boih na ih pơm kiơ̆ hloi bĕ.” (Luka 10:36-37)

Yang Yêsu bơtho bơ̆n athei ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng. Minh lăm dôm lu tơdrong bơ̆n tơbăt tơdrong ‘mêm noh, dang bơ̆n ‘mêm kơ lu bơngai Kră Yang dan lăm tơdrong arih jum dăr kơ bơ̆n, ưh kơ jô̆ sư bơngai thoi yơ, dah bơ̆n băt kơ sư dah ưh. Kơplah bơ̆n băt mơnat păng pơm ‘lơ̆ng kơ lu bơngai nai, bơ̆n oei tơbăt jơhngơ̆m đei tơplĭh yua kơ tơdrong ‘mêm păng tơdrong Yêsu Krist pơjao akâu Sư tơ ‘long pơglang. Sơ̆p hla bơar Nơ̆r ‘Bok Kei-Dei kư̆m bơtho bơ̆n băt kơ rim ‘nu bơngai pŭ iŏk tơdrong bơ̆n pơm kơ lu bơngai jum dăr kơ bơ̆n. (Lăng lăm Mathiơ 25:34-46)

Kơplah bơ̆n băt pơih jơhngơ̆m păng pơih măt lăng lu bơngai jum dăr, ưh kơ pơdê dah tŭk lê̆ minh ‘nu bu ôh, bơ̆n gô đei tơdrong gĭt kăl jing thoi hơdah ŭnh pơchrang kơ jơ̆p-jang kơ teh đak măng mu âu. Na bơ̆n kư̆m jing tơmam jang ‘lơ̆ng lăm tơpang ti Yang Yêsu, ba tơdrong ‘mêm đơ̆ng Sư kơ lu bơngai mă oei kăl kơ Sư.

Apĭnh đĭ đăng krao khan hơdai: Kơkuh kơ Kră Yang, apinh Ih pơih măt păng pơih jơhngơ̆m kon wă kơ kon ‘bôh lu bơngai Ih dan ăn lăm tơdrong arih kon, lu bơngai mă jơhngơ̆m oei rơdu kơdŭn tơrŏng păng kăl băt kơ Ih. Apinh Ih bơtho ăn kơ kon băt pơm ‘lơ̆ng kơ lu sư hăm tơdrong ‘mêm mơnat, đon ‘brơ̆k mơnat păng băt mơnat, thoi Ih kư̆m đei ‘mêm mơnat kơ kon. Apinh Ih yua kon jing ti păng jơ̆ng Ih, wă ba tơdrong tơpăt păng hơdah ŭnh đơ̆ng Tơdrong ‘Nao ‘Lơ̆ng năm tơ dôm anih mă lăm măng mu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah jơ̆p-jang kơ teh đak mă lu bơngai juăt kơ rơih tơwih rŏng dih băl, ih đei layơ tơchĕng jet akâu ih kơdih: minh ‘măng tuch luch ih dơ̆ng tơchĕng wă pơhiôk jơhngơ̆m kơ minh ‘nu bơngai bu noh kơplah ayơ? Đei bu oei tơ rok trong mă ih yak rim năr, thĕng hrĕh pŭ trăp dôm tơdrong chhŭr nuih, oei hơdrô̆ dah jơhngơ̆m rơdu kơdŭn tơrŏng, mă ih tam tơchĕng lăng tơ sư ưh? Năr ‘nâu, bơngai bu mă Kră Yang dan ăn oei tơ anăp ih, wă kơ ih ‘mêm mơnat kơ sư thoi Sư đei ‘mêm mơnat kơ ih? Hơpơi kơ rim ‘nu lu bơ̆n, đei jơhngơ̆m ‘mêm mơnat đơ̆ng Kră Yang gô đei tơbôh ăn, pơlung pơhiôk lu jơhngơ̆m mă oei gleh lap, ơh sơ’ngon.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.