Muaj pes tsawg zaus uas koj cim civ yws tias ntawm no yog zaum kawg uas yus cia siab, tas rov qab txais tau txoj kev puas tsuaj loj dua zaum tas los? Thaum tej qhov rooj pib kaw zuj zus, thaum tej kev siv zog tsuas yog txais tau txoj kev tsis paub losis ntxeev siab, tib neeg lub siab yuav cim civ tsim muaj tej phab ntsa pos los thaiv. Peb kawm txoj kev ua siab tawv, kawm tsis cia siab, tas phem tshaj yog thooj yim rau txoj kev xav tias: yog tsis cia siab yuav tsis muaj hnub tas kev cia siab. Txoj kev kub siab thaum pib cia li tsuag zuj zus, ua rau muaj ib qhov khoob lug loj txias zias. Tiamsis koj puas xav tias, muaj qhov chaw twg yeej tseem muaj ib txoj kev cia siab loj txaus ua rau kom peb lub siab kam ntseeg thiab rov qab pib dua?

Hnub no, yog hnub 29/09/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Martha Noebel dhau ntawm Zaj kawm KEV CIA SIAB MUAJ TIAG

“Thov Vajtswv tus uas nej cia siab rau, pub nej muaj kev zoo siab thiab nyob kaj siab lug, Vaj Ntsujplig tus Dawbhuv lub hwjchim yuav pab kom nej muaj kev cia siab rau Vajtswv heev zuj zus” (Loos 15:13)

Ntawm kev mus ua haujlwm los, kuv ntsia pom kab ntawv sau rau saum Pawg Ntseeg daim txiag: “Cia siab yog muaj tiag”.

Kuv nres xav, thiab kuv yeej thooj yim rau lo lus hais no. Tiamsis thaum ua tib zoo xav txog ob peb lo lus luv luv no, kuv pom tias nyob ntawm coob tus, cia siab yog ib yam uas nyob deb heev, thiab ntau zaug cuag li tsis muaj tseeb.

Kuv ntseeg tias muaj ib nyob hauv tej qhov khoom plig muaj nqis tshaj uas peb yuav muab pub tau rau lwm tus yog cia siab.

Koj pom lawm tau, ib tug neeg tab tom tag kev cia siab, thiab nyob ib leeg cuag li lawv cim civ tawm tsis tau ntawm lub sijhawm uas lawv tab tom ntsib. Hauv lawv lub siab muaj txoj kev mob thiab hnov cuag li tsis muaj zog lawm. Ntawd yog lub sijhawm uas peb yuav tau nyob ze lawv, coj Txojmoo Zoo mus qhia rau lawv, nrog tag nrho tej uas Tswv Yexus pub: kev cawmdim, tiv thaiv, kev hlub thiab ib txoj kev cia siab tiag:

“Thaum tubsab tuaj tsuas yog tuaj nyiag, tuaj tua thiab ua kom puastsuaj xwb. Tiamsis kuv los, yog los ua kom nej tau txojsia thiab tau lub neej puv npo” (Yauhas 10:10).

Cia siab muaj lub ntsiab tias yog tos los ntawm lub siab ntseeg thiab tos ntsoov. Peb yuav tau coj Vajtswv tej lus thiab kev cia siab rau Vajtswv mus qhia rau cov neeg uas lawv tsis tau paub kev cia siab yog muaj tiag. Thaum peb coj kev cia siab mus qhia rau lawv, kuj yog lub sijhawm uas peb coj txojsia mus qhia rau lawv.
Lub sijhawm uas peb kawm tau txoj kev qhib siab ntseeg ces ib zaug ntxiv yog kaujruam hloov pauv tag nrho lub neej. Kaujruam ntawd nws nyob deb tej lus taij thov Vajtswv daws yus tej teeb meem ntawm yus xub ntiag, nws tseem yog lub sijhawm uas peb yuav tau paub tos ntsoov ua haujlwm. Thiab ruaj siab tias Vajtswv yeej tseem tab tom ua tej yam uas siab tshaj tej uas peb qhov muag muaj nrim ntsia pom.

Nyob qhov twg ntawd tej lus taij thov, lub siab ntseeg thiab ua siab ntev tos Vajtswv yuav teb, peb yuav nrhiav tau yam uas yus cheem tsum tiag tiag.

“Kuv paub tseeb hais tias kuv tau ua neej nyob saib ntsoov tus Tswv tes haujlwm zoo thaum tsis tau tas kuv simneej” (Ntawv Nkauj 27:13).

Ntev los lawm, kuv yeej pom tias ib qhov teeb meem nyob rau hauv lub ntiajteb thaum ntawd yog: muaj ntau tus neeg lawv tsis muaj kev cia siab. ib ncig peb thaum twg twb vij puas ncig tej kev tu siab, tej teeb meem sib tsuam zaws, kab mob, teeb meem, nyiaj txiag, tsev neeg sib nrauj, nrog rau tej kev hloov pauv thiab txhua txoj kev txhawj ntawm lub neej. Lub ntiajteb cuag li twb tsis muaj ib qhov kev cia siab twg li lawm.

Yog tsis muaj Vajtswv, lub neej no nws yog ib qhov chaw tsis zoo thiab tag kev cia siab npaum cas. Tiamsis, nyob ntawm Vajtswv txhais tes pab thiab coj, peb muaj cuab kav tiv dhau. Kuv xav paub tias, txawm yog lub sijhawm no koj tab tom ntsib lub sijhawm zoo li cas los, cia siab tias txoj kev cia siab yeej tseem yuav muaj nyob. Tej zaum koj tseem ntsia tsis tau pom lossis txais tsis tau txoj kev cia siab ntawd los, qhov pom kev yeej nyob ntawd, zoo kawg nkaus tseg rau koj.

Yuav ua li cas thiaj rov qab nrhiav tau kev cia siab? tsuas muaj ib qhov chaw uas peb yuav nrhiav tau kev cia siab tiag xwb – ntawd yog nyob hauv Tswv Yexus.

Kuv nrhiav lo lus “cia siab” nyob hauv Vajluskub thiab nrhiav tau ntau lo lus cog tseg zoo. Feem ntau tej nqe Vajluskub no nws nyob hauv phau Ntawv Nkauj thiab Paj lug. Nyob hauv yus lub neej, vajntxwv Daviv ntau zaug poob rau txoj kev txomnyem thiab tej lub sijhawm li ntawd, nws yuav tau cim civ ntuas nws tug kheej tias kev cia siab yog muaj tiag, vim qhov ntawd los ntawm Vajtswv los. Hauv qab no yog tej uas Daviv tau thov muab fij rau Vajtswv:

“Tus Tswv, nimno kuv yuav cia siab rau dabtsi? Kuv cia siab rau koj nkaus xwb” (Ntawv Nkauj 39:7).

“Vim li cas kuv nyuaj siab ua luaj? Vim li cas kuv yuav raug kev txomnyem ua luaj li? Kuv yuav tso siab pluav rau Vajtswv, thiab kuv yuav rov qhuas nws dua, nws yog kuv tus cawmseej thiab yog kuv tus Vajtswv” (Ntawv Nkauj 42:11).

“Tus Tswv, thov qhia kom kuv paub koj txojkev, qhia kom kuv paub tej kev no tseeb. Qhia kom kuv ua neej raws li koj txojkev tseeb, rau qhov koj yog kuv tus Vajtswv uas cawm kuv dim. Kuv yeej ibtxwm cia siab rau koj. (Ntawv Nkauj 25:4-5)

“Cov uas cia siab rau koj yeej tsis muaj ib tug swb hlo li, tiamsis cov uas tawmtsam koj, yog cov yuav swb ntag” (Ntawv Nkauj 25:3)

“Tus Tswv yeej saib ntsoov txhua tus uas hwm nws, thiab cov uas cia siab rau nws txojkev hlub uas tsis hloov li” (Ntawv Nkauj 33:18)

“Thov koj nco ntsoov tej lus uas koj tau cog tseg rau kuv uas yog koj tus tubtxib lawm; tej lus cog tseg ntawd ua rau kuv muaj kev cia siab” (Ntawv Nkauj 119:49)

Cia li tso siab rau Vajtswv, vim ntawd yog yam uas Vajtswv tos ntsoov ntawm peb txhua tus. Koj yuav tau kawm txoj kev mloog lus thiab pom li Vajtswv pom txog yus lub neej uas yus tau ntsib dhau. Nyob hauv ntau yam, Vajtswv tab tom nthuav tawm rau koj pom tus dabtsi txog koj tus kheej thiab Vajtswv lub siab nyiam zoo kawg nkaus rau koj? Txhob cia tej kev xav lossis kev ntshai ib vuag ntawd coj koj kev. Pauv rau qhov ntawd, peb yuav tau cim civ ntuas tias Vajtswv lub homphiaj npaj tseg rau peb lub neej yog tej tswv yim zoo. Tus cev lus Yelemis tau sau tej lus cog tseg no cia:

“Kuv tib leeg thiaj paub tej uas kuv npaj yuav ua rau nej, kuv yuav pab kom nej vammeej tsis yog ua kom nej puastsuaj, nej thiaj muaj kev cia siab rau yav tom ntej” (Yelemis 29:11).

Peb tsis tas yuav tsau tsawv rau hauv txoj kev tag kev cia siab lossis hnov tias yus nyob ib leeg. Peb muaj cai tau puv npo kev cia siab! Vajtswv txoj kev hlub zoo kawg nkaus ntws lug rau hauv peb lub siab yuav zes tus nplaim taws cia siab kom cig, tus uas ib txwm raug muab npog cia tob tob hauv siab. thiab Vajtswv tej lus yuav ntxiv zog, txhawb peb, txhua zaus uas peb nrhiav Vajtswv los ntawm lub siab tos ntsoov ib txoj kev ntseeg ruaj khov. Paulus xa tej lus txhawb zog puv npo koob hmoov dhau ntawm tsab ntawv Loos:

“Txojkev cia siab no tsis ua rau peb poob ntsejmuag, rau qhov Vaj Ntsujplig tus Dawbhuv uas Vajtswv twb pub rau peb lawm, qhia rau peb hais tias Vajtswv hlub peb kawg li” (Loos 5:5).

“Rau qhov Vajtswv txojlus uas thaum ub luag muab sau tseg rau hauv ntawv twb yog sau qhia rau peb. Vajtswv txojlus ua rau peb muaj kev cia siab, ua siab ntev thiab muab siab rau ntseeg ntxiv” (Loos 15:4).

Hauv qab no yog qee ntu Vajluskub tiag, pab rau peb ntsia pom tej uas peb yuav ua nyob hauv peb lub neej ntseeg. Tej lus no yog “ruaj siab” “ua siab tawv”, “tos”. “hwm Vajtswv nyob hauv txoj kev pehawm”. “tos txoj kev cia siab” “ua siab ntev tos” thiab “zoo siab hauv txoj kev cia siab” puav leej ntuas peb txog tej yam uas peb yuav xyaum ua txhua hnub. Cia li nyeem kom nrov nrov tej ntu no lub sijhawm uas thov Vajtswv txhua hnub. Cia Vajtswv tej lus nkag rau hauv koj lub hlwb, thiab koj yuav txais tau txoj kev cia siab thaum koj lub qhov ncauj lees Vajtswv tej lus hauv lub neej.

“Nej cov uas cia siab rau tus Tswv, nej cia li cuab zog khov kho thiab ua siab tawv qhawv” (Ntawv Nkauj 31:24)

“Thaum cov neeg uas hwm koj porn kuv mas lawv yuav zoo siab heev, rau qhov kuv cia siab rau koj tej lus cog tseg” (Ntawv Nkauj 119:74).

“tiamsis cov neeg uas cia siab ntsoov rau tus Tswv yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg” (Yaxayas 40:31).

“Leejtwg tseem yuav cia siab rau tej uas nws qhovmuag twb porn lawm? Tiamsis yog peb cia siab rau tej uas peb qhovmuag tsis tau porn, peb yeej ua siab ntev tos tej ntawd” (Loos 8:24b-25).

“Qhov uas nej cia siab rau Vajtswv yuav ua rau nej zoo siab, thiab thaum nej raug kev txomnyem nej yuav tsum ua siab ntev thiab thov Vajtswv tsis tseg tsis tu” (Loos 12:12).

Cia siab tias tej lus puv npo lub hwjchim no yuav coj txojsia los rau koj. Cia li tawm suab hais tawm tej lus cia siab ntawd hauv koj lub neej thiab koj lub caijnyoog. Kuv muaj kev cia siab! Kuv txoj kev cia siab nyob ntawm Vajtswv! Kuv yuav sawv khov kho thiab tos Vajtswv. Kuv muab kuv lub neej thiab tsev neeg tso rau hauv txoj kev ntseeg Vajtswv. Cia li lees tej lus no txhua hnub. Cia siab yog muaj tiag. Cia siab los ntawm Vajtswv los! Nws tso txoj kev cia siab hauv koj lub siab. cia li tawm suab lees thiab tos saib tej uas Vajtswv yuav ua.

“Thov Vajtswv tus uas nej cia siab rau, pub nej muaj kev zoo siab thiab nyob kaj siab lug, Vaj Ntsujplig tus Dawbhuv lub hwjchim yuav pab kom nej muaj kev cia siab rau Vajtswv heev zuj zus” (Loos 15:13).

Thov caw nrog kuv peb thov Vajtswv ua ke: Tus Tswv, twb muaj tej lub sijhawm kuv qaug zog vim kuv txoj kev tag kev cia siab, txog qhov uas tsis kam ntseeg ib yam dabtsi ntxiv. Thov zam txim rau kuv txoj kev qaug zog thiab zes tus nplaim taws cia siab hauv kuv lub siab kom cig dua ib zaug ntxiv. Hnub no, kuv thov muab txhua txoj kev tws thiab kev txhawj tso rau ntawm Vajtswv txhais tes. Thov pub rau kuv kom muaj kev ntseeg sawv khov kho tos Tswv Yexus tej txujci – yog lub hauv paus hauv kuv lub neej. Thov Vaj Ntsujplig txhawm kom puv nkaus kuv sab ntsujplig los ntawm txoj kev kaj siab thiab txoj kev zoo siab zoo kawg nkaus. Kuv thov hauv Tswv Yexus Khetos lub npe, Amees.

Cov kwv tij txhua tus, koj txoj kev cheem tsum tshaj rau hnub no yog dabtsi? puas yog kev pab txog nyiaj txiag, kev kho zoo ntawm lub cev ntaj ntsug, ib txoj haujlwm ttshiab, ib lub chaw sov siab lossis ib txoj kev mus los? Txawm yog dabtsi los, cia li muab tso rau hauv Tswv Yexus txhais tes hnub no. thiab phooj ywg, tsis paub ib ncig ntawm koj puas muaj leej twg tab tom cheem tsum kev txhawb zog? Cia li qhia tej lus no muaj zog txhawb kom sawv daws muaj sia. Ntseeg tias cia siab yog muaj tiag – yuav tau muaj lub siab tawv qhib siab los txais yuav yam zoo uas Vajtswv ua!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.