Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ană mơnuih ƀing ta juăt hmâo nua pơkă phara kiăng kơ phat kơđi kơ sa čô mơnuih dưi jing ƀôdah tơlơi hơgĕt jing hiam. Tơlơi kơƀah ƀing ta anŭn jing ƀu hơdơr kơ bruă rơgao, ƀu hluh tum djŏp bruă ƀơi anăp laih anŭn mơmŏt kơ hơgĕt bruă pơanăp. Kơnơ̆ng kơ Khua Yang- Pô lăng ƀuh pơ anih hlŏng lar kar hăng bruă hmâo truh laih ƀơi anai, mông anai  dưi thâo krăn klă pă jing hiam hloh.

Hrơi anai, lơ 26/09/2022, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Dan Betzer  tui hăng akŏ tơlơi hrăm Khua Yang thâo Tơlơi Hiam Hloh

“Ƀing ta thâo laih, abih bang tơlơi pơƀŭt glaĭ leng kơ jing hĭ tơlơi hiam kơ ƀing khăp kơ Ơi Adai, jing kơ ƀing mơnuih Ơi Adai hmâo iâu mă tui hăng tơlơi Ñu ruah mă hlâo.” ( Rôm 8:28)

Thŭn 1904, tơdơi kơ pơgiơ̆ng tơlơi hrăm hră, William Bordon jing pô hyu ră ruai Tơlơi Phrâo Hiam. Amăng tơlơi hơdip ñu, amăng hơdôm hrơi mông phara, Bordon hmâo čih gah klon Hơdrôm Hră Tơlơi Pơhiăp Ơi Adai ñu tui anai, “ Ƀu pơkom, ƀu kơdun, ƀu hơưi”.

Wơ̆t dah tơkeng rai amăng sang anŏ pơdrŏng sah samơ̆ Bordon ƀu jing hlun kơ tơlơi pơdrŏng sah ƀôdah prăk kak. Mơ̆ng blŭng, sa čô gơyut hmâo laĭ jing sa čô pô hyu ră ruai jing pơrơngiă mông đôč. Samơ̆ hiăp pơklă čih laih gah klon Hơdrôm Hră Tơlơi Pơhiăp Ơi Adai jing “ ƀu pơkom”. Tơdơi kơ pơđŭt hrăm hră pơ Sang Hrăm Prŏng hmư̆ hing Yale, hmâo lu anih iâu ñu mă bruă, prăk lu mơ̆n. Samơ̆, tui hăng hơdôm tơlơi Bordon hmâo čih laih, anŭn jing “ ƀu kơdun”. Bordon thâo klă Khua Yang iâu laih kiăng kơ nao pơ tơpul tơlơi đaŏ Hôi anih čar Khač kiăng pơhaih kơ tơlơi khăp Khua Yang kơ gơñu. Tơdơi kơ pơgiơ̆ng laih tơlơi hrăm glông amăng anih hrăm bruă Ơi Adai Princeton, ñu nao pơ čar Êjip kiăng hrăp boh hră Arabic hlâo kơ nao pơ čar Khač. Samơ̆ tơdang dŏ pơ čar Êjip, Bordon bưp tơlơi ruă glo laih anŭn găn sa blan kloh pran hlăk 25 thŭn. Hlâo kơ djai, Bordon hmâo čih “ ƀu hơưi”.

Biă mơ̆n tơlơi djai blĭp blăp truh kơ William Borden jing sa tơlơi ƀu lăp, bơrơngiă hĭ sa čô rơgơi, abih pran jua kơ bruă Khua Yang? Ƀu djơ̆ ôh. Rơbâo čô mơnuih hmâo đŏk tơlơi ră ruai kơ Borden laih anŭn tŭ mă tơlơi pơtrut kiăng kơ jing pô đuaĭ hyu ră ruai. Khua Yang ƀu pơrơngiă ôh tơlơi rơngot pă amăng tơlơi hơdip ƀing ta.

Jing ƀing đaŏ kơ Khua Yang, ƀing ta găn gao hơdôm mơta ƀing ta ƀu čang rơmang, laih anŭn biă mơta tơlơi ƀing ta dŏ tơguan samơ̆ ƀu truh ôh. Hmâo tơlơi mơtah hơtai ƀing ta ƀu thâo gah pơblang. Samơ̆ tơlơi ƀing ta thâo sĭt anŭn jing Ơi Adai yua abih bang tơlơi anŭn kiăng ba glaĭ tŭ yua kơ bruă mơnuă Ñu. Ană mơnuih hmâo so hơđăp, ră anai, pơ anăp samơ̆ hăng Khua Yang djŏp mơta tơlơi amăng anih nanao hlŏng lar kar hăng hlăk truh ră anai, mông anai. Ană mơnuih hơdơr glaĭ bruă so hơđăp dŏ kơƀah, thâo krăn bruă hlăk truh hăng tơlơi ƀu tum djŏp laih anŭn ƀu rơđah ôh kơ djŏp bruă pơ anăp. Bơ Ơi Adai jing Yang dŏ răk wai abih bang mơnơ̆ng mơnuă, wơ̆t djŏp anih anŏm laih anŭn hrơi mông. Ñu thâo abih bang tơlơi laih anŭn thâo tơlơi hơgĕt jing hiam hloh brơi kơ ană bă khăp hơeng Ñu laih anŭn bruă mơnuă Ñu.

Mông hrơi hơdip ƀơi lŏn ƀôdah mông hrơi mă bruă kơ Khua Yang ƀu pơdah tơlơi dưi jing amăng bruă jao ôh. Pơhmutu kar hăng Yôhan ngă batem, ƀing ta đŏk amăng Mathiơ 11: 2-3 ƀuh tui anai, “ Tơdang Yôhan dŏ amăng sang mơnă, ñu hmư̆ arăng ră ruai hơdôm bruă Yang Krist ngă. Hnŭn yơh ñu pơkiaŏ nao ƀing ding kơna ñu tơña kơ Yêsu: “Djơ̆ mơ̆ Ih jing Pô khŏm či rai, ƀôdah gơmơi khŏm dŏ tơguan pô pơkŏn dơ̆ng?” 

Yôhan hmâo lu tơlơi găn mưn amăng tơlơi hơdip mă bruă samơ̆ tơlơi mưn găn anŭn ngă kơ ñu đing đaŏ kơ Khua Yang Yêsu. Yua kơ anŭn, sa tơlơi yom pơ anai ƀu djơ̆ tơlơi dưi jing kar hăng mơta lăng gah asar ôh samơ̆ hơin kơnang kơ kơnơ̆ng tơlơi gĭt gai wai lăng Ơi Adai, tui anai “Ƀing ta thâo laih, abih bang tơlơi pơƀŭt glaĭ leng kơ jing hĭ tơlơi hiam kơ ƀing khăp kơ Ơi Adai, jing kơ ƀing mơnuih Ơi Adai hmâo iâu mă tui hăng tơlơi Ñu ruah mă hlâo.” ( Rôm 8:28)

Rơkâo ƀing ta pioh mông iâu laĭ hrŏm hơbĭt

Ơ Khua Yang, lu wơ̆t kâo pơkă tơlơi dưi jing amăng tơlơi hơdip kâo, wơ̆t amăng tơlơi mă bruă Ih tui hăng nua pơkă asar anai. Rơkâo Ih pap brơi kâo laih anŭn anăp mơta kâo đĭ nao hăng Ih jing Pô hlăk dŏ ƀơi gre pơtao ang yang, Pô lăng ƀuh djŏp mơta laih anŭn hơin kơnang kơ Ih thâo krăn laih anŭn hmâo hơdră hiam hloh kơ tơlơi hơdip kâo. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, sa tơlơi hơdip mă bruă kơ Khua Yang ƀu či jing sa tơlơi hơdip đôč đač ôh. Anŭn yơh, Tơdah ƀing ih jing pô Khua Yang ruah iâu mă bruă kơ Ñu, brơi jao pơyơr tơlơi hơdip hăng bơngăt jua “ ƀu pơkom, ƀu kơdŭn, ƀu hơưi”. Tŏng ten bĕ hăng hơdôm bruă Khua Yang hmâo jao laih wơ̆t dah hmâo djơ̆ mông aka ƀuh boh than tui hăng tơlơi ƀing ih čang rơmang ôh. Sĭt yơh, truh hrơi mông gal, ƀing ih či ƀuh rup hiam klă mơ̆ng Ơi Adai rơđah rơđong yơh.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih