Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Nyob rau thawj hnub ntawm lub xyoo tshiab 2022, peb cia li qhib siab txais Vajtswv txojlus los ntawm txoj kev tshiab thiab tej yam tshiab uas Vajtswv cog lus yuav pub rau Nws tej menyuam. 

Hnub no, yog hnub 01/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dianne Neal Matthews dhau ntawm Zaj kawm IB XYOO TSHIAB TXHUA YAM TSHIAB

Kuv tabtom ua yam tshiab! (Yaxayas 43:19).

Ua Vajtswv tsaug vim muaj lub caij ua koob tsheej nco txog Yexus yug yog li peb txhua tus puav leej xaus lub xyoo dhau nrog tej yam uas tshiab -  Yuav tej khoom ua si tshiab rau tej menyuam, tej ris tshiab (tsis yog tias thaum twg twb yog xim llossis haum hnav tiamsis yeej tseem tshiab),  thiab tej zaug tseem yog qhov uas peb lub cev rog tuaj thiab. Peb kuj pib ib lub xyoo tshiab los ntawm tej yam tshiab – ib daim ntawv caij nyoog tshiab tau muab dai rau tim phab ntsa, tej ntawv them nuj nqis tshiab yuav tau them thiab txoj kev tshiab rau tej hnub yuav los no. 

Txhua tus puav leej xav tej yam uas tshiab, Vajtswv los kuj ib yam. Txawm yog nyob hauv Vajluskub muaj tej ntu hu Vajtswv ua Tus Nyob Puas Thaum Ub los Nws tau hais tias “Tiamsis tus TSWV hais tias, “Tsis txhob nco txog tej xwm txheej uas twb dhau los lawm lossis tsis txhob xav txog tej xwm ntawd li. Kuv tabtom ua yam tshiab; nimno yam ntawd twb tshwm tuaj lawm, nej tsis pom yam ntawd li los?” (Yaxayas 43:18-19). 

Vajtswv pib Nws phau ntawv los ntawm zaj xwm txheej uas Vajtswv tau tsim muaj ib lub ntiajteb tshiab. Thiab Nws xaus Nws phau ntawv ntawd los ntawm Nws lub homphiaj tsim muaj lub ntuj tshiab thiab lub ntiajteb tshiab. 

Peb Leej Txiv tus uas nyob saum ntuj ceebtsheej xav ua tej yam tshiab nyob rau hauv Nws tej menyuam lub neej. Nws xav qhia rau peb paub txog qhov tseeb tshiab nyob ntawm Nws, pub rau peb lub caijnyoog tshiab los ua haujlwm pab rau lwm tus, coj peb mus rau hauv kev pehawm tob dua thiab ntseeg siab rau Nws ntau dua. Tiamsis peb pheej zoo li haiv neeg Yixalayees thaum uas lawv mus rau tom roob moj sab qhua. 

Vajtswv cog lus tias yuav muab ncuav los saum ntuj los rau lawv noj tag nrho 6 hnub nyob ra txhua thiv. Vajtswv qhia kom lawv tsuas mus khaws ma-nas los noj hnub twg txaus rau hnub ntawd xwb, nyob rau hnub rau, lawv tau cai khaws tseg cia rau ob hnub. Thaum muaj ib txhia neeg lawv tsis mloog lus thiab siv zog khaws ma-nas tseg cia, ces cov uas khaws cia ntawd cia li lwj tas thiab muaj kas nyob rau hnub tom qab. 

Muaj ntau zaug kuv kuj zoo ib yam li ntawd. Vajtswv xav ua tej yam uas tshiab nyob hauv kuv lub neej thiab kuv tes haujlwm ua Nws dej num. Tiamsis feem ntau kuv siv zog tuav kom tau cov ma-nas nag hmo cia. Kuv tsis xav muab tej yam uas kuv hnov zoo thiab ib txwm ua tau zoo lawm tso tseg – muaj qee txoj kev xav qub, ib txoj kev ua haujlwm twg tau teem tseg, ib yam haujlwm uas kuv pheej ua pub rau Vajtswv. Kuv yuav tseg tsis tau cia tej yam tshiab thiab tej yam zoo uas Vajtswv tau npaj tseg rau kuv dhau mus yog tias kuv tsis ntseeg siab rau Vajtswv ua tus coj kuv kev, txawm yog thaum uas Vajtswv coj kuv mus rau ntawm txoj kev uas kuv tsis tau paub dua. 

Ib txoj kev zoo uas tshaj plaws tuav tau peb txoj kev ntseeg kom tshiab yog kawm Vajtswv txojlus txhua hnub. Vajtswv txojlus ciaj sia nrog lub sijhawm – qub thiab tshiab tib si phim rau txhua tiam. Ib yam li Nkauj Quaj Ntsuag 3:23 tau sau, “Txoj kev hlub ntawd muaj txhua hnub, ib yam li lub hnub niaj tagkis tawm tuaj”, Nyeem Vajtswv txojlus txhua hnub yuav ua rau peb muaj kev nkag siab tshiab, paub yam tshiab thiab muaj zog tshiab tib si. 

Peb cia li koom siab ua ke nrog tus sau Ntawv Nkauj 33:3 “Hu nkauj tshiab qhuas Nws”. Nyob rau hauv Exekees, yog tshooj 11,18,36, peb pom Vajtswv cog lus yuav pub “ib lub siab tshiab thiab ib tug ntsujplig tshiab”. Peb nrog Paulus zoo siab ua ke nyob rau hauv cov lus, “Tus uas nrog Yexus Khetos koom ib txojsia, tus ntawd yog neeg tshiab. Nws lub neej qub twb dua mus lawm nimno Nws muaj lub neej tshiab” (2 Kauleethaus 5:17).

Xav txog Vajtswv txojlus nyob hauv tsab ntawv Kaulauxais thiab Efexaus ntuas peb txhua tus kom peb nco tias “nej twb muab nej lub siab qub thiab tej kev phem uas nej ibtxwm ua tso pov tseg lawm” (Kaulauxais 3:9) thiab “muab lub siab tshiab los coj. Lub siab tshiab ntawd Vajtswv tsim zoo li Vajtswv tus yam ntxwv, sawvdaws thiaj pom hais tias nej ua nej lub neej ncaj ncees thiab dawbhuv” (Efexaus 4:24). 

Yog tias peb cheem tsum lub zog kom ua tau lub neej raws li “ib tug neeg tshiab” ces Vajtswv twb muab ob tug yaumsij nyob rau hauv Nws txojlus rau peb lawm. Ib yog cia li tig ntsia Txoj Kev Cog Lus tshiab yog peb lub hauv paus cawmdim. Peb cia li ua tib zoo xav txog tsab ntawv Henplais thiab ua Vajtswv tsaug dua ib zaug ntxiv tias dhau ntawm Tswv Yexus txoj kev tuag tau qhib dua ib “txojkev tshiab thiab muaj sia” kom peb nkag tau mus ntsib Nws tim ntsej tim muag (Henplais 10:19-22). Txuas ntxiv yog peb cia li tig mus rau lub neej tom ntej los ntawm kev nyeem phau ntawv Tshwm Sim. Peb yuav nrhiav pom kev txhawb zog thaum xav txog lub sijhawm uas Vajtswv yuav rov qab kho dua txhua yam uas tsis yog, kho txhua txoj kev tu siab, thiab pub rau peb ib lub npe tshiab thiab ib lub tsev tshiab. 

Ib txoj kev zoo kom Vajtswv cov menyuam noj xyoo tshiab yog muab tej uas “twb lwj tas thiab pob puas lawm” pov tseg mus. Tom qab ntawd, peb yuav tau txais kev ywj pheej ua lub neej txhua hnub tos tej yam tshiab ntawm Tus Tswv tej lus cog tseg “Nim no Kuv yuav tsim dua ib puas tsav yam tshiab!” (Tshwm Sim 21:5).

Thov caw nrog kuv peb thov Vajtswv ua ke: Tus Tswv thov ua tej yam tshiab nyob hauv kuv lub neej, kom kuv tsis yog tsuas saj tau tej yam tshiab txog Koj xwb tiamsis tseem yuav muab tej paj txiv tshiab fij rau Koj thiab. Kuv thov hauv Tswv Yexus Khetos lub npe. Amees.

Cov kwv tij txhua tus, puas muaj yam dabtsi tab tom tav koj kev kom txais tsis tau tej yam tshiab los ntawm Vajtswv los? Tej zaug ntawd yuav yog tej kev xav, tej txoj kev ua haujlwm, lossis txoj kev sib raug zoo tsis haum Vajtswv siab. Cia li vam khom Vajtswv txoj kev hlub tshem tej yam tsis zoo tawm. Tuav txoj kev uas kawm Vajtswv txojlus txhua hnub kom txais tau tej yam tshiab uas Vajtswv npaj tseg rau koj.  

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.