Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv txoj lus kws ntau tug tau kawm paub dhau lawv lub neej txhua hnub, raws li phau ntawv CBN Devotional Daily. Thov kom koj txais tau kev kaj siab ntawm koj lub neej kws caum tug Tswv qab txhua hnub.

Nyob rau hnub ua kevcai nco txog Tswv Yexus raug kev txom nyem, peb rov los hais txog tej uas tug Tswv tau ua pab rau peb saum tug ntoo khaublig. Tus Tswv tau tuag txhiv peb tej kev txhaum, ib zaug txaus lawm, kom peb tau los nrog Vajtswv sib raug zoo thiab txais tau lub neej tshiab hauv Vajtswv.

Hnub no, yog hnub 01/04/2021, kev thov Vajtswv Txhua Hnub nej txhua tug los nrog kawm Vajtswv txoj lus nrog tug sau ntawm zaj kawm muaj lub npe hais tias NUJ NQIS TAU THEM - IB ZAUG TXAUS LAWM

Ib yam nkaus, nej cia li suav tias nej tuag ntawm lub txim thiab muaj txojsia hauv Yexus Khetos nyob rau Vajtswv. (Loos 6:11)

Koj puas pom tau tias Tswv Yexus txoj kev tuag saum ntoo khaublig twb yog peb txoj kev tuag saum ntoo khaublig ntag? Koj puas pom hais tias qhov uas Tswv Yexu sawv rov los twb yog peb sawv hauv qhov tuag rov qab los thiab? Tiamsis tseem muaj ntau tus ib txwm tsis tau muab yug lub neej los sib txuas rau qhov Tswv Yexus tau tuag thiab sawv rov los. Tseeb tiag qhov ntawd yog yam uas peb txhua tus yuav tsum ua kom peb “kawm paub” lub neej tiag hauv Tswv Yexus Khetos.

Tim thawj Paulus qhia tias, “Yog peb nrog Yexus koom txojkev tuag li hais no, peb yeej yuav nrog nws koom qhov uas sawv hauv qhov tuag rov los. Peb paub tias peb tus qub twb raug muab teem nrog Yexus rau saum tus ntoo khaublig xwv peb lub cev qub uas muaj txim ntawd thiaj raug muab ua puam tsuaj tag mas peb yuav tsis ua lub txim li qhev dua li lawm.” (Loos 6:5-6)

Peb yuav tsum paub dabtsi? Yam ntawd yog tias peb lub neej qub twb raug ntsia saum ntoo khaublig nrog Tswv Yexus lawm yog li peb lub cev kws ua txhaum ntawd tsis nyob lawm, “rau qhov tus uas tuag lawd kuj dim lub txim lawm. Yog peb twb nrog Khetos tuag lawm, peb ntseeg tias peb yuav muaj txojsia nrog nws nyob thiab.” (Loos 6:7-8).

Vajluskub hu tej txheej txheem no hais tias “kev sib raug zoo”. Sib raug zoo txhais tau hais tias sib kho. Ntawd yog txheej txheem los ntawm ob tug sib txawv, tsis sib thooj los koom ua ib tug. Txoj kev cawm dim kuj muaj ntau lub ntsiab lus zoo yam ntawd tiag.

Kuv niam yog ib tug rau siab ntso rau nws teg hauj lwm uas tuav nyiaj. Nws ua hauj lwm hauv ib lub tuam txhab uas luam tawm tej khoom khov. Vim muaj niam, kuv thiaj kawm tau ntau yam los ntawm cov uas tuav nyiaj. Kuv kawm tau tias hauv daim ntawv xam nyiaj ces txhua yam cuab tam uas muaj yuav tsum haum nrog cov nuj nqis yuav raug them thiab qhov nyiaj uas tus ntawd muaj. Yog xam pom ob yam ntawd tsis sib haum lawm yuav tsum tau muab los sib piv thiab kho dua kom ob tog sib haum.

Ib yam nkaus li ntawd, peb hais tau hais tias Vajtswv twb “sib kho phau ntawv kom haum” vim tej nqi uas peb tshuav Nws vim peb tej kev txhaum.

 Thiv uas nco txog Tswv Yexus raug txom nyem thiab sawv rov los tau hu ua thiv Dawb huv vim qhov ntawd tau piv txog txoj kev cawm dim muaj hwjchim thiab zoo kawg nkaus.

Tswv Yexus twb them tug nqi siab kawg nkaus kom peb tau ua lub neej nrog Vajtswv. Lub neej ntawd xav kom peb yuav tsum txiav txim siab txhua hnub, kom sib haum qhov nuj nqis uas Tswv Yexus twb pab peb them peb yuav tsum ua dabtsi?

“Peb yeej paub tias Khetos raug muab tsa ciaj sawv hauv qhov tuag rov los thiab nws yuav tsis tuag dua li lawm. Txojkev tuag tsis muaj hwjchim kav nws lawm. Qhov uas nws tuag ntawd nws tuag ntawm lub txim tib zaug xwb mas txaus, tiamsis qhov uas nws muaj txojsia nyob nws nyob rau Vajtswv.Ib yam nkaus, nej cia li suav tias nej tuag ntawm lub txim thiab muaj txojsia hauv Yexus Khetos nyob rau Vajtswv.” (Loos 6:9-11).

Halelusyas… qhov nuj nqis tau them… ib zaug txaus lawm!

Thov caw peb sawv daws nrog koom thov Vajtswv: Ua tsaug Tswv Yexus koj tau tuag saum ntoo khaublig them tej nuj nqis uas yog kuv tej kev txhaum, ib zaug tag lawm. Thov kom koj txoj kev txom nyem qhia kuv paub ua lub neej haum koj dej siab, khiav dim ntawm tej kev txhaum ua lub neej kom koj tau ntsej muag. Kuv taij thov los ntawm Tswv Yexus Khetos lub npe. Amen!

Cov kwv tij sawv daws, Nyob rau hnub nco txog Tswv Yexus raug txom nyem, yuav tsum xav txog tej uas Tswv Yexus tau ua rau koj ntawm tug ntoo khaublig. Nws tuag vim koj tej kev txhaum thiab kom koj tau txais txoj sia ntev mus ib txhis. Cia li qhia tawm lub siab ua Vajtswv tsaug thiab cog lus ua lub neej kom phim Tswv Yexus txoj kev tuag.

Nyob zoo nej txhua tus! Thov kom nej txhua tus txais tau ntau yam koob moov