Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Koob tsheej Yexus sawv ntuas kom peb txhua tus nco txog lub neej tshiab nyob hauv Tswv Yexus, txojsia uas Tswv Yexus tau them nqi los ntawm nws txoj kev tuag txomnyem saum tus ntoo khaublig thiab sawv rov qab los muaj yeej. Tiamsis kom ua tau lub neej lawv li lub neej tshiab uas Vajtswv muab pub no, peb yuav tau tsa kom nws tsim los.

Hnub no, yog hnub 05/04/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gordon Robertson dhau ntawm lub npe TSA LUB NEEJ TSHIAB HAUV TSWV YEXUS TSIM LOS

Peb zoo li tej neeg raug txim uas luag yuav coj mus tua. Tiamsis cia peb raug kev txomnyem li no, peb thiaj tsis cia siab rau peb lub tswvyim, tiamsis kom peb cia siab rau Vajtswv tus uas tsa tau neeg tuag sawv rov qab los. (2 Kauleethaus 1:9).

Cov neeg Yudais lawv daim ntawv suav caijnyoog muaj ib lub sijhawm hu ua Teshuvah, txhais tias “tig los”nyob rau hli kawg hauv lub xyoo, yog hli Elul, txhais tias “nrhiav”. Homphiaj ntawm lub sijhawm ntawd yog kom txhua tus tig mus rau Vajtswv, npaj yus lub siab rau hnub Koob Tsheej Theej txhoj nug yug tus kheej, “Kuv puas npaj txhij tuag?”

Tej no nthuav qhia dhau ntawm tej ris tsho lawv hnav. Cov txiv neej Yudais muaj poj niam lawm ces lawv ntoo ib txoj phuam khuam caj dab, hnav ib lub tsho ntau mag dawb, kuj yog daim ntaub tom qab no yuav siv coj los pam lawv thaum tuag ntag. Lub tsho ntev no tsis muaj hnab tshos, piv txwv tias tsis muaj ib yam ab tsi yuav nqa tau mus nyob rau ncua kev ntawd. Ntawd yog ib txoj kev npaj txhij rau txoj kev tuag.

Yuav tau nco qab ntsoov tias Tswv Yexus yog neeg Yudais, thiab Nws twb npaj rau Nws txoj kev tuag. Txoj xov zoo yog thaum Tswv Yexus hnav daim ntaub qhwv Nws ntawd ces Nws muab hle cia nyob rau hauv lub qhov ntxa ntawd mus ib txhis vim Nws twb sawv rov qab los thiab yuav tsis nkag rov qab mus rau hauv lub qhov ntxa ntawd dua ib zaug lawm.

Thiab peb muaj lo lus cog tseg zoo kawg nkaus no nyob hauv Khaulauxais 2:12

“Thaum nej ua kevcai raus dej, twb yog muab nej faus nrog Yexus Khetos ua ke lawm. Thiab Vajtswv twb tsa nej nrog Yexus Khetos sawv rov qab los lawm, rau qhov nej cia siab rau Vajtswv lub hwjchim uas tsa Yexus sawv hauv qhov tuag rov qab los.”

Peb puas tau npaj siab nkag mus rau hauv Vajtswv qhov chaw zoo kawg nkaus lawm tau? Ntau zaug peb yooj yim cia rau txoj kev iab siab, khuab xeeb thiab txhawj xeeb ntim rau hauv peb, txeeb peb txoj kev zoo siab lawm. Yim pw tsaug zog hauv yus txoj kev tsis mloog lus, ces peb yuav yim khiav deb Vajtswv uas peb yeej tsis paub li.

Peb yuav tau tsa kom lub neej tshiab uas Vajtswv muab pub rau peb tsim rov qab los. Ntawd yog vim li cas peb yuav tau tshuaj xyuas tus kheej, saib yus muaj tsis txaus qhov twg, kom thov Vajtswv zamtxim thiab tso peb dim. Vajtswv yog tus muaj siab ntev thiab hlub tshua, Vajtswv yuav coj peb mus rau hauv tebchaws cog lus tseg.

Ua ntej, yuav tsum tau nco ntsoov tias Vajtswv hlub peb ntau npaum cas. Xalumoos hais nyob rau hauv Xalumoos Tej Nkauj 6:3 tias, “Tus uas kuv hlub yog kuv tug, thiab kuv yog nws tug”,
Yuav tau xav txog Vajtswv tus cwjpwm nyob hauv Khiavdim 34:6-7:
“Kuv yog tus Tswv, Vajtswv tus uas muaj lub siab puv nkaus kev hlub thiab tshua, yog tus uas tsis chim siab thiab yog tus uas muaj kev hlub thiab ncaj ncees. Kuv txojkev hlub yuav nyob nrog ntau txhiab tiam neeg, thiab zam txim rau tej neeg ua phem thiab muaj txim; tiamsis Kuv yuav rau txim rau lawv tej xeebntxwv mus txog peb thiab plaub tiam neeg, rau qhov lawv niam lawv txiv tau ua txhaum los lawm”.
Tom qab ntawd, rov qab tshuaj xyuas koj lub siab saib, muaj yam twg tab tom tav koj, ua rau koj tsis kam tag siab caum cov lus cog tseg uas Vajtswv tseg rau koj.
“Koj yeej tsis yuav tej khoom uas luag coj tuaj fij; yog Koj yuav tej ntawd, kuv yeej yuav coj tuaj. Koj tsis txaus siab rau tej khoom uas luag coj tuaj hlawv fij rau Koj. Vajtswv, tej uas kuv coj tuaj fij rau Koj ces yog kuv lub siab mos siab muag xwb, Koj yuav tsis fee plhu rau tus uas txo hwjchim thiab lees nws tej kev txhaum ib zaug li.” (Ntawv Nkauj 51:16-17).
Peb yuav tau ceev faj txog kev muab hlob los ntawm cim civ teb cov lus nug: “Kuv puas muaj yam dab tsi ua yuam rau Vajtswv? Kuv puas tau npaj txhij ntsib Vajtswv lawm tau? Kuv puas ua lub neej nco Tswv Yexus txiaj ntsig txog tej uas Nws tau ua rau kuv saum tus ntoo khaublig?
Thaum ntsib txoj kev tuag tim ntsej muag, tej zaug koj yuav ntsia txawv txog lub neej no. Kuv twb yuav luag tuag ib zaug thaum mob ua npaws. Lub sijhawm ntawd tej yam uas koj xav tias tseem ceeb puav leej tsis muaj qab hau. Thaum ntawd tsuas muaj koj thiab Vajtswv xwb.
Nyob hauv 2 Kauleethaus 1:8-9, Paulaus nthuav qhia txog tej uas nws kawm tau thaum ntsib tim ntsej muag txoj kev tuag:
Cov kwvtij, peb xav kom nej paub hais tias thaum peb mus pem lub xeeb Axias, peb raug txomnyem heev kawg li, peb tiv yuav luag tsis dhau, peb xav hais tias peb yeej yuav tuag xwb. Peb zoo li tej neeg raug txim uas luag yuav coj mus tua. Tiamsis cia peb raug kev txomnyem li no, peb thiaj tsis cia siab rau peb lub tswvyim, tiamsis kom peb cia siab rau Vajtswv tus uas tsa tau neeg tuag sawv rov qab los.”

Paulaus ntsib txoj kev tuag tim ntsej muag thiab tej ntawd pab kom Paulaus paub vam khom Vajtswv, yog tus uas yuav ua rau kom peb sawv tau rov qab los.
Thaum ntsib tej kev txomnyem peb yuav tau coj tus cwjpwm yog “Vajtswv yuav tau koob meej dhau ntawm tej no. Kuv yuav kawm kom nkag siab ntau dua txog Vajtswv txoj kev zoo tshaj plaws yog li cas”
Tswv Yexus los yog pub txoj sia puv ntoob rau koj. Nyob hauv Nws peb muaj txoj sia tshiab. Xij peem peb yuav ntsib yam dab tsi. Peb cia siab tau rau Nws. Peb txoj kev cia siab yog nyob ntawm tus uas ua rau tus tuag sawv tau rov qab los.

Thov caw peb sawv daws thov Vajtswv ua ke: Vajtswv, peb txoj kev cia siab tsuas muaj nyob ntawm Koj xwb, yog tus uas ua rau kom tus tuag sawv tau rov qab los. Thov qhia kom kuv paub lub neej muaj nqis, yam twg thiaj yog yam tseem ceeb, kom kuv paub muab tso ua ntej hauv txoj kev sib raug zoo nrog Koj, ua lub neej kom Koj tau koob meej. Kuv thov hauv Yexus Khetos lub npe. Amees.

Cov kwv tij txhua tus, zaj kawm hnub no yog txhawb kom koj tsa lub neej tshiab uas Vajtswv tau muab pub rau kojtsim los dhau qhov koj paub tau tias Vajtswv hlub koj npaum cas thiab koj tab tom teb Vajtswv txoj kev hlub ntawd zoo li cas? Tseg ob peb feeb los tshawb xyuas koj lub siab, puas muaj yam twg tsis yog uas koj yuav tau lees rau Vajtswv thiab thov kom Nws zam txim? Kuj thov Vajtswv pub kev txawj ntse rau koj kom ua lub neej muaj nqis, paub yam twg yog yam yuav tau caum qab ua lawv li kom Vajtswv tau koob meej.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau tag kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.