Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas muaj zaum twg koj qaug zog, tsis muaj zog thiab kev ntseeg cia li qaug zog zis? Zaum ze tshaj plaws uas koj nthuav tawm txoj kev ntseeg Vajtswv muaj zog tshaj plaws yog thaum twg? Cia li nco txog Yexus Khetos txoj kev cawm dim nyob saum Ntoo Khaub Lig thiab koj txoj kev zoo siab thaum uas nyuam qhuav ntseeg Vajtswv. Vajtswv txojlus hnub no txhawb koj kom mus rau tom hauv ntej nrog txoj kev ntseeg khov kho dhau ntawm txhua kaujruam nyob hauv txoj kev ua neej.

Hnub no, yog hnub 07/01/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diane Markins dhau ntawm Zaj kawm TUAV KEV NTSEEG RUAJ KHOV

“Nej yuav tsum muab siab rau ntseeg Yexus Khetos ib yam li tus cag ntoo uas ntsia av tob tob. Thiab nej yuav tsum sawv khov kho ib yam li lub tsev uas cov ncej txhos tob tob. Nej yuav tsum muab siab npuab tej uas nej twb kawm los lawm. Thiab nej yuav tsum niaj hnub nco ntsoov ua Vajtswv tsaug.” (Kaulauxais 2:6-7)

Twb yog muaj kuv tus xibhwb saib xyuas Pawg Ntseeg txoj kev ntseeg ruaj khov ua tus qauv zoo rau kuv. Nws yeej ib txwm qhia txog qhov tseem ceeb ntawm txoj kev fij nyiaj. Vajtswv txojlus nyob hauv Vajluskub sau tias Vajtswv cog lus yuav foom hmoov rau tus neeg uas zoo siab hlo fij nyiaj. Nyob rau ntawm feem xaus hauv zaj lus qhuab qhia, yawg txhawb cov pej xeem kom lawv ncaj ncees rau txoj kev fij nyiaj tsawg kawg yog ib feem kaum ntawm tej uas lawv khwv tau los. Yog tias muaj ib tug neeg twg pom tias lawm fij nyiaj rau Vajtswv tas es lawv ho muaj tsis txaus ces Pawg Ntseeg yuav pab lawv. Tiamsis qhov tseem ceeb tshaj plaws yog lawv txais tau qhov khoom plig uas qhov muag ntsia tsis pom ntawd yog kev kaj siab, txoj kev muab pub los ntawm Vajtswv los, txoj kev txhawb zog thiab kev zoo siab. Yog li, lwm tus ntseeg yuav xyaum raws li yawg tus qauv nyias yuav nthuav tawm nyias txoj kev ntseeg khov kho.

Yog tias tsis nthuav tawm txoj kev ntseeg khov kho nyob rau hauv lub neej no ces peb txoj kev ntseeg yuav qaug zog. Tseeb tiag, yog tias peb yim nthuav tawm peb txoj kev ntseeg ntau npaum cas ces peb yuav muaj zog ntau npaum ntawd nyob hauv txoj kev ntseeg. Vajtswv txojlus nyob hauv Kaulauxais 2:6-7 txhawb kom peb yuav tau khov kho hauv txoj kev ntseeg: “Nej yuav tsum muab siab rau ntseeg Yexus Khetos ib yam li tus cag ntoo uas ntsia av tob tob. Thiab nej yuav tsum sawv khov kho ib yam li lub tsev uas cov ncej txhos tob tob. Nej yuav tsum muab siab npuab tej uas nej twb kawm los lawm. Thiab nej yuav tsum niaj hnub nco ntsoov ua Vajtswv tsaug.”

Ua Vajtswv tsaug vim txhua tus nyob hauv kuv tsev neeg lawv nyias yeej nthuav tawm nyias txoj kev ntseeg khov kho. Kuv tus tub mus nyob rau teb chaws Zimbabwe thiab nrog cov neeg uas nws tsis tau paub dua nyob ua ke thiab ntawm no ua rau peb ntsib ntau yam nyob hauv nws txoj kev ntseeg ua rau nws sawv khov kho. Kuv tus nyab nws vam khom Vajtswv pab nws nres txhua tes haujlwm khov kho thaum nws tus txiv tsev tsis nyob tsev. Kuv tus txiv los nws kuj ntxiv nws txoj kev ntseeg thaum uas yawg xav txoj kev yuav ua lag luam li cas kom zoo thiaj yuav pab tau cov tub zog uas nyob rau lwm qhov chaw txom nyem thaum lawv tuaj ua haujlwm. Tshuav lwm tus ces lawv muaj lub siab tawv heev thaum uas lawv nthuav tawm lawv txoj kev ntseeg ruaj khov tias Vajtswv yuav kho zoo lawv txoj kev ntseeg. Thaum nthuav tawm txoj kev ntseeg khov kho li ntawd ces peb tab tom ua raws li Vajtswv tej lus tau sau tseg nyob hauv 1 Kauleethaus 16:13

“Nej yuav tsum ceevfaj, muab siab rau ntseeg, ua siab tawv qhawv thiab cuab zog khov kho”

Tseeb tiag, kuv sau tej no los txhawb nej sawv daws zog kom nej nthuav tawm nej txoj kev ntseeg kom khov kho dhau ntawm lub caijnyoog uas peb tab tom ntsib nyob rau hauv lub neej no. Txawm yog muaj qee zaug, txoj kev qaug zog yuav ua rau peb ntog thiab xav muab tso tseg los Vajtswv txojlus txhawb kom peb yuav tau muaj zog khov kho thiab muaj lub siab tawv nyob hauv txoj kev ntseeg txawm yog peb yuav ntsib lub caijnyoog muaj kev txomnyem ua rau peb muaj kev tu siab lossis muaj kev quaj ntsuag. Yog li peb yuav tau nthuav tawm txoj kev ntseeg khov kho dhau los ntawm tej lub caijnyoog uas Vajtswv cia rau peb ntsib nyob hauv lub neej no. Peb yuav tau muaj lub siab tawv hauv peb txoj kev ntseeg txawm yog peb yuav ntsib txoj kev qaug zog. Kuv txhawb kom koj yuav tau muaj lub siab tawv hauv txoj kev ntseeg thiab nthuav tawm txoj kev ntseeg ntawd dhau los ntawm yus tes haujlwm. Thaum uas nthuav tawm koj txoj kev ntseeg ruaj khov nyob rau lub sijhawm muaj kev txomnyem txog nyiaj txiag ces koj yog tus uas yuav txhawb tau rau lwm tus kom lawv sawv khov kho ntseeg siab rau Vajtswv.

Thov caw nrog kuv peb thov Vajtswv ua ke.
Ua Vajtswv tsaug vim Koj siv koj tej lus hnub no los txhawb kom kuv yuav tau muaj zog khov kho nyob hauv txoj kev ntseeg txawm yog yuav ntsib tej lub caijnyoog ua rau kuv qaug zog thiab tsis muaj zog los kuv paub tias dhau los ntawm tej kev txomnyem ntawd koj yuav rub kuv tes kom nce mus rau ib qib siab dua. Thov Vajtswv koj ua rau kom kuv muaj lub siab tawv thiab ua rau kuv muaj zog khov kho nyob hauv txoj kev nrog koj mus thiab coj tau txoj kev txhawb zog rau tej neeg ib ncig. Kuv thov hauv Tswv Yexus Khetos lub npe. Amees.

Cov kwv tij txhua tus, thaum uas koj ntseeg siab rau Vajtswv thiab vam khom rau Nws, peb yuav saj tau lub zog uas tsis muaj ib zaum twg tas. Kev sim siab yuav tshwm tuaj kom cob qhia peb txoj kev ntseeg thiab pab kom peb yim hnub yim loj hlob thiab muaj zog khov kho nyob hauv Vajtswv. Yuav tau muaj lub siab tawv thiab khov kho ua raws li Vajtswv tej lus, nrog tus tswv mus dhau los ntawm txhua lub caijnyoog zoo thiab tsis zoo hauv lub neej no. Ntseeg tias koj yuav txais tau qhov khoom plig zoo kawg nkaus uas Vajtswv cog lus yuav muab pub rau Vajtswv tus tub txib uas ncaj ncees thiab zoo.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.