Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

lub nra nyhav hauv lub neej txhua hnub ua rau koj qaug zog, lub siab tsuag zuj zus, khiav deb Vajtswv. Yog li yuav ua li cas thiaj yuav hloov tau dua tshiab, kom peb rov muaj lub siab kub lug dua ib zaug ntxiv?

Hnub no, yog hnub 07/05/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Sherri House dhau zaj kawm LUB SIAB KUB LUG

Nkawd sib tham hais tias, “Thaum peb taug kev tuaj, nws nrog wb tham thiab piav Vajtswv Txojlus rau wb mloog, mas wb lub siab kub lug cuag li hluavtaws hlawv puas yog? (Lukas 24:32)

Kuv zaum ib sab ntawm lub máy ntsuas kuv niam lub plawv dhia “bíp, bíp”. Nrog cov ntxhiab pa tshuaj tsw hauv chav tsev kho mob. Tom qab lub caijnyoog nyob hauv lub chav tu cov neeg mob nyhav tu kuv niam, kuv siv ob peb teev txoob los tsev saib kuv tus txiv, vim nws kuj muaj me ntsis teeb meem txog nws lub dag zog thiab. Tomqab ntawd kuv rov mus rau tom tsev tshuaj pw ib sab ntawm kuv niam. Kuv mus mus los los, khiav mus los ntawm kuv niam thiab kuv tus txiv, siv tag nrho kuv lub zog kom nkawd ob tug puav leej paub tias nkawd tau hlub thiab tau saib xyuas zoo. Ua li no tau ntau lub thiv kuv tso kuv tes haujlwm ua lag luam tseg, tsis tau xam txog kuv tus kheej. Kuv nco tsis tau tias ob peb thiv tag los kuv puas tau muaj ib pluas noj haus kom tsim nyog.

Kuv hnov lub nra nyhav heev thiab tag zog lawm. Kuv kuj tsis muaj sijhawm tseg rau Vajtswv. Txhua zaug mus cuag Vajtswv kuv tsuas thov kom Vajtswv cia rau kuv niam ntxov zoo mob. Ntau thiv dhau los kuv tsis nyeem Vajluskub nrhiav Vajtswv taw kuv kev nyob hauv Nws txojlus. Txawm yog kuv pom tias cov neeg nyob ib ncig ntawm kuv lawv cheem tsum mloog txoj moo zoo qhia txog Yexus Khetos, kuv lub siab qhuav qhawv kuv tsis muaj ib yam ab tsi yuav qhia rau lawv. Kuv tamsim no tsuas yog tseem tsis tau tuag xwb.

Kuv ntseeg tias nyob hauv peb leej twg los tshe twb muaj ib lub caij yuav ntsib dhau lub sijhawm lub hlwb qhuav qhawv. Feem ntau yog thaum uas peb ntsib ib yam teeb meem twg cov nyhom, lub nra nyhav thiab tej uas peb ua yog siv zog ua lub neej kom dhau lub sijhawm ntawd. Lub sijhawm ntawd peb cia txhua yam ib ncig ntawm peb muab yus nias rau hauv qab. Peb tsis xav siv sijhawm los saj Vajtswv txoj kev qab zib lawm. Tej zaug peb yeej tseem tuav rawv yus txoj kev ntseeg ruaj khov kho tiamsis paub tias tus nplaim taws hauv yus sab ntsujplig tsis kub lug li thaum ub lawm.

Tswv Yexus cov thwj tim kuj muaj ib lub caij zoo li ntawd. Nyob hauv Lukas 24, peb pom lawv nyuam qhuav hla dhau ib thiv muaj kev quaj ntsuag, thaum ntsia ntsoov Tswv Yexus raug ntes thiab muab coj mus ntsia rau saum ntoo khaub lig. Txawm yog nyob hauv nqe 4-9 lawv tau qhia paub tias Yexus twb sawv lawm los, lawv yeej tseem ua lub neej nrog txoj kev quaj ntsuag ntawd pauv qhov uas ua neej nrog Tswv Yexus tus twb sawv hauv qhov tuag rov los. Tom qab ntawd Tswv Yexus tshwm sim los, Tswv Yexus hais rau lawv txog cov lus ciaj sia. Nws paub lawv lub siab yuav tau hloov dua tshiab, yog li Tswv Yexus thiaj nthuav Vajluskub los kom lawv lub siab ib zaug ntxiv tau saj hauv Tswv Yexus qhov kaj.

Qhov kaj ntawm Vajtswv txojlus tau ua rau cov thwj tim lub hlwb tau hloov pauv thiab lawv lub siab tau kub lug tamsi ntawd.

“Nkawd sib tham hais tias, “Thaum peb taug kev tuaj, nws nrog wb tham thiab piav Vajtswv Txojlus rau wb mloog, mas wb lub siab kub lug cuag li hluavtaws hlawv puas yog?” (Lukas 24:32).

Vajtswv kuj yuav ua ib yam li nkaus li ntawd rau peb, tiamsis peb yuav tau cia Nws nrog peb mus ua ke hauv lub neej no thiab maj mam mus kom muaj txaus sijhawm los mloog tus Tswv txhais Vajluskub lub ntsiab. Thaum ntawd peb yuav hnov yus lub siab tau hloov dua tshiab thiab rov kub lug dua ib zaug ntxiv rau Vajtswv.

Kuv niam nyuam qhuav los tom tsev kho mob los tsis ntev xwb ces kuv tus txiv kuj zoo mob lawm thiab. Kuv pib siv sijhawm los kawm kom tob Vajluskub thiab cia Nws txojlus muaj sia hloov pauv kuv. Hauv Vajtswv txoj kev hlub tau coj kuv hla dhau tej kev sim siab thiab tau tsa kuv sawv.

Yog koj hnov qaug zog, tab tom hnov yus tsuas tab tom siv zog kom muaj sia nyob xwb ces yuav tau ruaj siab rau Vajtswv txoj kev ncaj ncees. Vajtswv yuav hloov pauv thiab ua rau kom koj muaj lub siab kub lug rau Nws.

Thov caw nrog kuv peb thov Vajtswv ua ke: Peb leej txiv tus uas nyob saum ntuj ceebtsheej, thov Koj zam lub txim pub rau kuv vim kuv tau cia tej lub caijnyoog ntawd ua rau kuv tsis muaj sijhawm pub rau Koj thiab tsis siv sijhawm rau Koj txojlus. Ua Vajtswv Koj tsaug vim Koj yeej tseem nrog kuv mus ua ke txhua hnub hauv lub neej. Thov hloov pauv kuv lub hlwb, thov ua rau kom kuv lub siab rov kub lug kom nthuav ci tau Koj lub hwjchim mus rau cov neeg nyob ib ncig ntawm kuv. Kuv thov hauv Yexus Khetos lub npe. Amees.

Cov kwv tij txhua tus, peb lub hlwb tsuas tau hloov dua tshiab thiab kub lug los ntawm Vajtswv Txojlus xwb. Yog li, txawm yuav muaj haujlwm ntau, lub neej yuav khwv npaum twg, los yuav tau qee lub sijhawm hauv txhua hnub los nyeem Vajtswv txojlus, maj mam nyeem thiab siv sijhawm los tshawb nrhiav kom Vajtswv txojlus nkag mus rau hauv koj, ua rau koj rov kub siab lug dua ib zaug ntxiv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.