Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Coob tug neeg xav nrog tus Tswv mus tiamsis lawv kuj xav tuav rawv lawv lub neej ntawm tus kheej cia, caum qab tej yam uas tus kheej nyiam tshuav Vajtswv tsuas yog feem ntxiv rau kom lub neej no muaj ntau yam ntxiv xwb. Yam dab tsi yuav tshwm sim tuaj yog tias thaum txog rau ib lub sijhawm twg, Vajtswv kom peb yuav tau xaiv, nrog tus Tswv mus lossis tso txhua yam tseg, lossis tuav rawv koj lub neej ntawm koj tus kheej cia, muaj tag nrho txhua yam tiamsis tsis muaj Vajtswv. Thaum ntawd koj yuav xaiv zoo li cas? 

Hnub no, yog hnub 09/02/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Terry Meeuwsen dhau ntawm zaj kawm LO LUS NQUA HU NROG TUS TSWV MUS

Koj cia li rov mus muab koj tej qhov txhia chaw muag huv tibsi thiab muab cov nyiaj ntawd coj mus faib rau cov neeg pluag, koj thiaj yog tus npluanuj nyob saum ntuj ceebtsheej; tom qab ntawd, koj cia li tuaj nrog Kuv mus." (Malakaus 10:21)

Kuv yeej tsis hnov qab tau txog zaj xwm txheej uas Tswv Yexus tau ntsib ib tug tub hluas nplua nuj thaum uas Tswv Yexus tab tom taug kev tuaj mus rau hauv Yeluxalees. 

Tej zaug tus tub hluas no yog ib tug neeg tseem ceeb nyob rau hauv ntiajteb, ib tug tub hluas lub neej tab tom muaj txiaj nplua nuj muaj koob npe nrog ib puas tsav yam ntau heev ua rau coob tug neeg laus nyob rau tebchaws Yudais lawv kuj muaj kev khib txog thiab. Tiamsis nyob rau hauv tus tub hluas no lub siab yeej tseem khi rawv ib chav tsis muaj ib yam dab tsi yuav laub kom puv taus rau. 

Nyob rau ntawm nws lub meej mom thiab tej qub txeeg qub teg, tus tub hluas no nws pom txog txoj kev ntshaw tiag tiag nyob rau hauv nws lub siab. Txojmoo zoo Malakaus qhia rau peb paub tias tus tub hluas no tau khiav tuaj cuag Tswv Yexus, txhos caug rau ntawm Nws xub ntiag. Nws thiaj nug Tswv Yexus tias yuav ua li cas kom thiaj tau txoj sia ntev dhawv mus ib txhis. Tus neeg no paub tej kevcai, tej lus samhwm tseg thiab tau coj raws li tej ntawd puag thaum tseem yau los lawm. 

Tiamsis tseem tshuav ib yam dab tsi thiab, thiab yawg paub yam ntawd. Yawg ntshaw kom tau tej ntawd. Tiamsis puas yog xav tau tag siab tag ntsws? Cuag li tsis yog li ntawd. 

Phau Malakaus qhia rau peb paub tias Tswv Yexus tau ua tib zoo saib yawg thiab hais tias, “koj tseem tshuav ib yam thiab”. Tswv Yexus hais rau tus tub hluas, “Koj cia li rov mus muab koj tej qhov txhia chaw muag huv tibsi thiab muab cov nyiaj ntawd coj mus faib rau cov neeg pluag, koj thiaj yog tus npluanuj nyob saum ntuj ceebtsheej; tom qab ntawd, koj cia li tuaj nrog Kuv mus." (Malakaus 10:21)

Ib lo lus nqua hu qhib kev nrog Vajtswv mus tawm hauv Vajtswv tus Tub lub qhov ncauj los. “Ntawm no yog koj tes haujlwm, koj puas txaus siab txais yuav lossis tsis txaus siab?” thiab peb paub tias tus tub hluas no tau tsi txais yuav. Vajluskub sau ntxiv tias “Thaum tus txivneej ntawd hnov dheev Yexus hais li ntawd, nws ua ntsejmuag ntshaus ntsho; nws txawm rov mus tsev lawm, nws nyuaj siab kawg li rau qhov nws npluanuj heev” (Malakaus 10:22). Nyob rau ntawm tus tub hluas no tsis yog tsuas hnov tag kev cia siab xwb tiamsis tseem hnov nyuaj siab thiab. Nws lub siab hnov nyhav heev. Txhua yam nyob rau hauv yawg, qhia rau yawg paub tias yawg tau xaiv yuam kev lawm… txawm li ntawd los, yawg yeej xaiv li ntawd. 

Tswv Yexus yeej tsis xav tus tub hluas no cov nyiaj. Tswv Yexus tsuas xav hloov yawg lub neej xwb. Tswv Yexus nqua hu nws nkag los rau hauv ib txoj kev ua neej tshiab. Ntawd yog ib daim duab zoo nkauj heev puas yog? Cov lus nqua hu ntawd yeej tseem tau nthuav dav tseg rau peb txhua tus los txog niaj hnub nim no puas yog. 

Koj puas tau muaj zaum xav tias yog tus tub hluas no nws txiav txim siab xaiv txawv no yuav zoo li cas? Yam dab tsi yuav tshwm sim yog tias tus neeg uas Tswv Yexus ua tib zoo saib no tom qab nws hnov Tswv Yexus tej lus qhia, nws nres ua ib pa loj loj tas thiab txaus siab nrog tus Tswv mus, rov qab los rau hauv nws lub tsev zoo, muab tag nrho tej uas nws muaj muag mus, tsuas tseg cev ris tsho nws tab tom hnav. Yam dab tsi yuav tshwm sim yog tias tus tub hluas no muab nws tej khoom ntawd tso rau ib tug pab tuav thiab ceeb toom tias cia li coj txhua yam ntawd mus nraum zoov faib rau tej neeg pluag nyob thoob plaws hauv tej nroog, pem tej yaj sab thoob plaws cheeb tsam Yudais. Kuj sim xav txog lub sijhawm uas yawg tig rov qab los rau ntawm Tswv Yexus, txhos caug rau ntawm Nws xub ntiag thiab hais tias, “Xibhwb, kuv twb ua tiav raws li txhua yam uas Koj tau qhia. Txhua yam tsis tshuav li lawm. Txhua yam twb muab muag tas lawm. Kuv txaus siab hlo nrog Koj mus, thov Koj coj kuv kev”. 

Sim xav seb txij lub sijhawm ntawd tus hluas no lub neej yuav zoo li cas? 

Tseeb tiag peb yeej tsis paub. Thiab yuav tsis muaj ib zaum twg peb yuav paub tau yog li txoj kev xaiv zoo tshaj plaws yog thaum twg twb yuav tau mloog raws li Vajtswv lo lus, txawm yog Nws yuav hais txog yam dab tsi, sij peem thaj chaw twg uas Tswv Yexus coj peb mus txawm yog ntawd yuav yog Ntoo Khaublig.

Thov caw nrog kuv peb thov Vajtswv ua ke: Tus Tswv, kuv lub siab ntshaw ntsoov Koj. Thov Koj txhob pub tej kev ntshaw khoom ntiajteb no lossis lwm yam txawv yuav tav tsis pub kom Koj dhau los ua tus nyob nruab nrab hauv kuv lub neej. Kuv thov Koj pab kom kuv lub neej yuav mloog Koj lus, mus raws li Koj ua tus coj kev. Kuv thov hauv Tswv Yexus Khetos lub npe. Amees.

Cov kwv tij txhua tus, tsis yog tias nrog tus Tswv mus yuav yuam kom koj muab tag nrho koj qhov txhia chaw muag, tiamsis kom tag siab tag ntsws nrog tus Tswv mus koj yuav tau ntshaw Tus Tswv ntau tshaj txhua yam thiab cia Nws ua tus coj koj nyob rau hauv txhua yam.  Hnub no, cia li tshuaj yus lub siab, saib puas muaj yam twg uas koj muab tso ua ntej tshaj Vajtswv lawm lossis tsis muaj?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.