Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas tau muaj ib zaug twg koj hnov tej haujlwm hauv lub neej uyog ib lub nra nyhav heev, khwv heev thiab koj yeej daws tsis tau lawm? Zaj kawm hnub no xav ntuas kom koj nco tias Vaj Leej Txiv tus nyob saum ntuj xav kom peb txhua tus muab peb tej kev txhawj xeeb cob rau Nws. 

Hnub no, yog hnub 09/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Byron Bohnert dhau ntawm zaj kawm VAM KHOM VAJTSWV

Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv. (1 Petus 5:7)

Vajtswv yeej tshua txog txhua teg haujlwm loj thiab me uas koj tab tom ntsib. Vajtswv tsis tau muaj ib zaug twg xav cia kom koj cim civ daws koj tej teeb meem ntawd ib leeg. 

Vajtswv txojlus nyob hauv Mathais 6:32-34 qhia, 

“Nej Leej Txiv tus uas nyob saum ntuj ceebtsheej yeej paub hais tias nej yuav tsum muaj tej no. Tiamsis nej yuav tsum xub nrhiav Vajtswv lub tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej. Yog li ntawd, nej tsis txhob txhawj rau tagkis, rau qhov tagkis yeej muaj kev txhawj txaus rau tagkis lawm. Kev nyuajsiab hnub twg yeej muaj txaus rau hnub ntawd, tsis tas yuav mus nrhiav kev nyuaj siab los ntxiv.” 

Peb paub hais tias tus Vajtswv uas peb pehawm yog tus Tswv kav tag nrho lub ntuj thiab lub ntiajteb no, Nws tuav lub ntiajteb no nyob rau hauv Nws txhais tes. Vajtswv tus uas muaj zog tuav rawv lub ntiajteb no, Nws kuj muaj cuab kav kwv taug txhua lub nra nyhav ntawm koj lub xub pwg. Tej nra nyhav uas koj tab tom ntsib tsuas yog tej nyuag hmoov av nyob hauv Vajtswv txhais tes xwb. 

Nyob hauv kuv lub neej, kuv kawm tau qhov tseem ceeb ntawm kev vam khom rau ntawm Vajtswv. Nws niaj hnub ntsia pom tej uas kuv tab tom ntsib thiab xyab tes los pab. Kuv cia siab tau rau ntawm Vajtswv thiab ntseeg siab tau rau Vajtswv tus uas ua raws li Nws txoj kev ncaj ncees. 

Muaj ib txhia neeg tej zaug lawv kuj cim civ nug tias, “Yuav ua li cas kuv thiaj yuav cia siab tau rau ib tug neeg twg, tshwj xeeb yog thaum uas kuv pom tias yus muaj lub nra nyhav heev thiab tsis paub yuav ua li cas?” yog tias qhov yuam kev ntawd nyob ntawm qhov uas peb xav tias peb yuav tau pab Vajtswv, tiamsis qhov tseeb tiag Vajtswv ho yog tus npaj txhij yuav pab peb. 

Vajtswv tsis tsim peb los kom ris tej nra nyhav nyhav. Vajtswv tsim peb los kom peb nyob hauv qab tswj hwm ntawm Nws. 

Ntawv Nkauj 68:19 sau, “Cia li qhuas tus TSWV, Nws yog tus uas ris peb lub nra ib hnub dhau ib hnub, Nws yog Vajtswv tus uas cawm peb dim ntag.” 

Twb yog vim li ntawd kuv ntseeg siab rau Vajtswv yog tus ua raws li Nws tej lus cog tseg vim Nws tau nthuav tawm Nws lub hwjchim nyob rau yav dhau los thiab yuav ua li ntawd ntxiv nyob rau yav tom ntej. Qhov yooj yim tshaj kom koj thiab kuv peb tau cawmdim ntawm txhua lub nra nyhav uas tab tom nias rawv peb lub neej txhua hnub yog nthuav qhia meej meej rau Vajtswv paub txog peb tej kev cheem tsum thiab thov kom Vajtswv pab. Tom qab ntawd, cia Vajtswv ua tus npaj txhua yam nyob rau hauv peb lub neej. 

Peb yuav ruam heev thaum uas pheej ris rawv tej nra nyhav thaum uas peb lub zog twb tsi taug lawm thaum ntawd Vajtswv txojlus tau nthuav qhia meej meej: “Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv.” (1 Petus 5:7). 

Nyob rau tej lub sijhawm uas muaj kev txomnyem thiab ntsib teeb meem, Vajtswv yuav nrog peb nyob, thiab thaum uas peb raug ntaus ntog lawm, Nws yuav pab kom peb sawv taus. Ua tib zoo saib cov tub kws mus sib ntaus thaum uas lawv raug yeeb ncuab ntaus ntog lawm. Tus tswv saib xyuas khiav mus tav nkaus thiab pib suav, “ib! ob! Peb! Plaub!” Yog tias tus raug ntog ntawd sawv tsis taus tom qab suav mus txog kaum ces nws yuav raug ua tus swb. Tiamsis cov tub sib ntaus tiag tiag lawm lawv yuav tsis pw twj ywm ntawd cia luag suav. Lawv yuav siv tag nrho lub zog lawv tshuav sawv rov los thiab rov sib ntaus ntxiv. 

Muaj ntau zaug kuv xav tso tseg thaum raug yeeb ncuab ntaus ib rig . Kuv tau cia ntxwsnyoog tej lus dag ntxias nkag rau hauv kuv lub hlwb xav. Tiamsis ua Vajtswv tsaug, kuv kawm tau txoj kev tawm tsam yeeb ncuab dhau ntawm Vajtswv txojlus. Thaum kuv hnov txog yeeb ncuab tej tswv yim tsis zoo, muaj ib lub tua ntawm sab ntsujplig cim civ tua thiab kuv tau xav: “Tos tso ntxwsnyoog, txhob muab qhov nyuag teeb meem ntawd dhau los ua loj dhau heev yuav daws tsis tau”. Kuv hais rau yeebncuab dhau ntawm Vajtswv txojlus tias, “Tiamsis peb cia li ua Vajtswv tsaug, rau qhov Vajtswv twb kom Yexus Khetos tus uas yog peb tus Tswv pab peb kov yeej lawm” (1Kauleethaus 15:57); “Peb tej yeebncuab tsis muaj lus yuav nyhos peb. Peb ntog lawm, tiamsis peb yuav sawv tau rov los dua. Tamsim no peb nyob hauv qhov chaw uas tsaus ntuj nti, tiamsis tus TSWV yuav ua lub teebci rau peb pom kev.” (Mikhas 7:8). 

Ntxwsnyoog tsis muaj cai ntaus kom koj swb vim koj twb muaj yeej nyob rau hauv ntsus tsov rog no lawm.

Thov caw nrog kuv peb thov Vajtswv ua ke: Ua Vajtswv Koj tsaug vim Koj tshua thiab saib xyuas kuv lub neej. Txhua zaug uas kuv tag kev cia siab thiab nyuaj siab, thov qhia rau kom kuv paub khiav los vam khom thiab txais yuav Koj txoj kev pab. Kuv thov hauv Tswv Yexus Khetos lub npe. Amees.

Cov kwv tij txhua tus, yuav muaj tej tus neeg ua rau koj tag kev cia siab. Kuj yuav muaj tej yam ua rau koj tag kev cia siab. Tiamsis Vajtswv yuav tsis muaj ib zaum twg ua rau koj tag kev cia siab. Vajtswv txoj kev pab yuav los yog lub sijhawm, thaum uas koj cheem tsum. Yog li, lwm zaug, thaum uas hnov tag kev cia siab, nco ntsoov tias Vajtswv tab tom nyob ntawm koj ib sab! Cia li khiav los txais yuav Nws txoj kev pab.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.