Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Tus hlub cuav yog tej uas peb tab tom khiav caum qab tiamsis tej ntawd yeej ib txwm tsis muaj qab hau, tsis tsim nyog rau peb txoj kev hlub thiab peb tau muab tso ua ntej hauv lub neej. Tej tus hlub cuav no yeej ua tsis tau rau kom koj txaus siab, tsuas yog Tus Tswv thiaj yog tus uas muab Nws txoj kev hlub ib txhis los hlub koj. 

Hnub no, yog hnub 11/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Sara Freeman dhau ntawm Zaj kawm COV HLUAS NRAUG CUAV

Nws tseem hais tias, Kuv yuav raws kuv cov hluas nraug mus, lawv mam muab zaub mov, dej haus, ntaub plaub yaj, ntaub mag, roj txiv ntoo thiab cawv txiv hmab rau kuv. (Hauxeyas 2:5)

Vajtswv kom Hauxeyas cia li mus yuav Nkaumes, uas yog ib tug poj niam deev hluas nraug, thiab tej zaug tseem yog ib tug niam ntiav nyob rau lub sijhawm ntawd thiab. Qhov no kuj zoo ib yam li ib tug tshaj moo zoo nto moo lug losis ib tug xibhwb muaj koob npe lawv thoob tshab txog lawv yuav yuav ib tug ntxhais ua movies liab qab los ua poj niam! Koj puas yuav ntseeg tau? 

Vajtswv kom tus cev lus ua li ntawd vim Vajtswv xav siv Hauxeyas lub neej los ua piv txwv tham txog txoj kev sib raug zoo ntawm Vajtswv thiab haiv neeg Yixalayees ua ke. Lawv caum raws txhua yam, pe mlom, muab lawv tej menyuam fij rau tej hauv paus ntoo, tej pob zeb tsis muaj sia. 

“Nws tseem hais tias, Kuv yuav raws kuv cov hluas nraug mus, lawv mam muab zaub mov, dej haus, ntaub plaub yaj, ntaub mag, roj txiv ntoo thiab cawv txiv hmab rau kuv.” (Hauxeyas 2:5). 

Kuv xav txog kuv lub neej thiab pom tias muaj ntau zaug kuv tau khiav raws qab tej tus hlub cuav, piv txwv li tau lwm tus lees paub, nyiaj txiag, zaub mov noj, ris tsho hnav, tej kev sib raug zoo, kev mus ua si. Thiab ntau zaug tes haujlwm ua pub rau Vajtswv kuj dhau los ua ib tug cuav lawm thiab. 

“Nws yuav caum nws cov hluas nraug qab tiamsis nws raws tsis cuag lawv. nws yuav mus nrhiav lawv tiamsis nrhiav tsis tau. Ces nws yuav hais tias, “Kuv yuav rov mus nrog kuv thawj tug txiv nyob, yav tas los kuv lub neej yeej zoo tshaj tamsim no lawm ntau.” Nws yuav tsis kam lees hais tias tej nplej, cawv txiv hmab, roj txiv ntoo thiab tagnrho tej nyiaj tej kub uas nws pheej coj mus fij rau Npa-as ntawd yog kuv muab rau nws” (Hauxeyas 2:7-8).

Tsis muaj leej twg nyob rau hauv cov hluas cuav no coj tau txoj kev zoo siab los rau kuv, kev kaj siab lossis kev cia siab. Qhov tseeb tiag, tej ntawd ua rau kuv mob taub hau thiab tseem mob kuv lub siab heev thiab. Nyob rau lub sijhawm ntawd, kuv ho tsis pom tias lawv tsis muaj qab hau thiab tsis muaj nqis zoo li cas. Txawm yog nyob hauv lub siab yeej paub hais tias lawv pab tsis tau tiamsis kuv lub siab yeej ntseeg hais tias lawv yuav pab tau. 

“Yog li ntawd, kuv yuav coj nws mus tso rau tom tiaj suabpuam dua; kuv yuav hais lus mos lus muag rau nws thiaj coj tau nws rov los…Kuv yuav yuav koj ua kuv tus pojniam; kuv yuav ua ncaj thiab muab siab npuab koj; Kuv yuav hlub thiab hmov tshua koj, thiab yuav koj ua Kuv tug mus ibtxhis li.” (Hauxeyas 2:14-19). 

Txawm yog peb tsis hlub Vajtswv los Vajtswv yeej tseem hlub peb heev. Vajtswv xav kom Nws yog peb tib tug hluas nraug xwb. Yog li, tsis txhob cia ib yam dab tsi cuam tshuam rau koj thiab Vajtswv li! Yuav tau paub – tsis yog tsuas nyob saum lub taubhau xwb tiamsis tseem yog nyob hauv lub siab – tias tej uas koj tab tom khiav caum qab tsis tsimnyog npaum li tus neeg tab tom caum koj qab. Tib neeg cov lus qhuas tsis muaj dab tsi. Tej zaub mov noj yeej yuav ua tsis tau rau kom koj txaus siab. Tej khoom siv yeej yog khoom siv xwb. Tej ris tsho hnav thiab tej khoom noj haus tsuas ua rau kom koj siv koj tej nyiaj txiag lawm ntau xwb. Koj tes haujlwm yeej yuav txhawm tsis tau rau koj txoj kev hlub. 

Yog li cia li nres tsis txhob caum cov hluas nkauj lossis hluas nraug cuav ntawd lawm. tej yam uas ua tsis tau rau kom koj zoo kawg nkaus. Cia li tig rov qab los thiab khiav los rau ntawm Vajtswv tus uas muaj kev hlub. Vajtswv tab tom xyab Nws ob sab tes dav tos koj.

Thov caw nrog kuv peb thov Vajtswv ua ke: Tus Tswv, thov Koj zam txim rau kuv vim tau khiav caum tej yam cuav ho tsis khiav caum Koj, yog tus uas tau hlub kuv. Thov rub kom kuv tig rov los rau ntawm Koj thiab nyob hauv Koj txoj kev hlub ib txhis. Kuv thov hauv Tswv Yexus Khetos lub npe. Amees.

Cov kwv tij txhua tus, koj tab tom khiav raws qab yam dabtsi hnub no? Cia li ua tib zoo xav seb tej ntawd puas tsim nyog rau koj txojkev siv zog li ntawd? Vim li cas koj ho tsis sim nres thiab tig rov los rau ntawm Vajtswv, tus uas hlub koj los ntawm txoj kev hlub loj tshaj plaws thiab nrhiav txoj kev txaus siab hauv kev sib raug zoo ua ke nrog Vajtswv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.