Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas tau muaj ib zaug twg ua rau koj tag kev cia siab, tsis xav ua ib yam dabtsi, ua rau koj pom tias twg kev tsi pom qab ua ib yam dabtsi li lawm? Tej zaug uas zoo li ntawd cia li cia Vajtswv txojlus ceeb toom rau koj paub tias Vajtswv txojkev hlub yeej txaus rau koj lawm, thiab txaus rau Vajtswv txhua tus menyuam.  

Hnub no, yog hnub 11/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Andred Hedlund dhau ntawm zaj kawm KEV HLUB TXAUS LAWM

Tiamsis Vajtswv teb kuv hais tias “Kuv pom zoo hlub koj ces txaus lawm. Kuv yuav pub kuv lub hwjchim rau tus uas qaug zog.” Vajtswv hais li no, yog li ntawd qhov uas kuv qaug zog ua rau kuv zoo siab kawg li, rau qhov Yexus Khetos lub hwjchim yuav tsomkwm kuv. (2 Kauleethaus 12:9).

“Kuv yuav tau tawm ntawm thaj chaw no mus,” Kuv tuav rawv kuv tus txiv txhais tes thiab thov nws thaum ntawd yog yav tav su nyob rau hnub rau ntuj sov so  thiab nyob rau lub hli twb yuav tas xyoo. “Koj txiv, wb mus nce saib toj roob hauv pes”. 

Tom qab uas ntau hnub nyob rau hauv tsev, cuag li ua tsis tau ib yam dabtsi thaum uas kuv lub zog tsuag zuj zus los ntawm ntau txoj haujlwm, ntau zaug tseem ua rau kuv tsis xav ntsib leej twg, kuv cim civ nug tias vim li cas yus ho muaj pluaj siab loj ua luaj yuam kom yuav tau ua li ntawd? 

Yog li kuv thiaj muaj ntsis ua xyem xyav thaum pom kuv tus txiv teb, “Tau kawg, koj niam, muab txhua yam tso cia, npaj ib mentsis khoom, hu rau tsev qhua kom tseg chaw, xaiv ib lub roob kom phim thiab mus xwb tiag!” 

Kuv ua xyem xyav tias hauv kuv tus txiv lub siab tshe nws tab tom yws, “yus mas tab tom nkees muaj ntau txoj haujlwm, tsuas xav so nyob hauv tsev xwb los poj niam ho yuam kom mus ua si li ntawd. Poj niam mas pw tas hnub, thiab thaum no ho yuam kom yus nrog nws mus rau ib thaj chaw twg nce toj roob hauv pes tsis muaj homphiaj kev npaj ua ntej, ntseeg tsis tau kiag li!” 

Yog, ntawd yog tej uas kuv xav tias ntshe kuv tus txiv yuav coj li ntawd. Thaum cov lus nyuam qhuav tawm hauv qhov ncauj tuaj kuv lub siab dhia pig poog thiab txhawj li ntawd. 

Kuv paub tias kuv tsis tsimnyog kom tau mus ua si lossis nce toj roob hauv pes li. 

Txawm li ntawd los, ntawd yog tej uas wb twb tau ua lawm. Tsuas poob ob teev tom qab xwb, kuv zaum tom qab, ntawd yog ib feem nyob rau ntawm kuv tus txiv wb txoj kev sib tham ua ke nyob rau txoj kev mus ua si zaum no. Nws pw txaus siab heev nrog rau ib daig pam vov mos muag thiab txawm cia li tsaug zog lawm. 

Ntawm kuv ib sab pob ntsej cua tab tom ntsawj muaj zog heev thiab tus neeg hais xov xwm txog kev sib twv ncaws pob tab tom tham saum radio. Tsis yog, tsis yog kuv xav khiav nkaum kuv tej teeb meem. Kuv tsuas xav kom tau ib mentsis sijhawm los so lam hlwb. Thiab yuav tsis muaj ib yam dabtsi zoo cuag yog tias tau nyob rau ib lub roob twg thiab muaj kev sib raug zoo nrog ib puas tsav yam uas tau tsim muaj? 

Hnub tom qab, kuv kuj ua tib zoo tiamsis kuj zoo siab heev tsav tsheb raws txoj kev nkhaus nyob rau hauv zej zog mus rau ntawm wb thaj chaw nce roob. Tab tom xav nce roob, kuv txiav txim siab yuav nce mus kom txog lub roob ntawd. Thiab wb txawm cia li pib mus…

Ntawm txoj kev taug mus, kuv xav tsis thoob txog tej uas Vajtswv tau tsim muaj. Kuv nyiam tej nplooj ntoo uas tabtom cim civ hloov zam. Kuv tig pob ntsej mloog dej lub suab ntxhia ntws saum roob los ntawm tej pob zeb muaj ntxhuab puv nkaus. 

Tau ib lub sijhawm ntev loo, wb kuj nce mus txog rau saum ncov roob. Wb ob leeg puavleej tsis muaj neeg nqa xov tooj lossis coj teev txoob. Thiab thaum no sijhawm tsis tseem ceeb rau wb lawm. Wb ntsia saib ib puas tsav yam uas zoo nkauj heev ntawd ua ntej uas wb yuav mus ko taw tawm ntawm txoj kev av thiab yuav tsau ko taw rau hauv tus dej ntws laj ntsiag uas nyob ze ntawd. 

Thaum kawg, Vajtswv txojlus kuj los txog rau hauv kuv lub siab. Kuv pom kuv zoo li Yausuas, mus mus los los tom roob moj sab qhua tau 40 xyoo tsis muaj homphiaj. Kuv pom kuv twb siv tag nrho zog los nrhiav Vajtswv. Muaj ntau hmo kuv mus cuag Vajtswv ntawm lub kua muag nyob ntawm kuv chav chaw txais tos qhua, tag siab ntsws taij thov. Kuv suav tau tias twb muaj pes tsawg zaus kuv ua tsis tiav lawm. Tiamsis tej ntawd tsis yog tej uas Vajtswv hais rau kuv. 

“ Andrea, Kuv txoj kev hlub yeej txaus rau koj lawm”. 

Thaum kawg kuv kuj nkag siab. Kuv txoj kev sib raug zoo muaj nqis nrog Vajtswv tsis nyob rau ntawm qhov uas kuv ua tsis tiav zoo txhua yam, thiab kuj tsis yog ntau txoj haujlwm uas kuv ua rau tus Tswv tag kev cia siab thiab ntau yam ntxiv. 

“Rau qhov txhua tus puavleej ua txhaum thiab tu ncua Vajtswv lub tshwjchim lawm.” (Loos 3:23). 

Tiamsis ntawd yog qhov zoo nkauj ntawm txoj kev hlub. Txawm yog peb muaj tej kev qaug zog, muaj yam tsis zoo los peb dhau los zoo kawg nkaus nyob rau hauv Tswv Yexus. Yog Yexus Khetos ib tug thwjtim. Peb muaj cuab kav txais Vajtswv txojkev pab lub sijhawm twg los twb tau. Vajtswv txoj kev hlub yeej muaj txaus rau peb lawm. 

Tiamsis Vajtswv teb kuv hais tias “Kuv pom zoo hlub koj ces txaus lawm. Kuv yuav pub kuv lub hwjchim rau tus uas qaug zog.” Vajtswv hais li no, yog li ntawd qhov uas kuv qaug zog ua rau kuv zoo siab kawg li, rau qhov Yexus Khetos lub hwjchim yuav tsomkwm kuv.” (2 Kauleethaus 12:9). 

Thov caw nrog kuv peb thov Vajtswv ua ke: Ua Vajtswv Koj tsaug vim Koj txoj kev hlub yeej txaus rau kuv lawm txawm yog kuv paub tias kuv yeej tsis tsimnyog. Thov kom Koj txoj kev hlub cawm kuv dim, rub kuv sawv txhua zaug kuv ntog. Kuv thov hauv Tswv Yexus Khetos lub npe. Amees.

Cov kwv tij txhua tus, muaj ntau zaug lub neej yuav ua rau koj qaug zog zis, tws kev tsis paub yuav ua dab tsi, cia li nrhiav ib thaj chaw twg los nyob twj ywm thiab saib Vajtswv txojkev hlub uas tau tseg rau koj dhau ib puas tsav yam uas Vajtswv tsim los, dhau ntawm txoj kev cawm dim, dhau ntawm koj ncua kev ntseeg kom koj pom tias Vajtswv txoj kev hlub yeej txaus rau koj lawm.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.