Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Nyob rau lub caij muaj kev txomnyem, tsis paub yuav ua li cas, cov tib neeg muaj kev ntseeg lawv tau xaiv pehawm Vajtswv, tsa suab hu nkauj qhuas Nws thiab lawv tau saj tau Vajtswv tshwm ntsej tshwm muag nrog lawv nyob ua ke rau thaum ntawd. 

Hnub no, yog hnub 12/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Charles W Page dhau ntawm Zaj kawm TIMTSWV LUB SUAB NKAUJ

Yog li ntawd, peb cia li ua siab tawv qhawv mus cuag Vajtswv tus uas nyob saum lub zwm txwv, rau qhov Nws yog tus uas hlub peb. Nws yuav pab peb thiab foom koob hmoov rau txhua tus uas thov Nws. (Henplais 4:16)

Thaum kuv nug Jim txog nws tus mob (ung thư) nws txawm cia li muaj ib lub suab luag kaj siab lug tshwm ntawm nws ntsej muag “Txog rau lub sijhawm no txhua yam yeej tseem zoo. Tsis mob ntxiv. Kws tshuaj tias tus mob (ung thư) nyob rau ntawm kuv tus nplaig twb tsis pom lawm”. 

“Kuv tsis tau muaj ib zaum twg pom Vajtswv tshwm ntsej tshwm muag tshwj xeeb li thaum uas kuv pw saum lub txaj kho mob”. 

Nws cev tes mus khawb taub hau plhws pob ntseg. “Kuv yog ib tug neeg uas muaj kev ntshai thaum nyob ib leeg ntsiag to yog li kuv txhawj heev thaum raug kom nyob twj ywm. Thaum koj nyob txhab tshuaj, lawv yuav muab koj khi ruaj ruaj rau ntawm lub txaj”. 

Jim ntsia ntsoov kuv thiab cuag li txhua yam uas nyob yav dhau los rov ciaj sia tuaj. “Lawv muab kuv khi ruaj ruaj rau ntawm chaw, muab ib daim plhu cuav coj los npog kuv ob lub qhov muag thiab khi kuv rau ntawm txaj. Cov ua haujlwm lawv tawm mus thiab kaw qhov rooj rau. Kuv nyob kuv ib leeg, nti tsis taus, hnov zoo li ib tug neeg txhaum raug kaw hauv tsev rau txim. Kuv hnov ib lub suab nrov qev, tom qab ntawd yog ib lub suab tso ntawm cov pas hlau, nyuaj siab ntsuav. Ces thaum ntawd kuv paub tias txog lub sijhawm txhab tshuaj pib lawm”. 

Jim tuav nws poj niam tes ruaj ruaj thiab tom qab ntawd rov hais ntxiv. “Kuv twb tiv dhau lawm vim kuv tus poj niam tau coj raws tej zaj nkauj hu qhuas Vajtswv thiab pehawm Nws. Los ntawm tej suab nkauj pehawm tab tom nrov saum xov tooj, tag nrho tej uas kuv yuav ua tau yog thov Vajtswv thiab tsau tsawv rau hauv tej suab nkauj. Thaum kuv ua li ntawd, yam uas txawv tshaj plaws tau tshwm sim tuaj”. 

So cov kua muag ntawm plhu, Jim hais tias: “Kuv hnov lub suab nkauj nrov zoo tshaj plaws tau nrov kiag ntawm kuv ib sab. Kuv ntsia tsis pom tus neeg tab tom hu nkauj rau qhov kuv looj lub ntsej muag cuav lawm, tiamsis kuv hnov cuag li yog ib tug timtswv uas Vajtswv txib los zov kuv”. 

Muaj ntau zaug peb kuj hnov zoo li Jim, peb raug lub sijhawm muab khi cia. Tej kev mob ntawm sab nqaij tawv, nyiaj txiag tsis txaus siv thiab tej kev sib raug zoo muaj teeb meem tau muab peb kaw rau ib ceg kaum twg. Lub hlwb qaug zog zis qhia rau peb tus kheej paub tias peb ua tsis tau lawm, nyob ib leeg thiab raug hnov qab lawm. Kev ua xyem xyav npog peb txoj kev xav. Peb cim civ nug tsis paub hais tias xyov Vajtswv thiab lwm tus lawv puas yuav quav ntsej txog peb. 

Thaum peb ntsib dhau tej no, peb yuav kawm raws li Jim tus qauv. Yawg tsis cia nws tus kheej ua qhev rau lub caijnyoog. Jim tau ua ib yam uas nws tus kheej yuav ua tau ntawd yog – txhawm rau txoj kev ntseeg. Yawg thov Vajtswv, pehawm thiab taij thov Vajtswv txoj kev hlub. Thaum ntawd, Vajtswv kev tshwm ntsej tshwm muag cia li pom meej meej. Yawg hnov cov timtswv tab tom hu nkauj qhuas Vajtswv  los ntawm tej suab nkauj hu muaj yeej nrov tshab plaws tej suab nyuaj siab thaum raug txhab tshuaj. 

Thaum kev txomnyem muab peb khi cia, peb muaj cuab kav qhuas Vajtswv. Peb kuj yuav nthuav tau lub siab ncaj ncees txoj kev hlub thiab Vajtswv lub hwjchim. Peb kuj cim civ ntuas tus kheej txog txoj kev uas Vajtswv tswj txhua yam nyob hauv peb lub neej, txoj hau kev uas Vajtswv foom koob hmoov rau peb tej kev cheem tsum thiab Vajtswv txoj kev hlub uas yuav tsis muaj hnub tso peb tseg. 

Jim tau kawm tau txoj kev cia Vajtswv tshwm ntsej tshwm muaj rau lub caijnyoog ntawd. Yam uas Jim yuav ua tau yog,yog siv nws qhov cuab yeej muab zais cia twj ywm rau thaum uas raug khi rau saum lub txaj. Ntawd yog lub siab pehawm Vajtswv. 

Nyob hauv Vajluskub, peb nyeem txog qhov uas Paulus thiab Xilas nkawd raug kaw rau hauv tsev rau txim nyob tim Filipis. Thaum nkawd hu nkauj qhuas Vajtswv, Vajtswv tau tso nkawd dim ntawm tej saw hlau. Tiamsis tsis yog tias thaum twg Vajtswv twb yuav cawm kom peb dim ntawm tej xwm txheej. Ntau zaug Vajtswv yuav coj peb mus dhau tej teeb meem ntawd. 

Nyob rau lwm zaj xwm txheej, peb tug tub hluas neeg Henplais yog Hananiyas, Misayees thiab Axaliyas raug muab hlua khi thiab pov rau hauv ib lub qhov cub tab tom cig loj heev. Lawv qhuas Vajtswv pauv qhov uas nyho taub hau pemlom. Nyob hauv cov nplaim hluav taws ntawd, Vajtswv tau tshwm los. Vajtswv tau tiv thaiv lawv txojsia thiab tso lawv dim ntawm tej saw hlau tab tom khi. Dhau ntawm tej kev sim siab, Vajtswv tau hloov pauv lawv. 

Cov lus taij thov thiab cov lus qhuas Vajtswv tau pab Paulus thiab Xilas nkawd nyob rau hauv tsev rau txim, pab peb tug tub hluas neeg Henplais dim hluav taws, thiab pab Jim, kuv tus phooj ywg nyob rau hauv tsev txhab tshuaj. Xij peem peb yuav hnov raug  khi zoo li cas los, nco ntsoov tias peb yuav tsis raug peb lub sijhawm khi tau peb cia. Peb cia li ua raws li Vajtswv tejlus cog tseg, mus rau ntawm Vajtswv lub zwm txwv. Peb muaj cuabkav thov Vajtswv thiab pehawm Nws thiab caw tus uas nyob nruab nrab ntawm Nws haiv neeg txoj kev qhuas nkag los rau peb lub sijhawm. 

“Yog li ntawd, peb cia li ua siab tawv qhawv mus cuag Vajtswv tus uas nyob saum lub zwm txwv, rau qhov Nws yog tus uas hlub peb. Nws yuav pab peb thiab foom koob hmoov rau txhua tus uas thov Nws.”  (Henplais 4:16).

Thov caw nrog kuv peb thov Vajtswv ua ke: Ua Vajtswv Koj tsaug vim Koj niaj hnub nrog kuv nyob txhua lub sijhawm. Ua ntej ntawm tej teeb meem hauv lub neej, thov Vajtswv koj pub txoj kev kaj siab thiab cawm kom kuv dim los ntawm Koj txoj kev tshwm ntsej tshwm muag zoo kawg nkaus. Kuv thov hauv Tswv Yexus Khetos lub npe. Amees.

Cov kwv tij txhua tus, koj tab tom ntsib tej teeb meem zoo li cas?  Txawm yog ntawd yog tej xwm nyob hauv kev siv nyiaj txiag, hauv kev sib raug zoo lossis kab mob nkeeg, kav tsij muab siab rau ntseeg Vajtswv. Txais yuav tej teeb meem ntawd dhau ntawm tej suab nkauj, lus qhuas, thiab lub siab pehawm Vajtswv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.