Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Muaj tej lub pob zeb loj uas Vajtswv tso nyob rau hauv peb lub neej, thiab txawm yog peb siv zog taij thov kom Vajtswv tshem mus los tej zaug nws yeej nyob rawv rau qhov ntawd hnub dhau hnub hmo dhau hmo. Peb xav tias lub pob zeb ntawd yog tej pob zeb tav kev, tiamsis tseeb tiag ntawd ho yog tej cuab yeej Vajtswv siv los cob qhia peb kom peb dhau los ua neeg muaj nqis pub rau Vajtswv lub tebchaws. 

Hnub no, yog hnub 14/09/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Andy Hollifield dhau ntawm Zaj kawm SIV ZOG TSOO KOJ TEJ LUB POB ZEB.

“Kuv pom zoo hlub koj ces txaus lawm. Kuv yuav pub kuv lub hwjchim rau tus uas qaug zog” (2 Kauleethaus 12:9). 

“Mikey, koj yuav tsis muaj ib zaum twg tshem tau lub pob zeb ntawd os, nws loj dhau heev lawm na!” Txawm yog tsis txhawb zog pes tsawg los, Mikey nws yeej tsis ua cas thaum uas hnov nws tej phooj ywg hais li ntawd. Txij li thaum nws muaj peb xyoo thiab hloov chaw nyob, Mikey ntxub lub pob zeb ntawd, thiab nws xav kom nws txiv muab tshem mus kom zam chaw rau lub viav vias. Txiv hais rau nws tias yog koj tshem tau, yawg yuav yuav kiag ib lub siav viav vias (xích đu) rau nws kiag tamsim. 

Thaum Mikey nyuam qhuav muaj rau xyoo, hnub twg los nws yeej siv zog tshem lub pob zeb ntawd. Ntau zaug Mikey tsuas sim ob peb zaug thaum uas tawm mus nraum zoov ua si. Kuj muaj tej hnub Mikey siv zog tsheej li ob peb sij. Thawj zaug, nws pib los ntawm lub rauj me me nyob rau hauv nws cov khoom ua si. Tsis tau haujlwm, nws thiaj muab txiv lub rauj tiag los tsoo. Yeej tseem tsis tau lo thiab, nws muab nws cov nyiaj uas nws tseg tau cia mus yuav tau ib lub rauj nyhav dua li 1 kg. Mikey txiav txim siab loj heev. Muaj ib txhia neeg hu nws tias yog neeg tawv ncauj. Tiamsis nws yuav tsis muaj ib zaum twg tso tseg yuav tsis muab lub pob zeb ntawd tshem. 

Thaum nkag rau lub sijhawm tiav hluas zuj zus, Mikey pib lees yuav qhov tseeb tias lub pob zeb ntawd tshe yuav nyob ntawd mus ib txhis. Txawm li los nws yeej tsis tso tseg. Thaum Mikey muaj 14 xyoo nws yuav ib lub rauj nyhav li 4 kg. Thaum uas nws tau los mus koom rau pawg ntaus pob vim nws muaj lub cev loj thiab muaj zog, nws txiav txim siab tias lub pob zeb no yuav muaj nqis rau nws txoj kev xyaum dhia. Txhua hnub, Mikey siv ib teev los nce mus rau saum lub pob zeb thiab muab rauj los tsoo 30 teg. Tom qab ntawd nws nqes los rau hauv pem teb rov qab muab ntaus 30 zaug thiab. Thaum no Mikey hnov qab lub viav vias ntev los lawm. 

Xyoo kawg hauv tsev kawm ntawv, Mikey txais tau ib txoj kev pab kawm ntawv tsis raug them nyiaj. Nws yuav tau mus kawm nyob rau hauv ib lub tsev kawm ntawv qib siab nto npe lug nyob rau sab qab teb. Nyob rau pluas hmo hnub ntawd, Mikey nug txiv tias: “Txiv, puas muaj ib zaug twg koj muab lub pob zeb ntawd tshem mus li?” 

Nws txiv teb: “Vim li cas txiv thiaj yuav ua li ntawd? Cia li saib tej uas lub pob zeb no tau ua rau koj!” 

“Txiv koj hais li ko yog li cas maj?” Mikey nug. 

Nws txiv ua ntsej muag luag ntxhi thiab hais: “Mikey, txij li thaum koj muaj rau xyoo los, koj twb siv zog tshem lub pob zeb ntawd. Koj siv zog ua txoj haujlwm ntawd txhua hnub. Ntau zaug koj twb ua lov ob peb lub rauj lawm. Lub pob zeb no yeej tshem tsis tau mus li. Txiv yeej ua tsis tau. Twb yog vim lub pob zeb ntawd tau ua rau koj muaj zog. Txawm yog koj ntxub nws los, nws yeej yog qhov uas pab rau kom koj dhau los muaj hnub no. Yog tsis muaj lub pob zeb koj yuav siv sijhawm los tua game ua si. Tiamsis thaum no koj yuav tau ua raws li koj txoj kev npau suav yog tau ntaus pob nyob rau hauv tsev kawm ntawv qib siab. Twb yog vim txoj kev siv zog txiav txim siab thiab lub zog nrog txoj kev ruaj siab ntawd tau pab rau koj txais tau tej ntawd. Lub pob zeb uas koj ntxub tau dhau los ua tej ntawd rau koj, thiab tseem ua tau ntau tshaj tej uas txiv ua tau. Txiv txaus siab rau koj, txiv tus tub”. 

Ntau zaug, tej pob zeb tav kev loj tshaj ho dhau los ua cuab yeej qhuab ntuas peb kom dhau los zoo li tus neeg uas Vajtswv xav kom peb ua. Tej kev sim siab yuav ua rau peb muaj lub siab hlub tshua rau cov neeg uas ntsib ib yam li peb. Tej kev tab kaum ua rau peb xav ua rau kom lwm tus txoj kev mob ntawd mob tsawg zog. Tej kev txomnyem pab rau peb paub txhawb lwm tus lub zog thaum uas lawv tab tom tawm tsam. Tej yam uas peb ntxub thiab xav tias yus yuav tiv tsis taus ho yog tej uas yuav tsim muaj peb tus neeg no. 

Cia li siv zog muab “tej pob zeb ntawd tsoo kom tawg” hauv koj lub neej. Thov kom koj muaj ib hnub tau txais koob hmoov zoo nyob rau hauv Vajtswv!

Thov caw nrog kuv peb thov Vajtswv ua ke

Kuv ua Vajtswv Koj tsaug vim tej pob zeb uas Koj tau muab tso rau hauv kuv lub neej. Ntau zaug kuv khuab xeeb vim li cas Vajtswv tsis tshem peb mus, tiamsis thaum tig saib rov tom qab, kuv thiaj pom tias los ntawm tej phab ntsa thaiv kev ntawd kuv thiaj loj hlob nyob rau hauv koj txhua hnub, thiab dhau los muaj nqis rau txhua tus. Kuv thov hauv Tswv Yexus Khetos lub npe. Amees.

Cov kwv tij txhua tus, puas muaj tej pob zeb twg koj xav muab tshem tawm nyob rau hauv koj lub neej? Tig rov saib seb koj puas tau loj hlob thiab muaj zog tshaj qub dhau ntawm tej pob zeb tav kev ntawd. Kom dhau ntawm tej ntawd, koj thiaj yuav coj tau tej uas koj ntsib dhau ntawd mus txhawb zog, thiab pab lwm tus kom lawv tiv dhau tej pob zeb thaiv hauv lawv lub neej thiab koom dhau los ua cov neeg muaj nqis pub rau Vajtswv lub tsev.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.