Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Thaum uas raug tus neeg uas yus hlub heev ua rau muaj kev tu siab, tshwj xeeb yog thaum uas pom lawv tsis muaj kev ncaj ncees rau Vajtswv, tej zaug peb yuav hnov tag kev cia siab, qaug zog thiab kua muag poob nthav. Txawm yog tej kev nyuaj siab ntawd yog tej uas muaj tiag thiab tsim nyog saib kom muaj nqis, tiamsis nco ntsoov tias Vajtswv lub homphiaj yeej yuav ua kom tiav, txawm yog tib neeg yuav xaiv li cas. Peb feem haujlwm yog sawv tsees thiab txhais ruam mus ntxiv hauv Vajtswv lub homphiaj.
Hnub no, yog hnub 17/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Wally Odum dhau ntawm zaj kawm TSEEM YUAV NYUAJ SIAB MUS TXOG THAUM TWG?
Tus TSWV hais rau Xamuyees hais tias, “Koj tseem yuav nyuaj siab rau Xa-ules mus txog thaum twg thiab? Kuv twb tsis pub nws ua vajntxwv kav cov Yixalayees lawm. Koj cia li nqa ib hwj roj mus rau nram lub nroog Npelehees, thiab mus cuag ib tug txivneej uas hu ua Yexais, rau qhov Kuv twb xaiv nws cov tub ib tug ua vajntxwv kav cov Yixalayees lawm. (1 Xamuyees 16:1)
Leej twg los twb xav kom txhua yam tshwm sim mus tau zoo raws li tej uas twb npaj tseg thiab tsis xav kom muaj tej qhov xwm txheej nyuaj twg txeem tau los rau hauv. Tiamsis lub neej tsis yog tias thaum twg twb yuav tau zoo li ntawd. Yuav muaj ib zaug twg muaj tej yam kev tab kaum los thaiv peb txhua txoj hau kev uas peb tab tom taug. Yog peb tsis nqig teg ua ib yam dab tsi ces tej teeb meem ntawd yuav tav peb txoj hau kev thiab ua rau kom peb nres twj ywm.
Xamuyees yog ib tug cev lus muaj koob nto npe nyob hauv Vajluskub Qub, yog tus uas tau ywg roj rau Xa-ules ua cov neeg Yixalayees thawj tug vajntxwv. Thaum Xa-ules coj tsis ncaj, Vajtswv tau xaiv Daviv, uas yog Yexais tus tub los hloov chaw. Qhov teeb meem no ua rau Xamuyees qaug zog. Yawg hlub Xa-ules thiab suav tias tus neeg no yog Vajtswv lo lus teb rau cov neeg Yixalayees lub neej tom ntej. Thaum Xa-ules ua tsis tiav, Xamuyees twb tsis ua ib yam dabtsi mus txog rau thaum Vajtswv hais rau nws. Tej uas Vajtswv hais yog ib zaj kawm tseg rau peb txhua tus, tej tus neeg uas twb raug lwm tus ua rau muaj kev tu siab.
“Tus TSWV hais rau Xamuyees hais tias, “Koj tseem yuav nyuaj siab rau Xa-ules mus txog thaum twg thiab? Kuv twb tsis pub nws ua vajntxwv kav cov Yixalayees lawm. Koj cia li nqa ib hwj roj mus rau nram lub nroog Npelehees, thiab mus cuag ib tug txivneej uas hu ua Yexais, rau qhov Kuv twb xaiv nws cov tub ib tug ua vajntxwv kav cov Yixalayees lawm.” (1 Xamuyees 16:1).
“Koj tseem yuav nyuaj siab mus txog thaum twg?” – lo lus hais no tsis muaj lub siab xav hais tias kom peb tsis txhob nthuav qhia peb lub siab tawm. Tiamsis muaj lub ntsiab tias Vajtswv tsis xav kom peb pw twj ywj ntawd nyuaj siab tsis paub nres li. Yog tias Xamuyees tsis hlub tshua txog Xa-ules ces yawg yuav tsis mob siab tag npaum no.
Tseeb tiag puag thaum nyuam qhuav pib, Xa-ules yog ib tug neeg txo hwjchim. Peb paub tau tej no dhau ntawm Xamuyees tej lus hais rau Xa-ules.
“Xamuyees teb hais tias, “Txawm yog koj xav hais tias, koj tsis tseem ceeb dabtsi li los koj yog cov Yixalayees tus thawj coj. Tus TSWV twb muab roj hliv rau koj taubhau thiab tsa koj ua vajntxwv kav cov Yixalayees,” (1 Xamuyees 15:17).
Mob siab heev thaum uas peb raug cov neeg uas peb hlub ntawd ua rau peb muaj kev tu siab. Txoj kev hlub uas Xamuyees tseg rau Xa-ules tau ua rau peb pom dhau ntawm nws txoj kev nyuaj siab. Raws li tej uas Vajtswv hais, peb nkag siab tias thaum ntawd Xamuyees xav tsis thoob li, thiab qaug zog zis rau tej uas tab tom tshwm sim rau Xa-ules.
Yam uas Vajtswv xav kom Xamuyees thiab peb niaj hnub nim no yuav tau paub yog Vajtswv lub homphiaj yeej yuav tsum tau ua tiav kom txog thaum kawg txawm yog leej twg yog tus xaiv, txiav txim siab ua yuam kev. Tej uas Vajtswv tau hais rau Xamuyees, Nws kuj hais rau peb txhua tus, “Cia li sawv, so kua muag thiab mus”.
Xibhwb George Campbell Morgan tej uas peb ua nyob rau thaum lub sijhawm muaj teeb meem nyob txij ntawm qhov uas peb puas ntsia pom Vajtswv tus duab ci, lossis ntsia pom Vajtswv nyob rau hauv tus duab tsaus ntuj ntawm tej kev txomnyem. Txawm yog peb yuav ntsib dhau tej kev tu siab twg los Vajtswv yeej yog Vajtswv thiab Nws yeej tseem ua rau kom peb muaj yeej.
Qhov uas peb raug tej yam dhau los khi cia tej zaug yuav ua rau peb xav tsis txog yus lub neej tom ntej. Thaum uas lub sijhawm cuag li xav txeeb peb txoj kev loj hlob, ua rau peb qaug zog, tag kev cia siab rau lub neej tom ntej uas tau Vajtswv npaj ua ntej, qhov tseem ceeb yog peb yuav tau siv zog mus rau tom hauv ntej.
Puas muaj leej twg nyob rau hauv peb cov no tsis tau ntsib dhau txoj kev tu siab? Kuv xav tias ntshe yuav tsis muaj. Yog tias tsis tau poob kua muag rau tej kev tu siab uas peb ntsib dhau ces ntawd thiaj yog teeb meem loj. Tiamsis tsis yog tias peb pheej nres cia rau ntawm tej kev tu siab thiab los kua muag ntawd.
Cuag li tej lus no tsis zoo mloog, tshwj xeeb yog nyob rau ntawm tug uas tab tom muaj kev tu siab, tiamsis Vajtswv txojlus hnub no hais rau peb, “Koj tseem yuav nyuaj siab mus txog thaum twg… cia li sawv tsees thiab taug kev mus”. Txhob cia txoj kev tu siab hauv lub neej yav dhau los lossis tamsim no tuav peb cia. Vajtswv muaj dua ib lub homphiaj zoo tseg rau tagkis thiab Nws xav kom peb koom tes rau lub homphiaj ntawd.
Thov caw nrog kuv peb thov Vajtswv ua ke: Tus Tswv, Koj paub tej kev tu siab uas peb ntsib dhau loj npaum li cas. Thov Koj ntxiv zog, pab kom peb sawv taus thiab mus ntxiv lawv li Koj lub homphiaj zoo uas Koj tau npaj tseg rau peb txhua tus. Kuv thov hauv Tswv Yexus Khetos lub npe. Amees.
Cov kwv tij txhua tus, txawm yog koj tab tomntsib tej kev tu siab loj npaum li cas, raug tus neeg uas koj ntseeg siab ntawd ntxeev siab, khiav deb ntawm koj, txawm li los thov kom paub tias Vajtswv lub homphiaj uas tseg rau koj zoo dua, loj dua, tseem ceeb dua ntau npaug li tej kev tu siab koj tau ntsib yav dhau los thiab tamsim no. kav tsij quaj rau koj tej kev tu siab tiamsis tej zaug kuj txog lub caij yuav tau sawv thiab rov qab ua Vajtswv tej haujlwm. Vajtswv tab tos kom koj nqes tes rau txoj haujlwm kiag hnub no.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
CHƯƠNG TRÌNH RADIO
- Tĩnh Nguyện Hằng Ngày
- Đọc sách cùng bạn
- Chỉ bởi đức tin
- Lời sống hằng ngày
- Chúc bé ngủ ngon
- Truyện kể cuối tuần
- Cảm nhận âm nhạc
- Sắc màu thánh nhạc
- Sống khỏe mỗi ngày
- Niềm Tin Và Cuộc Sống
- Bài Hát Yêu Thích
- Bài Hát Theo Yêu Cầu
- Tư Vấn 247
- Câu Chuyện Phúc Âm
- Giới Thiệu Album
- Top Christian Songs
- Sau Giờ Làm
- Cuộc sống Mến Yêu
- Lời yêu thương
- Tĩnh Nguyện Mùa Thi
- Sống Theo Đúng Mục Đích
- Tĩnh Nguyện Hằng Ngày (Tiếng Hoa)
- Tĩnh Nguyện Hằng Ngày (Tiếng H’Mông)
- Tĩnh Nguyện Hằng Ngày (Tiếng K'Ho)
- Tĩnh Nguyện Hằng Ngày (Tiếng Jarai)
- Tĩnh Nguyện Hằng Ngày (Tiếng Bahnar)
RADIO MỚI NHẤT
Tĩnh Nguyện Hằng Ngày
Tĩnh Nguyện Hằng Ngày
Tĩnh Nguyện Hằng Ngày
Tĩnh Nguyện Hằng Ngày
bình luận