Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Yog Vajtswv ib tug menyuam peb tau hu kom dhau los ua ib tug tub rog txawj nyob hauv Vajtswv pab tub rog. Peb yog Vajtswv tug thiab yog tus pab kom peb txais tau txoj kev muaj yeej nyob hauv txhua ntsus kev tsov rog hauv lub neej. Yam tseem ceeb uas peb yuav tau ua yog yuav tau npaj kom txhij Vajtswv tej cuab yeej los tawm mus ua rog rau txhua lub tshav rog.

Hnub no, yog hnub 18/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm Zaj kawm HNAV VAJTSWV TEJ CUAB YEEJ

“Thaum kawg no kuv qhia rau nej hais tias nej yuav tsum nrog tus Tswv sib raug zoo, nej thiaj li yuav muaj zog thiab tau nws lub hwjchim uas loj kawg nkaus. Nej yuav tsum muab tej cuabyeej uas Vajtswv pub rau nej lawm los hnav. Yog nej ua li ntawd thaum dab Ntxwgnyoog tuaj ntxias nej, nej thiaj yuav kovyeej.” (Efexaus 6:10-11).

Cov ntseeg Vajtswv tab tom ntsib ntsus kev tsov rog loj heev ntawm sab ntsujplig nyob hauv lub neej yog li peb yuav tau hnav tej cuab yeej ntawm sab ntsujplig. Koj puas tseem nco zaj nkauj muaj lub npe tias “Yexus cov tub rog” muaj tej ntsiab lus zoo kawg nkaus: “Yexus cov tub rog mus rau tom ntej! Tsa tes mus ua rog, Tswv Yexus tus chij yog ntoo khaublig, yoj coj kev ua rog ntawm pab tub rog dawbhuv, saib, peb tus thawj tub rog yog Yexus Khetos, pab peb muaj lub siab tawv mus rau tom ntej; txiav txim siab saib ntsoov daim chij, txiav txim siab mus rau tom tshav rog! Kav tsij mus Yexus cov tub rog! Mus zoo li yog thawj pab, tus chij yuav tsa siab, txiav txim mus ua ntej.”

Txij li thaum ntseeg Tswv Yexus ces peb yog Vajtswv pab tub rog. Vim qhov no, dab ntxwgnyoog thiaj nrhiav kev tawm tsam peb thiab ua rau kom peb khiav deb Vajtswv. Tsis tas li ntawd thaum peb paub tias peb yog Vajtswv tug thiab Vajtswv yog tus pab peb kom kov yeej ces qhov tseem ceeb uas peb yuav tsum ua yog yuav tau npaj kom txhij Vajtswv tej cuab yeej.

Yog li qhov twg thiaj yog Vajtswv tej cuab yeej? Peb koom saib Vajtswv txojlus ua ke tau sau nyob hauv Efexaus 6:10-20:

“Thaum kawg no kuv qhia rau nej hais tias nej yuav tsum nrog tus Tswv sib raug zoo, nej thiaj li yuav muaj zog thiab tau nws lub hwjchim uas loj kawg nkaus. Nej yuav tsum muab tej cuabyeej uas Vajtswv pub rau nej lawm los hnav. Yog nej ua li ntawd thaum dab Ntxwgnyoog tuaj ntxias nej, nej thiaj yuav kovyeej. Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj , tej uas muaj hwjchim loj thiab tej uas muaj hwjchim kav tiam tsaus ntuj. Yog li ntawd, nimno nej yuav tsum muab Vajtswv tej cuabyeej los hnav. Yog nej ua li ntawd thaum dab Ntxwgnyoog los tawmtsam nej, nej thiaj kovyeej. Thiab thaum tej kev tawmtsam ntawd dhau lawm, nej thiaj tseem nyob ruaj nrees. Yog li ntawd nej yuav tsum npaj tos. Cia li muab Txojlus tseeb los ua siv sia, muab kev ncaj ncees los ua daim hlau thaiv hauvsiab. Thiab nej yuav tsum muaj lub siab kub lug mus qhia Txojmoo Zoo uas hais txog txojkev kaj siab los ua khau rau. Nej yuav tsum niaj hnub tuav txojkev ntseeg thaiv nej ib yam li nej tuav daim hlau thaiv hniav ntaj. Yog nej ua li ntawd, nej yuav tua tau dab Ntxwgnyoog xibxub hluavtaws uas nws tua tuaj. Cia li muab txojkev dim txim uas Vajtswv pub rau nej lawm coj los ua kausmom hlau ntoo. Thiab muab Vajtswv Txojlus uas Vajtswv tus Ntsujplig pub rau nej coj los ua rab ntaj. Ib puas tsav yam uas nej ua no, nej yuav tsum thov Vajtswv pab. Nej yuav tsum thov Vajtswv txhua lub sijhawm raws li Vajtswv tus Ntsujplig coj nej. Vim li ntawd nej yuav tsum ceevfaj thiab ua siab ntev thov Vajtswv tsis txhob nkees. Thiab niaj hnub thov Vajtswv pab cov ntseeg sawvdaws. Thiab nej thov Vajtswv pab kuv, kom thaum kuv qhia Vajtswv txojlus, kuv muaj lub siab tawv qhia Txojmoo Zoo lub ntsiab Ius rau sawvdaws paub. Txawm yog nimno kuv raug kaw rau hauv tsev lojcuj los kuv yeej yog ib tug xeebcom, vim kuv tseem qhia txojmoo zoo. Yog li ntawd, thov nej thov Vajtswv pab kom kuv muaj lub siab tawv qhia Txojmoo Zoo uas kuv yuav tsum qhia.”

Peb yuav tau thov Vajtswv pab kom peb muaj txhij txhua Vajtswv tej cuab yeej txhua hnub. Thaum ua li no peb thiaj yuav npaj txhij los tawm tsam yeej tej kev sim siab uas tshwm tuaj.

Ua ntej peb yuav tau sia siv uas yog qhov tseeb, hnav lub tsho thaiv uas yog kev ncaj ncees. Txuas ntxiv rau nkawm khau uas yog Txojmoo Zoo, siv kev ntseeg los ua daim thaiv hauv siab tua kom dab ntxwgnyoog tej sib xub tuag. Peb ntoo lub mom uas yog txoj kev cawmdim thiab tuav Vaj Ntsujplig tus ntaj, yog Vajtswv txojlus kom ua rau peb tus ntsujplig tshiab txhua hnub. Yog peb paub tseeb Vajtswv tejlus ces peb thiaj yuav kov yeej txhua lub caijnyoog uas yuav ua rau peb qaug.

Peb yuav tau npaj kom txhij rau nkawm khau uas yog Txojmoo Zoo kom thiaj yuav tawm tsam yeej yeebncuab yog dab ntxwgnyoog. Txhua hnub dhau mus peb yuav tsum tau tab pov tias yus yuav tau npaj kom txhij Vajtswv tej cuab yeej. Ntawm no yog tib txoj kev pab kom peb tiv dhau yeebncuab lub tswv yim. Vajtswv yog peb lub zog thiab Vajtswv nrog nraim peb nyob pab kom peb kov yeej txhua yam.

Thov caw nrog kuv peb thov Vajtswv ua ke
Ua Vajtswv tsaug vim koj yog tus pub lub zog rau kuv kom kuv tawm tsam thiab kov yeej dabntxwg nyoog txoj kev tawmtsam. Thov Vajtswv pab kom kuv npaj txhij koj tej cuab yeej txhua hnub npaj txhij los tawm tsam tej kev sim siab tshwm tuaj. Thov Vajtswv pab kom kuv tuav ruaj Vajtswv tejlus tawm tsam yeej lub caijnyoog uas yuav qhau kuv ntog. Kuv thov hauv Tswv Yexus Khetos lub npe. Amees.

Cov kwv tij, peb yuav tsis kam tawm mus ua rog ntawm sab ntsujplig yog tias peb tsis hnav Vajtswv tej cuab yeej. Cia li vam khom Vajtswv thiab Vajtswv lub zog pub rau peb kom peb tsis raug dab ntxwsnyoog ntaus qaug vim yim nyob ze Vajtswv ces peb yuav kov yeej dabntxwgnyoog txoj kev ntxeev ntxias peb. Ntseeg siab rau Vajtswv thiab txhais ruam mus los ntawm Vajtswv lub hwjchim kom peb dhau los ua tus rog kov yeej txhua ntsus kev tsov rog ntawm sab ntsujplig uas koj tab tom ntsib.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.