Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Vajluskub qhia tias peb txais tsis tau ib yam dab tsi vim peb tsis taij thov. Tiamsis, peb kuj muaj ntau lo lus thov, txawm yog tos ntev loo los kuj tsis hnov Vajtswv teb. Vim li cas ho zoo li no?

Hnub no, yog hnub 18/05/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kay Camenisch dhau zaj kawm VIM LI CAS VAJTSWV TSIS TEB?

Yexus paub hais tias lawv yuav tuaj muab Nws yuam tsa ua vajntxwv; yog li ntawd, nws tibleeg thiaj mus rau saum roob lawm. (Yauhas 6:15)

Nyob rau tej hnub maj ua haujlwm, kuv maj nroos thov Vajtswv rau kuv tej kev cheem tsum thaum ntawd. Vim Vajtswv yog tus yuav muab txhua yam rau peb thiab Nws hais rau peb tias peb yuav txais tsis tau ib yam ab tsi vim peb tsis taij thov. Yog li ntawd, kuv thiaj tau thov Vajtswv ntau zaug, txawm yog tej yam uas me tshaj plaws. Kuv thov Vajtswv pab kuv thaum ua tej nyuag ntaub ntawv, thov Vajtswv pab thaum kuv lub tsheb puas, thov Vajtswv pab kom kuv ua tau siab ntev rau tus neeg nrog kuv ua haujlwm. Thiab nyob hauv Vajtswv txoj koob moov hauv Nws txoj kev hlub, Vajtswv tau teb kuv tej lus thov ntau zaug, tej zaug uas yooj yim yog thov kom muaj ib qhov chaw tso tsheb nyob ze ntawm lub chaw yuav khoom los Vajtswv yeej teb kuv.

Tiamsis, kuj muaj tej zaug cuag li Vajtswv tsis hnov tej lus kuv taij thov. Tseeb tiag, muaj tej zaug kuv pom cuag li tej lus thov rau tej yam uas tseem ceeb raug tav cia. Nyob rau ib lub sijhawm uas tsaus ntuj nti, txawm yog kuv lub suab quaj thaum kuv saib kuv tej kev txhaum tab tom rov ntxhia los kuj tsis pom Vajtswv ua haujlwm. Vajtswv nyob qhov twg thaum muaj tej lub sijhawm zoo li no?

Tsis ntev los no, thaum kuv nyeem Txoj Moo Zoo Yauhas, kuv nkag siab tob dua txog qee lo lus taij thov cuag li muaj yam ab tsi muab tav lawm. Nyob hauv Yauhas 6, Tswv Yexus muab tsib lub ncuav thiab ob tug ntses pub rau cov neeg coob coob noj.

“Thaum cov neeg sawvdaws pom Yexus ua zaj txujci tseem ceeb no, lawv hais tias, “Tus no yog tus cev Vajtswv lus uas nqis los rau hauv ntiajteb no tiag!” Yexus paub hais tias lawv yuav tuaj muab Nws yuam tsa ua vajntxwv; yog li ntawd, nws tibleeg thiaj mus rau saum roob lawm. (Yauhas 6:14-15)

Thaum cov neeg coob coob paub tias Tswv Yexus yog tus Mexiyas tau Vajtswv txib los, lawv kub siab lug nrog Nws mus. Tiamsis vim li cas Tswv Yexus ho tso tes khiav lawm? Vim li cas Tswv Yexus ho nraim ib leeg mus rau pem roob?

Tej zaug cov neeg coob coob no lawv muaj lawv lub homphiaj? Lawv tsis tau npaj siab yuav mus lawv li Vajtswv lub homphiaj. Lawv xav ua lawv li lawv lub siab nyiam, ntawd yog muab Tswv Yexus tsa ua vaj ntxwv. Txawm yog Tswv Yexus yog tus vajntxwv ntawm txhua tus vajntxwv, tus Tswv ntawm txhua tus Tswv, tiamsis qhov uas zaum saum ib lub zwm txwv nyob hauv ntiajteb no tsis yog Vajtswv lub homphiaj.

Tswv Yexus kuj tsis cem cov neeg coob, kuj tsis qhia rau lawv paub tias lawv tau yuam kev qhov twg. Thaum pom lawv lub homphiaj, Tswv Yexus ua twj ywm zam mus.

Kuv tsis nco tias kuv muaj pes tsawg lo lus thov tsis tau Vajtswv teb, tiamsis kuv paub ib nyob rau hauv tej lus thov ntawd yog thaum kuv hnov ntsuag nos heev. Kuv xav kom Vajtswv tshem txoj kev mob siab tawm ntawm kuv mus thiab hloov pauv tej neeg nyob ib ncig ntawm kuv.

Tswv Yexus tau teb kuv tej lus thov yav dhau los, thiab zoo ib yam li cov neeg coob coob ntawd, kuv xav kom tus Tswv teb kuv tej lus thov tamsim no. Kuv muaj kuv lub homphiaj mus dua li uas kuv yuav tau mus nrhiav Vajtswv lub homphiaj. Ua li, ntawd puas yog yam uas ua rau kuv tej lus thov tsis tau teb? Vajtswv puas yuav thim mus thaum uas peb siv zog siv Vajtswv rau peb lub homphiaj?

Peb saib feem kawg ntawm zaj xwm txheej. Cov thwjtim mus rau tom hiavtxwv, nce mus rau hauv ib lub nkoj, hla mus rau sab ntug dej tid tiamsis lub nkoj cuag li mus tsis taus nyob hauv lub hiav txwv Kalilais ntawd. Lawv raug cua daj cua dub muab tav cia. Tswv Yexus los saum nplaim dej los ze lawv thiab lawv ntshai txog rau thaum Tswv Yexus nthuav Nws tus kheej qhia rau lawv paub.

“Lawv thiaj zoo siab cia Yexus los rau hauv lawv lub nkoj, tamsis ntawd lub nkoj twb mus txog ntua ntawm ntug qhov chaw uas lawv yuav mus lawm” (Yauhas 6:21).

Thaum uas lawv tos Tswv Yexus los rau hauv lub nkoj – los rau qhov lawv xav yuav, thaj chaw uas lawv yuav tau ris lub nra, thaj chaw uas lawv tab tom tawm tsam sib txeeb thiab tag nrho lub zog – ces lawv txawm cia li mus txog chaw. Lawv tsis tas yuav tawm tsam kom ua tiav lawv lub homphiaj.

Thaum uas kuv siv tag nrho lub zog los ua ib yam ab tsi ntawd kom muaj tseeb – ntau zaug los ntawm tej lus taij thov – ces kuj zoo ib yam li nquam nkoj thaum muaj cua daj cua dub. Hloov qhov uas siv tag nrho zog nquam nkoj, tej zaug kuv yuav tau tsum kuv tej kev siv zog mus thiab nrhiav Tswv Yexus. Puas yog tib yam uas kuv yuav txheej ua kom mus txog chaw yog txais tos Tswv Yexus los nyob rau hauv kuv lub nkoj.

Kuv ntseeg tias thaum kuv txo hwjchim thiab txais tos Nws los nyob rau hauv kuv lub nkoj, thiab thaum Vajtswv nrog kuv nyob ua ke, kuv yuav tso siab lug so hauv Nws.

Thov caw nrog kuv peb thov Vajtswv ua ke: Vajtswv thov Koj pab kom kuv paub tos Koj. Thov qhia rau kuv paub tos Koj los rau hauv kuv lub nkoj thiab mloog lawv li Koj ua tus coj nyob rau txhua lub caij hauv lub neej pauv qhov uas yuam kom Koj ua lawv li kuv lub homphiaj. Kuv thov hauv Yexus Khetos lub npe. Amees

Cov kwv tij txhua tus, cia li caw Tswv Yexus nkag los rau hauv koj lub homphiaj, kom Vajtswv ua tus tswv rau koj txhua lub homphiaj ces koj yuav mus kom txog chaw sai.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov phooj ywg uas hlub thiab tshua, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.