Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Feem ntau peb txhua tus puav leej paub txog kev mus puag menyuam los tu. Tiamsis tseeb tiag, peb pom tias tej uas ntsib dhau los no nws tsis muaj ntau, tsawg kawg yog cov neeg uas peb paub. Vim txoj hau kev ua ntaub ntawv puag ib tug menyuam los tu tsis yooj yim kiag li, thiab dhau ntawd mus muaj ntau yam yuav tsum tau hloov. Ntsib dhau kev puag menyuam los tu yuav ua rau peb nkag siab zoo txog lub ntsiab lus ntawm qhov uas peb dhau los ua Vajtswv cov menyuam.

Hnub no, yog hnub 19/09/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Terry Meeuwsen dhau ntawm zaj kawm TEJ ZAJ KAWM DHAU NTAWM KEV PUAG MENYUAM OS TU

Yog li ntawd nej tsis yog qhev lawm, tiamsis yog tub. Vim nej yog Vajtswv cov tub lawm, nej thiaj yuav tau ib puas tsav yam uas Vajtswv khaws cia rau Vajtswv cov tub. (Kalatias 4:7).

Wb niam txiv muaj tag nrho yog 7 tus menyuam thiab 5 tug yog wb puag los tu. Ntau xyoo tag los, dhau los ntawm txoj kev sib paub, wb paub ib tug ntseeg, wb hnov tau ntshoov siab thiab puag 3 tug menyuam viv ncaus nyob tebchaws Ukraine los tu.

Xub thawj, wb lub homphiaj yooj yim xwb tsuas xav tias pab rau kom cov menyuam lawv muaj ib lub cuab yig thiab tuav kom lawv 3 tug viv ncaus tau nyob ua ke kom lawv tsis raug faib cais. Zuj zug mus cuag li wb raug rub mus rau ib yam dab tsi loj dua thiab khwv tshaj dua li tej uas wb xav txog. Kev ua ntaub ntawd, sij hawm tos, kev npaj, kev cog lus txog nyiaj txiag, tej yam tau thaiv wb kev! – thiab tej ntawd tsuas yog tej uas nyob ntawm sab nqaij tawv xwb. Tshuav nyob ntawm sab ntsujplig, wb tau Vajtswv hloov wb siab kom kawm tau txoj kev muab siab rau ntseeg Nws ntxiv.

Wb hu ncua kev no ua “Kev nrog tus Tswv Mus”. Thaum nyuam qhuav pib xwb, wb yeej nkag siab zoo tias yog tsis muaj Vajtswv nyob nrog thiab ua tus coj kev ces wb yeej yuav ua tsis tau. Thiab Vajtswv yeej tau nrog nraim wb nyob tiag rau txhua kaujruam ntawm ncua kev mus no. Vajtswv tamsim no yeej tseem coj wb kev txhua hnub. Tseeb tiag, Nws yog tus ua raws li Nws tej lus cog tseg, txaus ntseeg.

Ces wb txais tau Vajtswv koob hmoov los ntawm 3 tug me ntxhais tshiab no. Wb cov menyuam tau los cuag Vajtswv, nyeem Nws txojlus thiab lees paub Vajtswv yog tus muaj homphiaj zoo rau lawv lub neej. Tamsim no, wb tsev neeg muaj 9 tug ua neej nyob ua ke sib haum xeeb, ib leeg hlub ib leeg thiab ib leeg kawm hwm ib leeg thaum nyias coj nyias tus cwjpwm sib txawv.

Thaum rov zaum thiab xav txog tagnrho tej no, qhov uas Vajtswv siv wb puag cov menyuam no los tu tau ua rau kuv pom txog qhov tseeb zoo kawg nkaus nyob hauv txoj kev uas Vajtswv txais peb los nyob rau hauv Nws tsev neeg.

Ua ntej uas cov menyuam paub zoo txog wb ces wb twb tau xav txog lawv lawm thiab npaj txhua yam los txais tos lawv. Wb hlub cov menyuam ua ntej uas lawv yog wb li menyuam tiag. Thiab wb tau taug kev deb heev mus rau Ukraine ntsib lawv. Kev puag tej menyuam kuj khwv heev thiab poob nyiaj txiag ntau.

Vajluskub qhia tias Vajtswv paub peb ua ntej uas peb tau xeeb nyob rau hauv niam plab. Nws hlub peb ua ntej uas peb paub txog Nws. Vajtswv twb npaj ib thaj chaw rau peb nyob hauv Vajtswv lawm. Nws npaj siab taug ib ncua kev ntev heev kom los cuag tau peb, thiab them ib tug nqi kim kom peb dhau los ua Nws cov menyuam.

Ib feem nyob hauv kev puag menyuam los tu yog tis npe tshiab rau lawv. Hais txog ntawm tej ntaub ntawv, cov menyuam lawv tau tis npe raws li wb lub xeem. Qhov no kuj zoo ib yam li thaum peb muab yus lub neej fij rau Tswv Yexus, peb yuav tau hu ua tus ntseeg Yexus Khetos. Thaum uas peb nyob hauv Vajtswv thiab Vajtswv nyob hauv peb, peb pib zoo li Vajtswv zuj zug txhua hnub. Peb muab Vajtswv txoj kevcai los ua peb txoj kev ua neej. Peb tau tso dim ntawm lub meej mom qub, pib los ua ib lub neej tshiab.

Thaum coj cov menyuam tawm hauv tsev cov menyuam ntsuag, lawv yeej tseem muaj tus ntxhiab ntawm lub tsev menyuam ntsuag, wb coj cov menyuam mus rau hauv tsev so, muab tej khoom plig pub rau cov menyuam uas wb twb npaj lawm, nyob hauv muaj tshuaj ntsig plaub hau, tshuaj da dej, tshuaj ntxuav kaus, tshuaj tsw qab. Wb muab txhua yam cheem tsum rau lawv kom cov menyuam dhau los huv si zoo nkauj.

Vajtswv kuj ua ib yam li ntawd rau peb. Thaum uas thawj zaug Nws nrhiav tau peb, peb yeej tseem muaj ntiajteb tus txhiab. Nws puag peb nyob hauv Nws txoj kev hlub, ntxuav kom peb huv dhau ntawm tus menyuam yaj cov ntshav, laub rau peb lub hlwb thiab lub siab kom puv npo Nws txoj lus, thiab Nws tus Ntsujplig nyob hauv peb lub neej. Peb pib tsw Vajtswv tus pa tsw qab, uas yog peb Tus Tswv.

Thaum kawg, wb mus rau ntawm nom tswv thiab npaj txaus ntaub ntawv kom wb txoj kev puag cov menyuam ntawd los rau hauv wb tsev neeg kom yog kev yog cai. Tus txiav txim lees paub txhais tau tias thaum no cov menyuam yog ib feem hauv wb tsev neeg lawm , yog cov uas yuav txais tau txhua yam wb muaj raws li kev cai.

Koj puas paub, Vajtswv kuj ua tej ntawd rau peb thiab. Thaum peb dhau los ua Vajtswv cov menyuam, peb txais tau Vajtswv tej qub txeeg qub teg. Thiab ntawd yog tej qub txeeg qub teg nyob mus ib txhis.

Vajtswv txojlus nyob hauv Kalatias 4:4-7 sau txog tej no, “Tiamsis thaum txog lub sijhawm uas Vajtswv teem cia lawm, Vajtswv txib Vajtswv tus Tub los yug ua neeg, muaj ib tug pojniam yug Nws. Thiab Nws kuj coj raws li cov Yudais txoj kevcai ib yam li sawvdaws, nws thiaj pab tau cov neeg uas Vajtswv txoj kevcai muab khi cia lawm kom lawv dim. Nws ua li ntawd, peb thiaj tau ua Vajtswv cov menyuam. Vajtswv txib Vajtswv tus Tub tus Ntsujplig los nyob hauv peb lub siab, sawvdaws thiaj pom hais tias, peb yog Vajtswv cov menyuam, tus Vaj Ntsujplig ntawd yog tus uas qhia peb hu Vajtswv hais tias, “Anpas, Kuv Txiv.” Yog li ntawd nej tsis yog qhev lawm, tiamsis yog tub. Vim nej yog Vajtswv cov tub lawm, nej thiaj yuav tau ib puas tsav yam uas Vajtswv khaws cia rau Vajtswv cov tub.”

Thov caw nrog kuv peb thov Vajtswv ua ke: Ua Vajtswv Koj tsaug vim Koj tau txais yuav kuv, ib tug neeg tsis tsimnyog thiab puv npo tej yam tsis zoo, tau los ua Koj menyuam, tau hu Koj ua Txiv, kuv Txiv tus uas hlub kuv, tau txais lub meej mom tshiab thiab tau txais Koj tej qub txeeg qub teg. Kuv lub neej tau koob hmoov heev thaum uas nyob hauv Koj thiab tau ua Koj li menyuam. Hauv Tswv Yexus Khetos lub npe, Kuv xav muab lo lus qhuas fij rau Koj thiab nco ntsoov Koj txiaj ntsig. Amees.

Cov kwv tij txhua tus, qhov uas dhau los ua Vajtswv li menyuam muaj nqi li cas rau koj? Koj puas tab tom ua lub neej raws li koj lub meej mom tshiab, koj puas tsw Yexus khetos tus pa tsw qab thiab ua rau Leej Txiv saum ntuj zoo siab?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.