Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Hnub 20 hli 10 yog poj niam hnub nyob rau hauv teb chaws Nyablaj, yog hnub uas tshwj tawm siv los nthuav qhia thiab muab koob npe rau tej niam tsev dhau ntawm qhov uas ua ib nyuag qhov haujlwm muaj nqis pub rau lawv. Txawm yog ntawm no tsis yog ib hnub nyob hauv Vajluskub los peb kuj suav tau tias ntawm no yog ib lub sijhawm zoo, kom ua kev nco txog cov niam tsev tsim txiaj uas Vajtswv tau muab tso nyob rau hauv peb lub neej. Lawv yog leej niam, yog pog, yog ib tug muam, ib tug niam hluas lossis yus tus poj niam.

Hnub no, yog hnub 20/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm zaj kawm NCO TXOG COV NIAM TSEV ZOO TXIAJ NTSIG

Tus pojniam uas tsimtxiaj muaj nqis dua nyiaj thiab kub, tiamsis laj nrhiav tau ib tug pojniam zoo li ntawd. (Pajlug 31:10)

Hais txog niam txoj kev hlub puas yuav muaj yam dab tsi coj los piv tau? Thaum uas peb xav txog tej uas lawv tau muab pub tseg rau tej menyuam, puas muaj phau ntawv twg txaus los sau cia tej uas lawv tau ua? lawv poob sij hawm, tsis tau pw txaus, noj tsis txaus pluas. Tsis paub muaj pes tsawg zaus lawv poob kua muag. Tsis yog li ntawd xwb, lawv tseem yuav pab ntau yam kev cheem tsum rau coob leej ntau tus ntxiv. Lawv txhawj rau lawv tsev neeg, koom tej kev sab laj, mus sab laj rau tej menyuam, npaj zaubmov rau tej menyuam mus kawm ntawv, thiab tseem tshuav ntau yam haujlwm ntxiv. Txog rau thaum uas lawv dhau los ua pog los lawv tej haujlwm yeej tsis tsawg ib zaug li. Tej hnub hli uas lawv ua niam yeej tsis muaj hnub xaus li.

Yam dabtsi ua rau leej niam zoo tag npaum li no? Yeej yog Vajtswv thiaj yog tus uas ua kom muaj tej zoo tshwj xeeb no nyob rau hauv cov uas ua niam. Lawv ua ntau txoj haujlwm tshaj li lub sijhawm uas tsuas muaj 24 sij ib hnub. Lawv lub zog uas tiv taus tsis muaj leej twg yuav piv tau, tshwj xeeb yog tej kev mob siab thaum lawv ntsia pom lwm tus ua rau lawv tej menyuam tu siab.

Tej menyuam yog lawv qhov khoom plig thiab lawv zoo siab rau qhov khoom plig ntawd txawm yog twb khwv tas zog nrog hnub nrog hmo. Yog li, yog tias muaj sijhawm, tshwj xeeb yog nyob rau hauv tej hnub ua chaw nco txog, tej lub sijhawm tseem ceeb li hnub no, cia li ua ib yam dab tsi nthuav qhia nej lub siab hlub pub rau leej niam, ua qhia koj lub siab nco niam txiaj ntsig rau txhua yam uas niam tau ua thiab tseem yuav ua ntxiv pub rau peb.

Ib pob khoom, ib rev paj, ib daim ntawv txhawb zog, ib pluas noj…, tag nrho tej no tsis muaj ib zaum twg yuav txaus lossis tsimnyog rau tej uas niam tau ua. Tiamsis, dhau ntawm tej khoom me lossis tej haujlwm me me ntawd, peb xav kom niam nkag siab txog thiab xav txog peb lub siab. Niam yeej tau peb hlub thiab peb yeej tseem tsis tau hnov qab niam li. Yuav tau cia rau cov uas ua leej niam lawv paub tias lawv yog qhov khoom tsis muaj ib tug nqi twg yuav them tau nyob hauv koj thiab koj xav nthuav qhia lub siab hwm niam li Vajtswv txojlus tau qhia:
“Yuavtsum hwm nej niam nej txiv, nej thiaj yuav muaj sia ua neej nyob ntev rau hauv lub tebchaws uas kuv muab pub rau nej nyob”. (Khiavdim 20:12).

Tiamsis kuj muaj ib txhia lawv hnov nyob ib leeg thaum xav txog leej niam, vim lawv niam twb tag sim neej. Txawm li los, koj txhob hnov qab ib zaug li tias Vajtswv hlub koj tshaj plaws, txoj kev hlub thiab tej uas Vajtswv tseg rau koj hla dhau tej kev sib piv thiab tsis muaj ib yam dab tsi yuav piv tau. Txawm yog tsis muaj niam lawm los koj kuj muaj cuab kav siv tau hnub tshwj xeeb no tseg rau poj niam, tseg rau koj tej nkauj muam vim lawv muaj nqis heev nyob rau hauv Vajtswv lub qhov muag. Nthuav qhia rau lawv paub txog tej uas zoo kawg nkaus uas koj txais tau ntawm Vajtswv. Saib taus tej niam tsev uas Vajtswv tseg lawv nyob rau ntawm koj ib sab kom sib tham nrog lawv ua ke txog ntau yam sib txawv hauv lub neej. Ntawd yog ib txoj koob hmoov loj kawg.

“Tus pojniam uas tsimtxiaj muaj nqis dua nyiaj thiab kub, tiamsis laj nrhiav tau ib tug pojniam zoo li ntawd.” (Pajlug 31:10).

Thov caw nrog kuv peb thov Vajtswv ua ke: Ua Vajtswv Koj tsaug rau tej niamtsev uas Koj tau tso rau ntawm kuv ib sab, tshwj xeeb yog cov ua niam, lawv tau tso ntau yam thiab hlub peb tag siab tag ntsws. Thov Leej Txiv Koj ntxiv zog rau lawv, pub rau lawv kom ua lub neej muaj kev zoo siab, muaj dag zog thiab saj tau tej koob hmoov zoo ntawm Koj. Kuv thov hauv Tswv Yexus Khetos lub npe. Amees.

Cov kwv tij txhua tus, siv koj lub sijhawm hnub no, nthuav qhia rau niam paub tias koj hlub niam thiab saib taus niam heev. Ib pluas mov noj, ib qhov khoom plig, ib rev paj, ib daim ntawv, lossis tsuas yog ib lo lus thov Vajtswv tej ntawd nthuav qhia ntau heev txog koj lub siab. Kuj tsis txhob hnov qab lo lus qhuas txog tej niam tsev uas Vajtswv tso nyob hauv koj lub neej.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.