Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej txhua hnub uas lawv tau ntsib dhau los, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Tus kab mob thoob qab ntuj Covid-19 yog yam txaus ntshai tshaj plaws rau coob tug hauv lub ntiajteb no. Coob tug tab tom ua neej nrog txoj kev ntshai, tsis paub yus lossis cov neeg yus hlub puas raug kis tus kab mob no lossis tsis raug?

Hnub no, yog hnub 21/03/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Deirdre Reilly dhau ntawm lub npe YUAV UA LI CAS THIAJ MUAJ LUB SIAB TUS THAUM NYOB NRUAB NRAB NTAWM TUS KAB MOB KIS NO?

Nej tsis txhob ntshai, rau qhov Kuv nrog nraim nej, Kuv yog nej tus Vajtswv, nej tsis txhob poob siab; Kuv yuav pab nej thiab txhawb kom nej muaj zog, Kuv sab tes xis yuav puag rawv nej.” (Yaxayas 41:10)

Kwv yees li tau ib lub hlis dhaus los no, kuv mus hauv tsev pom kuv tus txiv zaum nraum zoov nrog rau lub ntsej muab liab khiv. Tom qab ua tib zoo saib tas, kuv tus txiv hais tias nws kuj hnov kub ua no thiab nkees heev. Tomqab muab nws lub cev ntsuas tas thiab paub tias nws tab tom ua npaws. Wb ob leeg sib ntsia thiab muaj kev ntxhov siab. Covid -19? Tag rho wb ob leeg puav leej xav txog qhov no.

Txawm yog wb yeej ua tib zoo coj raws li tej nom tswv txoj cai qhia kom tiv thaiv tus kab mob no kom zoo, xws li coj ntaub npog qhov ncauj, txhob nyob sib ze ua ke, ntxuav tes txhua lub sijhawm… tiamsis qhov tseeb leej twg los twb yeej muaj cuab kav yuav kis tau tus kab mob no. Tseeb tiag leej twg ua neej nyob los yeej yuav raug kab mob vim ntawm no yog qhov tseeb. Tiamsis nyob nruab nrab ntawm tus kab mob kis no, saib kuv tus txiv muaj cov cim zoo li no ua rau kuv lub hlwb xav ntxhov nyho.

Txoj kev xav thawj thawj tshwm hauv kuv lub hlwb yog kuv yuav ua neej nyob tsis tau yog tsis muaj kuv tus txiv. Kuv tus txiv yog ib tug paub tu nws lub dag zog ntawm tus kheej kom zoo, noj haus txaus, mus xyaum dhia ua si, thiab tsis tshua muaj mob li, yog li thaum kuv pom nws lub zog tamsim ntawd, kuv txhawj heev. Tshwj xeeb dua thiab yog thaum txhua txoj kev xa xov nyob ntawm yus ib sab, txij li Tivi mus txog rau xov xwm nyob saum

Internet. Tej xov xwm uas yog nrog rau cov lus hais ntawm tej neeg ib sab, qhov twg los twb tham txog tus kab mob no, yog li haj tseem ua rau kuv poob mus rau txoj kev xav tsis zoo, nrog kuv tej haujlwm ua. Dhau ntawm tej no, kuv thiaj paub tias thaum ntsib tej lub sijhawm txom nyem li no, tes haujlwm peb yuav tau ua yog cia li tua Tivi thiab xov tooj tig kiag los mus cuag Vajtswv.

Ntawm wb lub tshav puam zaum ua si hauv tsev uas wb ob niam txiv pheej zaum thaum sawv ntxov thaum lub ntuj ntsuab xiab, muaj cua tuaj, noog quaj lom zem, wb ob niamtxiv tau koom siab ua ke thov Vajtswv, thov Vajtswv pab kom wb ob niamtxiv muaj lub siab tus. Thiab paub daws qhov teeb meem no raws li txoj kev txawj ntse.

Vajtswv coj wb mus txog rau qee nqe Vajluskub nthuav qhia tias Vajtswv yog tus kho zoo:

“Tus Tswv, kuv tus Vajtswv, kuv quaj thov koj pab kuv, thiab koj tau kho kuv zoo hlo.” (Ntawv Nkauj 30:2)

“Tus Tswv, thov Koj kho kuv, kuv thiaj yuav zoo; thov cawm kuv, kuv thiaj yuav dim. Kuv qhuas Koj tib leeg xwb!.” (Yelemis 17:14)

Vajtswv Txojlus coj txoj kev txhawb zog los rau wb, pab rau wb muaj lub siab tiaj tus. Tomqab ntawd, wb maj nroos hu mus rau kws tshuaj, thiab npaj sijhawm mus sim ntshav. Ob peb hnub tom qab, wb txais tau tej ntaub ntawv qhia txog kuv tus txiv txoj mob tau mus tshuaj xyuas ua ntej ntawd yog “mob lawm”. Ua ntej ntawd, nyob rau lub sijhawm tos kws tshuaj teb tuaj kuv tau pheeb rau hauv Vajtswv Txojlus. Vim kuv paub tias lub sijhawm no yog lub sijhawm uas kuv cheem tsum Vajtswv tshaj plaws li. Kuv rov nyeem dua cov nqe Vajluskub uas kuv xav tshaj plaws:

“Yog neej pehawm Kuv uas yog tus Tswv nej tus Vajtswv, Kuv yuav foom koob hmoov kom nej muaj mov noj thiab dej haus nplua mias thiab yuav tshem nej tej kab mob kev nkeeg mus huv tibsi.” (Khiavdim 23:25)

“Cov neeg coob coob ntawd kov Yexus, rau qhov muaj hwjchim tawm ntawm Yexus tuaj kho txhua tus uas muaj mob zoo huv tibsi.” (Lukas 6:19)

Peb tau lawv taw kev qhia kom cim civ kho hauv tsev. Khwv heev rau wb ob niam txiv yuav tau nyob kom nrug deb thiaj li tab pov tias yuav tsis kis rau lwm tus. Tiamsis Vajtswv tau txhawb zog thiab foom hmoov kom wb tiv dhau lub sijhawm ua muaj txom nyem no. Kuv nco Vajtswv tshav ntuj vim kuv paub ua ntej yuav sim ntshav. Kuv tau txhawj thiab ntshai. Tiamsis thaum kuv tu kuv tus txiv kuv hnov kaj siab. Kuv hnov kuv tus kheej muaj zog zoo li tau tiv thaiv hauv Vajtswv txoj kev hlub. Kuv kuj tsis ntshai tias tsam kuv tus txiv yuav kis rau kuv. Lub sijhawm no kuv pom kuv tus kheej nyob ze Vajtswv tshaj thiab tau paub txoj kev pab ntawm Nws los.

Ua li tus kab mob no puas yog yog ib qhov khoom plig los ntawm Vajtswv los? Kuv tsis tab pov tiamsis kuv paub tseeb tias Tswv Yexus qhia kuv txog txoj kev cawmdim dhau ntawm Nws txoj kev txomnyem. Txawm yog lub sijhawm no tus neeg muaj mob tsis yog kuv los kuv hnov yus nyob ze Vajtswv thiab paub cia siab rau Nws.

Ua li kuv puas raug kab mob kis? Kuv tsis paub vim lub sijhawm tamsim no, kuv xav tias ntshe yuav tsis muaj leej twg paub lo lus teb. Tiamsis tej uas kuv paub yog kuv yuav cia siab ntsoov rau Vajtswv, ua Vajtswv tsaug, qhuas Nws txog tej uas kuv tus txiv lub zog tau zoo zuj zus.

Vajluskub qhia tias,

“Nej tsis txhob ntshai, rau qhov Kuv nrog nraim nej, Kuv yog nej tus Vajtswv, nej tsis txhob poob siab; Kuv yuav pab nej thiab txhawb kom nej muaj zog, Kuv sab tes xis yuav puag rawv nej.” (Yaxayas 41:10)

Thov caw nrog kuv peb thov Vajtswv ua ke: Vajtswv, nyob hauv nruab nrab ntawm kev kis kab mob tamsim li no, txawm yog tsis paub tom ntej yuav zoo li cas, seb tus kheej puas yuav kis mob lossis tsis kis tiamsis thov Vajtswv Koj nrog nraim kuv nyob, ntxiv zog thiab pab kom kuv kov yeej txoj kev ntshai, paub vam khom Vajtswv, ntseeg rau Koj lub hwjchim kho mob zoo kom tiv thaiv tau txhua lub caijnyoog yuav tshwm sim los. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug tus kab mob no tseem yuav tshwm sim mus ntev, thiab tsis muaj leej twg yuav raug tshwj tawm es kab mob tsis kis rau, tiamsis ntseeg tias dhau ntawm zaj kawm hnub no, koj yuav muaj zog thiab ruaj siab rau ntawm Vajtswv. Thov Vajtswv pab koj kom tswj tau tus kheej coj lawv li txoj kev taw qhia tav kab mob. Thiab ua ntej tshaj plaws thov Vajtswv ua rau kom koj lub siab rov tshiab tuaj kom koj muaj txoj kev sib raug zoo nrog Nws heev dua.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev txhawj xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj thiab peb xav kom txuas tau nrog koj.