Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Koj puas tau muaj ib zaug twg ua tib zoo xav txog txoj kev hlub uas Vajtswv tseg rau yus? Vajtswv tau hlub thiab nthuav qhia txoj kev hlub ntawd pub rau koj zoo li cas? Yog koj pom tias Vajtswv hlub koj npaum cas ces ntseeg tias koj yuav tsis muaj ib zaug twg tsis quav ntsej txog Vajtswv txoj kev hlub li.

Hnub no, yog hnub 21/04/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Wally Odum dhau ntawm Zaj kawm Vajtswv hlub kuv heev

Kuv tsis paub tias nej zoo li cas tiamsis nyob ntawm kuv tus kheej pheej siv sijhawm ntau los xav txog tias vim li cas Vajtswv ho hlub peb, thiab ntawm no yeej yog ib yam uas kuv xav tsi thoob li. Kuv paub tej uas kuv ua tsis tau tiamsis Vajtswv yeej tseem hlub kuv. Tej lus uas Mauxes hais rau haiv neeg Yixalayees nyob rau hauv 2 Kevcai 7:7-8 txhawb kuv lub zog ntau kawg li. Nyob hauv ob nqe Vajluskub no, Mauxes txhais lub ntsiab txog Vajtswv txoj kev hlub tseg rau Nws haiv neeg:

“Tus Tswv hlub nej thiab xaiv nej, tsis yog vim nej yog ib haivneeg uas coob tshaj luag lwm haivneeg; qhov tseeb, nej yog ib haivneeg uas tsawg kawg nkaus hauv ntiajteb no. Tiamsis tus Tswv hlub nej thiab nws ua raws li tej lus uas nws tau cog tseg rau nej cov yawgkoob lawm. Twb yog vim li no, nws thiaj siv nws lub hwjchim uas loj kawg nkaus cawm nej thiab tso nej dim, nej thiaj tsis tau ua Falaus uas yog cov Iziv tus vajntxwv qhev lawm”

Txoj kev hlub uas Vajtswv tseg rau peb no nws tsis yog nyob ntawm qhov uas peb muaj peev xwm lossis peb tseem ceeb. Tsuas yooj yim yog Vajtswv hlub peb xwb. Nqe Vajluskub uas sawv daws yeej paub nyob hauv Yauhas 3:16 hais meej meej tias, “Rau qhov Vajtswv hlub neeg ntiajteb kawg li…”

Richard Bellinger yog ib tug menyuam yaus, nws yog ib tug xibfwb nyob cheem tsam sab qab teb Carolina, tebchaws Mekas tus tub. Muaj ib hmo yog hmo xya, Richard txiav txim siab pleev nws txiv nkawm khau. Hmo tom qab leej txiv muab ib lub nyiaj tso rau saum nws tus tub lub rooj kawm ntawv nrog ib daim ntawv me me, nyob hauv sau txog leej txiv cov lus qhuas txog tus menyuam tes haujlwm tau ua pub rau nws txiv, thiab hais tias lub nyiaj no yog qhov khoom plig pub rau nws. Hnub tom qab, leej txiv rau khau, hnov cuag li hauv nws nkawm khau muaj yam dab tsi tawv tawv xws li hlau. Thaum muab txhais khau hle thiab ntxig tes rau hauv, yawg nrhiav tau lub nyiaj uas hmo ntej tau muab pub rau tus tub. Nrog rau lub nyiaj ntawd kuj muaj ib daim ntawv me me sau luv luv tias, “kuv ua tej ntawd vim yog kev hlub!”

Tej uas Vajtswv tau ua rau peb, Vajtswv tau ua los ntawm txoj kev hlub. Pauv qhov uas siv zog kom nkag siab, lossis ua tias yus tsimnyog rau, lossis them nqi rau, Vajtswv tsuas xav kom peb txais yuav txoj kev hlub ntawd thiab hais tias “ua tsaug”. Thaum peb ua tej ntawd, Vajtswv txoj kev hlub pib hloov peb.

Nyob rau hauv thawj ob peb xyoo kev ua Vajtswv haujlwm, wb ib niam txiv ua Vajtswv haujlwm nyob sab ntus nroog Baltimore, cheeb tsam Maryland. Nyob ntawd, kuv tau hnov txog ib zaj xwm txheej zoo heev ntawm ib tug xibfwb qhia ntawv qib siab. Nws yuam kom nws cov tub kawm mus rau hauv tej zej zog pluag nyob ib ncig thiab txhawb nrhiav tej xov xwm txog 200 tus menyuam yaus, thiab tom qab ntawd sau txog lawv lub neej tom ntej. Tej uas xibfwb txais tau ntawm cov tub kawm puav leej zoo tib yam, xws li tias, tus menyuam no tsis muaj feem.”

25 xyoos tom qab, muaj ib tug xibfwb tau tuaj tshawb nrhiav txog tej kev tshuaj txog ua ntej ntawd. Yawg txiav txim siab siv nws cov tub kawm soj ntsuam txog txoj kev tshawb nrhiav yav dhau los saib yam dab tsi tau tshwm sim rau tej menyuam yaus ntawd. Tshwj 20 tus tub uas tau khiav mus nyob rau lwm qhov lossis tuag lawm, cov tub kawm lawv mus tshawb fawb tau tias muaj 176 tus nyob rau hauv 180 tus tseem tshuav lawv tau ua lub neej tiav mus rau seem zoo heev nyob rau tej haujlwm xws li, tus sawv cev hais plaub ntug, kws tshuaj thiab cov ua lag luam.

Xibhwb xav tsis thoob txog tej ntawd thiab txiav txim siab caum tej teeb meem ntawd mus kom tob dua. Hmoov zoo tshaj, 176 tus txiv neej no yeej tseem ua neej nyob rau hauv lawv tej qub zos thiab cov tub kawm muaj caijnyoog nug txog ib tug zuj zus hauv lawv cov ntawd. Thaum nug tias, “yam dab tsi pab rau koj kom ua tau tiav zoo li ntawd?” feem ntau txhua lo lus teb puav leej yog “vim muaj ib tug xibfwb qhia ntawv”.

Tus xibfwb tau tshawb nrhiav thiab paub tias tus kws qhia ntawv no yeej tseem muaj sia ua neej nyob. Yawg thiaj mus nrog pog sib tham. Nws thiaj nug tus poj niam qhia ntawv tias muaj lub tswv yim zoo twg thiaj ho coj tau cov menyuam nyob rau tej lub zos pluag pluag ntawd tawm los thiab muaj koob nto npe li niaj hnub nim no. Tus niam kws qhia ntawv saib xibfwb thiab luag ntxhi hais tias, “Yooj yim xwb, vim kuv hlub kuv cov tub kawm”.

Kev hlub hloov pauv txhua yam, muab tej yam uas ua tsis tau yuav hloov los ua tau. Thiab Vajtswv hlub peb. Yog cov ntseeg Tswv Yexus, nyob rau lub sijhawm peb nkag mus rau ntuj ceebtsheej, yog tias muaj leej twg nug tias vim li cas peb ho tau txais txoj koob hmoov no, ces peb yuav teb tias vim Vajtswv hlub kuv.

Vim txoj kev hlub tseg rau peb Vajtswv tau them ib tug nqi kim kawg. Muaj ib zaj xwm txheej tham tias nyob rau tiam vajntxwv Oliver Cromwell kav tebchaws Anh, muaj ib tug tub rog hluas tau raug txiav txim tua pov tseg. Nws tus poj niam thiaj nrhiav kev mus ntsib tus thawj Cromwell thov zam txoj sia pub rau nws tus hlub, tiamsis tej uas tus niam tsev no thov tsis tau txais yuav. Raws li lub txim, tus tub rog hluas no yuav raug tua pov tseg thaum lub tswb nrov kom kaw qhov rooj nrov.

Sijhawm los txog, thaum tus neeg mus tsoo lub tswb tab tom mus tsoo ua ciav lub tswb tsis nrov ib suab li. Twb yog vim tus ntxhais no twb nce mus nyob rau saum lub tswb, thiab muab tus qws tsoo lub tswb ntawd qawm ruaj ruaj lawm. Nws zoo siab cia nws lub cev raug doog daws txhua zaug uas lub tswb yoj mus yoj los kom lub tswb tsis nrov. Thaum kawg nws lub cev doog tas, txawm li los nws yeej txiav txim siab qawm kom ruaj ruaj txog rau thaum twg uas lub tswb tsis nrov ntxiv. Thaum uas tus thawj tub rog Cromwell paub txog tej uas tus ntxhais no tau ua pub rau nws txoj kev hlub, tiv kev mob kom npog tau tus tub rog hluas no qhov kev txhaum. Yawg thiaj txib neeg mus coj tus ntxhais nqis los thiab sam hwm kom lawv tso tus tub rog hluas no.

Vajtswv hlub peb. Thiab vim yog txoj kev hlub tseg rau peb Nws lub cev thiaj raug luag nplawm, muaj tej qhov txhab kom peb thiaj tsis raug tuag ib txhis. Vajtswv xav kom peb ntseeg tej ntawd thiab tso cai rau Tswv Yexus txoj kev hlub hloov pauv peb.
Thov caw nrog kuv peb thov Vajtswv ua ke
Ua Tswv Yexus Koj tsaug vim txoj kev hlub zoo kawg nkaus uas Koj tseg rau kuv, txog qib uas txaus siab tiv kev txomnyem tuag saum ntoo khaublig kom dhau qhov ntawd kuv tej kev txhaum tau zam, kuv tus ntsujplig tau txais kev cawmdim los cuag Koj. Thov pab kom kuv ua lub neej nco Vajtswv Koj txiaj ntsig thiab nthuav qhia Koj txoj kev hlub mus rau coob tug. Kuv thov hauv Tswv Yexus Khetos lub npe. Amees.
Cov kwv tij, koj puas tau zeem tau Vajtswv hlub koj npaum li cas lawm los tsi tau? Hnub no, koj yuav hais li cas kom teb Vajtswv txoj kev hlub loj uas Vajtswv tseg rau koj ntawd?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.