Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Qhov uas tsis mloog tej lus ntuas thiab tawv qees ua raws li yus lub siab nyiam yog yam uas yuav coj mus ntsib ntau qhov teeb meem tsis zoo. Tus cwjpwm khav theeb thiab tsis paub Vajtswv yog txoj kev uas coj tib neeg mus poob rau txoj kev tuag. Tsuas yog thaum nyob hauv Vajtswv, mloog thiab ua raws li Vajtswv tej lus qhia peb yuav txais tej koob hmoov uas Vajtswv pub. 

Hnub no, yog hnub 21/10/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jennifer Scribner dhau ntawm Zaj kawm MLOOG THIAB UA RAWS LI VAJTSWV TXOJLUS

“Tiamsis Yexus teb hais tias: Tsis yog li ntawd, cov neeg uas hnov Vajtswv Txojlus thiab ua raws li Txojlus ntawd, thiaj yog cov uas tau koob hmoov!” (Lukas 11:28). 

Kuv muaj ob tug menyuam, ib tug tub, ib tug ntxhais. Thaum nkawd tseem yau nkawd pheej tsis mloog kuv tej lus qhia nkawd. Qhov uas nkawd tsis mloog lus ua rau kuv tsis zoo siab. Txhua zaug li ntawd kuv pheej cem nkawd: “Vim li cas neb tsis mloog kuv ua niam lus?” Kuv twb qhia neb pes tsawg zaus lawm?” 

Kuv tus tub mas tsis ua raws li kuv hais ntau dua li nws tus muam. Txawm yog nws yuav ntsib teeb meem ntau thaum uas nws mloog niam los kuv tus tub yeej pheej ua txhaum mus li. Thaum kuv kom kuv ob tug menyuam ua haujlwm ces nkawd nug tias vim li cas nkawd ho yuav tsum raug ua haujlwm. Kuv pheej tsim muaj txojcai yog tias ob tug menyuam tsis ua zoo thawj zaus ces nkawd yuav tau rov qab ua dua. Txawm yog nrhiav txhua txoj hau kev los cuag li kuv tus tub nws pheej ua tsis tau tej haujlwm ntawd kom zoo thiab nws rov qab raug ris lub txim ua dua ib zaus. Qhov no ua mus ua los ua rau nws tsis muaj sijhawm tawm mus sab nraud nrog tej phooj ywg ua si. 

Muaj ib zaug kuv tus tub cev taub hau tawm hauv tsheb rau sab nraud. Txawm yog kuv twb qhia nws ntau zaug tsis ua li ntawd vim phomsij heev los nws yeej tsis mloog kuv hais. Nws xav kom nws tej khoom ua si tau cua ntsawj. Lub sijhawm ntawd kuv ceeb toom nws tias koj tej khoom ua si yuav poob tas yog koj pheej ua li ntawd. Vim tsis mloog kuv lus thaum kawg nws cov khoom ua si ya tas khaws tsis tau. Twb yog zaum uas nws cov khoom ua si uas nws nyiam nyiam ntawd ya tas lawm thiaj qhia tau ib zaj kawm ua rau nws nco tshav ntuj nrig. 

Dhau ntawm tej uas kuv ntsib dhau thiab txoj kev sim  hauv lub neej thaum yog ib leej niam pab rau kuv paub txog kuv tus cwjpwm tawm tsam thiab tig rov qab los mloog Vajtswv lus. Leej Txiv saum ntuj xav kom kuv mloog lus nyob hauv txhua tes haujlwm. Vajtswv xav kom kuv ua raws li Vajtswv tej lus qhia. 

Nyob hauv Henplais 5:11 tus sau hais rau cov ntseeg tias: “Peb tseem muaj ntau zaj uas yuav piav qhia nej tiamsis piav nyuaj heev, rau qhov nej tsis tshua totaub”

Ua Vajtswv tsaug Vajtswv qhia kuv peb yam dhau ntawm nqe Vajluskub no: Ib, kuv yuav tau saib ntsoov rau tej yam uas Vajtswv qhia rau kuv. Ob, Vajtswv xav kom kuv mloog Vajtswv lus. Peb, kuv yuav tau nrhiav Vajtswv, ntseeg Vajtswv nyob hauv txhua lub caijnyoog uas kuv ntsib nyob hauv lub neej tom ntej. 

Ruaj siab thov Vajtswv zam txim rau tej kev txhaum uas peb tau ua yuam kev. Vajtswv yog tus uas nkag siab peb lub siab thiab pub rau peb kom muaj kev txawj ntse mloog lus thiab mloog Vajtswv lus.

Thov caw nrog kuv peb thov Vajtswv ua ke

Leej Txiv, ua Koj tsaug vim Koj tseem ua siab ntev rau kuv tom qab tej kev txhaum uas kuv tau ua tej yam uas kuv ua rau koj nyuaj siab. Kuv nco koj tshav ntuj vim ntau zaus kuv ntog koj pab kom kuv loj hlob. Thov Vajtswv pab kom kuv saib ntsoov rau ntawm koj, mloog koj thiab mloog koj lus nyob rau hauv txhua lub caijnyoog uas kuv ntsib. Kuv ntshaw kom tau kawm paub txog Vajtswv koj txhua hnub thiab dhau los zoo li koj ua lub neej kom haum Vajtswv koj siab. Kuv thov hauv Tswv Yexus Khetos lub npe. Amees.

Cov kwv tij, tau ua Vajtswv saum ntuj tus menyuam yog ib txoj koob hmoov loj tshaj nyob rau hauv peb txhua tus. Vajtswv xav kom peb paub Vajtswv, saib ntsoov rau Vajtswv thiab ua raws li tej uas Vajtswv qhia thiab ntseeg Vajtswv nyob rau hauv txhua lub sijhawm. Nres tsis mus ntxiv thaum Vajtswv ceeb toom kom zam tsis ntsib teeb meem. Txhua hnub koj yuav tau mus ze rau ntawm Vajtswv nug yam uas yog Vajtswv lub siab nyiam thiab tej uas Vajtswv taw kev nyob rau hauv txhua feem hauv koj lub neej.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj