Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Ua kev cai sau qoob loo lossis kev cai nyob tsev pheeb suab yog ib lub koob tsheej nyob rau hauv cov neeg Yudais peb lub koob tsheej tseem ceeb. Lub koob tsheej no ntev 7 hnub nyob rau lub caij nplooj ntoo zeeg, yog lub caij uas twb sau tej qoob loo tas thiab txhua tus koom fij lo lus ua tsaug rau Vajtswv txog tej koob hmoov uas Nws tau foom. Xyoo 2021 lub koob tsheej no yuav pib rau hnub 22 thiab mus txog rau hnub 29 hli 9.

Hnub no, yog hnub 22/09/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm zaj kawm TUAV TXOJ KEVCAI SAU QOOB LOO

Ua kevcai sau qoob loo rau thaum lub caij uas nej pib sau nej tej qoob. Thiab thaum nej de nej tej txiv hmab txiv ntoo hauv nej tej vaj. (Khiavdim 23:16b)

Thaum lub hli 9 yuav xaus yog lub caij sau qoob loo nyob rau ntau qhov chaw hauv ntiajteb. Cov neeg cog qoob loo lawv yeej tos ntsoov kom lawv tej qoob loo sau tau ntau thiab tej fuab cua qhuav qhuav, kom zoo rau kev sau qoob loo.

Ntawm no kuj yog ib lub caij tseem ceeb heev nyob hauv ib xyoo raws li cov neeg Yudais lub caijnyoog. Coob tug tseem tab tom ua kevcai tsev pheeb suab, kuj hu ua kevcai sau qoob loo, yog lub caijnyoog uas cov neeg ua qoob loo lawv sau tas lawv tej qoob loo thiab ua Vajtswv tsaug, nco Vajtswv txiaj ntsig vim Nws tau foom koob hmoov nplua mias.

“Ua kevcai sau qoob loo rau thaum lub caij uas nej pib sau nej tej qoob. Thiab thaum nej de nej tej txiv hmab txiv ntoo hauv nej tej vaj.” (Khiavdim 23:16b).

Muaj ib txoj cai nyob rau hauv txhua txoj cai yuam kom cov neeg Yixalayees yuav tau coj thaum ua txoj kev cai no yog lawv yuav tau nyob rau hauv tej tsev pheeb suab khaub hlab, ua los ntawm tej ceg ntoo hu ua (cây kè) lawv yuav tau nyob rau hauv 7 hnub. Yog li, lub koob tsheej no kuj tau hu ua lub koob tsheej kev cai tsev pheeb suab. Qhov no yog ntuas kom cov neeg Yixalayees lawv nco txog lub sijhawm lawv khiav tawm teb chaws Iziv thiab ua neej nyob rau hauv tej tsev pheeb suab thaum uas lawv mus mus los los rau tom moj sab qhua thaum taug kev los mus rau teb chaws cog lus tseg. Nyob rau qhov ntawd, lawv saj tau Vajtswv yog tus pub, thiab foom koob hmoov. Yog li, tsev pheeb suab piv txog Vajtswv txoj kev tiv thaiv thiab Nws txoj kev ua raws li Nws tej lus cog tseg rau cov pej xeem.

Thaum no, yim muaj coob tug tib neeg lawv tshua txog tej lub koob tsheej tseem ceeb no kom nrhiav txog tej ntsiab lus tseem ceeb txog Vajtswv thiab Nws txoj kev hlub tseg rau cov neeg uas ntseeg Nws, yog tag nrho cov neeg Yudais thiab lwm haiv neeg tib si. Yog ib tug ntseeg Tswv Yexus khetos, tsev pheeb suab ua rau kuv nco txog tias Tswv Yexus tau los rau hauv ntiajteb no thiab nyob nruab nrab ntawm tibneeg:

“Txojlus ntawd tau los yug ua neeg, Nws puv npo txojkev hlub, Nws yog qhov tseeb thiab Nws nrog peb nyob. Peb pom Nws lub tshwjchim ci ntsa iab; Leej Txiv pub lub tshwjchim ntawd rau Nws, rau qhov nws yog Leej Txiv tib leeg Tub.” (Yauhas 1:14).

Tshawb nrhiav txog tej koob tsheej no yog ib txoj kev zoo tseg rau peb xav txog nws lub ntsiab thiab tej xwm txheej nyob hauv Vajluskub, txij li ntawd coj peb mus ze rau txoj kev uas nkag siab txog txhua yam uas tus Tswv tau ua rau peb. Vajluskub Qub siv tej piv txwv los ua daim duab thiab nthuav qhia qhov tseeb rau peb paub nyob hauv Vajluskub tshiab.

Piv txwv li, yog tias Vajtswv pub tus nplaim hluav taws ci pom kev rau haiv neeg Yixalayees thaum tsaus ntuj tom moj sab qhua ces nyob hauv Yauhas 8:12, peb pom Tswv Yexus hais tias: “Kuv yog lub teeb ci rau neeg ntiajteb pom kev”.

Ib yam haujlwm nyob rau hauv txheej txheem thaum ua kev cai tsev pheeb suab yog cov neeg Yixalayees lawv tuav tej ceg ntoo yoj mus yoj los thiab hu nkauj tias “Ho-sa-na”, Ib lo lus Henplais muaj lub ntsiab tias “tus Tswv, thov cawm”. Ntawv Nkauj 118:25-26 sau cia cov lus qhuas no li no: “Tus TSWV, thov cawm peb, thov cawm peb lauj! Tus TSWV thov pab kom peb ua tau txhua yam tiav! Thov Vajtswv foom koob hmoov rau tus uas Vajtswv txib los! Peb foom koob hmoov rau tus uas Vajtswv txib los! Peb foom koob hmoov hauv tus TSWV lub tuamtsev rau koj.”

Nyob hauv Yauhas 12, peb pom tias ua ntej 5 hnub yuav txog kev cai hla dhau thiab ua ntej Tswv Yexus yuav raug ntsia rau saum ntoo khaublig, Nws caij tug neesluav nkag rau hauv lub nroog Yeluxalees. Peb pom cov pej xeem lawv tsa siab siab cov nplooj toov laj txais tos Nws thiab hu tias “Ho-sa-na”. lawv ua li ntawd vim lees paub tias Tswv Yexus yog tus vajntxwv uas Vajtswv txib los.

Peb txhua tus yuav tau nco ntsoov tias peb tab tom pehawm ib tug Vajtswv dawbhuv, muaj hwjchim, tus uas ua raws li Nws tej lus cog tseg tab tom soj ntsuam peb txhua tus lub neej. Yog li yuav tau pehawm Nws los ntawm lub siab hwm Nws.

Kev cai tsev pheeb suab lossis kevcai sau qoob loo yog lub caij zoo hauv ib lub xyoo tseg rau peb xav txog tej koob hmoov nplua mias uas Vajtswv tau pub thiab mus cuag Nws los ntawm kev pehawm thiab kev qhuas Nws.

Thov caw nrog kuv peb thov Vajtswv ua ke: Ua Vajtswv Koj tsaug vim Koj yog tus yuav ua li Koj tej lus cog tseg, niaj hnub saib ntsoov thiab foom hmoov nplua mias rau kuv nyob rau ib xyoo dhau los. Txog lub sijhawm tseem ceeb no ntawm kevcai sau qoob loo, kuv xav muab lo lus ua tsaug fij rau Koj, paub Koj txiag ntsig thiab qhuas Koj txog txhua yam Koj tau ua rau kuv. Thov kom Koj lub npe tau txhawb nqa nyob rau hauv kuv lub qhov ncauj. Kuv thov hauv Tswv Yexus Khetos lub npe. Amees.

Cov kwv tij txhua tus, txawm yog peb tsis yog neeg Yudais los, kuj tsis yuam kom yuav tau coj raws li txoj kev cai sau qoob loo no, tiamsis ntawm no yog lub caijnyoog zoo tseg rau peb xav txog tej yam uas Vajtswv tau ua pub rau peb nyob rau ib xyoo dhau los. Siv lub sijhawm tseem ceeb no los suav tej koob hmoov Vajtswv pub thiab ua Nws tsaug.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.